ᐊᐱᖅᑯᑦ 1. ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᒥᐊᓂᖅᓯᕙᒃᐊᑦ ᐆᒪᔪᓂᒃ ᑭᓯᐊᓂ ᓄᓇᕗᑦ ᐃᓗᐊᓃ?

ᑭᐅᔾᔪᑎ 1. ᐊᑖᒍᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ (ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ), ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑲᒪᒋᔭᒃᓴᖃᖅᐳᑦ ᒥᐊᓂᖅᓯᓂᕐᒥᒃ ᐃᓘᓐᓇᖏᓐᓂᒃ ᐆᒪᔪᓂᒃ ᓄᓇᕗᑦ ᐃᓗᐊᓂ.  ᐆᒪᔪᑦ ᓇᓗᓇᐃᖅᑕᐅᓯᒪᕗᑦ ᐃᓗᐊᓂ ᐊᖏᖃᑎᒌᒍᑎᑦ ᐊᒻᒪᓗ ᓄᓇᒥᐅᑕᑦ ᐃᒪᕐᒥᐅᑕᓪᓗ, ᑎᖕᒥᐊᑦ, ᐃᖃᓗᐃᑦ, ᐊᒻᒪ ᐱᕈᖅᑐᑦ ᓄᓇᕗᑦ ᐃᓗᐊᓂ.

ᐊᐱᖅᑯᑦ 2. ᖃᓄᐃᑦᑐᑦ ᓂᕐᔪᑎᑦ ᓄᓇᖃᕐᒪᑕ ᓄᓇᕗᒥ?

ᑭᐅᔾᔪᑎ 2. ᓇᐹᖅᑐᖃᖏᑦᑐᕐᒥ ᑐᒃᑐᑦ, ᐅᒥᖕᒪᑦ, ᓇᐹᖅᑐᖃᖏᑦᑐᕐᒥ ᐊᒡᖤᐃᑦ, ᐊᒪᕈᐃᑦ, ᖃ’ᒡᕕᑦ, ᐅᑭᐅᖅᑕᖅᑐᕐᒥᐅᑦ ᐊᐅᐸᖅᑐᑦ ᑎᕆᒐᓂᐊᑦ, ᑎᕆᐊᑦ, ᐊᕕᓐᖓᑦ ᐊᒻᒪ ᐅᑭᐅᖅᑕᖅᑐᕐᒥᐅᑦ ᐅᑲᓕᖏᑦ ᑕᒪᒃᑯᐊ ᓄᓇᒥᐅᑕᐅᔪᑦ ᐆᒪᔪᕆᔭᐅᒐᔪᒃᐳᑦ.  ᓄᓇᕗᑦ ᓇᓄᖃᖅᑐᖅ, ᓇᑦᑎᖃᖅᑐᖅ, ᖃᐃᕈᓕᖃᖅᑐᖅ, ᐅᒡᔪᖃᖅᑐᖅ, ᐊᒻᒪ ᖃᓯᒋᐊᖃᖅᑐᖅ, ᐊᐃᕕᑦ ᐊᒻᒪ ᐊᔾᔨᒌᖏᑦᑐᓂᒃ ᐃᒪᕐᒥᐅᑕᓂᒃ ᕿᓚᓗᒐᖃᖅᑐᖅ, ᖃᑯᖅᑕᑦ, ᑐᒑᓕᑦ, ᐊᕐᕕᑦ, ᐊᒻᒪ ᐅᓄᖏᓐᓂᖅᓴᐅᖓᓗᐊᑦ ᐋᕐᓗᐃᑦ, ᑎᑳᒍᓪᓕᑦ, humpback whales ᑐᓄᓱᖃᖅᑐᑦ, blue whales ᑐᖑᔪᖅᑐᑦ, ᐊᒻᒪ ᐊᖏᓂᖅᐹᑦ sperm whales.  ᑭᒡᒐᕕᖃᖅᑐᒍᑦ, ᑭᒡᒐᕕᐊᕐᔪᐃᑦ, ᐊᕿᒡᒋᑦ ᐊᒻᒪ ᐊᔾᔨᖏᖏᑦᑐᓂᒃ ᓂᕐᓕᖃᐅᖅᑐᑦ, ᑲᖑᖃᐅᖅᑐᑦ, ᖁᒡᔪᒃ, ᐅᒃᐱᒡᔪᐊᑦ ᐊᒻᒪ ᐊᔾᔨᒌᖏᑦᑐᓂᒃ ᒥᑎᖃᐅᖅᑐᑦ, ᐃᓱᓐᖓᖃᐅᖅᑐᑦ, ᐊᒃᐸᑦ, ᐱᑦᓯᐅᓛᑦ ᐊᒻᒪ ᐊᔾᔨᒋᖏᑦᑐᓂᒃ ᑎᖕᒥᐊᖃᐅᖅᑐᑦ.  ᐃᖃᓗᖃᕐᓂᖅᐹᖑᓪᓗᓂ ᐃᖃᓗᓪᓚᕆᖏᓂᒃ, ᑭᓯᐊᓂ ᐃᓘᕋᖃᕐᒥᔪᑦ, ᓯᒡᒍᓕᒃ, ᓱᓗᒃᐸᐅᒐᑦ, ᑲᕕᓯᓕᒃ, ᑎᒃᑖᓕᒃ, ᐅᑭᐅᖅᑕᖅᑐᕐᒥᐅᑦ ᐅᒐᖏᑦ, ᖃᓕᕋᓕᖃᕐᒥᔪᖅ ᓄᓇᕗᑦ ᑕᕆᐅᖓᓂ.   ᓇᕿᓪᓗᒍ ᐅᓇ ᑎᑎᕋᖅᓯᒪᔪᓄᐊᕈᒪᒍᕕᑦ ᐅᖃᐅᓯᖃᖅᑐᑦ ᐅᖃᓕᒫᒐᓂᒃ ᐊᔾᔨᒌᖏᑦᑐᓂᒃ ᐅᑭᐅᖅᑕᖅᑐᕐᒥᐅᑦ ᐆᒪᔪᖏᓐᓂᒃ

ᐊᐱᖅᑯᑦ 3. ᐋᖅᑭᒡᓯᕙᒃᐸᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐊᖑᓇᓱᒃᑕᐅᔪᓐᓇᖅᑐᑦ ᑰᑕᖏᓐᓂᒃ?

ᑭᐅᔾᔪᑎ 3. ᐃᓚᖓᑦ ᑲᒪᒋᔭᒃᓴᕗᑦ ᐃᓗᐊᒍᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ ᓴᓇᖁᓪᓗᑕ, ᐋᖅᑭᒋᐊᕆᖁᓪᓗᑕ ᐅᕝᕙᓗ ᐲᖅᓯᖁᓪᓗᑕ ᑲᑎᓐᖓᔪᓂᒃ ᐆᒪᔪᖅᑕᐅᔪᓐᓇᖅᑐᑦ ᑭᒡᓕᖏᓐᓂᒃ (TAH) ᓄᓇᕗᑦ ᐃᓗᐊᓂ - ᐋᖅᑭᒡᓱᐃᓗᑎᒡᓘᓐᓃᑦ ᓄᑖᓂᒃ ᑲᑎᓐᖓᔪᓂᒃ ᐆᒪᔪᖅᑕᐅᔪᓐᓇᖅᑐᑦ ᑭᒡᓕᖏᓐᓂᒃ, ᐲᔭᐃᓗᑎᒡᓗ ᑕᐃᒃᑯᓂᖓ ᐊᑐᖅᑕᐅᔪᓐᓃᖅᑐᓂᒃ, ᐅᕝᕙᓗ ᐊᓯᔾᔨᖅᑕᐅᓗᑎᒃ ᐊᑐᖅᑕᐅᔪᑦ ᑲᑎᓐᖓᔪᑦ ᐆᒪᔪᖅᑕᐅᔪᓐᓇᖅᑐᑦ ᑎᒡᓕᖏᓐᓂᒃ.  ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐋᖅᑭᒡᓱᐃᕙᒃᐳᑦ ᐊᓯᖏᓐᓂᒃ, ᑰᑕᐅᖏᑦᑐᓂᒃ ᐊᖑᓇᓱᖕᓂᕐᒧᑦ ᒪᓕᒐᖏᓐᓂᒃ, ᐱᔭᕆᐊᖃᕌᖓᑦ, ᐱᖃᓯᐅᔾᔨᓯᒪᔪᑦ ᖃᖓᒃᑯᑦ ᐊᖑᓇᓱᒍᓐᓇᕐᒪᖔᑕ ᐊᒻᒪ ᖃᓄᐃᑦᑐᓂᒃ ᓱᒋᐅᑎᓂᒃ ᐊᑐᕆᐊᖃᕐᒪᖔᑕ ᐊᖑᓇᓱᒃᑎᓪᓗᒋᑦ ᓇᓗᓇᐃᖅᑕᐅᓯᒪᔪᒥᒃ ᐆᒪᔪᕐᒥᒃ.

ᐊᐱᖅᑯᑦ 4. ᖃᓄᐃᒻᒪᑦ ᐊᖑᓇᓱᖕᓂᖅ ᐱᒻᒪᕆᐊᓘᕙ ᓄᓇᕗᒥ?

ᑭᐅᔾᔪᑎ 4. ᐃᓄᐃᑦ ᑕᐃᒪᓐᖓᓕᒫᖅ ᐊᖑᓇᓱᒃᑎᐅᕗᑦ ᐊᒻᒪ ᐃᖃᓪᓕᐊᖅᑎᐅᓪᓗᑎᒃ ᐆᒪᔾᔪᑎᒋᓪᓗᒍ.  ᑐᒃᑐᓯᐅᖃᑦᑕᖅᓯᒪᔪᑦ ᓄᓇᖅᐸᖅᓯᒪᓪᓗᑎᒃ ᐅᑭᐊᒃᓵᒃᑯᑦ ᐊᒻᒪ ᐅᑭᐅᒃᑯᑦ, ᐊᒻᒪ ᓯᒡᔭᒧᑦ ᐅᑎᖃᑦᑕᖅᑐᑦ ᐊᐅᔭᒃᑯᑦ ᐃᒪᕐᒥᐅᑕᕐᓂᒃ ᐊᖑᓂᒋᐊᖅᑐᕐᖢᑎᒃ (ᓇᑦᑎᕐᓂᒃ, ᐊᐃᕕᕐᓂᒃ ᐊᒻᒪ ᕿᓚᓗᒃᑲᓂᒃ).  ᐃᓄᐃᑦ ᐊᐅᓪᓛᖃᑦᑕᕐᓂᕐᒥᒃ ᐃᓅᓯᖓᑦ ᓇᑲᑕᐅᓚᐅᖅᓯᒪᕗᖅ 1950-ᖏᓐᓂ ᐊᒻᒪ 1960-ᖏᓐᓂ, ᑕᐃᑦᓱᒪᓂ ᒐᕙᒪᑐᖃᒃᑯᑦ ᓄᓇᓕᖕᓄᑦ ᓄᒃᑎᕆᓚᐅᖅᓯᒪᖕᒪᑕ ᐊᐅᓚᑦᓯᔪᓐᓇᖁᓪᓗᒋᑦ ᒐᕙᒪᒃᑯᑦ ᐱᔨᑦᓯᔭᖁᑎᖏᓐᓂᒃ.  ᑭᓯᐊᓂᓕ, ᐃᓄᐃᑦ ᓂᕿᖏᑦ ᓄᓇᒥᐅᑕᐅᔪᑦ ᓂᕿᒋᔭᐅᓪᓚᕆᒃᐳᑦ ᐊᒻᒪ ᐃᓕᖅᑯᓯᕆᔭᐅᓪᓗᑎᒃ ᐃᓄᖕᓄᑦ ᓄᓇᕗᑦ ᐃᓗᐊᓂ.

ᐊᐱᖅᑯᑦ 5. ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᓚᒋᔭᐅᕙᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᐅᕝᕙᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ?

ᑭᐅᔾᔪᑎ 5. ᓇᓕᐊᖕᓄᑐᐃᓐᓇᖅ ᐱᒋᔭᐅᖏᑦᑐᖅ.  ᑮᓇᐅᔭᖃᖅᑎᑕᐅᕙᒃᑲᓗᐊᖅᑐᒍᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᑖᓐᓇ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑎᒥᖁᑎᒋᔭᐅᕗᖅ ᑭᓇᒃᑯᓕᒫᓄᑦ ᒐᕙᒪᖃᖅᑎᐅᔪᓄᑦ (IPG) - ᑭᓇᒃᑯᓕᒫᓄᑦ ᐊᑐᖅᑕᐅᓂᐊᕐᓗᓂ ᓴᖅᑭᑕᐅᓯᒪᔪᖅ ᐊᑖᒍᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ ᒪᓕᖃᑦᑕᖅᑐᑦ ᖃᓄᐃᓕᐅᕈᑎᐅᔭᕆᐊᖃᖅᑐᓂᑦ ᐃᓗᐊᓂᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ. ᐃᓚᒋᔭᐅᒐᓗᐊᖅᑐᒍᑦ ᑭᓇᒃᑯᓕᒫᓄᑦ ᐱᔨᑦᓯᖅᑎᐅᔪᓄᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑭᓯᐊᓂᓕ ᐃᓛᒃᑯᖓᔪᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪ ᓄᓇᕗᑦ ᒐᕙᒪᒃᑯᖏᓐᓂᑦ.

ᐊᐱᖅᑯᑦ. ᑭᓲᖕᒪᑕ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ?

ᑭᐅᔾᔪᑎ. ᑖᒃᑯᐊ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ ᐊᖏᖃᑎᒌᒍᑎᐅᕗᑦ ᐊᑯᕐᖓᓐᓂ ᐃᓄᐃᑦ ᓄᓇᕗᒥᐅᑕᑦ (ᑕᐃᑦᓱᒪᓂᓗ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ) ᐊᒻᒪ ᑲᓇᑕᐅᑉ ᒐᕙᒪᒃᑯᖏᓐᓄᑦ.  ᑖᒃᑯᐊ ᐊᖏᖃᑎᒌᒍᑎᑦ, ᐊᖏᓂᖅᐹᖑᔪᒧᑦ ᓄᓇᒧᑦ ᓄᓇᑖᕈᑎᐅᓯᒪᔪᖅ ᑕᐃᒪᓐᖓᑦ ᑲᓇᑕ ᓄᓇᖃᓕᕐᒪᑦ, ᐊᑎᓕᐅᖅᑕᐅᓚᐅᖅᓯᒪᔪᖅ ᔪᓚᐃ 9, 1993-ᖑᑎᓪᓗᒍ ᐊᒻᒪ ᑐᓐᖓᕕᒋᔭᐅᓪᓗᓂ ᓴᖅᑭᑦᑎᔾᔪᑕᐅᓪᓗᑎᒃ ᓄᑖᒥᒃ ᓄᓇᒥᒃ ᓄᓇᕗᒥᒃ.  ᑖᓐᓇ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎ ᐊᖏᓂᖃᖅᑐᒧᑦ ᓄᓇᒧᑦ 350,000 ᓯᒃᑭᑕᑦ ᑭᓛᒥᑐᔅᓂᒃ ᑐᓂᓯᓯᒪᕗᖅ ᐃᓄᖕᓄᑦ ᐊᒻᒪ ᑎᒃᑯᐊᖅᑕᐅᓯᒪᔪᓄᑦ ᐱᓕᕆᔪᓐᓇᖅᑐᓄᑦ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ, ᓄᓇᐃᑦ ᐊᑐᖅᑕᐅᓂᒃᓴᖏᓐᓄᑦ ᐸᕐᓇᐅᑎᓕᐅᕐᓂᕐᒧᑦ ᐊᒻᒪ ᐱᕙᓪᓕᐊᑎᑦᓯᕐᓂᒧᑦ, ᓇᖕᒥᓂᕆᔭᑦ ᑖᒃᓯᔭᖅᑕᐅᓂᖏᓐᓄᑦ, ᐊᒻᒪ ᓄᓇᒥᐅᑕᓂᒃ ᒥᐊᓂᖅᓯᓂᕐᒥᒃ ᐃᓗᐊᓂ ᓄᓇᕗᑦ.

ᐊᐱᖅᑯᑦ. ᖃᓄᕐᓕ ᐃᓱᒪᓕᐅᕈᑎᓂᒃ ᓴᖅᑭᑦᑎᕙᒃᐸᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ?

ᑭᐅᔾᔪᑎ.  ᐱᔾᔪᑎᐅᔪᑦ ᑐᓂᔭᐅᖃᑦᑕᖅᑐᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐃᓱᒪᓕᐅᕈᑕᐅᓂᐊᕐᒪᑕ ᐱᔭᐅᕙᒃᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪ ᐅᑭᐅᖅᑕᖅᑐᕐᒥᐅᑦ ᒐᕙᒪᒃᑯᖏᓐᓂᑦ,  ᐊᒡᒍᖅᑐᖅᓯᒪᓂᕐᒥ ᐆᒪᔪᓕᕆᔨᑦ ᑎᒥᖏᓐᓂᑦ, ᓄᓇᓕᖕᓂ ᐊᖑᓇᓱᒃᑐᓕᕆᔨᑦ ᑎᒥᖏᓐᓂᑦ, ᓄᓇᕗᑦ ᑐᓐᖓᕕᒃ ᑎᒥᖓᓐᓂᑦ, ᒐᕙᒪᐅᖏᑦᑐᑦ ᑎᒥᖁᑎᖏᓐᓂᑦ, ᐊᒻᒪ ᑕᖅᑲᒃᑯᓇᓐᖓᑦ.  ᐊᖅᑯᑎᒋᔭᐅᓪᓗᑎᒃ ᖃᐅᔨᓴᖅᑎᒻᒪᕆᑦ ᖃᐅᔨᓴᐃᓂᖏᑎᒍᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᑐᓴᕋᓱᐊᕐᓂᖅ,  ᐊᒻᒪ ᐃᓄᓕᒫᖅᑎᑦᓯᓪᓗᑎᒃ ᑎᑎᖅᑲᑎᒍᓪᓗ ᑲᑎᒪᔾᔪᑕᐅᓪᓗᑎᒃ ᓈᓚᒃᑎᐅᓪᓗᑎᒃ  ᐊᑐᖅᑕᐅᕙᒃᑐᑦ ᐊᑐᐃᓐᓇᐅᔪᑦ ᐱᐅᓂᖅᐹᖑᔪᑦ ᑐᓴᒐᒃᓴᑦ ᐊᒃᑐᐊᓂᖃᖅᑐᑦ ᓇᓗᓇᐃᖅᑕᐅᓯᒪᔪᒧᑦ ᑐᓴᒐᒃᓴᒧᑦ ᑐᓂᔭᐅᓯᒪᔪᒧᑦ ᑲᑎᒪᔨᓄᑦ, ᐊᒻᒪ ᐃᓚᖃᒐᔪᒃᑐᑦ ᒥᐊᓂᖅᓯᔾᔪᑎᒃᓴᓄᑦ ᐊᑐᓕᖁᔭᓕᐊᓂᒃ, ᐅᕝᕙᓗ ᐋᖅᑭᒋᐊᕈᑎᒃᓴᖓᓂᒃ.  ᑕᐃᒪᐃᑦᑐᑦ ᑐᓴᒐᒃᓴᑦ ᐃᓱᒪᒃᓴᖅᓯᐅᕈᑕᐅᓚᐅᕐᖢᑎᒃ ᑲᑎᒪᔨᓄᑦ ᐃᓱᒪᓕᐅᓕᑕᐃᓐᓇᖃᑦᑕᖅᑐᑦ.  ᐃᓱᒪᓕᐊᖓᑦ ᑲᑎᒪᔨᑦ ᑐᓂᔭᐅᖃᑦᑲᖅᑐᖅ ᑲᒪᔪᒧᑦ ᑲᓇᑕᐅᑉ ᒐᕙᒪᒃᑯᖏᓐᓂ ᒥᓂᔅᑕᒧᑦ ᐅᕝᕙᓗ ᓄᓇᕗᑦ ᒐᕙᒪᒃᑯᖏᑕ ᒥᓂᔅᑕᖓᓐᓄᑦ ᐊᖏᖅᑕᐅᒐᓱᐊᕐᓂᐊᕐᑉᒪᑕ.  ᑕᐃᒪᓕ ᑲᑎᒪᔨᑦ ᐃᓱᒪᓕᐅᐊᖓ ᐊᖏᖅᑕᐅᒃᐸᑦ ᐊᑐᓕᖅᑎᑕᐅᕙᒃᑐᑦ ᐱᓕᕆᕝᕕᖕᒧᑦ ᑲᒪᔪᒧᑦ; ᒐᕙᒪᒃᑯᑦ ᑖᒃᑯᐊ ᐊᐅᓚᑦᓯᖃᑦᑕᖅᑐᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓱᒪᓕᐊᖏᑦ.  ᑕᐃᒪᓕ ᐃᓱᒪᓕᐅᕈᑕᐅᔪᖅ ᐊᖏᖅᑕᐅᖏᑉᐸᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᕈᑎᖃᒃᑲᓐᓂᕆᐊᖃᖅᐳᖅ ᒪᓕᒡᓗᒋᑦ ᐱᔾᔪᑎᐅᔪᑦ ᓇᓗᓇᐃᖅᑕᐅᓯᒪᔪᑦ ᒥᓂᔅᑕᐅᑉ ᑭᐅᔾᔪᑎᐊᑕ ᑎᑎᖅᑲᖏᓐᓂ.  ᓇᖁᓪᓗᒍ ᐅᓇ   ᑕᑯᓂᐊᕋᕕᐅᒃ ᐋᖅᑭᒡᓱᖅᓯᒪᓂᖓ ᐃᓱᒪᓕᐅᕐᓂᐊᖅᑎᓪᓗᒋᑦ ᐃᖏᕐᕋᓂᖓ ᐊᑐᖅᑕᐅᕙᒃᑐᖅ.

ᐊᐱᖅᑯᑦ. ᖃᓄᖅ ᑐᑭᖃᕐᒪᑦ ᐃᓄᐃᑦ ᖃᐅᔨᒪᔭᑐᖃᖏᑦ (IQ) ᐊᒻᒪ ᐃᓄᐃᑦ ᖃᐅᔨᒪᔭᑐᖃᖓᑦ ᐊᕙᑎᒧᑦ (TEK)?

ᑭᐅᔾᔪᑎ. ᐃᓄᐃᑦ ᖃᐅᔨᒪᔭᑐᖃᖓᑦ ᐊᕙᑎᒧᑦ ᐅᖃᐅᓯᖃᖅᐳᖅ ᐃᓄᐃᑦ ᖃᐅᔨᒪᓂᖏᓐᓄᑦ ᐆᒪᔪᓂᒃ ᐊᒻᒪ ᐊᕙᑎᒧᑦ, ᐃᓕᑕᐅᓯᒪᓪᓗᑎᒃ ᐃᓅᓯᖏᓐᓂ ᐊᑐᕐᓂᕐᒧᑦ ᐊᒻᒪ ᐊᓯᖏᓐᓂᑦ, ᑖᒃᑯᐊ ᐃᓕᖅᑯᓯᐅᔪᑦ ᐃᓕᓐᓂᐊᖅᑎᑦᑎᔾᔪᑕᐅᒐᔪᒃᑐᑦ ᓄᖃᖅᓯᐅᔪᓄᑦ (ᐊᓱ 1999).  ᐊᓱ (1999) ᑎᓴᒪᐅᓕᖅᑲᖓᓕᖅᑎᑦᓯᓯᒪᕗᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᕙᑎᒧᑦ:

  1. ᖃᓄᐃᓐᓂᖓᓂᒃ ᖃᐅᔨᒪᔭᐅᓪᓚᕆᒃᑐᑦ ᓄᓇᕐᔪᐊᖅ ᖃᓄᐃᓐᓂᖓ, ᐱᖃᓯᐅᑎᓪᓗᒍ ᓯᓚ, ᑕᕆᐅᕐᒧᑦ ᐃᒪᕐᒧᑦ ᖃᓄᐃᓐᓂᐅᔪᖅ ᐊᒻᒪ ᓯᑯᒧᑦ ᖃᓄᐃᓐᓂᐅᔪᖅ, ᓂᕐᔪᑎᑦ ᖃᓄᐃᓐᓂᕆᔭᖏᑦ ᐊᒻᒪ ᑭᓱᑯᑦᑎᕆᔭᖏᑦ.
  2. ᖃᓄᐃᓐᓂᖓ ᖃᐅᔨᒪᐅᓪᓚᕆᒃᑐᖅ ᐅᓪᓗᒥ ᐊᒻᒪ ᑭᖑᓂᑦᑎᓐᓂ ᐊᑐᖅᑕᐅᖃᑦᑕᓚᐅᖅᓯᒪᓂᖓ ᓄᓇᐅᑉ, ᐱᖃᓯᐅᑎᓪᓗᒍ ᓄᓇᐃᑦ ᖃᓄᐃᓕᖓᓪᓗᑎᒃ ᐊᑐᖅᑕᐅᕙᓚᐅᕐᒪᖔᑕ, ᐊᒻᒪ ᖃᑦᓯᓂᒃ ᐆᒪᔪᕐᓂᕐᒪᖔᑕ.
  3. ᐃᓕᖅᑯᓯᕐᒥᒃ ᑐᓐᖓᕕᖃᕐᖢᑎᒃ ᐅᖃᐅᑕᐅᓯᒪᔪᑦ ᑭᓱᑐᐃᓐᓇᐃᑦ ᖃᓄᐃᑦᑑᔭᕆᐊᖃᕐᒪᖔᑕ, ᐱᖃᓯᐅᑎᓪᓗᒋᑦ ᐃᓅᓯᑦᑎᐊᕙᑦ ᐅᕝᕙᓗ ᐱᑦᑎᐊᕐᓗᓂ ᐱᐅᓯᐅᔭᕆᐊᖃᖅᑐᑦ ᐅᐱᒋᓗᒋᑦ ᐆᒪᔪᑦ ᐊᒻᒪ ᓯᓚ.
  4. ᖃᐅᔨᒪᓂᐅᔪᑉ ᐊᐅᓚᓂᖓ ᑐᓐᖓᕕᖃᖅᑐᑦ ᓯᕗᓪᓕᕐᓂᒃ ᐱᖓᓱᓂᒃ, ᓇᓗᓇᐃᖅᓯᔾᔪᑎᓂᒃ ᐊᑐᐃᓐᓇᐅᑎᑦᓯᓂᖅ ᐊᒻᒪ ᑕᓯᐅᖅᓯᓂᖅ ᖃᓄᐃᒻᒪᑦ ᑕᒪᒃᑯᐊ ᑕᒪᐃᒻᒪᖔᑕ, ᐃᓗᓕᖏᓐᓂᒃ ᓇᓗᓇᐃᖅᓯᓪᓗᑎᒃ ᓴᖅᑭᒃᑲᔭᖅᑐᓂᒃ ᓯᕗᓪᓕᕐᓂᓐᖔᖅᑐᓂᑦ ᐊᒡᒍᖅᑐᖅᓯᔪᓂᑦ.

ᐃᓄᐃᑦ ᖃᐅᔨᒪᔭᑐᖃᖏᑦ ᑐᑭᓕᐅᖅᑕᐅᖃᑦᑕᖅᐳᖅ ᑭᓱᓕᒫᓂᒃ ᐃᓗᓕᖃᕐᓂᖏᓐᓂᒃ “…ᐃᓘᓐᓇᖏᓐᓂᒃ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐱᖃᓯᐅᑎᓪᓗᒋᑦ ᐅᒃᐱᕆᔭᖏᓐᓂᒃ, ᓄᓇᕐᔪᐊᕐᒥᒃ ᑕᑯᓐᓇᕐᓂᖏᓐᓂᒃ, ᐅᖃᐅᓯᖅ, ᐃᓅᖃᑎᒌᑦ ᐃᓅᓯᖃᑎᒌᖕᓂᖏᓐᓄᑦ, ᖃᐅᔨᒪᓂᖅ, ᐃᓅᓇᓱᐊᕐᓂᖅ, ᐃᓱᒪᒋᔭᑦ, ᐊᒻᒪ ᓂᕆᐅᒋᔭᑦ” (NSDC, 1998).  Wenzel ᐊᒻᒪ ᐱᖃᑎᖏᑦ (2008) ᓇᓗᓇᐃᖅᓯᔪᖅ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓗᓕᖃᑐᐃᓐᓇᖏᓐᓂᖓᓂᒃ ᐃᓄᐃᑦ ᐊᕙᑎᒧᑦ ᖃᐅᔨᒪᔭᑐᖃᖏᓐᓂᒃ, ᑭᓯᐊᓂᓕ ᐱᖃᓯᐅᔾᔨᓯᒪᓂᖓᓂᒃ ᖃᐅᔨᒪᓂᕐᓂᒃ ᐱᔾᔪᑎᖃᖅᑐᓂᒃ “ᖃᓄᖅ ᓄᓇᕐᔪᐊᖅ ᐊᐅᓚᓂᖃᕐᒪᖔᑦ ᐊᒻᒪ ᖃᓄᖅ ᐃᓕᖅᑯᓯᖃᕆᐊᖃᕐᒪᖔᑕ ᖃᐅᔨᒪᓂᕆᔭᐅᔪᖅ ᑐᑭᓕᐅᖅᑕᐅᔪᓐᓇᕐᓂᐊᕐᒪᑦ ᓯᕗᒧᐊᑦᑎᐊᖅᑐᒃᑯᑦ ᐊᕙᑎᒥᐅᑕᓂᒃ ᐱᓕᕆᐊᖃᕐᓂᕐᒧᑦ”.  ᑕᐃᒪᐃᒻᒪᑦ, ᐃᓄᐃᑦ ᖃᐅᔨᒪᔭᑐᖃᖏᑦ ᐅᖃᐅᑕᐅᔪᓐᓇᖅᐳᖅ ᐱᖃᓯᐅᔾᔨᓯᒪᓂᖓᓂᒃ ᓄᓇᕐᔪᐊᕐᒥ ᐃᓱᒪᒋᔭᐅᔪᓂᒃ, ᐅᒃᐱᕆᔭᐅᔪᓂᒃ, ᑐᓴᒐᒃᓴᓂᒃ ᐃᓅᖃᑎᒌᑦᐃᓅᓯᖃᑎᒌᖕᓂᖏᑕ ᐋᖅᑭᒡᓯᒪᓂᖓᓂᒃ, ᐃᓱᒪᒋᔭᐅᔪᓂᒃ, ᐅᖃᐅᓯᕐᓂᒃ, ᐊᒻᒪ ᐃᓅᓇᓱᐊᕈᑎᓂᒃ.  ᑕᒪᓐᓇ ᐱᔭᕐᓂᖅᑐᒃᑯᑦ ᓇᓗᓇᐃᖅᑕᐅᓯᒪᓪᓗᓂ ᐊᒃᑐᐊᖃᑎᒌᖕᓂᖏᓐᓂᒃ ᐃᓄᐃᑦ ᐊᕙᑎᒧᑦ ᖃᐅᔨᒪᔭᑐᖃᖏᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ, ᓇᓗᓇᐃᖅᑕᐅᓯᒪᔪᖅ ᑕᒪᓐᓇ ᐅᐃᓱᒧᑦ ᐊᒻᒪ ᐱᖃᑎᖏᓐᓄᑦ (2008) ᑖᒃᑯᐊ ᐃᓄᐃᑦ ᐊᕙᑎᒧᑦ ᖃᐅᔨᒪᔭᑐᖃᖏᑦ ᐃᓚᒋᔭᐅᓂᖏᓐᓂᒃ ᐃᓄᐃᑦ ᖃᐊᐅᔨᒪᔭᑐᖃᖏᓐᓂᒃ, ᑭᓯᐊᓂᓕ ᐃᓘᓐᓇᕆᓐᖏᑕᖏᑦ - ᐃᓘᓐᓇᖏᑦ ᐃᓄᐃᑦ ᖃᐅᔨᒪᔭᑐᖃᖓ ᐊᖏᓂᖅᓴᐅᕗᖅ ᑖᒃᑯᓇᓐᖓᑦ ᐃᓄᐃᑦ ᐊᕙᑎᒧᑦ ᖃᐅᔨᒪᓂᕆᔭᖏᓐᓂᑦ.  ᑐᑭᓯᒋᐊᒃᑲᓐᓂᕈᒪᒍᕕᑦ ᑐᑭᒧᐊᒍᑎᖏᑦ ᒪᓕᒐᖏᑦ ᐃᓄᐃᑦ ᖃᐅᔨᒪᔭᑐᖃᖏᑕ, ᐊᒻᒪ ᖃᓄᖅ ᐊᒃᑐᐊᓂᖃᕐᒪᖔᑦ ᒥᐊᓂᖅᓯᔾᔪᑎᓄᑦ ᐆᒪᔪᓂᒃ ᓄᓇᕗᒥ ᑕᑯᓗᒋ ᐅᑯᐊ ᓄᓇᕗᒥ ᐆᒪᔪᓕᕆᓂᕐᒧᑦ ᐱᖁᔭᕐᔪᐊᖅ.

ᑐᓴᐅᒪᔾᔪᑎᑦ ᐅᑯᓇᓐᖓᑦ ᐱᔭᐅᔪᑦ:

  • ᓄᓇᕗᒥ ᐃᓅᓯᓕᕆᓂᕐᒧᑦ ᑲᑎᒪᔨᖏᓐᓂᑦ (NSDC). 1998.   ᐃᓂᒃᑳᓕᐊᖅ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᕐᔪᐊᖅᑎᓪᓗᒋᑦ.  ᐃᒡᓗᓕᒃ, ᒫᔾᔨ 20-24.
  • ᐊᓱ, P. 1999.  ᐃᓄᐃᑦ ᐊᕙᑎᒧᑦ ᖃᐅᔨᒪᓂᖏᑦ ᐊᕙᑎ ᖃᐅᔨᓴᖅᑕᐅᑎᓪᓗᖑ ᐊᒻᒪ ᒥᐊᓂᖅᓯᔾᔪᑎᑦ, ᐅᑭᐅᖅᑕᖅᑐᕐᒥ.  53:2.
  • Wenzel, G., F. Weihs, G. Rigby.  2008.  ᐊᑐᖅᑕᐅᖃᑦᑕᕐᓂᖏᑦ ᐃᓄᐃᑦ ᐊᕙᑎᒧᑦ ᖃᐅᔨᒪᔭᑐᖃᖏᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ ᒥᐊᓂᖅᓯᔾᔪᑕᐅᓗᑎᒃ ᐆᒪᔪᓂᒃ ᓄᓇᕗᒥ: ᐱᒻᒪᕆᒃᑯᑦ ᕿᒥᕐᕈᓇᖕᓂᖅ.  ᐅᓂᒃᑳᓕᐊᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ.

 

ᐊᐱᖅᑯᑦ. ᖃᓄᕐᓕ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᖃᓯᐅᔾᔨᖃᑦᑕᕐᒪᑕ ᐃᓄᐃᑦ ᐊᕙᑎᒧᑦ ᖃᐅᔨᒪᔭᑐᖃᖏᓐᓂᒃ/ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ?

ᑭᐅᔾᔪᑎ. ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑎᓕᔭᐅᔾᔪᑎᑖᖅᑎᑕᐅᓯᒪᔪᑦ, ᐊᑑᒍᑦ ᓄᓇᕗᒥ ᐆᒪᔪᓕᕆᓂᕐᒧᑦ ᐱᖁᔭᕐᔪᐊᑎᒍᑦ, ᐱᖃᓯᐅᔾᔨᖁᓪᓗᒋᑦ ᑐᓐᖓᕕᖏᓐᓂᒃ ᐃᓄᐃᑦ ᖃᐅᔨᒪᔭᑐᖃᖏᑕ ᐱᓕᕆᐊᖃᓕᕌᖓᑕ ᐱᓕᕆᐊᒃᓴᖏᓐᓂᒃ ᓇᓗᓇᐃᖅᑕᐅᓯᒪᔪᓂ ᐃᓗᐊᓂ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ.  ᐱᔾᔪᑎᒋᓪᓗᒋᑦ ᐃᓱᒪᓕᐅᕐᓂᕐᒧᑦ ᐃᖏᕐᕋᓂᖓᑦ, ᓄᐊᑦᓯᖃᑦᑕᖅᑐᑦ ᐱᐅᓂᖅᐹᖑᔪᓂᒃ ᐊᑐᐃᓐᓇᐅᔪᓂᒃ ᑐᓴᒐᒃᓴᓂᒃ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ ᐱᔾᔪᑎᖃᖅᑎᓪᓗᒋᑦ ᐱᖃᓯᐅᔾᔨᒐᔪᒃᐳᑦ ᓄᓇᓕᖕᓂᑦ ᑐᓴᕋᓱᐊᕐᓂᕐᒥᒃ ᐅᕝᕙᓗ ᐃᓄᓕᒫᖅᑎᑦᓯᓪᓗᑎᒃ ᓈᓚᒃᑎᐅᓪᓗᑎᒃ ᑲᑎᒪᑎᑦᓯᓂᕐᒥᒃ.  ᓄᓇᓕᖕᓂ ᐊᖑᓇᓱᒃᑐᓕᕆᔨᑦ ᑲᑐᔾᔨᖃᑎᒌᖏᑦ ᐊᐱᕆᔭᐅᖃᑦᑕᕐᒥᔪᑦ ᑐᓴᕆᐊᕐᕕᐅᓪᓗᑎᒃ, ᐊᒻᒪ ᑐᓂᓯᕙᒃᑐᑦ ᐃᑲᔪᖅᓯᔾᔪᑎᖏᓐᓂᒃ ᑎᑎᖅᑲᓂᒃ ᐱᓕᕆᕝᕕᐅᔪᒧᑦ ᐅᕝᕙᓗ ᑎᒥᐅᔪᓄᑦ ᑐᓂᓯᔪᓄᑦ ᐱᔾᔪᑎᐅᔪᓄᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐃᓱᒪᓕᐅᕈᑕᐅᓂᐊᕐᒪᑦ.   ᑕᐃᒪᐃᓕᖓᑎᓪᓗᖑ, ᐃᓄᐃᑦ ᐊᖑᓇᓱᒃᑎᑦ, ᐃᓐᓇᐃᑦ, ᐊᒻᒪ ᐊᓯᖏᑦ ᓄᓇᖃᖅᑐᑦ ᐱᕕᖃᖅᑎᑕᐅᓪᓗᑎᒃ ᑐᓂᓯᔪᓐᓇᕐᓂᐊᕐᒪᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᑕᑯᓯᒪᔭᖏᓐᓂᒃ ᐱᔾᔪᑕᐅᔪᒧᑦ ᐃᓱᒪᒃᓴᖅᓯᐅᕈᑕᐅᔪᖅ ᐱᓪᓗᒍ ᑲᑎᒪᔨᓄᑦ.

ᐊᐱᖅᑯᑦ. ᖃᓄᕐᓕ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᖃᓯᐅᔾᔨᖃᑦᑕᕐᒪᑕ ᖃᓪᓗᓈᑦ ᖃᐅᔨᓴᖅᑎᒻᒪᕆᑦ ᖃᐅᔨᒪᓂᖏᓐᓂᒃ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ?

ᑭᐅᔾᔪᑎ.  ᓇᓕᐊᑐᐃᓐᓇᖅ ᐊᑐᐃᓐᓇᐅᔪᑦ ᖃᓪᓗᓈᑦ ᖃᐅᔨᓴᖅᑎᒻᒪᕆᑦ ᑐᓴᒐᒃᓴᖁᑎᖏᑦ, ᐊᕙᑎᒧᑦ ᐆᒃᑐᕋᐅᑎᐅᓪᓗᑎᒃ ᐱᒐᔪᒃᑐᑦ ᐊᒻᒪ ᓈᓴᐅᑎᓂᒃ ᕿᒥᕐᕈᓇᒍᑎᕕᓂᕐᓂᒃ ᑎᑎᕋᖃᑦᑕᖅᑐᑦ ᒐᕙᒪᒃᑯᑦ ᐱᓕᕆᕝᕕᖁᑎᖏᑦ, ᐱᖃᓯᐅᔾᔭᐅᓯᒪᖃᑦᑕᖅᑐᑦ ᑐᓴᒐᒃᓴᓂᒃ ᑐᓂᔭᐅᔪᓂ ᑲᑎᒪᔨᓄᑦ ᐃᓱᒪᒃᓴᖅᓯᐅᕈᑕᐅᓂᐊᖅᑐᒥᒃ ᑐᓂᓯᑎᓪᓗᒋᑦ ᐃᓱᒪᓕᐅᕈᑕᐅᖁᓪᓗᒍ.

ᐊᐱᖅᑯᑦ.  ᖃᓄᐃᓕᐅᕐᖢᑎᒡᓕ ᐱᓕᕆᖃᑕᐅᖃᑦᑕᖅᐸᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ  ᑲᓇᑕᐅᑉ ᒐᕙᒪᒃᑯᖏᓐᓂ ᐆᒪᔪᑦ ᐃᓄᐃᓴᓗᐊᕆᐊᖏᑦ ᐊᑦᑕᕆᔭᐅᓕᖅᑐᑦ ᑎᑎᕋᖅᑕᐅᓯᒪᕕᖏᓐᓂ?

]

ᑭᐅᔾᔪᑎ. ᓇᐅᒃᑯᑐᐃᓐᓇᖅ ᐃᖏᕐᕋᓂᖃᖅᑎᓪᓗᒍ, ᓄᓇᕗᑦ ᒐᕙᒪᒃᑯᖏᓐᓂ, ᐅᕝᕙᓗ ᑲᓇᑕᐅᑉ ᒐᕙᒪᒃᑯᖏᓐᓂ, ᑎᑎᕋᖅᑕᐅᒪᔪᒧᑦ ᐃᓕᓯᓂᐊᖅᑎᓪᓗᒋᑦ, ᐅᕝᕙᓗ ᐋᖅᑭᒋᐊᕆᓂᐊᖅᑎᓪᓗᒋᑦ ᑎᑎᕋᖅᑕᐅᒪᔪᒥᒃ ᐆᒪᔪᒥᒃ ᐅᕝᕙᓗ ᓂᕐᔪᑎᓂᒃ ᓄᓇᕗᒥᐅᑕᐅᔪᓂᒃ ᐊᖏᖅᑕᐅᓯᒪᔭᕆᐊᖃᖅᑐᖅ ᐊᖅᑯᑎᖃᕐᓗᑎᒃ ᐃᓱᒪᓕᐅᕈᑎᒋᔭᖓᓂᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ.  ᐊᒻᒪᓗ ᐊᓯᖏᑦ ᐊᑐᖅᑕᐅᓗᑎᒃ ᓄᓇᕗᑦ ᐅᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓱᒪᓕᐅᕐᓂᐊᕐᓗᑎᒃ ᐊᖅᑯᑎᒋᕙᒃᑕᖏᑦ, ᐃᓘᓐᓇᖏᓪᓗ ᐱᐅᓂᖅᐹᖑᔪᑦ ᐊᑐᐃᓐᓇᐅᔪᑦ ᑐᓴᒐᒃᓴᑦ ᑐᓂᔭᐅᓪᓗᑎᒃ ᑲᑎᒪᔨᓄᑦ ᐃᓱᒪᒃᓴᖅᓯᐅᕈᑕᐅᓂᐊᕐᒪᑕ ᐊᒻᒪ ᐃᓱᒪᓕᐅᕈᑕᐅᔪᖅ ᑐᓂᔭᐅᓪᓗᓂ ᑲᒪᔪᒧᑦ ᒥᓂᔅᑕᒧᑦ ᐊᖏᖅᑕᐅᒐᓱᐊᕐᓂᐊᕐᒪᑦ.  ᐃᖏᕐᕋᓂᖓ ᑕᒪᑐᒪ ᐱᓕᕆᔭᐅᖃᑦᑕᖅᑐᖅ ᒪᓕᒃᑕᐅᓪᓗᑎᒃ ᑐᑭᓯᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎᑦ ᐊᔾᔨᒌᓕᖅᑎᑕᐅᖁᓪᓗᒋᑦ ᐃᓕᔭᐅᓂᕆᔭᖏᑦ ᑕᑯᔭᐅᒐᔪᖏᑦᑐᑦ, ᐃᓄᐃᓴᓗᐊᕆᐊᖏᑦ ᐊᑦᑕᕆᔭᐅᓕᖅᑐᑦ ᐊᒻᒪ ᓄᖑᓐᓂᐊᖅᑐᒋᔭᐅᓕᖅᑐᑦ ᐆᒪᔪᑦ ᐃᓗᐊᒍᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᐅᔪᑦ ᐊᒻᒪ ᑎᑎᕋᖅᑕᐅᒪᕕᖏᓐᓂ ᐆᒪᔪᑦ ᐃᓄᐃᓴᓗᐊᕆᐊᖏᑦ ᐊᑦᑕᕆᔭᐅᓕᖅᑐᑦ ᐊᑖᒍᑦ ᐱᖁᔭᕐᔪᐊᖏᑕ ᐆᒪᔪᑦ ᐃᓄᐃᓴᓗᐊᕆᐊᖏᑦ ᐊᑦᑕᕆᔭᐅᓕᖅᑐᑦ.

ᐊᐱᖅᑯᑦ. ᖃᓄᕐᓕ ᓄᓇᖅᑲᑎᒌᖏᑦᑐᑦ ᐆᒪᔪᑦ ᐊᒻᒪ/ᐅᕝᕙᓗ ᓄᓇᖅᑲᑎᒌᖏᑦᑐᓄᑦ ᐅᒪᔪᖅᑕᐅᒐᓱᐊᖅᐸᒃᑐᑦ ᒥᐊᓂᕆᔭᐅᕙᖕᒪᑕ ᓄᓇᕗᒥ?

ᑭᐅᔾᔪᑎ. The ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ, ᐊᐅᓚᑦᓯᔨᐅᖃᑕᐅᔪᑦ ᐊᒡᒍᖅᑐᖅᓯᒪᓂᕐᒥ ᐆᒪᔪᓕᕆᓂᕐᒧᑦ ᑎᒥᖁᑎᖏᑦ, ᐊᒻᒪᓗ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᑎᒥᖁᑎᖏᑦ ᓴᓇᓯᒪᕗᑦ ᑐᑭᓯᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎᓂᒃ ᐱᖃᑎᒋᓪᓗᒋᑦ ᓄᓇᖅᑲᑎᒋᓐᖏᑕᕗᑦ  ᑲᓇᑕᒥ ᐊᒡᒍᖅᑐᖅᓯᒪᓂᖓᓂᓐᖔᖅᑐᓂᒃ ᐊᒻᒪ ᐅᑭᐅᖅᑕᖅᑐᕐᒥᐅᑦ ᒐᕙᒪᖏᓐᓂᒃ ᐃᑲᔪᖃᑎᒌᒡᓗᑎᒃ ᒥᐊᓂᖅᓯᓂᐊᕐᒪᑕ ᐆᒪᔪᓂᒃ ᓄᒃᑕᖅᑐᓂᒃ ᑲᓇᑕᐅᑉ ᐊᒡᒍᖅᑐᖅᓯᒪᓂᖏᑕ ᑭᒡᓕᖏᑎᒍᑦ.  ᐆᒃᑐᑎᒋᓗᒍ ᑐᒃᑐᑦ ᑭᒡᓕᖁᑎᓕᐊᖑᓯᒪᔪᓂᒃ ᒐᕙᒪᐅᔪᓄᑦ ᒪᓕᖏᒻᒪᑕ.  ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᓕᕆᖃᑕᐅᖃᑦᑕᕐᒥᔪᑦ ᓴᓇᑎᓪᓗᒋᑦ ᐃᖅᑲᓇᐃᔭᖃᑎᒌᓂᕐᒥᒃ ᓄᓇᕐᔪᐊᕐᒥ ᓄᓇᖅᑲᑎᒋᓐᖏᑕᑦᑎᓐᓂ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ ᑲᑎᒪᔨᐅᔪᓄᑦ ᑕᒪᒃᑯᐊ ᐱᐅᖅᓱᐊᖅᑕᐅᑦᑎᐊᖁᓪᓗᒋ ᐆᒪᔪᑦ ᓄᓇᖅᑲᑎᒌᖏᑦᑐᓄᑦ ᐱᔭᐅᓇᓱᐊᖅᐸᒃᑐᑦ.  ᐆᒃᑑᑎᑦᓯᐊᕙᐅᕗᑦ ᑲᐃᓐ ᐸᐃᓴᓐᒥ ᐊᒻᒪ ᐸᕙᓐ ᐸᐃᒥ ᓇᓄᐃᑦ ᑕᐅᕗᖓ ᑎᑭᑦᑕᖅᑐᑦ, ᑕᐃᒃᑯᐊ ᐃᓱᒪᖅᓱᕐᖢᑎᒃ ᐅᐸᖃᖅᑕᕐᒪᑕ ᓄᓇᕗᒧᑦ ᐊᒻᒪ ᐱᖓᖕᓇᖅᐸᓯᐊᓄᑦ ᐊᑯᑭᑦᑐᕐᒥᐅᑦ, ᐊᒻᒪ ᒥᐊᓂᕆᔭᐅᓂᖓᑦ ᑭᖑᒃᐸᑦ ᐊᒻᒪ ᖃᓕᕋᓕᑦ ᓄᓇᕐᔪᐊᕐᒥ ᓄᓇᖅᑲᑎᒌᖏᑦᑐᓄᑦ ᐱᓇᔪᒃᑕᐅᒐᓗᐊᖅᑎᓪᓗᒋᑦ.

Login Form