ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑎᒥᖁᑎᒋᔭᐅᕗᖅ ᑭᒃᑯᓕᒫᓄᑦ ᒐᕙᒪᐅᔪᓄᑦ, ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᑯᐊᐳᕇᓴᐅᓪᓗᓂ ᐊᒻᒪ ᑲᑐᔾᔭᐅᓪᓗᓂ ᐊᐅᓚᑕᐅᔪᖅ ᑎᒥᐅᔪᖅ.

ᑲᑎᒪᔨᑦ ᑎᒥᓐᖑᖅᑎᑕᐅᓚᐅᖅᓯᒪᔪᑦ ᐊᑐᕐᖢᑎᒃ ᓈᓴᐅᑎᖓᓂᒃ 10(1) ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ (NLCA). ᑎᒥᐅᓪᓗᓂ ᑯᐊᐳᕇᓴᐅᓪᓗᓂ, ᐱᓕᕆᔪᓐᓇᕐᓂᖃᖅᑐᖅ, ᐱᔪᓐᓇᕐᓂᖃᖅᑐᖅ, ᓴᓐᖏᓂᖃᖅᑐᖅ, ᐊᒻᒪ ᐱᓕᕆᔪᓐᓇᕐᓂᖃᖅᑐᖅ ᐃᓄᑐᐃᓐᓇᖅᑎᑐᑦ ᓲᕐᓗ.  ᒪᓕᒐᕋᓛᖃᖅᑐᖅ ᐊᒻᒪ ᐊᐅᓚᑕᐅᓂᖓᓄᑦ ᒪᓕᒐᖃᖅᑐᑦ.  ᑳᓐᑐᕌᒃᓯᔪᓐᓇᕆᓪᓗᓂ.  ᐃᖅᑲᓇᐃᔭᖅᑎᖃᐅᖅᑐᖅ ᐊᒻᒪ ᐅᖃᐅᔾᔨᒋᐊᖅᑎᖁᑎᖃᖅᑐᖅ.

ᐱᓕᕆᔪᓐᓇᕐᓂᖓᑕ ᐃᓗᐊᓂ ᑎᒥᖁᑎᒋᔭᐅᓪᓗᓂ ᑭᒃᑯᑐᐃᓐᓇᕐᓄᑦ ᒐᕙᒪᐅᔪᓄᑦ, ᑲᑎᒪᔨᐅᔪᑦ ᐱᓕᕆᕙᒃᐳᑦ ᐃᒻᒥᒃᑰᕐᖢᑎᒃ ᐊᐅᓚᑦᓯᔨᐅᓪᓗᑎᒃ ᐊᓪᓚᕕᖓᓐᓂᒃ ᐃᓚᒋᓪᓗᓂᐅᒃ ᑲᑎᒪᔨᑦ ᐋᖅᑭᒡᓱᖅᓯᒪᓂᖏᑕ ᑭᒃᑯᑐᐃᓐᓇᐃᑦ ᒐᕙᒪᖏᓐᓄᑦ ᑎᒥᖁᑎᒋᔭᐅᓪᓗᑎᒃ ᑲᓇᑕᐅᑉ ᐃᓗᐊᓂ.  ᑕᐃᒪᐃᒻᒪᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐊᑕᐅᑦᓯᒃᑯᑦ, ᐃᒻᒥᒃᑰᖅᑐᑦ ᐊᒻᒪ ᐃᓚᒋᔭᐅᓪᓗᑎᒃ ᒐᕙᒪᐅᔪᑦ ᑎᒥᖁᑎᖏᓐᓄᑦ.

ᑲᑎᒪᔨᑦ ᐃᓚᒋᔭᐅᕗᑦ ᒐᕙᒪᒃᑯᓐᓄᑦ ᐃᑲᔪᖅᑐᐃᖃᑦᑕᕐᖢᑎᒃ ᐱᓕᕆᐊᒃᓴᖏᓐᓂᒃ ᐊᐅᓚᑦᑕᕆᐊᖃᖅᑕᖏᓐᓂᒃ, ᐃᖅᑲᓇᐃᔮᖃᕐᖢᑎᒃ ᒐᕙᒪᒃᑯᑦ ᐱᓕᕆᐊᒃᓴᖏᓐᓂᒃ.  ᑭᓯᐊᓂᓕ, ᐱᓕᕆᓂᕆᔭᖓᑦᑕ ᐃᓗᐊᓂ ᐃᓘᓐᓇᖓᓂ ᒐᕙᒪᒃᑯᓐᓂᑦ ᐃᒻᒥᒃᑰᓕᖓᓪᓗᑎᒃ ᐱᓕᕆᖃᑦᑕᖅᐳᑦ.  ᑎᓕᔭᐅᖃᑦᑕᖏᑦᑐᑦ ᖃᓄᐃᓕᐅᖁᔭᐅᓗᑎᒃ, ᐅᕝᕙᓗ ᑭᒡᒐᖅᑐᐃᓗᑎᒃ ᐱᔨᑦᓯᖅᓯᒐᓱᐊᖅᐸᖏᑦᑐᑦ, ᐊᓯᖏᓐᓂ ᐱᓕᕆᕝᕕᖁᑎᖏᓐᓂ ᒐᕙᒪᒃᑯᑦ.  ᑭᓯᐊᓂᓕ, ᐱᓕᕆᐊᒃᓴᖏᓐᓂᒃ ᐱᕙᒃᑐᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ ᐃᓗᐊᓃᑦᑐᓂᑦ, ᐊᒻᒪ ᐱᓕᕆᐊᖃᖃᑦᑕᖅᑐᑦ “ᐊᐅᓚᑦᑕᕆᐊᖃᖅᑕᖏᓐᓄᑦ ᐱᓕᕆᐊᒃᓴᓂᒃ” ᐃᒻᒥᒃᑰᕐᖢᓂ ᑎᒥᐅᓪᓗᓂ.

ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᒻᒥᒃᑰᕐᓂᖓᑦ ᐃᓘᓐᓇᖓᒎᖏᑦᑐᖅ.  ᐃᒻᒥᒃᑯᑦ ᑲᑎᒪᔨᑦ ᐃᓱᒪᓕᐅᖃᑦᑕᖅᑑᒐᓗᐊᑦ, ᑭᓯᐊᓂᓕ ᑲᒪᒋᔭᒃᓴᐅᓂᖏᑦ ᐆᒪᔪᑦ ᒥᐊᓂᕆᔭᐅᓂᖏᑦ ᓄᓇᕗᒥ ᑐᓐᖓᕕᖃᖅᐳᖅ ᒪᓕᒐᓕᐅᕐᕕᖕᒥᒃ ᐊᒻᒪ ᐊᐅᓚᑦᓯᔨᑦ ᐱᓕᕆᕝᕕᖁᑎᖏᓐᓂ ᒐᕙᒪᒃᑯᑦ, ᑖᒃᑯᐊ ᓂᕈᐊᖅᑕᐅᓯᒪᖕᒪᑕ ᐊᒻᒪ ᑕᐃᒪᐃᒻᒪᑦ ᑭᐅᔪᓐᓇᕐᓂᖅᓴᐅᕗᑦ  ᑕᖅᑲᒃᑯᓄᖓ.

ᑎᒥᐅᓪᓗᑎᒃ ᑯᐊᐳᕇᓴᐅᓪᓗᑎᒃ ᐊᒻᒪ ᑎᒥᖁᑎᒋᔭᐅᓪᓗᑎᒃ ᑭᒃᑯᑐᐃᓐᓇᕐᓄᑦ ᒐᕙᒪᐅᔪᓄᑦ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓴᓇᓯᒪᕗᑦ ᐆᒃᑐᕋᐅᑕᐅᔪᓐᓇᖅᑐᒥᒃ ᐅᓪᓗᒥᓯᐅᑎᓂᒃ ᐊᓪᓚᕕᖕᒥ ᐊᐅᓚᑦᓯᓂᕐᒧᑦ.  ᐊᐅᓚᖃᑦᑕᖅᑕᖏᑦ ᐊᑑᑎᖃᑦᓯᐊᖅᑐᒃᑯᑦ ᐊᐅᓚᓂᖃᖅᐳᑦ ᐊᒻᒪ ᑮᓇᐅᔭᓂᒃ ᐊᑭᓕᒃᓴᖃᕋᑎᒃ, ᐊᒻᒪ ᓴᓇᓯᒪᓪᓗᓂ ᑕᖏᖃᑦᑎᐊᖅᑐᓂᒃ ᑐᓐᖓᕕᖃᕐᖢᓂ ᒪᓕᒐᕋᓛᓂᒃ, ᐊᐅᓚᑦᓯᔾᔪᑎᑦ ᒪᓕᒐᖏᓐᓂᒃ, ᑮᓇᐅᔭᓕᕆᓂᕐᒧᑦ ᐊᑐᐊᒐᓂᒃ ᐊᒻᒪ ᒥᐊᓂᖅᓯᓂᕐᒧᑦ ᐊᑐᐊᒐᓂᒃ.