ᐅᑯᐊ ᐃᓗᓕᖏᑦ ᖃᓪᓗᓈᑎᑑᖓᔪᑦ ᐊᑐᐃᓐᓇᐅᖕᒥᔪᑦ.

ᑐᕌᒐᒃᓴᑦ

  • ᒪᓕᒃᓯᒪᓕᖁᓪᓗᒋᑦ ᐊᑑᑎᖃᖅᑐᓄᑦ ᑎᓕᔭᐅᔾᔪᑎᐅᔪᓄᑦ ᓄᓇᕐᔪᐊᕐᒥ ᐊᖏᖃᑎᒌᒍᑎᓂᒃ ᐊᕙᑎᒥᐅᑕᓕᕆᓂᕐᒧᑦ, ᐊᒻᒪᓗ ᑲᓇᑕᒥᐅᑕᑦ ᐊᕙᑎᒥᐅᑕᓕᕆᓂᕐᒧᑦ ᐅᐸᓗᖓᐃᔭᐅᑎᖓ;
    • ᓄᓇᕐᔪᐊᕐᒥ ᐊᖏᖃᑎᒌᒍᑎᑦ ᐊᕙᑎᒥᐅᑕᓕᕆᓂᕐᒧᑦ, ᓈᓴᐅᑎᖓ 8: ᐅᐱᒍᓱᒡᓗᓂ, ᐱᐅᖅᓱᐊᕐᓗᓂ, ᐊᒻᒪ ᐱᓯᒪᔭᐅᓗᑎᒃ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᑦ, ᐃᓱᒪᒐᔪᖕᓂᕆᔭᖏᑦ, ᐊᒻᒪᓗ ᐱᖅᑯᓯᖏᑦ, ᐊᒻᒪ ᑲᔪᖏᖅᓴᐅᑎᖏᓗᒋᑦ ᐊᕙᑦᓯᓚᒃᓯᒪᓂᖅᓴᒧᑦ ᐊᑐᖅᑕᐅᖁᓪᓗᒋᑦ.
    • ᑲᓇᑕᒥ ᐊᕙᑎᒥᐅᑕᓕᕆᓂᕐᒧᑦ ᐅᐸᓗᖓᐃᔭᐅᑎ, ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᖅᑕᐅᔪᓐᓇᖅᑐᑦ ᑐᓐᖓᕕᐅᓗᑎᒃ ᓴᓇᑎᓪᓗᒋᑦ ᐃᐅᖅᓱᐊᕐᓂᕐᒧᑦ ᐊᒻᒪ ᓄᖑᑦᓯᕙᓪᓕᐊᖏᓐᓂᕐᒧᑦ ᐊᑐᐊᒐᒃᓴᓂᒃ ᐊᒻᒪ ᐱᓕᕆᔾᔪᑎᒃᓴᓄᑦ.  ᐅᓄᖅᑐᐃᖅᓱᓗᐊᕐᖢᑎᒃ, ᑭᓯᐊᓂ ᐃᓄᐃᑦ ᖃᐅᔨᒪᔭᑐᖃᖓᑦ ᐊᑐᖅᑕᐅᑦᑎᐊᖃᑦᑕᖅᓯᒪᖏᒻᒪᑦ ᐅᕝᕙᓗ ᓱᖁᑎᒋᔭᐅᓇᑎᒃ ᐊᑐᐊᒐᓕᐅᖅᑎᐅᔪᓄᑦ, ᖃᐅᔨᓴᖅᑎᒻᒪᕆᖕᓄᑦ, ᐱᓕᕆᐊᒃᓴᓄᑦ ᐸᕐᓇᐃᔨᓄᑦ, ᐊᒻᒪ ᐊᖓᔪᖅᑲᐅᑎᐅᔪᓄᑦ.
  •  ᑕᒪᒃᑯᐊ ᐊᑑᑎᖃᖅᑐᑦ ᐊᑐᖅᑕᐅᖁᓪᓗᒋᑦ ᐊᒻᒪ ᑐᕌᒐᒃᓴᕆᔭᖏᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ (NLCA); ᐊᒻᒪ
    • ᓄᓇᕗᒥ ᓄᓇᑖᕈᑎᓄᑦ ᐊᖏᕈᑎᓂ, ᓈᓴᐅᑎᖓ 5.1.2(e): ᑭᓐᖒᒪᒃᓯᕋᑦᑕ ᐊᑑᑎᖃᑦᑎᐊᖅᑐᒥᒃ ᐊᐅᓚᓂᐅᒐᔭᖅᑐᒥᒃ ᒥᐊᓂᖅᓯᔾᔪᑕᐅᒐᔭᖅᑐᓂᒃ ᓂᕐᔪᑎᓄᑦ...ᐃᓕᓴᖅᓯᓯᒪᓗᑎᒃ ᐃᓄᐃᑦ ᐊᐅᓚᑦᑎᔾᔪᓯᖏᓐᓂᒃ ᐆᒪᔪᓂᒃ ᒥᐊᓂᖅᓯᑎᓪᓗᒋᑦ ᐃᑲᔪᕐᓂᖃᖅᑐᓂᒃ ᐱᐅᖅᓱᐊᕐᓂᕐᒧᑦ ᓂᕐᔪᑎᓂᒃ ᐊᒻᒪ ᓴᐳᒻᒥᔭᐅᓂᖏᓐᓄᑦ ᓂᕐᔪᑎᑦ ᓇᔪᖓᖏᑦ.”
    • ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ ᓈᓴᐅᑎᖏᑦ 5.1.3(b) ii ᐊᒻᒪ iii: … ᐆᒪᔪᓂᒃ ᒥᐊᓂᖅᓯᔾᔪᑎᓄᑦ ᐊᐅᓚᑦᑎᔾᔪᑎ ᐃᓕᓴᖅᓯᓯᒪᑦᑎᐊᕐᓗᓂ ᐊᒻᒪ ᐱᖃᓯᐅᔾᔨᓯᒪᓗᓂ ᐱᓕᕆᖃᑕᐅᓂᖏᓐᓂᒃ ᐃᓄᐃᑦ ᐊᖑᓇᓱᒃᑎᐅᓂᖏᑎᒍᑦ...(ᐊᒻᒪᓗ)  ᐱᔨᑦᓯᕈᑕᐅᓗᑎᒃ ᐊᒻᒪ ᑲᔪᖏᖅᓴᐅᑕᐅᓗᑎᒃ ᓯᕕᑐᔪᒧᑦ ᑮᓇᐅᔭᓕᐅᕈᑕᐅᔪᓐᓇᕐᓂᐊᕐᒪᑕ, ᐃᓅᓯᖏᓐᓄᓪᓗ ᐊᒻᒪ ᐃᓕᖅᑯᓯᖏᓐᓄᑦ ᐱᔪᒪᔭᖏᑦ ᐊᑐᕐᓗᒋᑦ ᐃᓄᐃᑦ ᐊᖑᓇᓱᒃᑎᐅᔪᑦ.”
  • ᒪᓕᒃᓯᖁᓪᓗᒋᑦ ᐊᑑᑎᖃᖅᑐᓂᒃ ᒪᓕᒐᐅᔪᓂᒃ ᑐᓐᖓᕕᐅᔪᓂᒃ ᐊᒻᒪ ᐃᓱᒪᒋᔭᐅᔪᓂᒃ ᓄᓇᕗᒥ ᐆᒪᔪᓄᑦ ᐱᖁᔭᕐᔪᐊᑦ ᐃᓗᐊᓂ;
    • ᐱᖁᔭᕐᔪᐊᑦ ᐊᑖᒍᑦ, ᑕᒪᕐᒥᒃ ᓄᓇᕗᑦ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓇᓚᒎᖅᑐᒃᑯᑦ ᐱᓕᕆᐊᒃᓴᖃᖅᐳᑦ ᒪᓕᒃᑕᐅᖁᓪᓗᒋᑦ ᐊᑑᑎᖃᕐᓂᖏᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᒪᓕᒐᖏᓐᓂ ᐱᓕᕆᐊᖃᓕᕌᖓᑕ ᐱᓕᕆᐊᒃᓴᖏᓐᓂᒃ. 
  • ᓯᕗᒧᐊᒃᑎᑕᐅᑦᑎᐊᖁᓪᓗᒋᑦ ᐃᖏᕐᕋᓂᕆᔭᖏᑕ ᐃᓗᐊᓂ ᐊᒻᒪ ᐃᓕᖅᑯᓯᕐᒥᒃ ᐊᑑᑎᖃᖅᑐᓂᒃ ᐱᖃᓯᐅᔾᔨᓯᒪᑦᑎᐊᕐᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂ ᓂᕐᔪᑎᑦ ᖃᐅᔨᓴᖅᑕᐅᓂᖏᑎᒍᑦ ᐊᒻᒪ ᒥᐊᓂᕆᔭᐅᓂᖏᑎᖑᑦ ᐃᓗᐊᓂ ᓄᓇᕗᒥ; ᐊᒻᒪᓗ ᓴᓇᖁᓪᓗᒋᑦ ᓴᓐᖏᔪᒥᒃ, ᐃᑲᔪᖃᑎᒌᒃᑐᒃᑯᑦ ᐱᓕᕆᖃᑎᒌᒡᓗᑎᒃ ᖃᓪᓗᓈᑦ ᖃᐅᔨᓴᖅᑎᒻᒪᕆᖏᑦ ᑭᒡᓕᓯᓂᐊᖅᑎᑦ ᐊᒻᒪ ᐃᓄᐃᑦ ᖃᐅᒪᔨᔭᑐᖃᖏᑦ, ᓴᖅᑭᑦᑎᓗᑎᒃ ᐊᑑᑎᖃᑦᑎᐊᕐᓂᒃᓴᒃᑯᑦ ᓂᕐᔪᑎᓄᑦ ᒥᐊᓂᖅᓯᔾᔪᑎᓂᒃ ᓄᓇᕗᑦ ᐃᓗᐊᓂ.

 

ᖃᓄᐃᓚᐅᕐᒪᖔᑦ

ᐃᓄᐃᑦ ᐊᕙᑎᒧᑦ ᖃᐅᒪᔭᑐᖃᖏᑦ ᐱᔾᔪᑎᖃᖅᐳᑦ ᓇᓗᓇᐃᖅᑕᐅᓯᒪᔪᒥᒃ ᖃᐅᔨᒪᓂᐅᔪᒥᒃ, ᐱᔭᐅᓯᒪᔪᖅ ᐊᖅᑯᑎᒋᓪᓗᒍ ᐃᓄᐃᑦ ᐊᑐᖅᓯᒪᔭᖏᑎᒍᑦ, ᐊᔾᔨᒌᖏᑦᑐᓂᒃ ᐊᕙᑎᐅᑉ ᒥᒃᓵᓄᑦ, ᐱᖃᓯᐅᑎᓯᒪᓪᓗᑎᒃ ᐱᕈᖅᑐᓂᒃ, ᓂᕐᔪᑎᓂᒃ, ᓯᓚᒥᒃ, ᐊᒻᒪ ᐊᕙᑎᒥᐅᑕᐅᔪᓂᒃ ᑕᑯᒃᓴᐅᔪᓂᒃ.  ᐃᓄᐃᑦ ᐊᕙᑎᒧᑦ ᖃᐅᒪᔭᑐᖃᖏᑦ ᐱᖃᓯᐅᔾᔨᓯᒪᕗᑦ ᑐᑭᓕᐅᕆᓂᕐᒥᒃ ᐃᓗᓕᖏᓐᓂᒃ ᓯᓚᒥᐅᑕᑦ.  ᐃᓄᐃᑦ ᖃᐅᒪᔭᑐᖃᖏᑦ ᐃᓗᓕᖃᖅᐳᑦ ᐃᓄᐃᑦ ᐊᕙᑎᒧᑦ ᖃᐅᒪᔭᖏᓐᓂᒃ, ᐊᒻᒪᓗ ᐃᓄᐃᑦ ᐅᒃᐱᕆᔭᖏᓐᓂᒃ ᖃᓄᖅ ᓄᓇᕐᔪᐊᖅ ᐊᐅᓚᓂᖃᖃᑦᑕᕐᒪᖔᑦ ᐊᒻᒪ ᐃᓕᖅᑯᓯᕆᔭᕆᐊᖃᖅᑕᖏᑦ ᐃᓅᖃᑎᒌᑦ ᐆᒪᔪᕋᓱᐊᖅᑎᓪᓗᒋᑦ ᓯᓚᒥ.  ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓄᐃᑦ ᖃᐅᒪᔭᑐᖃᖏᓐᓄᑦ ᐱᓕᕆᐊᖓᑦ ᐃᓕᓴᖅᓯᓯᒪᕗᖅ ᑎᓴᒪᐅᓕᖅᑲᖓᓪᓗᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ;

ᖃᐅᔨᒪᓂᕆᓪᓚᕆᒃᑕᖏᑦ ᓯᓚᐅᑉ ᒥᒃᓵᓄᑦ, ᐊᒻᒪ ᑐᑭᓕᐅᕆᓂᖅ ᐊᕙᑎᒥᐅᑕᐅᔪᑦ ᐊᒃᑐᐃᖃᑎᒌᒃᓯᒪᓂᖏᓐᓂᒃ (ᐃᓄᐃᑦ ᐊᕙᑎᒧᑦ ᖃᐅᔨᒪᔭᑐᖃᖏᑦ);

  1. ᖃᐅᔨᒪᓂᕆᔭᐅᓪᓚᕆᒃᑐᖅ ᐊᕙᑎᒧᑦ, ᐊᒻᒪ ᑐᑭᓕᐅᕆᓂᕆᔭᐅᕙᒃᑐᖅ ᐃᓚᖏᓐᓂᒃ ᐊᕙᑎᒥᐅᑕᑦ ᐊᒃᑐᐃᓂᖃᖅᑐᑦ ᐊᓯᖏᓐᓂᒃ ᐃᓄᐃᑦ ᐊᕙᑎᒧᑦ ᖃᐅᔨᒪᔭᖏᓐᓄᑦ:
  2. ᖃᐅᔨᒪᓂᕆᔭᐅᓪᓚᕆᒃᑐᖅ ᑭᖑᓂᑦᑎᓐᓂ ᐊᑐᖅᑕᐅᕙᓚᐅᖅᑐᓂᒃ ᐊᒻᒪ ᐅᓪᓗᒥ ᐊᑐᖅᑕᐅᕙᖕᓂᖓᓂᒃ (ᐊᒡᒍᖅᑐᖅᓯᒪᓂᕐᒥ) ᐊᕙᑎᐅᑉ;
  3. ᐊᓐᓂᕆᔭᐅᓂᖏᑦ ᐊᕙᑎᐅᑉ (ᓯᓚᐅᑉ) − ᖃᓄᐃᓕᖓᔭᕆᐊᖃᕐᒪᖔᑦ, ᖃᓄᐃᓕᐅᕐᓗᓂ ᑕᒻᒪᖏᓪᓗᓂ ᐱᓕᕆᐊᖃᕐᓇᖅᐸ, ᖃᓄᕐᓕ ᐱᖅᑯᓯᖃᕆᐊᖃᖅᐱᑕ ᓂᕐᔪᑎᓄᑦ ᐊᒻᒪ ᐊᕙᑎᒥᐅᑕᓄᑦ (ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᓐᓂᕆᔭᑦ); ᐊᒻᒪᓗ
  4. ᐃᓕᖅᑯᓯᕐᒥᒃ ᑐᓐᖓᕕᖃᕐᓗᑎᒃ ᐃᓘᓐᓇᖏᓐᓄᑦ ᐃᓄᐃᑦ ᐅᒃᐱᕆᔭᖏᓐᓄᑦ ᐊᒻᒪ ᖃᐅᔨᒪᓂᕐᒧᑦ ᐊᐅᓚᓂᖃᕐᓗᑎᒃ − ᐋᖅᑭᒡᓱᖅᓯᒪᓂᕆᒐᔭᖅᑕᖓ ᐱᒋᐊᕐᓂᖓᓂ ᓇᓗᓇᐃᖅᓯᔾᔪᑎᓂᒃ ᐱᑕᖃᕐᓗᓂ ᖃᓄᐃᒻᒪᑦ ᑕᐃᒪᐃᓕᖓᖕᒪᖔᑕ ᐃᓄᐃᑦ ᖃᐅᔨᒪᔭᑐᖃᖏᑦ.

ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐱᓕᕆᐊᖏᑦ ᐅᑯᓂᖓ ᐃᓗᓕᖃᕐᓂᐊᖅᑐᑦ ᑕᓪᓕᒪᓂᒃ ᑲᑎᓐᖓᐅᖅᑐᓂᒃ ᐃᓗᓕᕆᔭᖏᓐᓂᒃ:

1. ᐃᓄᐃᑦ ᖃᐅᔨᒪᔭᑐᖃᖏᑦ ᖃᕆᑕᐅᔭᒃᑯᑦ ᑐᖅᑯᐃᕕᖓ ᐊᒻᒪ ᐅᖃᓕᒫᒐᖃᕐᕕᒃ

ᐱᔾᔪᑎᖓ ᐃᓄᐃᑦ ᑲᐅᔨᒪᔭᑐᖃᖏᓐᓄᑦ ᖃᕆᑕᐅᔭᒃᑯᑦ ᑐᐃᖅᑯᐃᕕᐅᑉ ᐊᒻᒪ ᐅᖃᓕᒫᒐᖃᕐᕕᖃᕐᓂᐅᑉ ᐅᓇᐅᕗᖅ:

  • ᐃᑲᔪᖅᓯᖁᓪᓗᒍ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᑎᑭᓐᓇᓱᐊᖅᑎᓪᓗᒋᑦ ᑕᐅᑐᓐᖑᐊᖅᑕᖏᓐᓄᑦ: “ᐱᐅᖅᓱᐊᕐᓗᑎᒃ ᓂᕐᔪᑎᓂᒃ ᐊᑐᕐᓂᒃᑯᑦ ᐃᓄᐃᑦ ᖃᐅᒪᔭᑐᖃᖏᓐᓂᒃ ᐊᒻᒪ ᖃᐅᔨᓴᖅᑎᒻᒪᕆᑦ ᑭᒡᓕᓯᓂᐊᖅᑎᑦ ᖃᐅᔨᒪᓂᕆᔭᖏᓐᓂᒃ;
  • ᐃᑲᔪᖅᓯᖁᓪᓗᒍ ᐱᐅᓯᒋᐊᖁᓪᓗᒍ ᑐᑭᓯᐅᒪᓂᕆᔭᐅᔪᖅ ᐅᑭᐅᖅᑕᖅᑐᕐᒥᒃ, ᐊᒻᒪ ᓴᓇᖁᓪᓗᒋᑦ ᐋᖅᑭᒋᐊᕈᑎᒃᓴᓂᒃ ᐊᕙᑎᓕᕆᓂᕐᒧᑦ ᐊᒻᒪ ᐆᒪᔪᐃᑦ ᒥᐊᓂᕆᔭᐅᓂᖏᓐᓄᑦ ᐊᑲᐅᓐᖏᓕᐅᕈᑎᐅᔪᓄᑦ;
  • ᓴᓇᖁᓪᓗᒋᑦ ᕿᓂᖅᑕᐅᔪᓐᓇᑦᑎᐊᖅᑐᓂᒃ ᑐᓴᒐᒃᓴᓂᒃ ᓄᐊᑦᑎᕕᐅᔪᒥᒃ ᐃᓄᐃᑦ ᓄᓇᖃᖅᑳᖅᓯᒪᔪᓪᓗ ᖃᐅᔨᒪᓂᕆᔭᖏᓐᓂᒃ ᐃᓚᓕᐅᑎᖁᓪᓗᒋᑦ ᒫᓐᓇᕐᓂᓴᕐᓄᑦ ᐊᒻᒪ – ᐅᓪᓗᒥᒧᑦ ᑎᑭᓪᓗᒍ –
  • ᑐᓴᒐᒃᓴᓂᒃ ᓄᐊᑦᑎᕕᖃᕐᓗᑎᒃ ᖃᐅᔨᓴᖅᑎᒻᒪᕆᑦ ᖃᐅᔨᒪᓂᕆᔭᖏᓐᓂᒃ ᐊᑐᖅᑕᐅᖃᑦᑕᕐᓗᑎᒃ ᑕᑎᒋᔭᐅᓗᑎᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ;
  • ᐊᑐᐃᓐᓇᐅᑎᑦᑎᓗᑎᒃ ᐊᑐᖅᑕᐅᑦᑎᐊᕈᓐᓇᖅᑐᒥᒃ ᖃᐅᔨᓴᐃᓂᕐᒧᑦ ᓴᓇᕐᕈᑎᒃᓴᒥᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ (ᐊᒻᒪᓗ ᐊᐅᓚᑦᓯᔨᐅᖃᑎᒋᔭᖏᓐᓄᑦ) ᐱᓕᕆᐊᖃᖅᑎᓪᓗᒋᑦ ᑎᓕᔭᐅᓯᒪᔾᔪᑎᒋᔭᖏᓐᓂᒃ; ᐊᒻᒪᓗ
  • ᐃᓕᓴᖅᓯᖁᓪᓗᖏᑦ ᐱᒻᒪᕆᔪᒃᑯᑦ ᐊᑑᑎᖃᕐᓂᖏᓐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᓄᓇᕗᒥ ᐆᒪᔪᓂᒃ ᒥᐊᓂᖅᓯᑎᓪᓗᒋᑦ ᐊᒻᒪ ᐃᑲᔪᖅᓯᖁᓪᓗᒋᑦ ᑎᓕᐅᕆᑎᓪᓗᒋᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᓴᐃᓂᕐᒥᒃ.

2. ᐃᓄᐃᑦ  ᖃᐅᔨᒪᔭᑐᖃᖏᓐᓄᑦ ᐱᓕᕆᔨ ᐃᖅᑲᓇᐃᔭᖅᑎ;

ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐱᓕᕆᔨ ᐃᖅᑲᓇᐃᔭᖅᑎ ᑲᒪᒋᔭᖃᕐᓂᐊᖅᑐᖅ ᐃᓕᐅᖅᑲᐃᖃᑦᑕᕐᓂᕐᒥᒃ ᐅᓪᓗᒥᓯᐅᑎᕈᖅᑎᓪᓗᓂᒋᑦ ᐃᓄᐃᑦ ᖃᐅᒪᔭᑐᖃᖏᓐᓄᑦ ᖃᕆᑕᐅᔭᒃᑯᑦ ᑐᖅᑯᐃᕕᒃ ᐊᒻᒪᓗ ᐅᖃᓕᒫᒐᖃᕐᕕᒃ ᓄᑖᑦ ᑐᓴᒐᒃᓴᑦ ᐊᑐᐃᓐᓇᕈᖅᐸᓪᓕᐊᑎᓪᓗᒋᑦ, ᐊᒻᒪᓗ

ᓯᕗᒧᐊᒃᑎᑦᑎᖁᓪᓗᒋᑦ ᖃᕆᑕᐅᔭᒃᑯᑦ ᑐᓴᒐᒃᓴᖃᕐᕕᐅᔪᖅ ᐊᑐᖅᑕᐅᖃᑦᑕᑦᑎᐊᖁᓪᓗᒍ ᐊᑐᖅᑕᐅᔪᓐᓇᕐᓂᓕᒫᖓᒍᑦ ᐱᔾᔪᑎᒋᓪᓗᒍ ᐊᒃᑐᐊᓂᖃᕐᓂᖓᓄᑦ ᐱᓕᕆᐊᒃᓴᖏᓐᓄᑦ ᐊᒻᒪ ᐊᐅᓚᑕᖏᓐᓄᑦ ᑲᑎᒪᔨᑦ ᒪᓕᒡᓗᒋᑦ  ᑕᐃᔭᐅᓯᒪᔪᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ.

3. ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᖃᐅᔨᓴᐃᓂᕐᒧᑦ ᐱᓕᕆᐊᖅ;

ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᖃᕆᑕᐅᔭᒃᑯᑦ ᑐᖅᑯᐃᕕᒃ ᐊᑐᖅᑕᐅᓂᐊᕐᒥᔪᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ (ᐊᐅᓚᑦᓯᔨᐅᖃᑎᖏᓐᓄᓪᓗ) ᓇᓗᓇᐃᖅᓯᒐᓱᐊᖅᑎᓪᓗᒋᑦ ᖃᐅᔨᓴᖅᑕᐅᖅᑳᕆᐊᓕᒃᓂ ᓯᕗᓪᓕᐅᔾᔭᐅᔪᓂᒃ, ᐊᒻᒪᓗ

ᓴᓇᓗᑎᒃ ᖃᐅᔨᓴᐃᓂᕐᒧᑦ ᐱᐅᓯᐅᒐᔭᖅᑐᓂᒃ ᑭᐅᔾᔪᑕᐅᔪᓐᓇᕐᓂᐊᖅᑐᓂᒃ ᐊᐱᖅᑯᑎᐅᔪᓄᑦ ᓴᖅᑭᑕᐅᓯᒪᔪᓄᑦ ᐆᒪᔪᓄᑦ ᒥᐊᓂᖅᓯᔨᐅᔪᓂᑦ.

4.  ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓄᐃᑦ ᖃᐅᒪᔨᒪᔭᑐᖃᖏᓐᓄᑦ ᖃᕆᑕᐅᔭᒃᑯᑦ ᐱᓕᕆᔾᔪᑎᑦ; ᐊᒻᒪ

ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᖃᕆᑕᐅᔭᒃᑯᑦ ᑐᖅᑯᐃᕕᒃ ᑲᑎᓯᒪᖃᑕᐅᓂᐊᖅᑐᖅ ᐅᓪᓗᒥ ᐊᑐᖅᑕᐅᖃᑦᑕᖅᑐᓂ ᐅᖓᓯᒃᑐᒧᑦ ᐱᑐᒃᓯᒪᕕᖕᒧᑦ, ᑕᐃᒃᑯᐊ ᖃᐅᔨᓴᖅᑎᐅᔪᑦ, ᐊᐅᓚᑦᓯᔨᐅᖃᑕᐅᔪᓪᓗ ᐊᓯᖏᓪᓗ ᑐᓴᕈᒪᓂᖃᖅᑐᑦ ᐱᑐᒍᓐᓇᕐᓂᐊᕐᒪᑕ ᖃᕆᑕᐅᔭᒃᑯᑦ ᑎᒍᓯᔪᓇᕐᓗᑎᒃ ᑐᓴᒐᒃᓴᓂᒃ ᖃᖓᑐᐃᓐᓇᑦᑎᐊᒃᑯᑦ.

5. ᐊᑐᖅᑕᐅᖃᑦᑕᕐᓗᑎᒃ ᐊᔾᔨᒌᒡᓗᑎᒃ, ᑲᑎᖅᓱᖅᓯᒪᔪᒃᑯᑦ ᐃᓱᒪᒃᓴᖅᓯᐅᕈᑕᐅᖃᑦᑕᕐᓗᑎᒃ ᐱᐅᓂᖅᐹᖑᔪᑦ ᑐᓴᒐᒃᓴᑦ ᐊᑐᐃᓐᓇᐅᔪᑦ ᖃᐅᔨᓴᖅᑎᒻᒪᕆᑦ ᖃᐅᔨᒪᓂᕆᔭᖏᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᓱᒪᓕᐅᕋᓱᐊᖅᑎᓪᓗᒋᑦ.

ᑖᓐᓇ ᖃᕆᑕᐅᔭᒃᑯᑦ ᐊᐅᓚᑦᓯᔾᔪᑎᐅᔪᖅ ᐃᓗᓕᖃᕐᓂᐊᕐᒥᔪᖅ ᖃᕆᑕᐅᔭᒃᑯᑦ ᐅᖃᓕᒫᒐᖃᕐᕕᖕᒥ ᐊᔾᔨᖏᓐᓂᒃ ᑎᑎᕋᖅᓯᒪᔪᓂᒃ ᐅᓂᒃᑳᓕᐊᓂᒃ, ᑕᕐᕆᔭᒐᓕᐊᓂᒃ, ᑕᑯᓐᓇᒐᒃᓴᓕᐊᓂᒃ, ᐊᒻᒪ ᖃᐅᔨᓴᐃᓂᕐᒧᑦ ᐅᓂᒃᑳᓕᐊᓂᒃ, ᐊᒻᒪᒪ ᐊᓯᖏᓐᓂᒃ ᑎᑎᖃᖅᓯᒪᔪᓂᒃ ᐊᑐᖅᑕᐅᑦᑎᐊᕐᓂᖅᓴᐅᖁᓪᓗᒍ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᓂᕐᔪᑎᓂᒃ ᐊᐅᓚᑦᓯᔾᔪᓯᖓᑦ ᐊᑐᖁᓪᓗᒍ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ.

Login Form

ᑕᑯᔭᒃᓴᖃᕐᕕᒃ

NUNAVUT WILDLIFE RESOURCE CENTRES COALITION

Catalogue of resource wildlife management materials