ᑕᐃᑦᓱᒪᓂ ᐊᑎᓕᐅᖅᑕᐅᑎᓪᓗᒍ ᓄᓇᕗᒥ ᓄᓇᑖᕈᑎᑦ ᐊᑎᓕᐅᖅᑕᐅᑎᓪᓗᒋᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᑕᐅᓯᐊᕐᓗᑎᒃ ᐊᑭᓕᖅᓯᓚᐅᖅᓯᒪᕗᑦ $11 ᒥᓕᐊᓐᓂᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ.  ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᓪᓗᑎᒃ ᓴᖅᑭᑦᑎᔾᔪᑕᐅᓚᐅᖅᑐᑦ ᓄᓇᕗᒥ ᐆᒪᔪᓄᑦ ᖃᐅᔨᓴᕈᑎᒃᓴᓄᑦ ᐸᐸᑦᓯᔨᓂᒃ (NWRT), ᑖᒃᑯᐊ ᓴᖅᑭᑕᐅᓚᐅᖅᓯᒪᔪᑦ ᑮᓇᐅᔭᖃᖅᑎᑦᓯᖃᑦᑕᕐᓂᐊᕐᓗᑎᒃ ᐆᒪᔪᓂᒃ ᖃᐅᔨᓴᐃᓂᖃᖅᑎᓪᓗᒋᑦ ᐅᑭᐅᖅᑕᖅᑐᕐᒥᐅᑦ ᒐᕙᒪᖏᑦ ᐊᒻᒪ ᑲᓇᑕᐅᑉ ᒐᕙᒪᒃᑯᖏᓐᓂ ᐱᓕᕆᕝᕕᐅᔪᑦ. ᑖᒃᑯᐊ ᓄᓇᕗᒥ ᐆᒪᔪᓄᑦ ᖃᐅᔨᓴᕈᑎᒃᓴᑦ ᐸᐸᑕᐅᔪᓄᑦ ᑲᑎᒪᔨᖏᑦ ᑐᓂᓯᖃᑦᑕᖅᑐᑦ ᐊᕐᕌᒍᑕᒫᓐ ᑮᓇᐅᔭᓂᒃ ᑭᐅᔾᔪᑕᐅᓂᐊᕐᒪᑕ ᐆᒪᔪᓂᒃ ᖃᐅᔨᓴᖅᑕᐅᖅᑳᖁᔭᐅᓯᒪᔪᓄᑦ ᓇᓗᓇᐃᖅᑕᐅᓯᒪᔪᓄᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐊᖅᑯᑎᖃᕐᖢᑎᒃ ᓇᓗᓇᐃᖅᑎᕆᓂᖃᓚᐅᖅᑎᓪᓗᒋᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐊᒻᒪ ᐊᒡᒍᖅᑐᖅᓯᒪᓂᕐᒥ ᐆᒪᔪᓕᕆᓂᕐᒧᑦ ᑎᒥᖁᑎᖏᓐᓂᑦ ᐊᒻᒪ ᖃᐅᔨᓴᖅᑕᐅᖅᑳᖁᔭᐅᔪᓄᑦ ᓯᕗᓪᓕᐅᔾᔭᐅᓯᒪᔪᓄᑦ ᑲᑎᒪᔾᔪᑎᖃᖃᑦᑕᖅᑐᑦ ᐱᖓᓱᓂ ᐊᒡᒍᖅᑐᖅᓯᒪᓂᖏᓐᓂ ᓄᓇᕗᒥ.

ᐊᕐᕌᒍᑕᒫᓐ ᑎᓯᐱᕆᐅᓕᕌᖓᑦ, ᐸᐸᑦᓯᔨᑦ ᑲᑎᒪᔨᖏᑦ ᓄᓇᕗᒥ ᐆᒪᔪᓄᑦ ᖃᐅᔨᓴᕈᑎᒃᓴᖏᓐᑦᓄ ᐃᓱᒪᓕᐅᖃᑦᑕᖅᑐᑦ ᖃᑦᓯᓂᒃ ᑮᓇᐅᔭᓂᒃ ᐊᑐᐃᓐᓇᐅᑎᑦᓯᓂᐊᕐᒪᖔᑕ ᑐᓐᖓᕕᒋᓗᒋᑦ ᐱᕈᕐᓂᕆᓚᐅᖅᑕᖏᑦ ᐸᐸᑕᐅᔪᑦ.  ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑲᒪᔨᐅᕗᑦ ᐊᒻᒪ ᒥᐊᓂᖅᓯᔨᐅᓪᓗᑎᒃ ᑮᓇᐅᔭᓂᒃ ᐸᐸᑕᐅᔪᓂᒃ ᓯᕗᒧᐊᒃᑎᑦᓯᖁᓪᓗᒋᑦ ᑮᓇᐅᔭᑦ ᐱᕈᖅᐸᓪᓕᐊᖏᓐᓇᖁᓪᓗᒋᑦ ᐱᕈᖅᓴᐃᕕᖕᒥ ᐊᒻᒪ ᑕᐃᒪᐃᒻᒪᑦ ᐊᑐᐃᓐᓇᐅᖏᓐᓇᖃᑦᑕᖁᓪᓗᒋᑦ ᐆᒪᔪᐃᑦ ᖃᐅᔨᓴᖅᑕᐅᔾᔪᑎᒃᓴᖏᑦ ᓯᕕᑐᔪᒧᑦ.

ᖁᔭᓇᐳᖅ ᑮᓇᐅᔭᑦ ᒥᐊᓂᕆᔭᐅᑦᓯᐊᕐᓂᖏᓐᓄᑦ, ᑮᓇᐅᔭᖁᑎᒋᔭᐅᔪᑦ ᒫᓐᓇ ᐱᕈᖅᑎᑕᐅᔪᑦ $20 ᒥᓕᐊᓐᖑᓕᖅᑐᑦ, ᐊᒻᒪ ᐊᕐᕌᓂ (2010/2011) ᑐᓂᓯᓚᐅᖅᑐᑦ ᐅᖓᑖᓂ $650,000  ᖃᐅᔨᓴᖅᑎᓄᑦ ᐱᓕᕆᕝᕕᖓᓐᓄ ᐃᒪᕐᒥᐅᑕᓕᕆᔨᒃᑯᑦ, ᑲᓇᑕᒥ ᐆᒪᔪᓕᕆᓂᕐᒧᑦ ᐱᔨᑦᓯᖅᑎᒃᑯᑦ (ᐊᕙᑎᓕᕆᔨᒃᑯᑦ ᑲᓇᑕᒥ), ᒥᓐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ, ᐊᒻᒪ ᓄᓇᕗᑦ ᒐᕙᒪᒃᑯᖏᓐᓂ ᐱᓕᕆᕝᕕᖓᓐᓄᑦ ᐊᕙᑎᓕᕆᔨᒃᑯᑦ, ᑕᐃᒪᓐᖓᑦ ᓴᖅᑭᑕᐅᓚᐅᖅᓯᒪᒐᒥ 1994-ᖑᑎᓪᓗᒍ ᑐᓂᓯᐅᖅᑲᐃᓯᒪᓕᖅᐳᖅ.  ᑮᓇᐅᔭᑦ ᐱᕈᕐᓂᖏᑦ ᓄᓇᕗᒥ ᐆᒪᔪᓄᑦ ᖃᐅᔨᓴᕈᑎᒃᓴᑦ ᐸᐸᑕᐅᔪᑦ ᐊᕐᕌᒍᑕᒫᓐ ᓄᑖᕈᕆᐊᖅᑕᐅᖃᑦᑕᖅᐳᑦ ᐃᓗᐊᓂ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐊᕐᕌᒍᑕᒫᖅᓯᐅᑎᓄᑦ ᐅᓂᒃᑳᓕᐊᖏᓐᓂ.

ᑐᓴᕆᐊᒃᑲᓐᓂᕈᒪᒍᕕᑦ, ᐅᕝᕙᓗ ᑐᒃᓯᕋᐅᑎᓕᐅᕈᒪᒍᕕᑦ ᑮᓇᐅᔭᖅᑐᕈᑎᒃᓴᓂᒃ ᑕᑯᒋᐊᕈᓐᓇᖅᐸᑎᑦ ᐅᑯᐊ ᓄᓇᕗᒥ ᐆᒪᔪᓂᒃ ᖃᐅᔨᓴᕈᑎᒃᓴᓄᑦ ᐸᐸᑦᓯᔨᑦ ᑮᓇᐅᔭᖃᖅᑎᑦᓯᓂᕐᒧᑦ ᒪᓕᒐᖏᓐᓂᒃ.

ᓯᓚᑖᓂᑦ ᐱᑐᒍᒪᒍᕕᑦ: http://www.dfo-mpo.gc.ca/index-eng.htm, http://www.ec.gc.ca/default.asp?lang=en, http://www.pc.gc.ca/, http://env.gov.nu.ca/.