ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᓴᖅᑭᑦᓯᔪᒪᓂᖓᑦ ᐆᒪᔪᐃᑦ ᒥᐊᓂᕆᔭᐅᓂᖏᓐᓄᑦ ᐊᒻᒪ ᐆᒪᔪᓂᒃ ᖃᐅᔨᓴᐃᓂᕐᒧᑦ ᓯᕗᓪᓕᐅᔾᔭᐅᓯᒪᔪᓂᒃ ᑐᑭᒧᐊᒃᑎᑕᐅᖃᑦᑕᖅᐳᑦ ᐊᑑᑎᖃᖅᑐᓂᒃ ᒪᓕᒐᖏᓐᓂᒃ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑎᒍᑦ. ᓯᕗᒧᐊᒃᑎᑦᓯᔭᕆᐊᖃᕐᒪᑕ ᓄᕗᒥ ᐆᒪᔪᐃᑦ ᒥᐊᓂᕆᔭᐅᑦᓯᐊᕐᓂᖏᓐᓂᒃ ᐱᑦᓯᐊᕐᓗᑎᒃ ᒪᓕᒃᑕᐅᓗᑎᒡᓗ ᒪᓕᒐᖏᑦ ᐱᐅᖅᓱᐊᕐᓂᒧᑦ ᓈᓴᐅᑎᖓ (S 5.1.5) ᐊᒻᒪ ᐃᑲᔪᖅᓯᓂᖃᖁᓪᓗᒍ ᓄᓇᕗᒥ ᓄᓇᖃᖅᑐᓄᑦ.
ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓴᓇᓯᒪᓕᖅᑐᑦ ᓇᖕᒥᓂᖅ ᐆᒪᔪᑦ ᖃᐅᔨᓴᖅᑕᐅᓂᖏᓐᓄᑦ ᐊᒻᒪ ᒥᐊᓂᕆᔭᐅᓂᖏᓐᓄᑦ ᓯᕗᓪᓕᐅᔾᔭᐅᓯᒪᔪᓂᒃ ᒪᓕᒡᓗᖏᑦ ᑲᑎᒪᔨᐅᔪᑦ ᐱᓕᕆᐊᒃᓴᖏᑦ ᐊᒻᒪ ᑲᒪᒋᔭᒃᓴᖏᑦ ᓇᓗᓇᐃᖅᑕᐅᓯᒪᔪᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ.
ᐃᓚᒋᓪᓗᒍ ᓇᖕᒥᓂᖅ ᓴᓇᖃᑦᑕᕐᓂᕐᒧᑦ ᓯᕗᓪᓕᐅᔾᔭᐅᓯᒪᔪᓂᒃ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑲᑎᒪᑎᑦᓯᖃᑦᑕᖅᐳᑦ “ᐊᒡᒍᖅᑐᖅᓯᒪᓂᕐᒥ ᐆᒪᔪᐃᑦ ᒥᐊᓂᕆᔭᐅᓂᖏᓐᓄᑦ ᐊᒻᒪ ᖃᐅᔨᓴᖅᑕᐅᖅᑳᕆᐊᓕᑦ ᓯᕗᓪᓕᐅᔾᔭᐅᓯᒪᓂᖏᓐᓄᑦ” ᐊᕐᕌᒍᑦ ᐱᖓᓱᑦ ᐊᓂᒍᑕ ᒫᓐ ᐊᑐᓂ ᐱᖓᓱᓂ ᓄᓇᕗᑦ ᐊᒡᒍᖅᑐᖅᓯᒪᓂᖏᓐᓂ ᑲᑎᒪᕙᒃᐳᑦ: ᕿᑭᖅᑖᓗᖕᒥ, ᑭᕙᓪᓕᕐᒥ, ᐊᒻᒪ ᕿᑎᕐᒥᐅᓂ. ᑭᒡᒐᖅᑐᖅᑎᐅᔪᑦ ᐊᑐᓂ ᓄᓇᓕᖕᓂᓐᖔᖅᓯᒪᔪᑦ ᑲᑎᒪᖃᑦᑕᖅᐳᑦ ᐅᓪᓘᖕᓄᑦ ᒪᕐᕉᖕᓄᑦ ᐃᓕᓐᓂᐊᓯᓐᓈᕐᖢᑎᒃ ᑐᓵᔭᖅᑐᖅᓯᒪᓪᓗᑎᒃ ᐊᒻᒪ ᐅᖃᐅᓯᖃᕆᐊᖅᑐᖅᓯᒪᓪᓗᑎᒃ ᐅᓪᓗᒥᐅᔪᖅ ᓄᓇᓕᖕᓂ ᐊᒻᒪ ᐊᒡᒍᖅᑐᖅᓯᒪᓂᕐᓂ ᐱᔾᔪᑕᐅᔪᓂᒃ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ, ᐊᒻᒪ ᐃᖅᑲᓇᐃᔭᖃᑎᒌᖃᑦᑕᖅᑐᑦ ᐋᖅᑭᒡᓱᖅᑕᐅᑎᓪᓗᒋᑦ ᑎᑎᖅᑲᑎᒍᑦ ᐊᒡᒍᖅᑐᖅᓯᒪᓂᕐᒥ ᐆᒪᔪᐃᑦ ᖃᐅᔨᓴᖅᑕᐅᖅᑳᖁᔭᐅᔪᑦ ᐊᒻᒪ ᒥᐊᓂᖅᓯᓂᕐᒧᑦ ᓯᕗᓪᓕᐅᔾᔭᐅᓯᒪᔪᓂᒃ.
ᒫᓐᓇᕐᓂᓴᕐᓂᒃ ᑎᑎᕋᖅᓯᒪᔪᓂᒃ ᐱᔪᒪᒍᕕᑦ ᐊᒡᒍᖅᑐᖅᓯᒪᓂᕐᒥ ᐆᒪᔪᓂᒃ ᒥᐊᓂᖅᓯᓂᕐᒧᑦ ᐊᒻᒪ ᖃᐅᔨᓴᖅᑕᐅᖅᑳᖁᔭᐅᔪᓄᑦ ᓯᕗᓪᓕᐅᔾᔭᐅᓯᒪᕗᑦ, ᓇᕿᓪᓗᒋᑦ ᐱᑐᒡᕕᑦ ᐊᑖᓃᑦᑐᑦ:
- 2018-2021 ᕿᑭᖅᑖᓗᖕᒥ ᓯᕗᓪᓕᐅᔾᔭᐅᓯᒪᔪᑦ
- 2018-2021 ᑭᕙᓪᓕᐊᕐᒥ ᓯᕗᓪᓕᐅᔾᔭᐅᓯᒪᔪᑦ
- 2018-2021 ᕿᑎᕐᒥᐅᓂ ᓯᕗᓪᓕᐅᔾᔭᐅᓯᒪᔪᑦ (ᐊᑯᓂᐅᖏᑦᑐᖅ ᑲᑎᒪᓂᒃᓴᖅ ᐊᒡᒋᓕᖅᐳᖅ)
- 2018-2021 ᓯᕗᓪᓕᐅᔾᔭᐅᓯᒪᔪᓕᒫᑦ − ᐃᓘᓐᓇᖏᓐᓂᑦ ᐊᒡᒍᖅᑐᖅᓯᒪᓂᕐᓂᑦ.
Priorities
ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑐᒃᓯᕋᖃᑦᑕᖅᐳᑦ ᐃᓚᖏᐊᕈᑎᖏᓐᓂᒃ ᐊᒻᒪ ᐋᖅᑭᒋᐊᖁᑎᖏᓐᓂᒃ ᑎᑎᕋᖅᑕᐅᓯᒪᔪᑦ ᐊᕐᕌᒍᑕᒫᓐ ᓯᕗᒧᐊᑦᓯᐊᖁᓪᓗᒍ ᐃᓚᐅᓂᕆᔭᖏᑦ ᐊᒻᒪ ᐃᑲᔪᖅᑐᖅᑕᐅᓂᕆᔭᖓ ᓄᓇᓕᖕᓂᑦ ᐊᖑᓇᓱᒃᑐᓕᕆᔨᑦ ᑎᒥᖁᑎᖏᓐᓂᑦ ᐊᒻᒪ ᐊᒡᒍᖅᑐᖅᓯᒪᓂᕐᒥ ᐆᒪᔪᓕᕆᔨᑦ ᑎᒥᖁᑎᖏᓐᓂᑦ.
ᓴᓇᑎᓪᓗᒋᑦ ᓯᕗᓪᓕᐅᔾᔭᐅᓯᒪᔪᓂᒃ ᐃᑲᔪᖅᓯᖃᑦᑕᖅᐳᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᒃ ᐊᒻᒪ ᐊᓯᖏᓐᓂᒃ ᑎᒥᐅᔪᑦ ᐱᓕᕆᕝᕕᖏᓐᓂᒃ ᐋᖅᑭᒡᓱᐃᓕᖅᑎᓪᓗᒋᑦ ᒥᐊᓂᖅᓯᓂᕐᒧᑦ ᐱᓕᕆᔾᔪᑎᒃᓴᓄᑦ ᐸᕐᓇᐅᑎᐅᓂᐊᖅᑐᓂᒃ ᐊᒡᒋᖅᑐᒧᑦ ᐊᕐᕌᒍᒧᑦ(ᓄᑦ), ᐊᒻᒪ ᐃᑲᔪᖅᓯᖃᑦᑕᕐᒥᔪᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᒃ ᐊᒻᒪ ᐊᓯᖏᓐᓂᒃ ᑎᒥᐅᔪᑦ ᐱᓕᕆᕝᕕᖏᓐᓂᒃ ᐋᖅᑭᒡᓱᐃᓕᖅᑎᓪᓗᒋᑦ ᖃᑦᓯᓂᒃ ᑮᓇᐅᔭᓂᒃ ᑐᓂᓯᓂᐊᕐᒪᖔᑕ ᑭᐅᔪᓐᓇᖁᓪᓗᒋᑦ ᓯᕗᓪᓕᐅᔾᔭᐅᓯᒪᔪᓄᑦ ᐱᔾᔪᑕᐅᔪᓄᑦ. ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐊᑐᓗᐊᓐᖑᐊᖃᑦᑕᖅᑐᑦ ᓯᕗᓪᓕᐅᔾᔭᐅᓯᒪᔪᓂᒃ ᖃᐅᔨᓴᐃᓕᖅᑎᓪᓗᒋᑦ ᑐᒃᓯᕋᐅᑎᓂᒃ ᖃᐅᔨᓴᕈᑎᒃᓴᓄᑦ ᑮᓇᐅᔭᖅᑐᕈᑎᒃᓴᓂᒃ ᓄᓇᕗᒥ ᐆᒪᔪᓂᒃ ᖃᐅᔨᓴᕈᑎᒃᓴᑦ ᐸᐸᑕᐅᔪᓂᑦ (NWRT) ᐊᒻᒪ ᓄᓇᕗᒥ ᐆᒪᔪᓂᒃ ᖃᐅᔨᓴᕈᑎᒃᓴᓄᑦ ᑮᓇᐅᔭᖁᑎᒋᔭᐅᔪᓂᑦ (NWSF).