ᓄᓇᓕᖕᓂ ᐊᖑᓇᓱᖕᓂᕐᒧᑦ ᒪᓕᒐᖃᖅᑎᑦᓯᓂᕐᒧᑦ ᓇᐅᑦᓯᖅᑐᐃᓂᕐᒧᑦ ᐱᓕᕆᐊᖅ
ᑐᕌᒐᒃᓴᑦ:
- ᐱᐅᓯᒋᐊᖅᑕᐅᖁᓪᓗᒍ ᑐᓴᒐᒃᓴᑦ ᐊᑐᖅᑕᐅᖃᑦᑕᖅᑐᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐊᒻᒪᓗ ᐊᐅᓚᑦᓯᖃᑎᒋᔭᖏᓐᓄᑦ ᓴᓇᑎᓪᓗᒋᑦ, ᐋᖅᑭᒋᐊᕆᑎᓪᓗᒋᑦ, ᐊᒻᒪ/ᐅᕝᕙᓗ ᐲᖅᓯᑎᓪᓗᒋᑦ ᑲᑎᓐᖓᔪᑦ ᐆᒪᔪᖅᑕᐅᔪᓐᓇᖅᑐᑦ ᑭᒡᓕᖏᓐᓂᒃ, ᐃᓄᐃᑦ ᓂᕿᒃᓴᕆᓂᐊᕐᓗᒋᑦ ᐆᒪᔪᕈᓐᓇᖅᑕᖏᑕ ᑭᒡᓕᖏᓐᓂᒃ, ᑰᑕᐅᖏᑦᑐᑦ ᐊᖑᓇᓱᖕᓂᕐᒧᑦ ᒪᓕᒐᖏᓐᓂᒃ, ᐊᒻᒪ ᐃᑲᔪᖅᑕᐅᖁᓪᓗᖏᑦ ᐃᓱᒪᓕᐅᕈᑎᖃᕋᓱᐊᖅᑎᓪᓗᒋᑦ ᐊᖏᖅᑕᐅᒐᓱᐊᖅᑎᓪᓗᒋᑦ ᒥᐊᓂᖅᓯᓂᕐᒧᑦ ᐸᕐᓇᐅᑎᐅᔪᑦ ᐊᒻᒪ ᐊᖏᖅᑕᐅᒐᓱᐊᕐᓗᑎᒃ ᑎᑎᕋᖅᑕᐅᒪᕕᖕᒧᑦ ᐃᓕᔭᐅᔪᒪᔪᑦ ᐆᒪᔪᑦ ᐊᑖᒍᑦ ᐆᒪᔪᑦ ᐃᓄᐃᓴᓗᐊᕆᐊᖏᓐᓂᒃ ᐊᑦᑕᕆᔭᐅᓕᖅᑐᑦ ᐱᖁᔭᕐᔪᐊᖏᑎᒍᑦ;
- ᓄᐊᑦᓯᓗᑎᒃ ᖃᕆᑕᐅᔭᒃᑯᑦ ᑐᓴᒐᒃᓴᓂᒃ, ᐊᒻᒪ ᐃᓄᖕᓂᑦ ᐊᒻᒪᓗ ᓄᓇᓕᖕᓂᑦ ᐊᕙᑎᒧᑦ ᖃᐅᔨᒪᓂᖏᓐᓄᑦ ᐊᑐᖅᑕᐅᓂᐊᕐᓗᑎᒃ ᓇᓗᓇᐃᖅᓯᔾᔪᑕᐅᓗᓂ ᒥᐊᓂᖅᓯᔾᔪᑎᑦ ᐊᒡᒍᖅᑐᖅᓯᒪᓂᖏᓐᓄᑦ, ᓄᓇᐃᓪᓗ ᐃᕐᓂᐅᕐᕕᐅᔪᑦ, ᐊᒻᒪ ᐊᖑᓇᓱᒡᕕᓪᓗᐊᑕᐅᔪᑦ, ᑎᑎᕋᖅᑕᐅᖃᑦᑕᕐᓗᑎᒃ ᐆᒪᔪᑦ ᐅᓄᕐᓂᖏᑦ ᐊᒻᒪ ᓄᒃᑕᕐᓂᖏᓐᓄᑦ ᐊᖅᑯᓵᖅᑕᖅᑕᖏᑦ, ᐋᖅᑭᒡᓱᖅᑕᐅᓂᐊᕐᓗᑎᒃ ᐆᒪᔪᑦ ᖃᐅᔨᓴᖅᑕᐅᓂᒃᓴᖏᓐᓄᑦ ᐊᒻᒪ ᒥᐊᓂᕆᔭᐅᓂᒃᓴᖏᓐᓄᑦ ᓯᕗᓪᓕᐅᔾᔭᐅᓯᒪᔪᓄᑦ, ᐊᒻᒪ ᑐᑭᒧᐊᒃᑎᑦᓯᔾᔪᑕᐅᓂᐊᕐᒪᑕ ᖃᐅᔨᓴᖅᑕᐅᔭᕆᐊᓕᖕᓄᑦ;
- ᐱᓯᒪᒃᓯᕐᓗᑎᒃ ᐱᕙᓪᔾᓕᐊᑎᑕᐅᖃᑦᑕᖅᑐᓂᒃ, ᐅᓪᓗᒥᓯᐅᑎᓂᒃ ᒥᐊᓂᖅᓯᓂᕐᒧᑦ ᐊᐅᓚᑦᓯᔾᔪᑎᓂᒃ ᐱᖃᓯᐅᔾᔨᓗᓂ ᓴᖅᑭᑉᐸᓪᓕᐊᔪᓂᒃ ᐱᔾᔪᑎᓂᒃ, ᐃᓱᒪᒋᔭᐅᔪᓂᒃ ᐊᒻᒪ ᑐᓐᖓᕕᒃᓴᖏᓐᓂᒃ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ; ᐊᒻᒪᓗ
- ᐅᓄᖅᓯᒋᐊᕐᓗᒋᑦ ᐃᑲᔪᕈᑎᐅᔪᑦ ᓄᓇᓕᖕᓄᑦ ᐱᓕᕆᐊᖃᕋᓱᐊᖅᑎᓪᓗᒋᑦ ᑐᕌᒐᒃᓴᓂᒃ ᑖᒃᑯᓂᖓ.
ᓄᓇᓕᖕᓂ ᓇᐅᑦᑎᖅᓱᐊᖃᕐᓂᕐᒧᑦ ᐆᒪᔪᓂᒃ ᐱᓕᕆᔭᐅᔪᖅ ᐃᔨᒋᓂᖅᓴᐅᓂᐊᖅᐳᖅ ᓇᓗᓇᐃᖅᓯᓂᕐᒥᒃ ᐊᒻᒪ ᐃᖅᑲᓇᐃᔭᖅᑎᑖᕐᓂᕐᒥᒃ ᐊᖑᓇᓱᒍᓐᓇᑦᓯᐊᖅᑐᓂᒃ ᐊᒻᒪ ᖃᐅᔨᒪᑦᑎᐊᖅᑐᓂᒃ ᐅᐱᒋᔭᐅᔪᓂᒃ, ᐱᓕᕆᔨᒻᒪᕆᖕᓂᒃ ᐊᒻᒪ ᐊᖑᓇᓱᒃᑎᓪᓚᕆᖕᓂᒃ ᓄᓇᓕᖕᓂ; ᑕᒪᓐᓇ ᐱᖃᓯᐅᔾᔨᑐᐃᓐᓇᕆᐊᓕᒃ ᑭᓇᒃᑯᑐᐃᓐᓇᕐᓂᒃ ᐊᖑᓇᓱᐃᓐᓇᕈᓐᓃᖅᑐᓂᒃ ᐱᓪᓗᒍ ᑮᓇᐅᔭᑭᒃᓴᒧᑦ ᐅᕝᕙᓗ ᐊᓯᖏᓐᓄᑦ ᐊᔪᕈᑎᖃᕐᓂᕐᒧᑦ. ᑕᐃᒪᓕ ᑭᓇᒃᑰᓂᖏᓐᓂᒃ ᓇᓗᓇᐃᖅᓯᑐᐊᖅᐸᑕ, ᑖᒃᑯᐊ ᐊᖑᓇᓱᒃᑎᐅᔪᑦ ᐊᑭᓕᖅᓱᖅᑕᐅᓂᐊᖅᑐᑦ ᓂᐱᓕᐅᖅᑕᐅᓗᑎᒃ ᓄᓇᓕᖕᓂ ᖃᐅᔨᒪᓂᕆᔭᐅᔪᑦ ᐊᕙᑎᒧᑦ ᐃᓕᐅᖅᑲᖅᑕᐅᓗᑎᒃ ᐆᒪᔪᖅᑕᐅᖃᑦᑕᖅᑐᑦ ᐊᒻᒪ ᑕᑯᔭᐅᖃᑦᑕᖅᑐᑦ ᖃᕆᑕᐅᔭᒧᑦ ᐊᖑᓇᓱᒃᑎᓪᓗᒋᑦ (ᓲᕐᓗ, ᐆᒪᔪᑦ ᑕᑯᔭᐅᔪᑦ, ᓯᐊᒻᒪᒃᑎᖅᓯᒪᓂᖏᑦ, ᐊᖅᑯᓵᖅᑕᖅᑕᖏᓪᓗ). ᑖᒃᑯᐊ ᖃᕆᑕᐅᔭᒧᑦ ᑐᓴᒐᒃᓴᑦ ᐃᓕᐅᖅᑲᖅᑕᐅᓂᐊᖅᑐᑦ ᐊᒻᒪ ᓄᐊᑕᐅᓗᑎᒃ ᑲᒪᑦᓯᐊᕈᓐᓇᖅᑐᒧᑦ ᓄᓇᓕᖕᓂᕐᒥᐅᑕᕐᒧᑦ. ᑖᑦᓱᒧᖓ ᐱᓕᕆᓂᐅᔪᖅ ᐃᓚᐅᑎᑦᓯᓂᐊᖅᑐᖅ ᓄᓇᓕᖕᓂᒃ ᓴᓇᕐᕈᑎᖃᖅᑎᑦᓯᓗᑎᒃ ᐊᒻᒪ ᐱᓕᕆᔾᔪᑎᖃᖅᑎᑦᓯᓗᑎᒃ ᓯᕕᑐᔪᒧᑦ ᐃᒻᒥᖕᓂᒃ ᓇᖕᒥᓂᖅ ᐆᒪᔪᓂᒃ ᓇᐅᑦᑎᖅᓱᐊᖃᕈᓐᓇᕐᓂᐊᕐᒪᑕ ᐊᒻᒪ ᐃᓕᐅᖅᑲᖅᑕᐅᓗᑎᒃ ᖃᕆᑕᐅᔭᒧᑦ.
ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐊᑐᓕᖅᑎᑦᓯᔪᒫᖅᐳᑦ ᓄᓇᓕᖕᓂ ᐆᒪᔪᓂᒃ ᓇᐅᑦᑎᖅᓱᐊᖃᕐᓂᕐᒧᑦ ᐱᓕᕆᔭᐅᓯᒪᔪᓂᒃ ᓄᓇᕗᑦ ᐃᓗᐊᓂ. ᒫᓐᓇᐅᔪᖅ, ᑭᓯᐊᓂ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᓕᕆᐊᖃᖅᓯᒪᓕᖅᑐᑦ ᖃᐅᔨᓴᐃᔪᒪᓪᓗᑎᒃ ᓯᕗᓪᓕᖅᐹᒥ ᐆᒃᑐᕋᖅᑕᐅᓗᓂ ᖃᐅᔨᓴᖅᑕᐅᓗᑎᒃ ᐱᐅᓯᐅᖁᔭᐅᔪᑦ ᓄᐊᑦᓯᔾᔪᑕᐅᓂᐊᖅᑐᑦ ᖃᕆᑕᐅᔭᒃᑯᑦ ᐊᒻᒪ ᒥᐊᓂᖅᓯᔾᔪᑕᐅᓂᐊᖅᑐᑦ. ᑐᓴᕋᓱᐊᕐᓗᑎᒃ ᐃᓚᐅᖃᑕᐅᔪᓂᑦ ᐊᒻᒪ ᐊᓯᖏᓐᓂᑦ ᓄᓇᖅᑲᑎᖏᓐᓂᑦ ᖃᐅᔨᓴᐃᕝᕕᐅᔪᓂ ᓄᓇᓕᖕᓂ ᐊᒃᓱᐊᓗᒃ ᐊᑑᑎᖃᕐᓂᐊᖅᑐᖅ ᓴᓇᔭᐅᒃᑲᓐᓂᓕᖅᑎᓪᓗᒋᑦ ᐋᖅᑭᒋᐊᖅᑕᐅᓗᑎᒡᓗ ᐱᒋᐊᕐᓂᖓᓂ ᐱᐅᓯᕆᔭᐅᔪᓄᑦ ᒪᓕᒐᓕᐊᕆᔭᐅᓚᐅᖅᑐᑦ ᒪᓕᒃᓯᒪᖁᓪᓗᒋᑦ ᓇᐅᑦᑎᖅᓱᐃᓂᕐᒧᑦ ᐱᓕᕆᔾᔪᑕᐅᓗᓂ ᓄᓇᕗᒥ, ᑕᐃᒪᓐᓇ ᐊᑐᓕᖅᑎᑕᐅᔪᓐᓇᕐᓂᐊᕐᒪᑦ ᐊᖓᔪᖅᑲᐅᑎᓄᑦ ᐱᓕᕆᐊᓄᑦ ᐊᒻᒪ ᓯᕗᒧᐊᑦᑎᑦᓯᔪᓐᓇᕐᓂᐊᕐᒪᑕ ᐃᓱᒫᓗᒍᑕᐅᔪᓂᒃ ᓄᓇᓕᖕᓂᑦ ᑭᐅᔭᓗᑎᒡᓗ. ᖃᐅᔨᓴᕈᑕᐅᔪᖅ ᐱᒋᐊᕐᓂᐊᖅᑐᒋᔭᐅᔪᖅ ᐊᐅᔭᖓᓂ 2011, ᐊᒻᒪ ᑲᔪᓯᓂᐊᖅᑐᖅ ᐅᑭᐊᒃᓵᖓᓄᑦ 2012.
ᐃᑲᔪᕈᑎᐅᓂᐊᖅᑐᑦ ᓄᓇᕗᑦ ᓄᓇᓕᖁᑎᖏᓐᓄᑦ
- ᑎᑎᕋᖅᑕᐅᕙᓪᓕᐊᓗᑎᒃ ᐆᒪᔪᕐᕕᐅᔪᑦ ᐊᒻᒪᓗ ᑕᑯᕕᐅᖃᑦᑕᖅᑐᑦ ᑕᐃᒪᓐᓇ ᓇᓗᓇᐃᖅᓯᔾᔪᑕᐅᔪᓐᓇᕐᒪᑦ ᐊᖑᓇᓱᒡᕕᐅᕙᒃᑐᓂᒃ ᐊᒻᒪ ᐱᒻᒪᕆᐅᔪᓂᒃ ᐆᒪᔪᑦ ᓇᔪᒐᖏᓐᓂᒃ;
- ᐱᕕᖃᖅᑎᑦᓯᓗᓂ ᓄᐊᑦᓯᔾᔪᓯᕐᒥᒃ ᓄᓇᓕᖕᓂᕐᒥᐅᑦ ᖃᐅᔨᒪᔭᖏᓐᓂᒃ ᐊᕙᑎᒧᑦ ᐊᒻᒪ ᐆᒪᔪᑦ ᓄᒃᑕᕐᓂᖏᓐᓄᑦ, ᐅᓄᕐᓂᖏᓐᓄᑦ, ᓄᓇᒥᒃ ᐊᑐᕐᓂᖏᓐᓄᑦ, ᐊᒻᒪ ᐊᓯᖏᓐᓄᑦ ᐊᕙᑎᒧᑦ ᐊᒃᑐᐊᓂᖃᖅᑐᓂᒃ ᐱᖃᓯᐅᔾᔨᓯᒪᓗᑎᒃ;
- ᐱᐅᓯᒋᐊᖅᑎᑦᓯᓂᐊᖅᑐᖅ ᑐᑭᓯᒪᓂᕆᔭᐅᔪᓂᒃ ᐱᐅᖅᓱᐊᕐᓂᕐᒧᑦ ᐃᓱᒫᓗᒍᑕᐅᔪᓂᒃ ᓄᓴᓕᖕᓂ, ᑖᒃᑯᐊᓗ ᓄᓇᓕᐅᔪᑦ ᐃᓚᐅᑎᑕᐅᓂᖅᓴᐅᓂᐊᖅᑐᑦ ᒥᐊᓂᖅᓯᓂᕐᒧᑦ ᐱᓕᕆᐊᖃᖅᑎᓪᓗᒋᑦ ᐊᖑᓇᓱᒡᕕᖏᓐᓂ ᐊᔾᔨᒋᖏᑦᑐᓂ;
- ᓴᖅᑭᑦᓯᓂᐊᖅᑐᖅ ᖃᐅᔨᒪᓂᕆᔭᐅᔪᓂᒃ ᐆᒪᔪᑦ ᐱᒻᒪᕆᐅᓂᖏᓐᓂᒃ ᒥᐊᓂᖅᓯᔾᔪᑎᖃᓗᐊᖏᑦᑐᑦ ᐅᓪᓗᒥ (ᓲᕐᓗ ᓇᑦᑏᑦ);
- ᓇᓗᓇᐃᖅᓯᔪᓐᓇᕐᓂᐊᖅᐸᓪᓚᐃᔪᑦ ᖃᐅᔨᓴᐃᕝᕕᐅᒃᑲᓐᓂᕆᐊᖅᑐᓂᒃ ᐊᒻᒪ ᐱᖃᓯᐅᔾᔨᓗᑎᒃ ᓄᓇᓕᖕᓂᑦ ᑐᓴᕋᓱᐊᕐᓗᑎᒃ ᑖᒃᑯᐊ ᓯᕗᓪᓕᐅᔾᔭᐅᓯᒪᔪᑦ ᐱᔾᔪᑎᑦ ᑲᒪᒋᔭᐅᑎᓪᓗᒋᑦ;
- ᓯᕕᑐᔪᒧᑦ ᓇᐅᑦᑎᖅᓱᐊᖃᕈᓐᓇᖅᓯᓂᐊᖅᑐᑦ ᐱᒻᒪᕆᐅᔪᒥᒃ ᓯᕗᒧᐊᑦᑎᐊᕈᑕᐅᓂᐊᕐᓗᑎᒃ ᒥᐊᓂᖅᓯᔾᔪᑕᐅᔪᓄᑦ ᐆᒪᔪᑦ ᐅᓄᕐᓂᕆᔭᖏᓐᓄᑦ;
- ᖃᕆᑕᐅᔭᒃᑯᑦ ᑐᓴᒐᒃᓴᓂᒃ ᓄᐊᑕᐅᓯᒪᔪᑦ ᐊᑐᖅᑕᐅᔪᓐᓇᖅᓯᓗᑎᒃ ᑭᐅᔾᔪᑕᐅᓗᑎᒃ ᐱᔾᔪᑕᐅᔪᓄᑦ ᐱᓪᓗᒋᑦ ᐊᖑᓇᓱᖕᓂᕐᒧᑦ ᐱᔪᓐᓇᐅᑎᓄᑦ, ᓄᓇᒥᒃ ᐊᑐᕐᓂᕐᒧᑦ, ᐊᒻᒪ ᐱᕙᓪᓕᐊᑎᑦᓯᕐᓂᒧᑦ; ᐊᒻᒪᓗ
- ᐃᑲᔪᕈᓐᓇᕐᓂᐊᖅᑐᑦ ᐊᑭᓕᖅᓯᔾᔪᑎᒃᓴᓂᒃ ᑭᖑᕝᕕᖅᓯᔾᔪᑕᐅᓗᑎᒃ ᔭᒐᑕᐅᔪᓄᑦ (ᓲᕐᓗ ᓇᓗᓇᐃᒃᑯᑕᐅᔪᓐᓇᖅᓯᓂᐊᖅᑐᑦ ᐊᖑᓇᓱᖏᓐᓂᕐᒧᑦ ᑮᓇᐅᔭᓕᐅᕈᑎᒃᓴᖏᓐᓂᒃ ᐊᓯᐅᔨᔭᐅᔪᓂᒃ ᐱᓪᓗᒋᑦ ᐅᒥᐊᕐᔪᐊᑦ ᐊᖅᑯᑎᒋᔪᒪᔭᖏᓂᓄ, ᐅᔭᕋᕐᓂᐊᕐᓂᕐᒧᓪᓗ ᐱᕙᓪᓕᐊᑎᑦᓯᓂᕐᒧᑦ ᐱᓕᕆᔭᐅᔪᓂᑦ)