ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᖃᓄᐃᓕᖓᒍᑎᖓ ᐱᓪᓗᒋᑦ ᓴᐳᒻᒥᔭᐅᓂᖏᑦ ᑐᒃᑐᐃᑦ ᐊᒻᒪᓗ ᐊᑦᑐᕐᑕᐅᑲᐅᑎᒋᔭᑦᑐᑦ ᑐᒃᑐᐃᑦ ᓇᔪᒐᖏᑦ

(ᒫᑦᓯ 16, 2016 - ᐃᖃᓗᐃᑦ, ᓄᓇᕗᑦ)

ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ (ᐆᒪᔪᓕᕆᔨᕐᔪᐊᑦ ᐅᕝᕙᓘᓐᓃᑦ ᑲᑎᒪᔩᑦ) ᓯᕗᓪᓕᕐᒥᒃ ᐅᖃᓚᐅᕐᓯᒪᒻᒪᑕ ᐃᒫᒃ ᐊᑭᓂᐊᖏᓐᓇᒥᒃ ᐃᑉᐱᒍᓱᑦᓯᐊᕐᓗᓂ ᐱᓕᕆᒡᕕᒃᔪᐊᑦ ᐱᕙᓪᓕᐊᔭᐅᓂᖏᓐᓂᒃ.  ᑭᓯᐊᓂ, ᑲᑎᒪᔩᑦ ᐃᓱᒪᒋᔭᖃᕐᒪᑕ ᐃᒫᒃ ᐱᑕᖃᕆᐊᖃᕐᒪᑦ ᓈᒻᒪᑦᑕᒥᒃ ᐃᓪᓗᒌᑎᑦᓯᒍᒻᒥᒃ ᒪᑯᓂᖓ ᐱᕙᓪᓕᐊᔭᐅᔪᑦ ᐊᒻᒪᓗ ᓴᐳᒻᒥᓂᖅ ᐆᒪᔪᕐᓂᒃ ᐊᒻᒪᓗ ᐆᒪᔪᐃᑦ ᓇᔪᒐᖏᓐᓂᒃ.  ᑲᑎᒪᔩᑦ ᑐᑭᓯᓇᑦᓯᐊᕐᑐᒥᒃ ᐱᓕᕆᐊᑦᓴᖃᕐᒪᑕ ᐊᑖᒍᑦ ᑎᑎᕋᕐᓯᒪᓂᖓ 5 ᐅᑯᐊ ᓄᓇᕗᑦᒥ ᓄᓇᖁᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐱᒐᓱᐊᕐᓗᒋᑦ - ᑎᑭᐅᑎᓗᒍ ᐊᔪᕐᓇᖏᓐᓂᖓ - ᐱᓗᐊᑦᑕᐃᓕᓗᓂ ᐆᒪᔪᕐᓂᒃ.  ᐆᒪᔪᓕᕆᔨᕐᔪᐊᑦ ᑕᐃᒪᐃᒻᒪᑦ ᑲᒪᒋᐊᖃᕐᐳᑦ ᐃᑲᔪᕈᑎᒋᓗᒍ ᐃᑉᐱᒍᓱᓐᓂᖅ ᐃᓪᓗᒌᑎᑦᓯᓂᕐᒥᒃ ᒪᑯᓂᖓ ᐱᕙᓪᓕᐊᔭᐅᔪᑦ ᓄᓇᕗᑦᒥ ᐊᒻᒪᓗ ᓴᐳᒻᒥᓂᖅ ᑐᒃᑐᓂᒃ ᐊᒻᒪᓗ ᐊᑦᑐᕐᑕᐅᑲᐅᑎᒋᔭᑦᑐᓂᒃ ᑐᒃᑐᐃᑦ ᓇᔪᒐᖏᓐᓂᒃ.

ᑕᐃᒪᐃᓐᓂᖓᓄᑦ, ᑭᖑᕐᖓᒍᑦ ᑲᒪᒋᓚᐅᕐᑐᒋᑦ ᐊᑐᐃᓐᓇᐃᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᓪᓗᓈᓂᒃ ᖃᐅᔨᓴᕐᑎᒻᒪᕆᓐᓂᒃ ᑐᓴᕋᑦᓴᑦ ᐱᓪᓗᒋᑦ ᐱᐅᖖᒋᑦᑐᒥᒃ ᐊᑦᑐᐃᓂᖏᑦ ᐃᓄᐃᑦ ᓄᓇᒥᒃ ᐊᑐᕐᓂᕐᒧᑦ ᐊᐅᓚᓂᖏᑕ ᓄᒡᕋᓕᐅᕐᑐᓂᒃ ᑐᒃᑐᓂᒃ ᐊᒻᒪᓗ ᓇᔪᒐᖏᓐᓂᒃ, ᐆᒪᔪᓕᕆᔨᕐᔪᐊᑦ ᐊᑐᓕᖁᔨᕗᑦ ᐅᑯᓂᖓ ᖃᓄᐃᓕᖓᒍᑎᒥᓂᒃ ᐱᓪᓗᒋᑦ ᑐᒃᑐᐃᑦ ᓇᔪᒐᖏᓐᓂᒃ ᓴᐳᒻᒥᒃᓯᓂᖅ:

ᐆᒪᔪᓕᕆᔨᕐᔪᐊᑦ ᐃᑲᔪᕐᑐᑦ ᖃᓄᓕᓛᖅ ᓇᓛᓂᒃ ᓴᐳᒻᒥᔭᐅᓂᖏᑕ ᑐᒃᑐᐃᑦ ᓄᒡᕋᓕᐅᕐᕕᖏᑦ ᐊᒻᒪᓗ ᓄᒡᕋᖃᓕᕐᑐᑎᒃ ᓄᓇᖏᑦ (ᑖᒃᑯᐊ ᐃᓚᖃᕐᑐᑦ ᐊᖅᑯᑕᐅᓗᐊᕐᑐᓂᒃ ᑐᕌᕐᑐᒍ ᑕᒪᐅᖓ ᐊᒻᒪᓗ ᑕᒫᖖᒐᑦ ᓄᒡᕋᓕᐅᕐᕕᓐᓂᒃ).  ᓈᓃᑦ ᓇᓕᖏᑦ ᓴᐳᒻᒥᔭᑦ ᐃᓚᖃᕐᑐᑦ ᐱᑕᖃᑦᑕᐃᓕᑎᑦᓯᓂᕐᒥᒃ ᐱᓕᕆᒡᕕᒃᔪᐊᑦ ᐊᐅᓚᓂᖑᓐᓂᒃ, ᐃᓚᐅᓪᓗᑎᒃ ᐅᔭᕋᑦᓯᐅᕐᑏᑦ, ᐅᖅᓱᐊᓗᑦᓯᐅᕐᑏᑦ ᐊᒻᒪᓗ ᐳᓪᓚᓯᐅᕐᑏᑦ ᐊᒻᒪᓗ ᐱᕙᓪᓕᐊᑎᑦᓯᔩᑦ, ᓴᓇᔭᐅᓂᖏᑦ ᐊᖅᑯᑕᐅᔪᑦ ᐊᒻᒪᓗ ᐊᑕᔪᑦ ᐊᐅᓚᓂᐅᔪᑦ.

ᐆᒪᔪᓕᕆᔨᕐᔪᐊᑦ ᓯᕗᓪᓕᕐᒥᒃ ᐊᑐᓚᐅᕐᑐᑦ ᑖᑦᓱᒥᖓ ᖃᓄᐃᓕᖓᒍᑎᒥᓂᒃ ᑕᐃᑲᓂ ᒪᐃ 2014 ᐅᓂᒃᑳᓂ ᐅᕗᖓ ᓄᓇᕗᑦᒥ ᐸᕐᓇᐃᔩᑦ ᑲᑎᒪᔨᕐᔪᐊᑦ ᑭᒃᑯᓕᒫᓂᒃ ᓈᓚᑦᑎᑦᓯᑎᓪᓗᒋᑦ ᐱᓪᓗᒋᑦ ᑎᑎᕋᕆᐊᖓᕐᑕᑦ ᓄᓇᕗᑦᒥ ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓇᒍᑏᑦ, ᐊᒻᒪᓗ ᑲᔪᓯᔪᑦ ᐃᑲᔪᕐᑐᒍ ᑕᒪᓐᓇ ᐊᑐᓕᖁᔭᖅ.

ᑐᑭᓯᒋᐊᒃᑲᓐᓂᕈᒪᒍᑦᓯ, ᐊᑏ ᖃᐅᔨᒃᑲᕐᓯᐅᒃ:

ᔭᐃᓴᓐ ᐊᕿᐊᕈᖅ

ᐆᒪᔪᓕᕆᔨᕐᔪᐊᓂ ᐊᐅᓚᑦᓯᔨ ᐊᓪᓚᒡᕕᒃᒥ

ᐅᖄᓚᐅᑦ (867) 975-7300

This email address is being protected from spambots. You need JavaScript enabled to view it.