ᑖᒃᑯᐊ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᐅᔪᑦ  (NLCA) ᐃᓕᓯᓯᒪᕗᑦ ᖃᐅᔨᓴᐃᓂᖅ ᐆᒻᒪᑎᒋᓪᓗᓂᐅᒃ ᐊᑑᑎᖃᑦᓯᐊᖅᑐᒃᑯᑦ ᐆᒪᔪᓂᒃ ᒥᐊᓂᖅᓯᓂᕐᒧᑦ ᐊᐅᓚᑦᓯᔾᔪᑎᖃᕐᓂᐅᑉ.  ᖃᐅᔨᓴᐃᓂᖃᕆᐊᖃᖅᑐᑦ ᑐᓂᓯᔪᓐᓇᕐᓂᐊᕐᒪᑕ ᑐᓴᒐᒃᓴᓂᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐊᒻᒪ ᑕᐱᕆᓪᓗᒋᑦ ᐊᐅᓚᑦᓯᔨᐅᖃᑎᒋᔭᖏᓐᓄᑦ ᓯᕗᒧᐊᒃᑎᑦᓯᖁᓪᓗᒋᑦ ᐱᐅᓂᖅᐹᖑᔪᓐᓇᖅᑐᓂᒃ ᑐᓴᒐᒃᓴᓂᒃ ᐊᑐᐃᓐᓇᕈᖅᑕᐅᓯᒪᔪᓂᒃ ᐊᑐᕐᓗᑎᒃ ᐃᓱᒪᓕᐅᖃᑦᑕᖁᓪᓗᒋᑦ ᐱᓪᓗᒋᑦ ᓄᓇᕗᒥ ᐆᒪᔪᖏᑦ.

ᓈᓴᐅᑖ 5.2.37  ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ (NLCA) ᐅᖃᖅᓯᒪᕗᑦ ᐃᒪᓐᓇ "ᑭᓐᖒᒪᒃᓯᖅᐳᑦ ᐊᑑᑎᖃᑦᓯᐊᖅᑐᒥᒃ ᐊᐅᓚᓂᕐᒥᒃ ᐆᒪᔪᐃᑦ ᒥᐊᓂᕆᔭᐅᓂᖏᓐᓄᑦ, ᐊᒻᒪ ᐊᑑᑎᖃᕐᓗᓂ, ᐊᐅᓚᓂᐅᕆᔭᖓ ᒥᐊᓂᖅᓯᓂᐅᑉ ᐊᑑᑎᖃᑦᓯᐊᖅᑐᒃᑯᑦ, ᑐᑭᒧᐊᒃᑎᑕᐅᓯᒪᔪᒃᑯᑦ ᖃᐅᔨᓴᐃᓂᖃᖃᑦᑕᖁᓪᓗᒋᑦ.".

ᖃᐅᔨᓴᐃᓂᖅᑕᖃᕿᐊᖃᖅᑐᖅ ᓯᕗᒧᐊᒃᑎᑦᓯᖁᓪᓗᒋᑦ ᐆᒪᔪᑦ ᐆᒪᔪᕋᓱᐊᖅᑕᐅᔪᑦ ᖃᐅᔨᒪᔭᐅᑦᓯᐊᕐᓗᑎᒃ ᐊᒻᒪ ᓄᖑᑕᐅᕙᓪᓕᐊᖏᓪᓗᑎᒃ ᓄᓇᕗᒥᐅᑕᐅᔪᑦ ᐊᖑᓇᓱᐃᓐᓇᕈᓐᓇᕐᓂᐊᕐᒪᑕ ᐊᒻᒪ ᐃᖃᓪᓕᐊᖏᓐᓇᕈᓐᓇᕐᓂᐊᕐᒪᑕ ᐊᑐᕐᓗᒋᑦ ᐃᓕᖅᑯᓯᖏᑦ.  ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓯᕗᒃᑲᖅᑕᖅᑎᐅᓗᑎᒃ ᐱᓕᕆᔭᕆᐊᖃᖅᐳᑦ ᑕᒪᑐᒧᖓ ᐊᒻᒪ ᐊᖏᖅᓯᒪᑦᓯᐊᖅᑐᑦ ᐆᒪᔪᐃᑦ ᖃᐅᔨᓴᖅᑕᐅᑎᓪᓗᒋᑦ ᑲᒪᑦᓯᐊᖁᓪᓗᒋᑦ ᑭᐅᓯᒪᑦᓯᐊᖁᓪᓗᖏᓪᓗ ᑭᓐᖒᒪᔭᐅᔪᓄᑦ ᐊᒻᒪ ᐃᓱᒫᓗᒍᑎᒋᔭᖏᓐᓄᑦ ᐃᓄᖏᓐᓄᑦ ᓄᓇᕗᒥᐅᑦ.

ᑕᐃᒪᓐᓇ ᓯᕗᐊᒍᓐᓇᖁᓪᓗᒋᑦ ᑐᕌᒐᒃᓴᖏᓐᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᓴᓂᕐᕙᐃᓯᒪᔪᑦ $11 ᒥᓕᐊᓐ ᑖᓚᓂᒃ ᐸᐸᑕᐅᓪᓗᑎᒃ ᑮᓇᐅᔭᑦ ᐸᐸᑕᐅᓕᓚᐅᖅᑐᑦ ᐊᑎᓕᐅᕈᑕᐅᑎᓪᓗᒍ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ ᑮᓇᐅᔭᖃᖅᑎᑦᓯᖃᑦᑕᕐᓂᐊᕐᒪᑕ ᐆᒪᔪᑦ ᖃᐅᔨᓴᖅᑕᐅᓂᖏᓐᓄᑦ.  ᑖᒃᑯᐊ ᓄᓇᕗᒥ ᐆᒪᔪᓄᑦ ᖃᐅᔨᓴᕈᑎᒃᓴᑦ ᐸᐸᑕᐅᔪᑦ ᑮᓇᐅᔭᑦ ᖃᐅᔨᓴᐃᓪᓗᑎᒃ ᐱᓕᕆᔾᔪᑕᐅᖃᑦᑕᖅᐳᑦ ᒐᕙᒪᒃᑯᑦ ᐱᓕᕆᕝᕕᖁᑎᖏᓐᓄᑦ.  ᐃᓚᒋᓪᓗᒍ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑮᓇᐅᔭᖃᖅᑎᑦᓯᖃᑦᑕᕐᒥᔪᑦ ᐱᓕᕆᐊᖑᔪᓂᒃ ᒐᕙᒪᐅᖏᑦᑐᑦ ᑎᒥᖁᑎᖏᓐᓄᑦ (ᓲᕐᓗ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᑎᒥᖏᓐᓄᑦ) ᐊᖅᑯᑎᖃᕐᖢᑎᒃ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᖃᐅᔨᓴᕈᑎᒃᓴᓄᑦ ᑮᓇᐅᔭᖁᑎᖏᓐᓂᑦ.

ᐅᑭᐅᖅᑕᖅᑐᕐᒥ ᓄᑖᒥ − ᐊᐅᓚᑦᓯᖃᑎᒌᖕᓂᐅᔪᒧᑦ ᑎᒥᐅᔪᑦ ᓲᕐᓗ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᓱᒪᓕᐅᕈᑎᖃᖃᑦᑕᖅᐳᑦ ᐆᒪᔪᓄᑦ ᒥᐊᓂᖅᓯᔾᔪᑎᐅᓂᐊᖅᑐᓂᒃ − ᐆᒪᔪᓄᑦ ᐊᒃᑐᐊᓂᖃᖅᑐᑦ ᖃᐅᔨᓴᐃᓂᐅᔪᑦ  ᐱᓕᕆᔭᐅᑐᐃᓐᓇᖅᐸᒍᓐᓃᕐᒪᑕ ᖃᓪᓗᓈᑦ ᓄᓇᖓᓐᓂᓐᖔᖅᓯᒪᔪᓄᑦ ᖃᐅᔨᓴᖅᑎᓄᑦ ᐱᓕᕆᖃᑦᑕᓕᖅᑐᓪᓕ ᑐᓴᕋᓱᐊᓚᐅᕐᖢᑎᒃ ᐃᓄᖕᓂᑦ.  ᐅᓪᓗᒥᐅᓕᖅᑐᖅ, ᐃᓄᐃᑦ ᐃᑲᔪᖃᑦᑕᓕᖅᑐᑦ ᐃᓱᒪᓕᐅᕆᓇᓱᐊᖅᑎᓪᓗᒋᑦ ᖃᐅᔨᓴᖅᑕᐅᔭᕆᐊᓕᖕᓂᒃ, ᖃᓄᕐᓕ ᖃᐅᔨᓴᐃᔭᕆᐊᖃᕐᒪᖔᑕ, ᐊᒻᒪ ᐱᓕᕆᖃᑕᐅᖃᑦᑕᓕᖅᑐᑦ ᖃᐅᔨᓴᐃᑎᓪᓗᒋᑦ.  ᐅᓐᓄᑐᑦ ᐃᓄᐃᑦ ᐆᒪᔪᓂᒃ ᖃᐅᔨᒪᓂᖃᒻᒪᕆᒃᑐᑦ, ᐊᒻᒪᖃ ᐅᔨᒪᓂᕆᔭᖏᑦ ᐃᓚᒋᔭᐅᔭᕆᐊᖃᕐᒪᑕ ᖃᐅᔨᓴᓂᐅᑉ ᐃᖏᕐᕋᓂᖓᑕ ᐃᓗᐊᓂ.