ᐃᓘᓐᓇᖏᑦ ᑐᑭᓯᑎᑦᓯᒋᐊᕈᑎᑦ ᑎᑎᖅᑲᑦ ᑐᓂᔭᐅᔭᕆᐊᖃᖅᑐᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᖃᓪᓗᓈᑎᑑᖓᔭᕆᐊᖃᖅᐳᑦ ᐊᒻᒪ ᐃᓄᒃᑎᑑᖓᓗᑎᒃ ᐱᔭᐅᓯᒪᓗᑎᒃ ᑎᑭᓚᐅᖏᓐᓂᖓᓂ ᐅᓪᓗᖅ ᐃᓱᓕᕝᕕᒃᓴᖓ ᐱᔭᐅᓯᒪᔭᕆᐊᖃᕐᓂᖏᓐᓄᑦ.

ᑐᑭᓯᑎᑦᓯᒋᐊᕈᑎᑦ ᑎᑎᖅᑲᑦ ᑐᓂᔭᐅᔪᓐᓇᖅᑐᑦ ᖃᕆᑕᐅᔭᒃᑯᑦ, ᓱᑲᑦᑐᒃᑯᑦ, ᐅᕝᕙᓗ ᑎᑎᖅᑲᕐᓂᐊᕐᕕᒃᑯᑦ.  ᓇᓗᓇᐃᖅᑕᐅᓯᒪᑦᓯᐊᕐᓗᑎᒃ ᐊᒃᑐᐊᓂᖃᕐᓂᖏᓐᓂᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᑲᑎᒪᑎᓪᓗᒋᑦ ᐱᓕᕆᐊᒃᓴᖏᓐᓄᑦ, ᓇᓗᓇᐃᖅᓯᓯᒪᓗᑎᒃ ᓇᓕᐊᖕᓂᒃ ᑲᑎᒪᓂᕐᒧᑦ ᓈᓴᐅᑎᖓᓂᒃ.  ᑐᓂᔭᐅᔪᑦ ᐃᖅᑲᓇᐃᖅᒪᑦᓯᐊᕆᐊᖃᖅᑐᑦ ᐊᒻᒪ ᐅᖃᓕᒫᒐᕐᓂᕐᓗᑎᒃ ᐊᔾᔨᖏᑦ ᑎᑎᕋᖅᓯᒪᔪᑦ ᑐᑭᓯᑎᑦᓯᒋᐊᕈᑎᑦ ᓱᑲᑦᑐᒃᑰᖅᑐᑦ ᐅᕝᕙᓗ ᖃᕆᑕᐅᔭᒃᑰᖅᑐᑦ ᐊᐅᓪᓚᖅᑎᑕᐅᓂᖏᓐᓂᒃ ᓇᓗᓇᐃᖅᓯᓗᑎᒃ ᐅᖄᓚᓗᑎᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐃᓱᓕᓚᐅᖏᓐᓂᖓᓂ ᐅᓪᓗᖅ ᐃᓱᓕᕝᕕᒃᓴᓕᐊᖑᓯᒪᔪᖅ.  ᑎᑎᕋᖅᑕᐅᓯᒪᔪᑦ ᐃᓱᒪᒋᔭᐅᓕᕋᔭᖅᐳᑦ ᐱᓯᒪᔭᐅᓂᖏᓐᓂᒃ ᑐᖅᑯᐃᕕᖕᒧᑦ ᐅᓪᓗᕐᒥ ᑕᐃᑦᓱᒪᓂ ᐱᔭᐅᑎᓪᓗᒋᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ.  ᐊᑏ ᖃᐅᔨᒪᓂᐊᖅᐳᓯ ᐃᓄᒃᑎᑑᖓᓕᖅᑕᐅᓯᒪᔪᑦ ᑐᑭᓯᑎᑦᓯᒋᐊᕈᑎᑦ ᑎᑎᖅᑲᑦ ᐱᔭᐅᓯᒪᔪᑦ ᑭᖑᕐᖓᒍᑦ ᐅᓪᓗᖅ ᐃᓱᓕᕝᕕᒃᓴᖓᑕ ᐃᕐᖐᓐᓇᖅ ᐃᓕᔭᐅᔭᒐᔭᖅᐳᑦ ᑲᑎᒪᔾᔪᑎᒃᓴᖏᓐᓄᑦ ᑭᖑᓪᓕᕐᒥ ᑲᑎᒪᔨᑦ ᑲᑎᒪᕕᒃᓴᖓᒍᑦ ᑲᑎᒪᓂᖃᓕᖅᐸᑕ.

ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐲᖅᓯᓯᒪᓕᖅᐳᑦ ᐊᑐᖃᑦᑕᕐᓂᕐᒥᒃ ᐸᐃᑉᐹᓂᒃ ᐃᔾᔪᔪᓂᒃ ᐅᖃᓕᒫᒐᓕᐊᕆᓯᒪᔪᓂᒃ ᑕᐃᒪᐃᑦᑐᓂᒃ ᐊᑐᖅᑕᐃᓕᒪᓂᖅᓴᐅᓕᖅᐳᑦ ᑲᑎᒪᑎᓪᓗᒋᑦ.  ᑲᑎᒪᔾᔪᑎᒃᓴᑦ ᑎᑎᖅᑲᑦ ᐊᐅᓪᓚᖅᑎᑕᐅᖃᑦᑕᖅᐳᑦ ᐊᐅᓚᑦᓯᔨᐅᖃᑕᐅᔪᓄᑦ ᓯᕗᕐᖓᒍᑦ ᑲᑎᒪᓂᒃᓴᐅᑉ ᐊᒻᒪ ᐱᖃᓯᐅᔾᔨᓯᒪᓗᑎᒃ ᐊᑑᑎᖃᖅᑐᓂᒃ ᑎᑎᕋᖅᓯᒪᔪᓂᒃ, ᐱᖃᓯᐅᑎᓪᓗᒍ ᓇᓗᓇᐃᖅᑎᖅᓯᒪᔪᖅ ᑲᑎᒪᔾᔪᑎᒃᓴᖅ ᐊᒻᒪ ᖃᖓᒃᑯᑦ ᑲᑎᒪᕕᒃᓴᖃᕐᒪᖔᑕ.

ᑕᐃᒃᑯᐊ ᖃᕆᑕᐅᔭᒃᑯᑦ ᑕᑯᒃᓴᐅᑎᑦᓯᔾᔪᑎᓂᒃ ᐊᑐᕈᒪᔪᑦ ᐅᓂᒃᑳᓕᐅᖅᑎᓪᓗᒋᑦ, ᐋᖅᑭᒡᓯᖃᑦᑕᕐᓂᐊᖅᐳᓯ ᐆᒃᑐᕋᕐᓗᒍ ᖃᕆᑕᐅᔭᒃᑯᑦ ᑕᑯᒃᓴᐅᑎᑦᓯᔾᔪᑎ ᐊᔪᖏᒃᑲᓗᐊᕐᒪᖔᑦ ᓯᕗᕐᖓᒍᑦ ᐅᓂᒃᑳᕐᕕᒃᓴᕕᑦ ᐅᐊᔭᒨᖅᑐᓄᑦ ᐊᑲᐅᓐᖏᓕᐅᕈᑎᖃᖁᓇᒍ.

ᖃᐅᔨᒪᓂᐊᖅᐳᓯ ᐃᓘᓐᓇᖏᑦ ᑎᑎᖅᑲᑦ ᑐᓂᔭᐅᔪᑦ ᑲᑎᒪᔨᓄᑦ ᖃᓪᓗᓈᑎᑑᖓᔭᕆᐊᖃᕐᓂᖏᑦ ᐊᒻᒪᓗ ᐃᓄᒃᑎᑑᖓᔭᕆᐊᖃᕐᓂᖏᓐᓄᑦ. ᑕᒪᑐᒧᖓ ᒪᓕᒐᕆᔭᐅᔪᖅ ᐊᑐᖅᑕᐅᓪᓚᕆᖕᓂᐊᖅᐳᖅ.

ᖃᐅᔨᒃᑲᐃᓂᖅ ᐊᒻᒪ ᑐᓂᓯᒋᐊᖃᕐᓂᕐᒧᑦ ᐱᕕᒃᓴᐃᑦ:

ᐃᓘᓐᓇᑲᓴᖏᑎᒍᑦ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᑕᖃᖅᑎᑦᓯᕙᒃᑐᑦ ᐅᓪᓗᓂ 60 ᖃᐅᔨᒃᑲᐃᓪᓗᑎᒃ ᐅᓪᓗᖏᓐᓂᒃ, ᖃᐅᔨᓴᐅᑦ ᓇᒧᓐᖓᕐᓂᖓᓂᒃ, ᓇᒥ ᓈᓚᒃᑎᑦᓯᓂᖃᕐᓂᐊᕐᒪᖔᑕ ᐊᒻᒪ ᐱᑕᖃᕆᐊᖃᖅᑎᑦᓯᓪᓗᑎᒃ ᑕᒪᒃᑯᐊ ᑎᑎᕋᖅᓯᒪᔪᖅ ᑐᓂᔭᐅᔪᒃᓴᑦ ᑐᓂᔭᐅᓯᒪᓗᑎᒃ ᐅᓪᓗᐃᑦ (21) ᑐᖔᓂ ᓈᓚᒃᑎᑦᓯᓂᐅᓂᐊᖅᑐᖅ.  ᑭᓯᐊᓂ ᖃᓄᐃᓐᓂᖏᓐᓄᑦ ᐊᑐᖅᑐᑦ ᓇᓪᓕᐊᑐᐃᓐᓇᕐᒧᑦ ᓈᓚᒃᑎᑦᓯᓂᐅᔪᓄᑦ, ᑲᑎᒪᔩᑦ ᐅᓄᖅᓯᒋᐊᕆᐊᖃᑐᐃᓐᓇᕆᐊᓖᑦ, ᓇᐃᓪᓕᒋᐊᕐᓗᒍᓘᓐᓃᑦ, ᒪᓕᒡᓗᒋᑦ ᐊᑐᕆᐊᓖᑦ ᐃᓕᖅᑯᓯᐅᒋᐊᖃᖅᑐᓂ ᐃᓚᐅᓐᓈᖅᑎᑦᓯᖏᑦᑐᓂᒃ.  ᐊᒻᒪ ᐱᔾᔪᑕᐅᔪᖅ ᓇᓪᓕᐊᑐᐃᓐᓇᕐᒧᑦ ᑐᓂᔭᐅᓯᒪᔪᓄᑦ ᑭᖑᕙᖅᑐᑎᒃ ᐅᓂᔭᐅᓯᒪᔪᑦ.

ᑭᐅᔾᔪᑏᑦ ᑐᓂᔭᐅᔪᓄᑦ:

ᑎᑎᕋᖅᓯᒪᔪᑦ ᑭᐅᔾᔪᑏᑦ ᑐᓂᔭᐅᔪᓄᑦ ᖃᓄᓪᓚᕆᒃ ᐋᖅᑭᒃᓯᒪᓂᒃᓴᖃᓐᖏᑦᑐᑦ ᑐᓂᔭᐅᔪᑦ ᑖᒃᑯᓄᖓ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᑭᓯᐊᓂ ᐃᓚᐅᑎᑦᓯᔪᒃᓴᐅᔪᑦ ᑭᐅᔾᔪᑎᓂᒃ ᑐᒃᓯᖃᐅᑎᓄᑦ ᐃᓱᒪᓕᐅᖁᔨᓂᕐᒧᑦ ᐅᕝᕙᓘᓐᓃᑦ ᐊᓯᖏᑦ ᐃᓱᒫᓘᑕᐅᔪᑦ ᐱᓪᓗᒋᑦ ᐃᓱᒪᓕᐅᖁᔨᓂᖅ ᐊᒻᒪ ᐃᓚᖃᖅᑐᒃᓴᐅᕗᑦ ᐃᑲᔪᖅᓱᐃᔾᔪᑎᓕᒫᓂᒃ ᑎᑎᕋᖅᓯᒪᔪᓂ.

ᐃᓘᓐᓇᑎᒃ ᑎᑎᕋᖅᓯᒪᔪᓕᒫᑦ ᑭᐅᔾᔪᑏᑦ ᐊᒻᒪ ᐃᑲᔪᖅᓱᐃᔾᔪᑏᑦ ᑎᑎᕋᖅᓯᒪᔪᑦ ᐃᓱᒪᓕᐅᖁᔨᓂᕐᒧᑦ ᑐᓂᔭᐅᓯᒪᒋᐊᓖᑦ ᑖᒃᑯᓄᖓ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ − ᖃᓪᓗᓇᐅᔭᕐᓗᒋᑦ, ᐃᓄᒃᑎᑐᓪᓗ−ᐅᓪᓗᖏᑎᒍᑦ ᖃᐅᔨᒃᑲᐅᑕᐅᔪᑎᒍᑦ ᐃᓄᖕᓄᑦ ᐅᕝᕙᓘᓐᓃᑦ ᖃᐃᖁᔨᔾᔪᑎᑎᒍᑦ ᓴᖅᑭᑎᑕᖓᓂᒃ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ.  ᑐᓂᔭᐅᔪᑦ ᑐᓂᔭᐅᔪᓐᓇᖅᑐᑦ ᑲᑎᒪᔨᓄᑦ ᓇᖕᒥᓂᖅ ᐃᓄᖕᒧᑦ, ᐊᒡᔭᖅᓯᔨᑎᒍᑦ, ᑎᑎᖅᑲᑎᒍᑦ ᐊᒻᒪ ᓇᓗᓇᐃᖅᓯᒪᑎᑦᓯᑦᓯᐊᕐᓗᑎᒃ ᑖᒃᑯᐊ ᑐᓂᔭᐅᔪᑦ ᓈᓚᒃᑎᑦᓯᓂᕐᒧᑦ ᑐᕌᖓᓂᖏᓐᓂᒃ.  ᑐᓂᔭᐅᔪᓐᓇᕐᒥᔪᑦ ᓱᑲᔪᒃᑯᑦ, ᖃᕆᓴᐅᔭᒃᑯᓪᓘᓐᓃᑦ ᑭᓯᐊᓂ ᓇᓗᓇᐃᖅᑕᐅᒃᐸ ᐅᖄᓚᐅᑎᒃᑯᑦ ᑖᒃᑯᓄᖓ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ − ᑐᖔᒍᑦ ᐃᓱᒪᓕᑦᑕᕐᕕᐅ ᑐᓂᓯᒋᐊᖃᕐᓂᕐᒧᑦ − ᐱᐊᓂᒃᓯᒪᑦᓯᐊᖅᑐᑦ ᐊᒻᒪ ᒪᓕᒐᑎᒎᕈᓐᓇᖅᑐᖅ ᐊᔾᔨᖓ ᐊᐅᓪᓚᖅᑎᑕᐅᓯᒪᔪᑦ ᐱᔭᐅᒃᐸᑕ ᑖᒃᑯᓄᖓ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ.

ᑎᑎᕋᖅᓯᒪᔪᑦ ᑐᓂᔭᐅᔪᑦ ᐃᓚᐅᔾᔭᐅᓚᐅᖅᑎᓐᓇᒋᑦ ᑲᑎᒪᔾᔪᑎᒃᓴᖏᓐᓄᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᓂᖏᓐᓄᑦ, ᐊᑐᓂ ᑐᓂᔭᐅᔪᑦ ᐃᒪᐃᒋᐊᓖᑦ:

1.          ᐅᖃᐅᓯᕆᓗᒍ ᐱᔾᔪᑕᐅᔪᖅ ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐱᓕᕆᐊᒃᓴᖏᑎᒍᑦ;

2.           ᑎᒃᑯᐊᖅᑕᐅᓯᒪᓗᓂ ᑲᑎᒪᔨᓄᑦ  ᓈᒻᒪᒃᐸᑦ ᐃᓚᓕᐅᑎᓗᒍ ᑲᑎᒪᓂᕐᒧᑦ;[1]

3.           ᐱᔭᐅᓯᒪᓕᕐᓗᓂ ᑐᖔᒍᑦ 28 ᐅᓪᓗᐃᑦ ᑲᑎᒪᓂᐅᓚᐅᖅᑎᓐᓇᒍ;

4.          ᐃᓚᓕᐅᑎᓯᒪᓗᓂ ᐃᓄᒃᑎᑑᓕᖅᓯᒪᔪᓂᒃ ᑐᓂᔭᐅᔪᓂᒃ;

5.         ᑐᓂᔭᐅᓗᑎᒃ ᑕᒪᒃᑮᑎᒍᑦ ᖃᕆᓴᐅᔭᒃᑰᕈᓐᓇᕈᑎᓂᒃ (ᐅᕝᕙᓘᓐᓃᑦ Excel ᓈᓯᒪᓈᖅᐸᑦ ) ᐊᒻᒪ PDF;

6.         ᐃᓚᐅᑎᑦᓯᓗᓂ ᓇᓚᐅᑦᓵᖅᓯᒪᔪᓂᒃ ᖃᖓᐅᒐᔭᕐᓂᖓᓂᒃ ᐅᖃᐅᓯᒃᑯᑦ ᐅᖃᐅᓯᐅᒐᔭᕐᓂᖓᓂᒃ ᐱᔾᔪᑕᐅᔪᖅ; ᐊᒻᒪ

7.         ᐱᑕᖃᖅᑎᑕᐅᓗᑎᒃ ᐃᒪᐃᓕᖓᓗᒋᑦ.

ᐋᖅᑭᒃᓯᒪᓂᖓ ᑐᓂᓯᓂᐊᕐᓗᓂ ᑎᑎᕋᖅᓯᒪᔪᓂᒃ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᓂᖏᓐᓄᑦ

ᑎᑎᕋᖅᓯᒪᔪᓂᒃ ᑐᓂᓯᓂᖅ ᑖᒃᑯᓄᖓ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ

ᑐᒃᓯᒋᐊᕈᑎᒃᓴᑦ: ᐊᑕᐅᓯᕐᒥᒃ ᑎᑎᖅᓯᓗᑎᑦ         ᐃᓱᒪᓕᐅᕈᑕᐅᔪᖅ: ᐊᑕᐅᓯᕐᒥᒃ ᑎᑎᖅᓯᓗᑎᑦ

ᐱᔾᔪᑕᐅᔪᖅ:  ᓇᓗᓇᐃᔭᕐᓗᒋᑦ ᐊᑐᓂ ᐱᔾᔪᑕᐅᔪᑦ ᐊᑕᐅᓯᕐᒥ ᑐᑭᓕᐊᖅᑐᒥ ᑎᑎᕋᖅᓯᒪᓂᖓ.

ᖃᓄᐃᓯᒪᓂᖓ:

ᐱᑕᖃᖅᑎᑦᓯᓗᓂ ᓇᓗᓇᐃᔭᐃᓯᒪᑦᓯᐊᖅᑐᓂᒃ ᐃᓗᓕᖏᓐᓂᒃ ᐱᔾᔪᑕᐅᔪᑦ, ᑲᑎᒪᔨᓄᑦ ᑐᑭᓯᐊᔾᔪᑕᐅᓂᐊᖅᑐᑦ:

(a)        ᖃᓄᖅ ᐊᑕᓂᖃᕐᓂᖓ ᐱᔾᔪᑕᐅᔪᖅ ᑖᒃᑯᐊ  ᐆᒪᔪᓕᕆᔨᕐᔪᐊᒃᑯᑦ ᐱᓕᕆᐊᒃᓴᖏᓐᓄᑦ;

(b)       ᓱᖕᒪᑦ ᐱᔾᔪᑕᐅᔪᖅ ᓴᖅᑭᑎᑕᐅᖕᒪᖔᑦ;

(c)        ᖃᓄᐃᒻᒪᕆᖕᓂᖓ ᐊᒻᒪ ᖃᓄᐃᓕᖓᓂᖓ ᑐᕌᖓᔪᑦ ᑕᒪᑐᒧᖓ ᐱᔾᔪᑕᐅᔪᒧᑦ; ᐊᒻᒪ

(d)        ᓇᓚᐅᑦᓵᖅᓯᒪᔪᑦ ᖃᓄᑎᒋ ᐱᕕᒃᓴᖃᕆᐊᖃᕐᓂᖏᑦ ᐅᖃᐅᓯᒃᑯᑦ ᐅᖃᐅᓯᐅᓂᐊᕐᓗᓂ ᑕᒪᓐᓇ ᐱᔾᔪᑕᐅᔪᖅ (ᐃᓚᐅᓐᖏᓪᓗᒋᑦ ᐊᐱᖅᓱᕐᓂᑦ/ᐅᖃᐅᓯᖃᕐᓂᖅ).

ᐅᖃᐅᓯᖏᑦ ᑐᑭᓯᓇᑦᓯᐊᕆᐊᕐᓗᒋᑦ ᐊᔪᕐᓇᖏᓐᓂᓕᒫᖓᒍᑦ.  ᓂᕆᐅᒋᓗᒋᑦ ᐊᐱᖅᓲᑎᒋᒐᔭᓐᖑᐊᖅᑕᖏᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦᑕ.

ᐋᔩᖃᑎᖃᕐᓂᖅ:

ᓇᐃᓪᓕᑎᖅᓯᒪᓗᒍ ᐋᔩᖃᑎᒌᒍᑕᐅᓚᐅᖅᑐᑦ ᑐᓂᓯᓂᖅᑕᖃᓚᐅᖅᑎᓐᓇᒍ ᑎᑎᕋᖅᓯᒪᔪᓂᒃ ᐱᔾᔪᑕᐅᔪᒧᑦ ᑖᒃᑯᓄᖓ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ.  ᓇᐃᓪᓕᑎᑦᓯᒪᔪᑦ ᐃᓚᖃᖅᑐᒃᓴᐅᕗᑦ ᐅᑯᓂᖓ:

(a)      ᖃᓄᖅ ᐋᔩᖃᕈᑎᖃᓚᐅᕐᓂᖏᑦ;

(b)      ᑎᑎᕐᓗᒋᑦ ᑲᑐᔾᔨᖃᑎᒌᑦ ᐅᖃᕐᕕᐅᓚᐅᖅᑐᑦ ᐊᒻᒪ ᓇᓚᐅᑦᓵᕐᓯᒪᔪᑦ ᖃᑦᓯᐅᓚᐅᕐᓂᖏᑦ ᐊᑐᓃᖅᑐᑦ ᐅᖃᕐᕕᐅᔪᑦ ᐃᓚᐅᓗᑎᒃ ᐃᓄᑐᐃᓐᓇᐃᑦ; ᐊᒻᒪ

(c)      ᓇᐃᓪᓕᑎᑦᓯᒪᓗᒋᑦ ᓴᖅᑭᑦᑐᑦ, ᐃᓚᐅᓗᑎᒃ ᓇᓪᓕᐊᑐᐃᓐᓇᖅ ᑭᐅᔾᔪᑕᐅᓚᐅᖅᑐᑦ ᐅᕝᕙᓘᓐᓃᑦ ᐋᖅᑭᒋᐊᕈᑕᐅᔪᑦ ᐱᔾᔪᑕᐅᔪᒧᑦ, ᐃᓱᒫᓘᑕᐅᔪᑦ ᐊᓯᖏᓪᓗ ᓴᖅᑭᑎᑕᐅᔪᑦ ᐋᔩᖃᑎᒌᖕᓂᐅᔪᒥ.

 ᐊᑐᔨᖁᔭᐅᔪᑦ:

ᐊᓯᐊᒎᕈᑕᐅᔪᓐᓇᖅᑐᑦ ᐅᖃᐅᓯᖃᕐᓗᓂ ᐱᔾᔪᑕᔪᒥᒃ ᐅᕝᕙᓘᓐᓃᑦ ᖃᓄᐃᓕᐅᕈᑕᐅᖁᔭᐅᔪᑦ

ᐋᖅᑭᒃᓱᖅᑕᖏ            ᑦ ᐆᒪ:

ᐃᓚᐅᓗᑎᒃ ᐊᑏᑦ, ᐃᓚᐅᔪᑦ ᐊᒻᒪ ᐅᖄᓚᐅᑎᖏᑦᑕ ᓈᓴᐅᑎᖏᑦ ᐃᓅᑉ ᐋᖅᑭᒃᓱᐃᔫᑉ ᑖᑦᓱᒥᖓ ᑐᓂᔭᐅᔪᒥᒃ.

ᐅᓪᓗᐊ:

ᓪᓗᐊ ᑐᓂᔭᐅᔫᑉ ᐋᖅᑭᒃᓱᖅᑕᐅᕝᕕᒋᓚᐅᖅᑕᖓ.

ᐃᓚᐅᔪᑦ ᐃᒃᐱᒍᓱᑦᓯᐊᕐᓂᐊᖅᑐᕆᔭᐅᕗᑦ ᐱᕕᒃᓴᕆᑎᑕᐅᔪᓂ ᐅᖃᐅᓯᒃᑯᑦ ᐅᖃᓕᒪᕕᒃᓴᖏᓐᓂᒃ ᐋᖅᑭᒃᑕᐅᔪᓂᒃ ᑲᑎᒪᔨᓄᑦ, ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐊᐅᓚᑦᓯᑦᓯᐊᕈᓐᓇᖁᓪᓗᒋᑦ ᑲᑎᒪᔾᔪᑎᒃᓴᓂᒃ.  ᑖᓐᓇ ᑐᑭᒧᐊᒃᑎᑦᑎᔨᒻᒪᕆᒃ ᐊᐅᓚᒋᐊᓕᖕᓂᑦ ᐃᓱᒪᖅᓱᕐᓗᓂ, ᓄᖅᑲᖅᑎᑦᓯᔪᓐᓇᖅᑐᖅ ᐅᖃᐅᓯᐅᔪᓂᒃ ᐅᖓᑖᓅᕈᔾᔨᒃᐸᑦ ᐱᕕᒃᓴᕆᖅᑲᐅᔭᒥᓂᒃ.

ᑕᕐᕆᔭᒐᒃᓴᑎᒍᑦ ᑕᐅᑐᒃᑎᑦᓯᓂᖅ ᐃᓄᒃᑎᑑᓕᖅᓯᒪᒋᐊᓖᑦ ᐊᒪ ᑐᓂᔭᐅᔪᑦ ᐊᓯᖏᓐᓂᒃ ᑐᑭᓯᒋᐊᕈᑎᒃᓴᖅᑕᓖᑦ.

ᓇᓪᓕᐊᑐᐃᓐᓇᖅ ᑐᓂᔭᐅᔪᖅ ᑎᑎᕋᖅᓯᒪᔪᖅ ᐅᖓᑖᓃᐸᑕ (15) ᒪᒃᐱᒐᐃᑦ ᐃᓚᖃᕆᐊᓖᑦ ᓇᐃᓪᓕᑎᖅᓯᒪᔪᓂᒃ ᐃᓄᒃᑎᑑᓕᖅᓯᒪᔪᖤ ᐅᖃᐅᓯᖏᑦ ᑕᒫᓂ ᒪᒃᐱᒐᐃᑦ ᐊᑕᐅᓯᖅ, ᐱᖓᓱᓄᑦ ᑕᑭᓂᖃᕐᓗᒋᑦ.

ᓇᓪᓕᐊᑐᐃᓐᓇᖅ ᐃᓱᓕᑦᑕᕐᕕᐅᔪᖅ ᐊᑐᖅᑕᐅᓂᖏᓐᓄᑦ ᐊᒻᒪ ᑐᓂᐅᖅᑲᐅᑕᐅᓂᖏᓐᓄᑦ ᑎᑎᕋᖅᓯᒪᔪᑦ (ᓲᕐᓗ ᑖᒃᑯᐊ ᑲᓐᖑᓇᖅᑑᒋᐊᖃᕐᒪᖔᑕ, ᐋᒃᑲᓘᓐᓃᑦ) ᓇᓗᓇᐃᖅᓯᒪᑦᓯᐊᕆᐊᓖᑦ ᑎᑎᕋᖅᓯᒪᓗᓂ ᑐᑭᒧᐊᒃᑎᑦᑎᔨᒻᒪᕆᖕᒧᑦ ᑐᓂᓯᓕᕈᑎᒃ.  ᑕᐃᒪᓐᓇ ᑐᑭᒧᐊᒍᑎᒃᓴᖃᖅᑎᓐᓇᒍ, ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᑲᒪᒋᓂᐊᖅᑕᖓ ᐃᓄᖕᓄᑦ ᒪᑐᐃᖓᓂᖓᓂᒃ ᑐᑭᓯᒋᐊᕈᑎᒃᓴᑦ.

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐃᓛᓐᓂᒃᑯᑦ, ᐋᖅᑭᒃᓯᔪᓐᓇᖅᑐᑦ ᒥᑭᓪᓕᒋᐊᕐᓗᒍ ᐃᓱᓕᑦᑕᕐᕕᐅᔪᑦ ᐱᕕᒃᓴᖃᕈᓐᓇᑦᓯᐊᖁᓪᓗᒋᑦ ᕿᒥᕐᕈᓂᕐᒧᑦ ᐃᖅᑲᓇᐃᔭᖅᑏᑦ ᐊᒻᒪ ᑲᑎᒪᔨᖏᔪᑦ.  ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᖃᐅᔨᒃᑲᐃᑦᓯᐊᕐᓂᐊᖅᐳᑦ ᐃᓘᓐᓇᖏᓐᓂᒃ ᐃᓚᐅᔪᓂᒃ.


[1] ᑖᒃᑯᐊ ᑐᓂᔭᐅᔪᑦ ᓇᓗᓇᐃᖅᑕᐅᖏᑉᐸᑕ ᐃᓚᐅᓂᐊᓂᖏᓐᓂᒃ ᑲᑎᒪᔩᑦ ᑲᑎᒪᓂᖏᓐᓄᑦ, ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐱᓕᕆᐊᕆᓂᐊᖅᑕᖓᑦ ᑎᑎᖃᐅᑎᓪᓗᒍ ᐅᕝᕙᓘᓐᓃᑦ ᐃᓚᐅᓂᐊᕐᓗᓂ ᑭᖑᓪᓕᕐᒧᑦ ᑲᑎᒪᓂᒃᓴᒧᑦ ᐅᖄᓚᐅᑎᒃᑯᑦ.  ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᑐᓴᖅᑎᑦᓯᑲᐅᑎᒋᒐᔭᖅᑐᑦ ᐊᑐᓃᖅᑐᓂᒃ ᐃᓄᖕᓂᑦ, ᑎᒥᐅᔪᓂᓪᓘᓐᓃᑦ ᑎᑎᕋᖅᓯᒪᓗᒋᑦ ᐃᓱᒪᓕᐅᕈᑕᐅᓂᖓ.

ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ ᑐᑭᒧᐊᒍᑎᖏᑦ

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᒪᐃᑦᑐᓐᓇᖅᑐᑦ ᐃᓄᖕᓂᑦ ᓇᓚᒃᑎᑦᑎᓂᖃᕐᓗᑎᒃ ᓇᓪᓕᐊᑐᐃᓐᓇᖅ ᐅᖃᐅᓯᒃᓴᖅ ᐱᓪᓗᒍ ᐃᓱᒪᓕᐅᕈᑕᐅᒋᐊᓕᒃ. 5.2.26).

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ  ᒪᓕᒐᒃᓴᓕᐅᕈᓐᓇᖅᑐᑦ ᐊᔾᔨᒌᓐᖏᔾᔪᑎᒋᓂᐊᖅᑕᖏᓐᓂᒃ ᐱᓕᕆᐊᖏᑦᑕ ᐊᖏᖃᑎᒌᒃᓯᒪᔪᑦ ᐊᒻᒪ ᐱᓕᕆᐊᖏᑦᑕ ᓇᓪᓕᐊᒃ ᐃᓄᐃᑦ ᑕᐃᔭᐅᔪᑦ ᐃᓄᖕᓂᑦ ᓈᓚᒃᑎᑦᓯᓂᖃᖅᑎᓪᓗᒋᑦ. (ᓄᓇᕗᒥ ᓄᓇᑖᕈᑏᑦ 5.2.27).

ᓇᓪᓕᐊᑐᐃᓐᓇᖅ ᑭᒡᒐᖅᑐᐃᔪᖅ ᐅᕝᕙᓘᓐᓃᑦ ᑎᒥᖁᑎᖓᑦ ᒐᕙᒪᑐᖃᒃᑯᑦ ᐅᕝᕙᓘᓐᓃᑦ ᐊᕕᒃᑐᖅᓯᒪᓂᐅᔪᑦ ᒐᕙᒪᖏᑦ, ᓇᓪᓕᐊᑐᐃᓐᓇᖅ ᐃᓄᒃ ᐅᕝᕙᓘᓐᓃᑦ ᓇᓪᓕᐊᑐᐃᓐᓇᖅ ᓄᓇᓕᖕᓂ ᐊᖑᓇᓱᒃᑏᑦ ᑲᑐᔾᔨᖃᑎᒌᖏᑦ ᐅᕝᕙᓘᓐᓃᑦ ᐊᕕᒃᑐᖅᓯᒪᔪᓂ ᐊᖑᓇᓱᒃᑏᑦ ᑲᑐᔾᔨᖃᑎᒌᖏᑦ ᑐᓂᔭᐅᒋᐊᓖᑦ ᓈᒪᔪᓂᒃ ᐃᓚᐅᔾᔪᑎᒋᓂᐊᖅᑕᖏᓐᓂᒃ ᓈᓚᒃᑎᑦᓯᓂᕐᒧᑦ.  ᑖᒃᑯᐊ  ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᖅᓲᑎᖃᖅᑐᑦ, ᒪᓕᒍᒪᒍᑎᒃ ᒪᓕᒐᕐᒥᓂᒃ, ᓇᓪᓕᐊᒃ ᐃᓄᒃ ᑐᓂᔭᐅᓂᐊᕐᒪᖔᑦ ᓈᒪᔪᓂᒃ ᐃᓚᐅᔾᔪᑎᓂᒃ ᓇᓪᓕᐊᓐᓄᑦ ᓈᓚᒃᑎᑦᓯᓂᐅᔪᒧᑦ.  (ᓄᓇᕗᒥ ᓄᓇᑖᕈᑏᑦ  5.2.28).

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ  ᒪᐃᑦᑐᓐᓇᖅᑐᑦ, ᓇᓪᓕᐊᓐᓂᑐᐃᓐᓴᖅ ᑐᒃᓯᕋᐅᑕᐅᔪᒥ,  ᓈᓚᖕᓂᐅᔪᓂ ᐅᕝᕙᓘᓐᓃᑦ ᐱᒻᓚᕆᐅᑎᑕᐅᔪᓂᒃ ᓴᖅᑭᓯᒪᔪᓂᒃ, ᐃᓱᒪᒋᔭᖓᑎᖑᑦ ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐃᓄᐃᑦ ᐃᓚᐅᑎᑕᐅᔪᒃᓴᐅᒋᐊᖏᑦ, ᐃᖅᑲᓴᐃᔭᖅᑎᑖᕐᓂᐊᖅᑐᑦ ᒪᓕᒐᓕᕆᔨᒥᒃ ᐅᕝᕙᓘᓐᓃᑦ ᐊᐃᕙᐅᑎᒋᓗᒍ ᐅᕝᕙᓘᓐᓃᑦ  ᓇᓪᓕᐊᑐᐃᓐᓇᖅ ᐊᐱᖅᑯᑕᐅᔪᖅ ᓴᖅᑭᑎᑕᐅᓪᓗᓂ ᑐᒃᓯᖃᐅᑕᐅᔪᒧᑦ, ᓈᓚᒃᑎᑦᓯᓂᐅᔪᓂᒃ ᐅᕝᕙᓘᓐᓃᑦ  ᐊᓯᖏᑎᒍᑦ. (ᓄᓇᕗᒥ ᓄᓇᑖᕈᑏᑦ  5.2.29).

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑖᒃᑯᓂᖓᑦᓴᐃᓐᓇᖅ ᐱᔪᓐᓇᐅᑎᖃᖅᑐᑦ ᑲᒥᓯᓇᑎᑐᑦ ᑎᒃᑯᐊᖅᑕᐅᓯᒪᔪᑎᑐᑦ ᒪᓕᒃᑐᒍ Part I ᑖᒃᓇᓂ ᖃᐅᔨᒋᐊᖁᑎᖃᕐᓂᕐᒧᑦ ᐱᖁᔭᕐᓂ, R.S.C. 1970, c.I-13 ((ᓄᓇᕗᒥ ᓄᓇᑖᕈᑏᑦ 5.2.30).  ᑕᐃᒪᐃᒻᒪᑦ, ᑖᒃᑯᐊ ᑲᑎᒪᔩᑦ ᐱᔪᓐᓇᐅᑎᖃᖅᑐᑦ ᖃᐃᑎᑦᑎᔪᓐᓇᖅᑐᑎᒃ ᓇᓪᓕᐊᓐᓂᑐᐃᓐᓇᖅ ᖃᐅᔨᔪᕕᓂᕐᓂᒃ, ᐃᓚᐅᓐᖏᑦᑐᑑᓗᑎᒃ ᒥᓂᔅᑕᖓᑦ ᒐᕙᒪᒃᑯᑦ ᑎᒥᖓᑦᑕ ᐊᒻᒪ ᐃᒪᓐᓇᐃᑎᑕᐅᒋᐊᖃᖅᑐᓂ:

i)          ᐅᖃᐅᓯᖃᕐᓂᐊᖅᑐᑦ ᐊᖏᖅᑎᑕᐅᓯᒪᓗᑎᒃ ᐅᕝᕙᓘᓐᓃᑦ ᓇᓗᓇᐃᖅᓯᒪᓗᓂ, ᐅᖃᐅᓯᒃᑯᑦ, ᑎᑎᕋᖅᓯᒪᔪᑎᒍᓪᓘᓐᓃᑦ; ᐊᒻᒪ

ii)        ᓴᖅᑭᑎᑦᓯᓗᑎᒃ ᑕᐃᒪᓐᓇ ᑎᑎᕋᖅᓯᒪᔪᓂᒃ ᐊᒻᒪ ᑭᓱᓂ ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐱᓯᒪᒋᐊᖃᖅᑕᖏᑦ ᓈᒪᔪᒥᒃ ᖃᐅᔨᓴᐃᓂᖃᕐᓂᐊᖅᐸᑕ ᑖᑦᓱᒥ ᕿᒥᕐᕈᔭᒥᓂᒃ.

ᖃᓄᐃᑦᑑᓂᖏᑦ ᓈᓚᒃᑎᑦᓯᓂᐅᔪᑦ:

ᓄᓇᕗᑦ ᐆᒪᔪᓕᕆᕐᔪᐊᖏᑦᑕ ᑲᑎᒪᔨᖏᑦ ᐱᖑᓱᓄᑦ ᐅᓪᓗᓄᑦ ᓈᓚᒃᑎᑦᓯᔪᓐᓇᖅᑐᑦ:

  1. ᑕᑯᓐᓇᖃᑦᑕᐅᑎᓗᑎᒃ ᓈᓚᒃᑎᑦᑎᓂᖅ ᒪᓕᒡᓗᒋᑦ ᑕᒪᒃᑮᒃ ᑎᑎᕋᖅᓯᒪᔪᑦ ᐊᒻᒪ ᐅᖃᐅᓯᒃᑰᖅᑐᑦ, ᐃᒪᐃᒐᔪᒃᑐᑦ, ᑖᒃᑯᐊ  ᐆᒪᔪᓕᕆᔨᕐᔪᐊᒃᑯᑦ ᐱᖃᑎᖃᒻᒪᕆᒡᓗᑎᒃ ᓈᓚᒃᑎᑦᓯᓂᐊᖅᑐᑦ ᑲᑎᒪᔩᑦ ᐃᓱᒪᓕᐅᕈᑎᖓᓂᒃ ᐱᒻᒪᕆᐅᓪᓗᑎᒃ ᑮᓇᐅᔭᓕᐅᕈᑕᐅᔪᓐᓇᖅᑐᑦ, ᐃᓅᓯᕐᒧᑦ ᐊᒻᒪ/ᐅᕝᕙᓘᓐᓃᑦ ᐃᓕᖅᑯᓯᑎᒍᑦ ᐃᓚᐅᕝᕕᒋᔭᖏᑦ ᐃᓄᐃᑦ ᐊᖑᓇᓱᒃᑏᑦ.  ᐊᑲᐅᓈᕌᖓᑦ, ᑕᐅᑐᖃᑎᒌᒡᓗᓂ ᓈᓚᒃᑎᑦᓯᖃᑦᑕᖅᑐᑦ ᓄᓇᓕᖕᓂ ᐅᕝᕙᓘᓐᓃᑦ ᐊᕕᒃᑐᖅᓯᒪᓂᐅᔪᓂ ᐊᒃᑐᖅᑕᐅᔪᓂᒃ ᑐᒃᓯᕋᐅᑎ ᐃᓱᒪᓕᐅᕈᑕᐅᓂᖓᓄᑦ.
  2. ᐅᖄᓚᐅᑎᒃᑯᑦ, ᖃᕆᓴᐅᔭᒃᑯᓪᓘᓐᓃᑦ ᓈᓚᒃᑎᑦᑎᓂᖅ, ᓈᓚᒃᑎᑦᓯᓗᑎᒃ ᐅᖄᓚᐅᑎᒃᑯᑦ ᐅᕝᕙᓘᓐᓃᑦ ᐊᓯᐊᒍᑦ ᐅᐊᔭᓅᖅᑎᑐᒍᑦ ᑐᓴᐅᖃᑦᑕᐅᑎᑎᒍᑦ, ᑖᒃᑯᐊ ᐊᖏᖃᑎᒌᒃᓯᒪᔪᑦ ᐅᖃᓕᒪᖃᑎᒌᒍᓐᓇᖅᐸᑎᒃ ᐅᖃᐅᓯᒃᑯᑦ.  ᑕᒪᓐᓇ ᐅᐊᔭᓅᖅᑐᑎᒍᑦ ᓈᓚᒃᑎᑦᓯᓂᖅ ᐃᓚᖃᕈᓐᓇᖅᑐᖅ ᑎᑎᕋᖅᓯᒪᔪᓂᒃ.  ᐃᒪᐃᒐᔪᒃᑐᖅ, ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐅᐊᔭᓅᖅᑐᑎᒍᑦ ᓈᓚᒃᑎᑦᓯᒐᔪᒃᑐᑦ ᐊᑕᐅᓯᖅ ᐅᖓᑖᓄᓪᓘᓐᓃᑦ ᐃᒪᐃᑦᑐᖃᖅᑎᓪᓗᒍ: 
    1. ᐱᕕᒃᓴᖃᓗᐊᓐᖏᑎᓪᓗᒍ ᐃᓱᒪᒃᓴᖅᓯᐅᕈᑕᐅᔪᖅ;
    2. ᑖᒃᑯᐊ ᐊᖏᖃᑎᒌᒃᓯᒪᔪᑦ ᑕᐅᑐᖃᑎᒌᒡᓗᑎᒃ ᑲᑎᒍᓐᓇᖏᑉᐸᑕ ᑭᖑᕙᓗᐊᓐᖏᑦᑐᒥᒃ; ᐊᒻᒪ/ᐅᕝᕙᓘᓐᓃᑦ
    3. ᐊᑭᖏᑦ ᑕᐅᑐᖃᑎᒌᒡᓗᑎᒃ ᓈᓚᒃᑎᑦᓯᓂᖃᖅᐸᑕ ᐊᔪᕈᑕᐅᓗᓂ.
  3. ᑎᑎᕋᖅᓯᒪᔪᑎᒍᑦ ᓇᓚᒃᑎᑦᓯᓂᖅ ᐃᓚᖃᓐᖏᑦᑐᖅ ᐅᖃᐅᓯᒃᑰᖅᑐᓂᒃ, ᐃᒪᐃᒐᔪᒃᑐᖅ ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᑎᑎᕋᖅᓯᒪᔪᑎᒍᑦ ᓈᓚᒃᑎᑦᓯᓂᖃᖅᑎᓪᓗᒋᑦ ᐊᑕᐅᓯᕐᒥᒃ, ᐅᖓᑖᓄᓪᓘᓐᓃᑦ ᐅᑯᐊ ᑕᓪᓕᒪᑦ ᓴᖅᑭᑉᐸᑕ;
    1. ᑖᒃᑯᐊ “ᑐᒃᓯᕋᐅᑦ ᐃᓱᒪᓕᐅᕈᑕᐅᒋᐊᓕᒃ” - ᐱᖃᑎᒌᑐᓄᑦ ᒐᕙᒪᒃᑯᓐᓄᑦ ᐊᒻᒪ ᐊᒃᑐᖅᑕᐅᔪᓄᑦ;
    2. ᐃᓱᒪᓕᐅᓕᑕᐃᓐᓇᕐᓗᑎᒃ ᑲᑎᒪᔨᑦ, ᐃᓱᒪᒋᔭᖓᑎᒍᑦ ᐆᒪᔪᓕᕆᔨᕐᔪᐊᒃᑯᑦ, ᑕᒪᓐᓇ ᑮᓇᐅᔭᓕᐅᕈᑕᐅᓗᐊᕐᓂᐊᖅᑐᕆᓇᒍ, ᐃᓅᓯᕐᒧᑦᑖᒃᑯᐊ ᐊᖏᖃᑎᒌᒃᓯᒪᔪᑦ ᑕᐅᑐᖃᑎᒌᒡᓗᑎᒃ ᑲᑎᒍᓐᓇᖏᑉᐸᑕ ᑭᖑᕙᓗᐊᓐᖏᑦᑐᒥᒃ; ᐊᒻᒪ/ᐅᕝᕙᓘᓐᓃᑦ ᐃᓕᖅᑯᓯᖏᓐᓄᑦ ᐊᒃᑐᐃᓂᐊᕐᓂᖓ ᐃᓄᐃᑦ ᐊᖑᓇᓱᒃᑎᖏᓐᓄᑦ;
    3. ᐱᕕᒃᓴᑭᓐᓂᖅ ᐃᓱᒫᓘᑕᐅᒃᐸᑦ ᐃᓱᒪᒃᓴᖅᓯᐅᕈᑕᐅᔪᒧᑦ;
    4. ᑖᒃᑯᐊ ᐊᖏᖃᑎᒌᒃᓯᒪᔪᑦ ᑕᐅᑐᖃᑎᒌᒡᓗᑎᒃ ᑲᑎᒪᖃᑎᒌᒍᓐᓇᖏᑉᐸᑕ ᑭᖑᕙᓗᐊᓐᖏᓪᓗᑎᒃ; ᐊᒻᒪ/ᐅᕝᕙᓘᓐᓃᑦ
    5. ᐊᑭᖏᑦ ᐱᓪᓗᒋᑦ ᑕᐅᑐᖃᑎᒌᒡᓗᑎᒃ ᓈᓚᒃᑎᑦᓯᒍᑕᐅᔪᓐᓇᖏᑉᐸᑕ.

ᐃᓕᖅᑯᓯᐅᔪᑎᒍᑦ ᐃᓚᐃᓐᓈᖏᓐᓂᖅ:

ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐃᖅᑲᖅᑐᐃᕕᒃᑎᑐᑦ ᐊᐅᓚᓂᖃᕐᒪᑕ − ᐃᓄᖕᓄᑦ ᑎᒥᐅᓪᓗᓂ ᐃᓱᒪᓕᐅᖅᑎᐅᔪᑦ ᐊᒃᑐᐃᔪᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐃᓚᐅᕝᕕᒋᔪᒪᔭᖏᓐᓂᒃ.  ᑕᐃᒪᐃᒻᒪᑦ ᑖᒃᑯᐊ ᐆᒪᔪᓕᕆᔨᕐᔪᐊᒃᑐᑦ ᒪᓕᒋᐊᖃᖅᑐᑦ ᐊᐅᓚᑦᓯᓂᕐᒧᑦ ᒪᓕᒐᕐᓂᒃ, ᑖᒃᑯᐊ ᐊᐅᓚᔾᔪᑕᐅᔪᑦ ᓂᕈᐊᖅᑕᐅᓯᒪᔪᓄᑦ ᐊᒻᒪ ᐃᓱᒪᓕᐅᖅᑎᐅᔪᓄᑦ ᑕᒪᒃᑯᓄᖓ.  ᑖᓐᓇ ᒪᓕᒐᖅ ᐃᓱᒪᓕᐅᕆᐊᖃᖅᑎᑦᓯᔪᖅ ᐃᓕᖅᑯᓯᐅᓂᐊᖅᑐᑦ ᐊᑐᖅᑕᐅᓂᐊᖅᑐᑦ ᐃᓚᐃᓐᓈᑕᐃᓕᖁᓪᓗᒋᑦ ᐊᒃᑐᖅᑕᐅᔪᓄᑦ.  ᑖᓐᓇ ᑎᑎᕋᖅᓯᒪᔪᖅ ᒪᓕᒋᐊᓕᒃ ᐅᖃᖅᓯᒪᖕᒪᑦ ᑖᒃᑯᐊ ᐊᖏᖃᑎᒌᒃᓯᒪᔪᑦ ᖃᐅᔨᒃᑲᖅᑕᐅᕙᒡᓗᑎᒃ ᑭᖑᕙᓗᐊᓐᖏᑦᑐᒥᒃ, ᓈᒻᒪᒃᑐᓂᒃ ᓴᖅᑭᑎᑦᓯᕕᐅᓗᑎᒃ ᐊᒻᒪ ᓈᒻᒪᒃᑐᓂᒃ ᐱᕕᒃᓴᖃᖅᑎᑕᐅᓗᑎᒃ ᑭᐅᔪᓐᓇᖁᓪᓗᒋᑦ ᐃᓱᒪᓕᐅᕈᑕᐅᔪᖃᒪᐅᓐᖏᓐᓂᖓᓂ ᐊᒃᑑᑕᐅᓂᐊᖅᑐᓂᒃ ᐃᓚᐅᕝᕕᒋᔪᒪᔭᖏᑦ ᐅᕝᕙᓘᓐᓃᑦ ᐱᔪᓐᓇᐅᑎᖏᑦ.

ᓄᓇᕗᒥ ᐆᒪᔪᓕᕆᔨᕐᒧᐊᒃᑯᑦ ᑕᐅᑐᖃᑎᖃᕐᓗᑎᒃ ᓈᓚᒃᑎᑦᓯᒐᔪᒃᑐᑦ ᐃᒪᓐᓇᐃᑦᑐᖃᖅᐸᑦ ᐊᑐᖅᑕᐅᒋᐊᓕᖕᓂᑦ:

  1. ᐱᑎᑕᐅᒃᐸᑕ ᐆᒪᔪᓕᕆᔨᕐᔪᐊᒃᑯᑦ ᑐᒃᓯᕋᐅᑎᓂᒃ ᐃᓱᒪᓕᐅᖁᔨᓂᕐᒧᑦ ᐊᒻᒪ ᐃᓚᖃᕐᓗᑎᒃ ᑐᑭᓯᒋᐊᕈᑕᐅᔪᓐᓇᑦᓯᐊᖅᑐᓂᒃ;
  2. ᓇᓗᓇᐃᖅᓯᕕᐅᓗᑎᒃ ᐆᒪᔪᓕᕆᔨᕐᔪᐊᒃᑯᓐᓄᑦ ᐃᓄᖕᓂᑦ ᓈᓚᒃᑎᑦᓯᓂᐊᕐᓂᕐᒧᑦ ᖃᐅᔨᒃᑲᐃᔾᔪᑎᓂᒃ, ᐃᓚᐅᓗᑎᒃ ᖃᐃᖁᔨᓂᖅ ᐃᓚᐅᒍᒪᔪᓄᑦ;
  3. ᐆᒪᔪᓕᕆᔨᕐᔪᐊᒃᑯᑦ ᓴᖅᑭᑎᑦᓯᓗᑎᒃ ᐃᓘᓐᓇᖏᓐᓂᒃ ᑐᑭᓯᒋᐊᕈᑐᐅᔪᓐᓇᖅᑐᓕᒫᓂᒃ;
  4. ᓇᓗᓇᐃᖅᓯᓗᑎᒃ ᐆᒪᔪᓕᕆᔨᒃᑯᑦ ᖃᐃᖁᔨᓗᑎᒃ ᐊᖏᖃᑎᒌᒃᓯᒪᔪᓂᒃ ᑐᓂᓯᖁᓗᒋᑦ ᑎᑎᕋᖅᓯᒪᔪᓂᒃ ᑭᐅᔾᔪᑎᒃᓴᓂᒃ;
  5. ᓈᓚᒃᑎᑦᑎᓗᑎᒃ ᐆᒪᔪᓕᕆᔨᕐᔪᐊᒃᑯᑦ ᐅᖃᐅᓯᒃᑯᑦ; ᐊᒻᒪ
  6. ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᓕᐅᕈᑎᖃᖃᑦᑕᖅᑐᑦ ᓈᓚᖕᓂᖅᑕᖃᓚᐅᖅᑎᓪᓗᒍ.

ᑐᒃᓯᕋᐅᑦ ᐃᓱᒪᓕᐅᖁᔨᓂᕐᒧᑦ

ᐊᑐᓂ ᑐᒃᓯᕋᐅᑏᑦ ᐃᓱᒪᓕᐅᖁᔨᓂᕐᒧᑦ ᐃᓚᖃᕆᐊᓖᑦ ᒪᑐᓂᖓ ᑕᓪᓕᒪᓂᒃ (5):

  1. ᓇᓗᓇᐃᖅᓯᒪᑦᓯᐊᖅᑐᒥᒃ ᑎᑎᕋᖅᓯᒪᓗᑎᒃ ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᑭᓱᒥᒃ ᐃᓱᒪᓕᐅᕈᑎᖃᖁᔭᐅᓂᖏᓐᓂᒃ; [1]
  2. ᐱᐅᓂᖅᐹᓂᒃ ᖃᓪᓗᓈᑦ ᖃᐅᔨᓴᕈᑎᒋᓯᒪᔭᖏᓐᓂᒃ, ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪ/ᐅᕝᕙᓘᓐᓃᑦ ᓄᓇᓕᖕᓂ ᑐᑭᓯᒋᐊᕈᑎᒃᓴᖅ ᑐᕌᖓᔪᑦ ᑐᒃᓯᕋᐅᑎᒧᑦ, ᐃᓚᐅᓗᑎᒃ ᓇᒻᒪᒃᑐᑦ ᐃᑲᔪᖅᓲᑕᐅᔪᑦ ᑐᒃᓯᕋᐅᑎᓄᑦ, ᐊᒻᒪᓗ, ᐊᑐᖅᑕᐅᒋᐊᓖᑦ ᖃᐅᔨᔾᔪᑎᒃᓴᑦ − ᐊᒻᒪ ᐊᐃᕙᔾᔪᑏᑦ, ᑕᐃᒪᓐᓇᐃᖁᔭᐅᒃᐸᑕ − ᐃᓱᒪᓕᐅᕈᑎᖃᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ;
  3. ᓈᒻᒪᒋᐊᖅᑐᓂᒃ−ᐅᓂᒃᑲᖅᓯᒪᔪᖃᕐᓗᓂ ᓇᐃᓪᓕᑎᑦᓯᒪᔪᓂᒃ ᖃᓄᖅ ᐋᔩᖃᑎᖃᕐᓂᕐᒪᖔᑕ ᐊᒻᒪ ᑭᓇᒃᑯᓐᓂᒃ − ᐃᓚᐅᓗᑎᒃ ᐅᓂᒃᑳᑦ ᐱᔾᔪᑕᐅᔪᖅ ᐋᔩᖃᑎᒌᒍᑕᐅᓚᐅᕐᓂᖓᓂᒃ, ᐃᒻᒪ ᐃᓱᒪᒋᔭᖏᑦ ᓴᖅᑭᑎᑕᐅᔪᑦ ᐅᖃᕐᕕᐅᔪᓄᑦ ᐊᒻᒪ ᓴᖅᑭᑎᑕᐅᔪᑦ ᐋᔩᖃᑎᖃᕐᓂᕐᒧᑦ;[2]  ᑖᒃᑯᐊ ᒐᕙᒪᒃᑯᑦ ᑐᒃᓯᕋᐅᑎᓕᐅᖅᓯᒪᔪᑦ ᐅᕝᕙᓘᓐᓃᑦ ᑖᒃᑯᐊ ᑐᒃᓯᖃᖅᑐᑦ, ᐅᖃᖅᓯᒪᒋᐊᓕᒃ, ᓈᒪᓈᖅᐸᑦ, ᑭᓱᓂ ᑭᐅᓯᓯᒪᕙᑦ, ᐱᑕᖃᖅᐸᑦ, ᓴᖅᑭᑎᑕᐅᔪᓂᒃ ᐋᔩᖃᑎᖃᕐᓂᕐᒧᑦ;
  4. ᑕᒪᓐᓇ ᑐᐊᕕᕐᓇᑐᖃᖅᑎᓪᓗᒍ ᐅᕝᕙᓘᓐᓃᑦ ᐊᓯᐊᒍᑦ ᐱᕕᒃᓴᑭᒃᑎᓪᓗᒍ, ᐱᑕᖃᖅᑎᑕᐅᓗᑎᒃ ᐱᔾᔪᑎᖏᑦ ᐊᒻᒪ ᐃᑲᔪᖅᓱᐃᔾᔪᑏᑦ ᖃᐅᔨᔾᔪᑎᓄᑦ ᖃᐅᔨᒋᐊᑲᐅᑎᒋᔾᔪᑕᐅᔪᓐᓇᖅᑐᑦ ᑐᒃᓯᖃᐅᑎᓄᑦ; ᐊᒻᒪ
  5. ᖁᓛᓃᑦᑐᓕᒫᑦ ᐃᓄᒃᑎᑑᓕᖅᑕᐅᓗᑎᒃ, ᖃᓪᓗᓈᑎᑐᑦ ᐅᕝᕙᓘᓐᓃᑦ (ᐃᓄᐃᓐᓇᖅᑐᑦ), ᓇᓪᓕᐊᒃ ᐊᑐᖅᑕᐅᒃᐸᑦ − ᐃᓚᐅᓐᖏᑦᑐᑑᓗᑎᒃ ᐃᑲᔪᖅᓱᐃᔾᔪᑕᐅᔪᑦ ᑎᑎᕋᖅᓯᒪᔪᑦ ᒪᒃᐱᒐᖃᖅᐸᑕ ᖁᓖᑦ ᐅᖓᑖᓄᑦ ᐃᓄᒃᑎᑑᓕᖅᑕᐅᔭᕆᐊᑐᓐᖏᑦᑐᑦ , ᑖᒃᑯᐊ ᐅᓂᒃᑳᖅᓯᒪᔪᑦ ᐃᓄᒃᑎᑑᓕᑕᐅᓯᒪᒃᐸᑕ ᓇᐃᓪᓕᑎᖅᓯᒪᔪᑦ.

ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᓈᓚᒃᑎᑦᓯᓂᖃᖅᑎᓪᖢᒋᑦ ᒪᓕᒋᐊᓖᑦ:

ᐅᑯᐊ ᐅᓄᕐᓂᖃᖅᑐᑦ 18−ᓂᒃ ᓈᓚᒃᑎᑦᓯᓂᕐᒧᑦ ᒪᓕᒋᐊᓖᑦ ᑐᕌᖓᔪᑦ ᐃᓘᓐᓇᖏᓐᓄᑦ ᑕᐅᑎᖃᑎᒌᒡᓗᑎᒃ ᑎᑎᕋᖅᓯᒪᔪᑎᒍᑦ ᓈᓚᒃᑎᑦᓯᓂᖅ.  ᑖᒃᑯᐊ ᑲᑎᒪᔩᑦ ᓴᓂᕐᕙᐃᓯᒪᕗᑦ ᐱᔪᓐᓇᐅᑎᒥᓂᒃ ᐋᖅᑭᒋᐊᕆᔪᓐᓇᕐᓗᑎᒃ ᒪᓕᒋᐊᓕᖕᓂᑦ ᓇᓪᓕᐊᓐᓄᑐᐃᓐᓇᖅ ᑕᐅᑐᖃᑎᒌᒃᑐᓄᑦ ᓈᓚᖕᓂᐅᓂᐊᖅᑐᓂᒃ.  ᓈᓚᒃᑎᑦᓯᓂᕐᒧᑦ ᐊᖏᖃᑎᒌᒃᑐᑦ, ᐃᓚᐅᔪᒪᔪᑦ ᐃᓄᐃᑦ ᐊᒻᒪ ᑲᑐᔾᔨᖃᑎᒌᑦ ᐊᒻᒪ ᐃᓄᑐᐃᓐᓇᐃᑦ ᐅᖃᐅᔾᔭᐅᓗᑎᒃ ᒪᓕᖁᔭᐅᓗᑎᒃ ᑖᒃᑯᓂᖓ ᒪᓕᒋᐊᓕᖕᓂᑦ ᓇᓚᒃᑎᑦᓯᓂᖃᖅᑎᓪᓗᒋᑦ, ᐅᐸᐅᑎᓂᐊᖅᑕᖏᓐᓄᑦ.

  1. ᑕᒪᒃᑯᐊ ᓈᓚᒃᑎᑦᓯᓂᐅᔪᑦ ᒪᑐᐃᖓᓂᐊᖅᑐᑦ ᐃᓄᑐᐃᓐᓇᕐᓄᑦ, ᖃᐅᔨᒃᑲᖅᑕᐅᓯᒪᓗᑎᒃ ᐃᓄᐃᑦ ᐅᓪᓗᓄᑦ 60−ᓄᑦ ᓈᓚᒃᑎᑦᓯᓂᖃᓚᐅᓐᖏᓐᓂᖓᓂ.  ᐃᓚᖓ ᓈᓚᒃᑎᑦᓯᓂᐅᑉ ᑲᓐᖑᓇᖅᑐᑰᖅᑎᑕᐅᔪᓐᓇᖅᑐᑦ, ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐃᓱᒪᒃᓴᖅᓯᐅᕈᑎᖃᖅᑎᓪᓗᒋᑦ ᑲᓐᖑᓇᖅᑑᒋᐊᖃᕐᒪᖔᑦ, ᐅᕝᕙᓘᓐᓃᑦ ᐊᑦᑕᕐᓇᕐᓂᖓᓂᒃ ᓴᖅᑭᑎᑕᐅᒋᐊᖃᕐᒪᖔᑦ, ᐅᖃᐅᓯᐅᒋᐊᖃᕐᒪᖔᓪᓘᓐᓃᑦ.
  2. ᓇᓪᓕᐊᑐᐃᓐᓇᖅ ᐃᓄᒃ, ᑎᒥᐅᔪᓪᓘᓐᓃᑦ ᑐᓂᓯᔪᓐᓇᖅᑐᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᑎᑎᕋᖅᓯᒪᔪᓂᒃ ᑭᐅᔾᔪᑎᒥᓂᒃ ᐊᒻᒪ ᐃᑲᔪᖅᓱᐃᔾᔪᑎᓂᒃ ᑎᑎᕋᖅᓯᒪᔪᓂᒃ[3] ᑭᐅᔾᔪᑎᒋᓗᒋᑦ ᑖᒃᑯᓄᖓ “ᑐᒃᓯᕋᐅᑎᓂᒃ ᑐᓂᓯᖁᔨᔾᔪᑎᓄᑦ” − ᐃᓄᒃᑑᓕᕐᓗᒋᑦ/ᐃᓄᐃᓐᓇᖅᑐᑦ ᐅᕝᕙᓘᓐᓃᑦ ᖃᐅᓪᓈᑎᑐᑦ ᒪᓕᒡᓗᒍ ᐅᖃᐅᓯᖅ ᐊᑐᖅᑕᐅᔪᖅ − ᐅᖓᑖᓅᓐᖏᑦᑐᑦ 5:00 ᐅᓐᓄᒃᓴᒃᑯᑦ ᐅᓪᓗᐊᓂ  ᑕᖅᑭᖅ/ᐅᓪᓗᖅ]/ᐊᕐᕌᒍ).
  3. ᑭᓯᐊᓂ ᓱᓕᔪᕐᓇᖅᓯᓯᒪᔪᑦ ᑎᑎᕋᖅᓯᒪᔪᑦ ᐊᒻᒪ ᐃᓄᒃᑎᑑᓕᖅᑕᐅᒋᐊᖃᕐᓂᖏᑦ, ᖃᓪᓗᓈᑎᑑᓕᖅᑕᐅᒋᐊᖃᕐᓂᖏᓐᓄᑦ ᐱᔾᔪᑎᖃᕐᓗᑎᒃ ᑐᓂᔭᐅᔪᑦ ᓄᓇᕗᑦ ᐆᒪᔪᓕᕆᔨᕐᔪᐊᓄᑦ ᑭᖑᕙᕐᓗᑎᒃ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐃᓱᒪᒃᓴᖅᓯᐅᕈᑎᖃᔾᔮᖏᑦᑐᑦ ᑎᑎᕋᖅᓯᒪᔪᓂᒃ ᑕᒡᕗᖓ ᓈᓚᒃᑎᑦᓯᓂᐅᔪᒧᑦ ᑐᓂᔭᐅᓐᓂᖅᐸᑕ ᑭᖑᕙᕐᓗᑎᒃ.
  4. ᐃᓄᒃᑎᑑᓕᖅᓯᒪᒋᐊᖃᕐᓂᖏᑦ ᑎᑎᕋᖅᓯᒪᔪᑦ ᑐᓂᔭᐅᒧᑦ ᐊᒻᒪ ᐃᑲᔪᖅᓱᐃᔾᔪᑕᐅᔪᑦ ᑎᑎᕋᖅᓯᒪᔪᓄᑦ ᑐᓂᔭᐅᔪᓄᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᐊᑐᓐᖏᑦᑐᑦ ᐃᓄᖕᓄᑦ ᐊᑐᓃᖅᑐᑦᓄᑦ.
  5. ᐊᓯᓕᒫᖏᓐᓄᑦ ᑐᓂᓯᔪᓄᑦ ᐃᑲᔪᖅᓱᐃᔾᔪᑎᓂᒃ ᑎᑎᕋᖅᓯᒪᔪᓄᑦ ᑖᒃᑯᓇᓂ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ, ᑖᒃᑯᐊ ᐃᓄᒃᑎᑑᓕᖅᓯᒪᒋᐊᖃᕐᓂᖏᑦ ᐊᑐᔾᔮᖏᑦᑐᑦ ᑎᑎᕋᖅᓯᒪᔪᑦ ᒪᒃᐱᒐᖃᖅᐸᑕ ᖁᓕᑦ 10 ᐅᖓᑖᓄᑦ, ᑕᒪᒃᑯᐊ ᐊᑐᓂ ᐃᑲᔪᖅᓱᐃᔾᔪᑕᐅᔪᑦ ᑎᑎᕋᖅᓯᒪᔪᓄᑦ ᐃᓄᒃᑎᑑᓕᖅᓯᒪᓐᖏᒃᑲᓗᐊᖅᐸᑦ, ᐃᓄᒃᑎᑑᓕᖅᓯᒪᓚᐅᑐᐊᖅᐸᑦ ᓇᐃᓪᓕᑎᑦᓯᒪᔪᑦ (ᖃᓪᓗᓈᑎᑐᑦ, ᐃᓄᒃᑎᑐᑦ/ᐃᓄᐃᓐᓇᖅᑐᑦ) ᒪᕐᕉᒃ ᒪᒃᐱᒐᖃᖅᑐᑦ.
  6. ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᐃᓘᓐᓇᖏᓐᓂᒃ ᑎᑎᕋᖅᓯᒪᔪᓂᒃ ᑐᓂᓯᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ  ᓴᖅᑭᑎᑦᓯᓗᑎᒃ ᐃᓄᖕᓄᑦ ᐱᔭᐅᔪᓐᓇᖅᑐᓂᒃ, ᒪᓕᒡᓗᒋᑦ ᖃᓐᖑᓇᖅᑑᒋᐊᖃᖅᑐᑦ ᐅᕝᕙᓘᓐᓃᑦ ᐃᓄᖕᒧᑦ ᐊᑕᐅᓯᕐᒨᖓᔪᑦ ᐃᓱᒫᓘᑕᐅᓗᑎᒃ.
  7. ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᐱᑕᖃᖅᑎᑦᓯᓂᐊᖅᐳᑦ ᐅᖃᑦᓴᐅᑎᒋᔭᖅᑐᓂᒃ ᖃᓪᓗᓈᑎᑐᑦ, ᐃᓄᑦᑎᑐᓪᓗ ᓈᓚᒃᑎᑦᓯᓂᖃᖅᑎᓪᓗᖏᑦ, ᐊᔪᓐᖏᓐᓂᓕᒫᖏᑦ ᐊᑐᕐᓗᒋᑦ.
  8. ᑲᑎᒪᔨᖏᑦ ᓈᒻᒪᒃᓯᖃᑦᑕᕐᓂᐊᖅᐳᑦ ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᑲᑎᒪᔨᖏᑦ ᐅᐸᐅᑎᓯᒪᔪᑦ ᓈᓚᒃᑎᑦᓯᓂᕐᒧᑦ.
  9. ᓇᓪᓕᐊᑐᐃᓐᓇᖅ ᑭᒡᒐᖅᑐᐃᔨᐅᔪᖅ, ᑎᒥᐅᖁᑎᖓᓪᓘᓐᓃᑦ ᒐᕙᒪᑐᖃᒃᑯᑦ, ᓄᓇᕗᑦ ᒐᕙᒪᖏᓪᓘᓐᓃᑦ, ᓇᓪᓕᐊᑐᐃᓐᓇ ᓄᓇᓖᑦ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᐅᕝᕙᓘᓐᓃᑦ ᐊᕕᒃᑐᖅᓯᒪᓂᐅᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᒻᒪ ᓇᓪᓕᐊᑐᐃᓐᓇᖅ ᐃᓄᒃ ᑐᓂᔭᐅᓗᓂ ᐃᓚᐅᑦᓯᐊᕈᑎᓂᒃ ᑖᒃᑯᓇᑎᑐᑦ ᐊᖏᖃᑎᒌᒃᓯᒪᔪᑎᑐᑦ ᓈᓚᒃᑎᑦᓯᓂᐅᔪᒥ.
  10. ᑭᓯᐊᓂ ᖃᐃᖁᔭᐅᒍᑎᒃ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᐃᓚᐅᖁᔭᐅᓗᓂ, ᓇᓪᓕᐊᑐᐃᓐᓇᖅ ᐊᓯᖏᑦ ᐃᓄᐃᑦ, ᑎᓯᐅᔪᓪᓘᓐᓃᑦ ᐊᑎᓂ ᐃᓚᓕᐅᑎᔪᒪᔭᖏᑦ ᐃᓚᒍᒪᓂᕐᒧᑦ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᓈᒻᒪᒃᑐᓂᒃ ᑐᒃᓯᖃᐅᑎᖃᕐᓂᐊᖅᐳᑦ ᑎᑎᕋᖅᓯᒪᓗᒋᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ.
  11.  ᐃᓚᐅᔪᓕᒫᑦ ᐊᒻᒪ ᐊᓯᖏᑦ ᐃᓚᐅᔪᑦ ᓈᓚᒃᑎᑦᓯᓂᐅᔪᓂ ᐊᓯᒥᓂᒃ ᐊᒻᒪ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓂᒃ ᐃᒃᐱᒍᓱᑦᓯᐊᕆᐊᓖᑦ ᐱᑦᓯᐊᕐᓗᑎᒃ.
  12.  ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᐱᑕᖃᖅᑎᑦᓯᓂᐊᖅᐳᑦ ᐱᕕᒃᓴᖃᑦᓯᐊᖅᑎᑕᐅᔪᓐᓇᕐᓗᑎᒃ ᐅᖃᐅᓯᒃᑯᑦ ᐅᖃᓕᒪᒍᔾᔭᐅᔪᓐᓇᕐᓗᑎᒃ ᐃᓚᐅᔪᑦ ᓈᓚᒃᑎᑦᓯᓂᐅᔪᒥ ᓂᕈᐊᖅᑕᒥᓄᑦ,  ᖃᐅᔨᒪᔨᑕᒥᓄᑦ, ᐅᕝᕙᓘᓐᓃᑦ ᒪᓕᒐᓕᕆᔨᒥᓄᑦ.
  13. ᓇᓪᓕᐊᑐᐃᓐᓇᖅ ᑲᑎᒪᔨᐅᖃᑕᐅᔪᖅ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑐᑭᒧᐊᒃᑎᑦᑎᔨᖓᑦ ᐆᒪᔪᓕᕆᓂᕐᒧᑦ ᐅᕝᕙᓘᓐᓃᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᒪᓕᒐᓕᕆᔨᖓᑦ ᐊᐱᖅᓱᕈᓐᓇᖅᑐᑦ ᓈᒻᒪᒃᑐᓂᒃ ᐊᐱᖅᓲᑎᓂᒃ ᓇᓪᓕᐊᓐᓄᑐᐃᓐᓇ ᐃᓚᐅᔪᓄᑦ ᓈᓚᒃᑎᑦᓯᓂᕐᒥ.
  14. ᓇᓪᓕᐊᑐᐃᓐᓇᖅ ᐃᓚᐅᔪᖅ ᐊᐱᕆᔪᓐᓇᖅᑐᑦ ᐊᐱᖅᑯᑎᓂᒃ ᓇᓪᓕᐊᑐᐃᓐᓇᕐᓄᑦ ᐃᓚᐅᔪᓄᑦ ᓈᓚᒃᑎᓯᓂᕐᒥ.
  15. ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐱᑕᖃᖅᑎᑦᓯᓂᐊᖅᐳᑦ ᐃᓄᖕᓄᑦ ᓈᓚᒋᐊᖅᓯᒪᔪᓄᑦ ᐅᐸᐅᑎᓯᒪᔪᑦ ᓈᓚᒃᑎᑦᓯᓂᕐᒧᑦ ᐅᖃᕈᓐᓇᖅᑎᑕᐅᓗᑎᒃ ᐊᒻᒪ ᐊᐱᕆᔭᐅᔪᓐᓇᕐᓗᑎᒃ ᐃᓚᐅᔪᓄᑦ ᐊᒻᒪ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ.
  16. ᐊᑐᓂ ᐃᓄᐃᑦ ᓈᓚᒃᑎᑦᓯᓂᐅᔪᒥ ᐅᖃᓕᒪᒍᒪᔪᑦ, ᐊᐱᖅᓱᕈᒪᔪᓪᓘᓐᓃᑦ ᐃᓵᖃᑦᑕᕐᓂᐊᕐᓗᑎᒃ ᐊᒻᒪ ᐅᖃᕈᓐᓇᕐᓗᑎᒃ ᑭᓯᐊᓂ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᐃᒃᓯᕙᐅᑕᖓᑦ ᐃᓕᑕᖅᓯᒃᐸᑦ ᐅᖃᕈᒪᔪᓂᒃ.
  17. ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯ ᐃᒃᓯᕙᐅᑕᖓᑦ ᐱᔪᓐᓇᕐᓂᖃᖅᐳᖅ ᐱᕕᒃᓴᖏᑦ ᐃᓱᓕᕝᕕᒃᓴᖏᑦᑕ ᐅᖃᓕᒪᓂᖏᓐᓂ ᐊᒻᒪ ᐊᐱᖅᓲᑎᖃᖅᑎᓪᓗᒋᑦ.
  18. ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑕᕐᕆᔭᓕᐅᕆᓂᐊᖅᐳᑦ ᓈᓚᒃᑎᑦᓯᓂᐅᔪᒥᒃ ᑐᒃᓯᕋᐅᑎᓂᒃ ᑐᓂᔭᐅᒍᑎᒃ.


[1] ᑕᒪᓐᓇ ᐊᔾᔨᒌᓐᖏᑦᑑᔪᓐᓇᖅᑐᖅ−ᐆᒃᑑᑎᒋᓗᒍ, ᐋᖅᑭᒃᓱᐃᓂ ᐲᖅᓯᓗᑎ ᐊᓐᖑᑕᐅᔪᓐᓇᖅᑐᑦ ᐅᓄᕐᓂᖏᑦᑕ ᓈᓴᐅᑎᖏᓐᓂᒃ, ᓴᒃᑯᖏᓐᓂᒃ ᖁᑭᐅᑏᑦ, ᐱᔾᔪᑕᐅᔪᖅ ᐊᖑᓇᓱᐊᕐᓂᕐᒧᑦ ᐊᓯᖏᓪᓗ.  ᐊᓯᐊᒍᑦ,  ᐊᐅᓯᐊᒎᕈᑕᐅᔪᓐᓇᖅᑐᑦ ᓴᖅᑭᑎᑕᐅᓪᓗᑎᒃ ᐅᕝᕙᓘᓐᓃᑦ ᑖᒃᑯᐊ ᑐᒃᓯᖃᐅᑏᑦ ᒪᑐᐃᕐᓗᒍ−ᒪᑐᓗᒍᓗ − ᐆᒃᑑᑎᒋᓗᒍ ᑐᒃᓯᕋᐅᑎᖃᕐᓂᖅ ᐃᓱᒪᓕᐅᕈᑎᖏᓐᓂᒃ ᐆᒪᔪᓕᕆᔨᕐᔪᐊᒃᑯᑦ ᐃᑲᔪᖅᓲᑎᓂᒃ ᐱᐅᓂᖅᐹᖑᓱᕆᔭᖏᓐᓂᒃ ᐃᑲᔪᖅᓱᐃᔾᔪᑕᐅᓗᑎᒃ ᖃᐅᔨᑎᑦᓯᔾᔪᑎᓄᑦ.

[2]. ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐃᒪᐃᓐᓂᐊᖅᑐᑦ − ᐱᒋᐊᓐᖓᕈᑎᒋᓗᒍ − ᕿᒥᕐᕈᓗᒋᑦ ᓱᓇᒃᑯᑖᑦ ᓈᒻᒪᒃᑲᓗᐊᕐᒪᖔᑕ ᐋᔩᖃᑎᖃᑦᑐᖃᕐᓂᐊᖅᑎᓪᓗᒍ ᑐᒃᓯᕋᖅᓯᒪᔪᒧᑦ.

[3] “ᐃᑲᔪᖅᓱᐃᔾᔪᑏᑦ ᑎᑎᖅᑲᑦ” ᐅᖃᐅᓯᖃᖅᑐᖅ ᐊᑕᐅᓯᕐᒥᒃ, ᐅᖓᑖᓄᓪᓘᓐᓃᑦ ᖃᐅᔨᓴᕈᑕᐅᔪᑦ, ᑎᑎᕋᖅᓯᒪᔪᑦ, ᐃᓱᒪᒋᔭᐅᔪᑦ ᐅᕝᕙᓘᓐᓃᑦ ᐊᓯᖏᑦ ᑎᑎᕋᖅᓯᒪᔪᑦ ᐃᖕᒥᒃᑰᖅᑐᑦ ᑕᒡᕙᓐᖓᑦ ᐃᓄᖕᒥᑦ, ᑲᑐᔾᔨᖃᑎᒌᓂᓪᓘᓐᓃᑦ ᑎᑎᕋᖅᓯᒪᔪᖅ ᑐᓂᔭᐅᒧᖅ, ᑐᓂᓯᒃᑲᓐᓂᕐᓗᑎᒃ ᖃᐅᔨᔾᔪᑎᒃᓴᒃᑲᓐᓂᕐᓂᒃ ᐊᒻᒪ/ᐅᕝᕙᓘᓐᓃᑦ ᐊᐃᕙᐅᑕᐅᒧᖅ ᐃᑲᔪᖅᓲᑕᐅᔪᖅ ᐃᓄᖕᒧᑦ, ᑲᑐᔾᔨᖃᑎᒌᓪᓘᓐᓃᑦ ᑐᓂᔭᖏᑦ.

ᑲᑎᒪᓂᐅᔪᑦ ᒪᑐᐃᖓᔪᑦ ᐃᓄᖕᓄᒃ ᑕᖅᑲᒃᑯᓄᖓ:

ᑎᒥᖁᑎᒋᔭᐅᓪᓗᓂ ᒐᕙᒪᒃᑯᓐᓄᑦ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐊᑐᐊᒐᖃᕈᒪᕗᑦ ᒪᑐᐃᖓᔪᓂᒃ, ᑕᑯᒃᓴᐅᔪᓂᓪᓗ ᐊᒻᒪ ᐱᓕᕆᐊᖃᖅᑎᓪᓗᒋᑦ ᐆᒪᔪᓕᕆᓂᕐᒧᑦ ᐊᐅᓚᑦᓯᔾᔪᑕᐅᔪᑦ ᐊᔪᕐᓇᖏᓐᓂᓕᒫᖓᒍᑦ ᐃᓄᐃᑦ ᖃᐅᔨᑎᓪᓗᒋᑦ.  ᑕᐃᒪᐃᒻᒪᑦ, ᐃᓘᓐᓇᑎᒃ ᑲᑎᒪᔩᑦ ᑲᑎᒪᓂᖏᑦ − ᐃᓚᐅᓐᖏᑦᑐᑑᓗᑎᒃ ᑲᓐᖑᓇᖅᑐᒃᑰᕆᐊᓖᑦ ᐊᒻᒪ ᐃᖅᑲᓇᐃᔭᖅᑏᓐᓇᐃᑦ ᑲᓐᖑᓇᖅᑐᒃᑰᕐᓂᖏᑦ − ᒪᑐᐃᖓᔪᑦ ᐃᓄᖕᓄᑦ ᑕᖅᑲᒃᑯᓄᖓ.

 

ᐃᓂᒃᓴᑕᓕᐅᕐᓂᖅ, ᑲᑎᒪᑎᑦᓯᓂᖅ ᐊᒻᒪ ᐃᓂᖏᑦ ᑕᖅᑮᑦ ᐱᖓᓱᑦ ᓈᑎᓪᓗᒋᑦ ᑲᑎᒪᓃᑦ:

 

ᐃᒪᐃᒐᔪᒃᑐᑦ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑕᖅᑮᑦ ᐱᖓᓱᑦ ᓈᒑᖓᑕ ᑕᐅᑐᖃᑎᒋᒃᑐᑎᒃ ᑲᑎᒪᓂᖃᖅᐸᒃᑐᑦ ᑐᒡᓕᐊᓂ ᐱᓇᓱᐊᕈᓯᐅᑉ ᔫᓂᒥ, ᓯᑦᑏᕝᕙ, ᑎᓰᕝᕙ ᐊᒻᒪ ᒫᔾᔨ, ᑭᓯᐊᓂ ᐊᓯᐊᒎᕆᐊᖃᖅᐸᑕ ᐊᓯᐊᒍᑦ ᑲᑎᒪᓂᖃᖅᐸᒃᑐᑦ.  ᑲᑎᒪᓂᒃᓴᒃᑲᓐᓃᑦ ᐋᖅᑭᒃᑕᐅᔪᓐᓇᖅᑐᑦ ᐱᑕᖃᕆᐊᖃᕐᓂᖏᑦ ᒪᓕᒡᓗᒋᑦ.

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐃᒪᐃᓐᓂᐊᖅᐳᑦ, ᐊᔪᕐᓇᖏᑐᐊᖅᐸᑦ, ᑲᑎᒪᓗᑎᒃ ᓄᓇᕗᒥ ᓄᓇᑖᕐᕕᐅᓯᒪᔪᓂ (ᓄᓇᑖᕈᑏᑦ 5.2.16) ᓈᒻᒪᓈᖅᑕᕆᐊᖃᕐᓂᖏᓐᓄ, ᖃᖓᓗ, ᐃᒡᓗᐃᑦ ᐊᒻᒪ ᑮᓇᐅᔭᖅᑑᑎᒃᓴᑦ ᐃᓱᒪᒋᔭᐅᔭᕆᐊᖃᖅᑐᑦ, ᐃᖃᓗᐃᑦ ᐊᖓᔪᖅᑳᖃᕐᕕᖓ ᓄᓇᕗᑦ ᐊᒻᒪ ᐊᕕᒃᑐᖅᓯᒪᓂᐅᔪᒥ ᐊᖓᔪᖅᑳᖃᕐᕕᖓᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ, ᐃᖃᓗᓕᕆᔨᒃᑯᑦ, ᐃᒪᕐᒥᐅᑕᐅᓕᕆᔨᒃᑯᓪᓗ, ᑖᒃᑯᐊ ᓄᓇᕗᑦ ᒐᕙᒪᖏᑦ, ᑲᓇᑕᒥ ᐆᒪᔪᓕᕆᔨᕐᔪᐊᑦ, ᐃᓄᓕᕆᔨᑐᖃᒃᑯᑦ ᐊᒻᒪ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ − ᐃᒪᐃᒐᔪᒃᑐᑦ, ᐊᑲᐅᓂᖅᐹᖑᓂᖓᓄᑦ ᐊᒻᒪ ᑮᓇᐅᔭᖅᑐᓗᐊᓐᖏᓐᓂᖓᓄᑦ ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑲᑎᒪᒐᔪᒃᑐᑦ.   ᑖᒃᑯᐊ ᑲᑎᔨᑦ ᔫᓂᒥ ᑲᑎᒪᓂᖏᑦ ᐊᑐᖅᑕᐅᕙᒃᑐᖅ ᐊᕐᕌᒍᑕᒫᖅᓯᐅᑎᒋᓪᓗᒍ “ᐊᕕᒃᑐᑦᓯᒪᓂᐅᔪᓂ ᑲᑎᒪᓂᖅ” ᑖᒃᑯᓄᖓ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐊᒻᒪ ᓂᑭᑦᑕᖃᑦᑕᖅᑐᒋᑦ ᐱᖓᓱᓄᑦ ᐊᕕᒃᑐᖅᓯᒪᓂᐅᔪᓄᑦ.

ᓈᒻᒪᓈᑦᓯᐊᖁᓪᓗᒋᑦ ᐊᒻᒪ ᐊᑑᑎᖃᑦᓯᐊᖁᓪᓗᒋᑦ ᐊᔪᕐᓇᖏᓐᓂᓕᒫᖓᒍᑦ, ᑖᒃᑯᐊ ᐆᒪᔪᓕᕆᔨᕐᔪᐊᒃᑯᑦ ᐃᓱᓕᑦᑕᕐᕕᖕᒥᑦ ᐋᖅᑭᒃᓯᖃᑦᑕᖅᑐᑦ ᐊᑐᓂ ᑲᑎᒪᓂᐅᔪᑦ ᑲᑎᒪᔾᔪᑎᒃᓴᖏᓐᓂ ᐊᒻᒪ ᐅᖃᓕᒪᓂᐊᖅᑐᑦ ᒪᓕᒋᐊᖃᖅᑎᑕᐅᔪᑦ ᑕᒪᒃᑯᓂᖓ ᐃᓱᓕᑦᑕᕐᕕᖕᓂᒃ.  ᑕᒪᑐᒪ ᖄᖓᒍᑦ, ᑕᐃᒃᑯᐊ ᑭᓯᐊᓂ ᐅᖃᐅᓯᐅᔪᑦ, ᐃᓱᒪᒋᔭᖓᑎᒍᑦ ᑲᑎᒪᔩᑦ, ᑕᐅᑐᖃᑎᒌᒡᓗᑎᒃ ᐅᖃᓕᒪᒋᐊᖃᖅᐸᑕ ᐊᒻᒪ/ᐅᕝᕙᓘᓐᓃᑦ ᐃᓱᒪᓕᐅᕈᑕᐅᓂᐊᖅᑐᖅ ᐅᖃᐅᓯᐅᓂᖃᖅᑎᓪᓗᒍ ᑕᐅᑐᖃᑎᒌᓗᓂ ᑲᑎᒪᓂᐅᔪᒥ.  ᐃᓘᓐᓇᑎᒃ ᐅᖃᐅᓯᒃᓴᑦ ᐅᖃᐅᓯᐅᓂᐊᖅᐳᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐅᖄᓚᐅᑎᒃᑯᑦ ᑲᑎᒪᓗᑎᒃ ᐅᕝᕙᓘᓐᓃᑦ ᑎᑎᖅᑲᑎᒍᑦ.

ᑕᖅᑮᑦ ᐱᖓᓱᑦ ᓈᒑᖓᑕ ᑲᑎᒪᓂᖅ:

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐱᑕᖃᖅᑎᑦᓯᒐᔪᒃᑐᑦ ᑎᑎᕋᖅᓯᒪᔪᓂᒃ ᖃᐅᔨᒃᑲᐃᔾᔪᑎᓂᒃ ᑕᖅᑮᑦ ᐱᖓᓱᑦ ᓈᑎᓪᓗᒋᑦ ᑲᑎᒪᓂᒃᓴᐅᔪᒥᒃ ᑐᖔᒍᑦ 42 ᐅᓪᓗᐃᑦ ᑲᑎᒪᓂᖃᓚᐅᖅᑎᓐᓇᒋᐃᑦ.  ᖃᐅᔨᒃᑲᐃᔾᔪᑏᑦ ᑐᓂᐅᖅᑲᐅᑕᐅᕙᒃᑐᑦ ᑐᓂᒋᐊᓕᖕᓄᑦ ᒐᕙᒪᒃᑯᑦ ᐱᓕᕆᕕᖏᓐᓄᑦ, ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪ ᒐᕙᒪᒃᑯᓐᓅᖓᓐᖏᑦᑐᑦ ᑲᑐᔾᔨᖃᑎᒌᑦ ᐊᒻᒪ ᑕᑯᒃᓴᐅᑎᑕᐅᕙᒃᑐᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᖃᕆᓴᐅᔭᒃᑯᑦ ᑐᑭᓯᒋᐊᖅᑎᑦᓯᕕᐊᓂ.  ᑖᒃᑯᐊ ᖃᐃᔨᒃᑲᐃᔾᔪᑏᑦ ᐃᓚᖃᖅᑐᑦ ᑲᑎᒪᔾᔪᑎᒃᓴᓅᖅᓯᖁᔨᓂᕐᒥᒃ.

ᑕᒻᒪᖅᓯᒪᔪᑦ ᐅᕝᕙᓘᓐᓃᑦ ᐋᒦᑕᕕᓃᑦ ᖃᐅᔨᒃᑲᐃᔾᔪᑎᓂᒃ ᓇᓪᓕᐊᑐᐃᓐᓇᕐᒧᑦ ᑲᑎᒪᓂᒃᓴᖏᓐᓄᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐊᑐᕈᓐᓃᖅᑎᑦᓯᔾᔮᖏᑦᑐᑦ ᑕᐃᒪᓐᓇ ᑲᑎᒪᓂᒃᓴᐅᔪᓂᒃ ᐅᕝᕙᓘᓐᓃᑦ ᓄᖅᑲᕈᑕᐅᓗᑎᒃ ᑲᑎᒪᓂᕐᒥᓄᑦ. (GB 9.7).

ᑲᓐᖑᓇᖅᑐᒃᑯᑦ ᑲᑎᒪᓂᖅ:

 

ᐃᓘᓐᓇᓕᒫᖓ ᑲᑎᒪᓂᐅᑉ ᑲᓐᖑᓇᖅᑑᓂᐊᖅᑐᖅ (ᑖᒃᑯᑑᓗᑎᒃ) ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐃᓱᒪᒃᐸᑕ ᐃᒪᐃᑦᑐᓂᒃ:

(a)                 ᑲᓐᖑᓇᖅᑐᑦ ᐅᕝᕙᓘᓐᓃᑦ ᐊᑦᑕᕐᓇᖅᑐᑦ ᓴᖅᑭᑎᑕᐅᑐᐃᓐᓇᕆᐊᖃᕐᓂᖏᓐᓂᒃ; ᐅᕝᕙᓘᓐᓃᑦ

(b)                 ᓲᕐᓗ ᑕᐃᒪᓐᓇ ᐊᑦᑕᕐᓇᖅᑐᑦ ᑮᓇᐅᔭᓕᕆᔾᔪᑏᑦ, ᐃᓄᖕᒨᖓᔪᑦ ᐅᕝᕙᓘᓐᓃᑦ ᐊᓯᖏᑦ ᓴᖅᑭᑎᑕᐅᔪᓐᓇᖅᑐᑦ, ᓴᖅᑭᑎᑕᐅᔪᒪᓐᖏᑦᑑᒐᓗᐊᑦ, ᓇᓪᓕᐊᑐᐃᓐᓇᕐᒧᑦ ᐃᓄᖕᒧᑦ ᐊᒃᑐᖅᑕᐅᔪᒧᑦ ᐅᕝᕙᓘᓐᓂᑦ ᐃᓄᑐᐃᓐᓇᕐᓄᑦ ᐃᓚᐅᕝᕕᐅᒍᒪᔪᖅ, ᐅᖁᒪᐃᓐᓂᖅᓴᐅᒃᐸᑕ ᒪᓕᒋᐊᖃᕐᓂᖅ ᑕᒪᒃᑯᐊ ᑲᑎᒪᓂᑦ ᒪᑐᐃᖓᒋᐊᖃᕐᓂᖏᓐᓄᑦ ᐃᓄᑐᐃᓐᓇᕐᓄᑦ.

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᓴᖅᑭᑎᑦᓯᒋᐊᖃᖅᑎᑕᐅᔪᖅᑦ ᐃᓘᓐᓇᑲᓴᖏᓐᓂᒃ ᐃᓱᒪᓕᐅᕈᑎᒋᓯᒪᔭᒥᓂᒃ ᒪᓕᒃᑐᒋᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐋᑎᑯ 5 ᑐᕌᕐᕕᐅᔪᒧᑦ ᒥᓂᔅᑕᒧᑦ ᐊᖏᕈᑎᒋᓂᐊᕐᓗᒍ ᐅᕝᕙᓘᓐᓃᑦ ᐋᒃᑳᕐᓂᐊᕐᓗᒍ/ᐱᔪᓐᓇᖏᑎᓐᓂᐊᕐᓗᒍ (ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ 5.3.7 -5.3.23).  ᐱᔾᔪᑎᒋᓪᓗᒍ ᐃᓱᒪᓕᐅᕈᑎᒋᒃᑳᓚᐅᖅᑕᓂ ᐋᖅᑭᒃᑕᐅᔪᖅ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᑲᓐᖑᓇᖅᑐᒃᑰᖅᑎᑕᐅᒋᐊᓕᒃ ᑖᒃᑯᓄᖓ ᑲᑎᒪᔨᓄᑦ ᐊᒻᒪ ᒥᓂᔅᑕᒧᑦ ((ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ  5.3.8 and 5.3.17),  ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᓂᖃᖅᐸᒃᑐᑦ ᑲᓐᖑᓇᖅᑐᒃᑯᑦ ᐃᓱᒪᓕᐅᕈᑎᖃᕐᓂᐊᖅᑐᑎᒃ ᐋᑎᑯ 5-ᒥᒃ ᐃᓱᒪᓕᐅᕈᑕᐅᓗᓂ.

ᓂᕈᐊᖅᑎᐅᖏᑦᑐᑦ ᑕᐅᑐᒋᐊᖅᓯᒪᔪᑦ (ᑎᑎᕋᖅᓯᒪᓂᐊ 5.5) ᐅᐸᐅᑎᔪᓐᓇᖅᑐᑦ ᑲᓐᖑᓇᖅᑐᒃᑯᑦ ᑲᑎᒪᓂᐅᔪᒧᑦ ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑕᐃᒪᐃᑦᑐᓂᒃ ᐃᓱᒪᓕᐅᕈᑎᖃᖅᑎᓪᓗᒋᑦ.  ᑭᓯᐊᓂ, ᑖᒃᑯᐊ ᑕᐅᑐᒋᐊᖅᓯᒪᔪᑦ ᑕᐅᑐᒍᓐᓇᖅᑎᑕᐅᑐᐃᓐᓇᖅᑐᑦ ᐊᒻᒪ ᑭᐅᖃᑦᑕᕐᓗᑎᒃ ᐊᐱᖅᑯᑕᐅᔪᓂᒃ ᑖᒃᑯᓇᓐᖓᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓂᒃ ᓈᓚᒃᑎᑦᓯᓂᖃᖅᑎᓪᓗᒋᑦ.  ᑕᒪᑐᒪ ᖄᖓᒍᑦ, ᑖᒃᑯᐊ ᐃᓄᐃᑦ ᑲᑐᔾᔨᖃᑎᒌᖏᓐᓃᓐᖔᖅᓯᒪᔪᖅ ᑕᐅᑐᒋᐊᖅᓯᒪᔪᑦ ᐃᖅᑲᓇᐃᔭᖅᑎᐅᖏᓪᓗᓂ ᑖᒃᑯᓄᖓ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᓯᕗᓪᓕᖅᐹᒥ ᐅᐸᐅᑎᒍᓂ ᑲᓐᖑᓇᖅᑐᒃᑯᑦ ᑲᑎᒪᓂᖃᖅᑎᓪᓗᒋᑦ, ᑖᓐᓇ ᑕᐅᑐᒋᐊᖅᓯᒪᔪᖅ ᐊᑎᓕᐅᕆᐊᖃᖅᑎᑕᐅᔪᖅ ᐊᒻᒪ ᐅᓪᓗᖓ ᐊᖏᕈᑕᐅᓯᒪᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᑐᓂᔭᐅᓗᑎᒃ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᑐᖔᒍᑦ ᑲᓐᖑᓇᖅᑐᒃᑯᑦ ᑲᑎᒪᓂᒃᓴᒧᑦ.[1]  ᐊᓯᐊᒍᑦ ᑲᓐᖑᓇᖅᑐᒃᑯᑦ ᑲᑎᒪᓂᐅᔪᑦ ᐃᓱᓕᑦᑕᕐᕕᓖᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔩᓐᓇᖏᓐᓄᑦ ᐊᒻᒪ ᑕᐃᒪᓐᓇ ᐊᑐᓃᖅᑐᑦ ᑲᑎᒪᔩᑦ ᓈᒻᒪᒋᔭᖏᑎᒍᑦ ᐱᑕᖃᕆᐊᖃᕐᓂᖓᓂᒃ ᐅᕝᕙᓘᓐᓃᑦ ᓈᒻᒪᖕᓂᖓᓂᒃ ᐱᔾᔪᑕᐅᔪᒥᒃ ᐱᓕᕆᐊᖃᕐᑎᓪᓗᒋᑦ.

Iᐱᓕᕆᔩᑦ ᑲᓐᖑᓇᖅᑐᒃᑯᑦ ᑲᑎᒪᓂᖏᑦ:

Fᐃᓛᓐᓂᒃᑯᑦ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᓂᖃᖃᑦᑕᕆᐊᖃᕐᒪᑕ ᐅᖃᐅᓯᖃᕐᓂᐊᕐᓗᑎᒃ ᐱᔾᔪᑕᐅᔪᓂᒃ ᑐᕌᖓᔪᓂᒃ ᐊᓪᓚᒡᕕᓕᕆᓂᕐᒧᑦ ᐊᒻᒪ ᑲᑐᔾᔨᖃᑎᒌᓂ ᐊᐅᓚᔾᔪᑎᖏᓐᓂᒃ ᐱᔾᔪᑎᖃᕐᓗᑎᒃ ᑲᑎᒪᔩᑦ.  ᑕᒪᒃᑯᐊ ᑲᑎᒪᓂᐅᔪᑦ ᐃᓗᓕᖃᕋᔪᒃᑐᑦ ᑖᒃᑯᓂᖓᐃᓐᓇᖅ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᒻᒪ ᑕᐃᒪᓐᓇ ᐊᑐᓃᖅᑐᑦ ᑲᑎᒪᔩᑦ ᐱᑕᖃᕆᐊᖃᖅᑐᕆᔭᖏᑦ ᐱᓕᕆᐊᖃᕐᓂᐊᕐᓗᑎᒃ ᐱᔾᔪᑕᐅᔪᒥᒃ.  ᑕᒪᒃᑯᐊ ᐃᓄᑦ ᐅᐸᐅᑎᔪᑦ ᑲᑎᒪᓂᐅᔪᓄᑦ ᖃᐃᖅᑯᔨᔾᔪᑎᖏᑎᒍᑦ ᑭᓯᐊᓂᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ.

ᐅᖄᓚᐅᑎᒃᑯᑦ ᑲᑎᒪᓃᑦ:

ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔪᓐᓇᖅᑐᑦ ᐅᖄᓚᐅᑎᒃᑯᑦ ᐊᔪᕐᓇᖏᑉᐸᑦ ᒪᓕᒡᓗᒋᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ.  ᐊᐅᓚᓂᖏᑦ ᐃᓕᖅᑯᓯᐅᔪᑦ ᐊᓯᖏᓐᓄᑦ ᑲᑎᒪᓂᐅᔪᓄᑦ ᐋᖅᑭᒃᑕᐅᓯᒪᔪᑦ ᑎᑎᕋᖅᓯᒪᓂᐊᓂ 3.1 ᑎᑭᓪᓗᒍ 3.11 ᑕᒡᕙᓂ ᑐᑭᒧᐊᒍᑎᓂ ᐊᑐᖅᑕᐅᕙᖕᒥᔪᑦ ᐅᖄᓚᐅᑎᒃᑯᑦ ᑲᑎᒪᓗᓂ ᑭᓯᐊᓂ ᐃᒪᐃᑎᓪᓗᒍ:

(a)    ᐃᒪᐃᒐᔪᒃᑐᖅ, ᐱᕕᒃᓴᖓ ᖃᐅᔨᒃᑲᐃᒋᐊᖃᕐᓂᐅᑉ ᑲᑎᒪᓂᕐᒧᑦ ᐊᒻᒪ ᓴᖅᑭᑎᑕᐅᒋᐊᖃᕐᓂᖏᑦ ᑎᑎᕋᖅᓯᒪᔪᑦ ᑐᓂᔭᐅᒋᐊᓖᑦ ᓇᐃᓗᐊᖅᐸᑦ: ᐊᒻᒪ

(b)   ᒪᓕᒡᓗᒋᑦ ᓂᕆᐅᓇᓐᖏᑦᑐᓂᒃ ᓴᖅᑭᑦᑐᖃᓐᖏᑐᐊᖅᐸᑦ, ᑖᒃᑯᐊ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᐊᓯᐊᒍᑦ ᐋᖅᑭᒃᓱᐃᓯᒪᕙᓐᖏᑦᑐᑦ ᐃᓄᐃᑦ ᐃᓚᐅᓂᐊᖅᑎᓪᓗᖏᑦ ᐅᖄᓚᐅᑎᒃᑯᑦ ᑲᑎᒪᓂᐅᔪᓄᑦ.



[1] ᒥᓂᔅᑕᒃᑯᓐᓃᓐᖔᖅᑐᑦ ᑕᐅᑐᒋᐊᖅᓯᒪᔪᑦ ᑕᐃᒫᑦᓴᐃᓐᓇᖅ ᐊᐱᖅᓱᖅᑕᐅᒋᐊᖃᓐᖏᑦᑐᑦ, ᑕᐃᒪᐃᒋᐊᖃᖅᑎᑕᐅᕌᓂᖕᒪᑕ ᓄᓇᕗᒥ ᓄᓇᑖᕈᑎᑎᒍᑦ. 5.2.2 ᐊᖓᔪᖅᑲᐅᑎᐅᓂᐊᕐᓗᓂ (ᐃᖅᑲᓇᐃᔭᖅᑎ) ᒥᓂᔅᑕᐅᑉ ᐱᓕᕆᕕᐊᓄᑦ.

Login Form