ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐅᓄᑲᓪᓚᒃᑐᓂᒃ ᑲᒪᒋᔭᒃᓴᓂᒃ ᑐᓂᔭᐅᓯᒪᕗᑦ, ᐱᓗᐊᖅᑐᒥᒃ ᐃᓗᐊᒍᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ (NLCA). ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᑎᓕᔭᐅᓯᒪᔾᔪᑎᒋᓪᓗᐊᑕᖅᑕᖏᑦ ᐱᓕᕆᐊᒃᓴᕆᓂᐊᕐᓗᒋᑦ ᐃᓗᐊᒍᑦ (ᓈᓴᐅᑖ 5.2.33 ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ), ᐃᓱᒪᖅᓱᕐᓗᑎᒃ ᐊᐅᓚᑦᑐᓐᓇᖅᑕᖏᑦ (ᓈᓴᐅᑖ 5.2.34), ᐊᒻᒪ ᖃᐅᔨᓴᐃᓂᕐᒧᑦ ᐊᐅᓚᑕᐅᔪᑦ (ᓈᓴᐅᑖ 5.2.37-5.2.38 ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ). ᑐᓴᖅᑎᑦᓯᓂᖅ ᐊᐅᓚᑕᖏᓐᓂᒃ ᐅᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ  ᑖᒃᑯᐊ ᑐᓐᖓᕕᒋᕙᐃᑦ ᐊᒻᒪ ᑐᕌᒐᒃᓴᕆᓪᓗᒋᑦ ᐃᓗᐊᓃᑦᑐᑦ ᓈᓴᐅᑎᖏᑕ 5.1.2 ᐊᒻᒪ 5.1.4 ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ ᐊᒻᒪ ᑐᓐᖓᕕᖏᑦ ᓈᓴᐅᑎᖓ 5 ᑐᑭᒧᐊᒃᑎᑦᓯᕗᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᒃ.

ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ  ᐱᓕᕆᐊᖃᖃᑦᑕᖅᐳᑦ ᐅᑯᓂᖓ ᐊᐅᓚᓪᓗᐊᑕᖅᑕᖏᓐᓂᒃ:

• ᐃᓚᐅᖃᑦᑕᖅᑐᑦ ᐅᕝᕙᓗ ᑐᑭᒧᐊᒃᑎᑦᓯᖃᑦᑕᖅᑐᑦ ᐆᒪᔪᑦ ᖃᐅᔨᓴᖅᑕᐅᓂᖏᓐᓂᒃ;
• ᐱᓕᕆᐊᖃᕐᓂᖅ ᐆᒪᔪᓄᑦ ᐊᖑᔭᓂᒃ ᖃᐅᔨᓴᐃᓂᕐᒥᒃ ᖃᑯᑎᒃᑯᑦ;
• ᐊᐃᕙᐅᑎᖃᕐᓂᖅ ᐃᓱᒪᒋᔭᑦ ᑭᓐᖒᒪᔭᐅᓗᑎᒃ ᐊᑐᖅᑕᐅᒋᐊᖃᕐᓂᖏᓐᓂᒃ;
• ᓴᖅᑭᑦᑎᓂᖅ, ᐋᖅᑭᒋᐊᕈᓂᖅ, ᐅᕝᕙᓗ ᐲᖅᓯᓂᖅ ᐅᓄᕐᓂᕆᔭᖏᓐᓂᒃ ᑲᑎᓐᖓᔪᑦ ᐆᒪᔪᖅᑕᐅᔪᓐᓇᖅᑐᑦ ᑭᒡᓕᖏᓐᓂᑦ;
• ᓴᖅᑭᑦᑎᓂᖅ ᐊᒻᒪ/ᐅᕝᕙᓗ ᐋᖅᑭᒋᐊᕆᓂᖅ ᐃᓄᐃᑦ ᓂᕿᒃᓴᕆᓂᐊᕐᓗᒋᑦ ᐆᒪᔪᕈᓐᓇᖅᑕᖏᑕ ᑭᒡᓕᖏᓐᓂᒃ;
• ᑐᓂᓯᐅᖅᑲᐃᓂᖅ ᐆᒪᔪᖅᑕᐅᔪᓐᓇᖅᑐᓂᒃ ᐊᒥᐊᒃᑯᓂᑦ ᐊᓯᖏᓐᓄᑦ ᓄᓇᖅᑲᑎᒋᔭᐅᔪᓄᑦ ᐊᒻᒪ ᐊᐅᓚᑕᐅᔪᓄᑦ ᓴᖅᑭᔮᖅᑐᓄᑦ;
• ᐊᑐᓕᖁᔭᓕᐅᖃᑦᑕᕐᓗᑎᒃ ᑐᓂᓯᐅᖅᑲᐃᓂᐅᑉ ᐊᒥᐊᒃᑯᓂᒃ ᒥᒃᓵᓄᑦ;
• ᓴᖅᑭᑦᑎᓂᖅ, ᐋᖅᑭᒋᐊᕆᓂᖅ ᐅᕝᕙᓗ ᐲᖅᓯᓂᖅ ᑰᑕᐅᖏᑦᑐᑦ ᐊᖑᓇᓱᖕᓂᕐᒧᑦ ᒪᓕᒐᖏᓐᓂᒃ; ᐊᒻᒪ
• ᐊᓯᖏᑦ ᐊᐅᓚᑕᐅᔭᕆᐊᖃᖅᑐᑦ ᐃᓗᐊᒍᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᒍᑦ ᐊᒻᒪ ᖁᓛᓂ ᑕᐃᔭᐅᓯᒪᖏᒃᑲᓗᐊᖅᑎᓪᓗᒍ.

ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓱᒪᖅᓱᕈᑎᒋᓗᒋᑦ ᐊᐅᓚᑦᑐᓐᓇᖅᑕᖏᑦ ᐅᑯᐊᖑᕗᑦ:

• ᐊᖏᖅᓯᓂᖅ ᓴᖅᑭᑦᑎᓂᕐᒥᒃ, ᐲᖅᓯᓂᕐᒥᑦ, ᐊᒻᒪ ᐊᓯᔾᔨᖅᓯᓂᕐᒥᒃ ᑭᒡᓕᖏᓐᓂᒃ ᐱᐅᖅᓱᐊᕐᕕᐅᔪᑦ ᓄᓇᑦ;
• ᓇᓗᓇᐃᖅᓯᓂᕐᒥᒃ ᐆᒪᔪᑦ ᒥᐊᓂᕆᔭᐅᕝᕕᖏᑕ ᑭᒡᓕᖏᓐᓂᒃ ᐊᒻᒪ ᐆᒪᔪᑦ ᐃᕐᓂᐅᕐᕕᖏᓐᓂᒃ ᐊᒻᒪ ᐊᑐᓕᖁᔭᓕᐅᖃᑦᑕᕐᓗᑎᒃ ᐅᑯᓄᖓ ᓄᓇᕗᒥ ᐸᕐᓇᐃᔨᑦ ᑲᒥᓴᖏᓐᓄᑦ ᐱᓪᓗᒋᑦ ᐸᕐᓇᐃᕝᕕᐅᓕᖅᑎᓪᓗᒋᑦ ᑕᐃᒃᑯᐊ ᓄᓇᐃᑦ;
• ᐊᖏᖅᓯᖃᑦᑕᕐᓂᖅ ᐸᕐᓇᐅᑎᓂᒃ ᒥᐊᓂᖅᓯᔾᔪᑎᒃᓴᓄᑦ ᐊᒻᒪ ᓴᐳᒻᒥᔭᐅᔾᔪᑎᒃᓴᖏᓐᓄᑦ ᐆᒪᔪᑦ ᓇᔪᒐᖏᑦ ᐱᖃᓯᐅᑎᓪᓗᒋᑦ ᐃᓗᐊᓃᑦᑐᑦ  ᓴᐳᒻᒥᐅᓯᖅᑕᐅᓯᒪᔪᑦ ᓄᓇᐃᑦ;
• ᐊᖏᖅᑕᐅᓗᑎᒃ ᐸᕐᓇᐅᑎᑦ ᐅᑯᓄᖓ:
  • ᒥᐊᓂᕆᔭᐅᓂᖓᓄᑦ, ᓇᓗᓇᐃᖅᑕᐅᓂᖓᓄᑦ, ᓴᐳᓗᒻᒥᔭᐅᓂᖓᓄᑦ, ᐆᒪᔪᑦ ᐅᑎᖅᑎᑕᐅᓂᖏᓐᓄᑦ ᐅᕝᕙᓗ ᐆᒪᔪᓂᒃ ᐃᓕᐅᖅᑲᐃᓂᕐᒧᑦ, ᐱᕈᖅᓴᐃᓂᕐᒧᑦ ᐅᕝᕙᓗ ᕿᑐᕐᖏᐅᖅᑎᑦᓯᓂᕐᒧᑦ ᐆᒪᔪᓂᒃ ᐱᓗᐊᖅᑐᒥᒃ, ᐱᖃᓯᐅᑎᓪᓗᒋᑦ  ᓄᖑᓐᓂᐊᖅᑐᖏᔭᐅᓕᖅᑐᑦ ᐆᒪᔪᑦ; ᐊᒻᒪ
  • ᐊᐅᓚᑦᓯᓂᕐᒧᑦ ᒪᓕᒐᖏᑦ ᑎᑭᑎᑦᓯᖃᑦᑕᕐᓂᕐᒧᑦ ᓄᓇᖅᑲᑎᒋᓐᖏᑕᖓᓂᓐᖔᖅᓯᒪᔪᓂᒃ  ᐆᒪᔪᓂᒃ ᐊᒻᒪ ᒥᐊᓂᕆᔭᐅᓂᖏᓐᓄᑦ  ᓄᒃᑎᖅᑕᐅᒪᔪᑦ ᐆᒪᔪᑦ;
• ᐅᖃᐅᔾᔨᒋᐊᖃᑦᑕᕐᓗᑎᒃ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ , ᓄᓇᕗᒥ ᐊᕙᑎᒧᑦ ᐊᒃᑐᐃᓂᖓᓂᒃ ᕿᒥᕐᕈᔨᑦ ᑲᑎᒪᔨᖏᑦ ᐊᒻᒪ ᐊᓯᖏᓐᓄᑦ ᑎᒥᐅᔪᑦ ᐱᓕᕆᕝᕕᖏᓐᓄᑦ ᐱᓪᓗᒋᑦ ᐱᓕᕆᔭᐅᓂᖏᓐᓄᑦ ᐋᖅᑭᒋᐊᕈᑎᐅᔪᑦ ᐊᒻᒪ ᐊᑭᓕᖅᓯᔾᔪᑎᐅᔪᑦ ᐊᒃᑐᐊᓂᖃᖅᑐᑦ ᐊᒃᑐᖅᑕᐅᓯᒪᔪᓄᑦ ᓂᐅᕐᕈᑕᐅᓂᖏᓐᓄᑦ ᐊᒻᒪ ᐱᕙᓪᓕᐊᑎᑦᓯᓂᕐᒧᑦ ᐆᒪᔪᑦ ᓇᔪᒐᖏᓪᓗ ᐊᒃᑐᖅᑕᐅᑎᓪᓗᒋᑦ;
• ᐊᖏᖅᓯᖃᑦᑕᕐᓗᑎᒃ ᑎᒃᑯᐊᖅᑕᐅᓂᖏᓐᓂᒃ ᑕᑯᔭᐅᒐᔪᖏᑦᑐᑦ, ᐃᓄᐃᓴᓗᐊᕆᐊᖏᓐᓂᒃ ᐊᑦᑕᕆᔭᐅᓕᖅᑐᑦ ᐊᒻᒪ ᓄᖑᓐᓂᐊᖅᑐᒋᔭᐅᓕᖅᑐᑦ ᐆᒪᔪᑦ;
• ᐅᖃᐅᔾᔨᒋᐊᖃᑦᑕᕐᓗᑎᒃ ᐱᓪᓗᒋᑦ ᑲᔪᖏᖅᓴᐅᑕᐅᓂᖏᑦ ᐆᒪᔪᓂᒃ ᐃᓕᓐᓂᐊᕐᓂᕐᒧᑦ, ᑐᓴᐅᒪᑎᑦᓯᓂᕐᒧᑦ ᐊᒻᒪ ᐃᓕᓐᓂᐊᖅᑎᑕᐅᖃᑦᑕᕐᓗᑎᒃ ᐃᓄᐃᑦ ᐆᒪᔪᓂᒃ ᒥᐊᓂᖅᓯᓂᕐᒥᒃ; ᐊᒻᒪ
• ᓴᓇᖃᑦᑕᕐᓗᑎᒃ ᐱᓕᕆᔭᐅᔪᓐᓇᖅᑐᑦ ᐃᓕᓐᓂᐊᖅᓯᒪᔭᕆᐊᖃᖅᑕᖏᓐᓂᒃ ᐱᓪᓗᒋᑦ ᐊᐅᓪᓚᐅᔾᔨᔨᐅᔪᑦ;

ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᓕᕆᔪᒪᒍᑎᒃ ᐱᓕᕆᐊᖃᕈᓐᓇᕐᒥᔪᑦ ᐊᓯᖏᓐᓂᒃ ᐱᓕᕆᐊᒃᓴᓂᒃ ᐊᒃᑐᐊᓂᖃᖅᑐᓂᒃ ᒥᐊᓂᖅᓯᓂᕐᒧᑦ ᐊᒻᒪ ᐊᐅᓚᑦᓯᔾᔪᑎᑦ ᒪᓕᒐᕋᓛᖏᓐᓂᒃ ᐆᒪᔪᕋᓱᐊᕐᓂᕐᒧᑦ ᓄᓇᕗᑦ ᐃᓗᐊᓂ ᒪᓕᒡᓗᒋᑦ ᐊᖏᖃᑎᒌᒍᑕᐅᓯᒪᔪᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐊᒻᒪᓗ ᒐᕙᒪᒃᑯᓐᓄᑦ.