ᖃᓄᐃᒻᒪᖔᑦ

ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ ᐃᑲᔪᖃᑎᒌᖕᓂᕐᒧᑦ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ ACCWM ᓴᖅᑭᑕᐅᓚᐅᖅᓯᒪᕗᑦ ᐊᒥᖅᑳᕈᓐᓇᖁᓪᓗᒋᑦ ᑐᓴᒐᒃᓴᓂᒃ ᐊᒻᒪ ᑐᑭᒧᐊᒃᑎᑦᓯᔪᓐᓇᖁᓪᓗᒋᑦ ᐆᒪᔪᑦ ᒥᐊᓂᕆᔭᐅᓂ  ᖏᓐᓄᑦ ᓄᓇᖅᑲᑎᒌᖏᑦᑐᑦ ᒐᕙᒪᖏᓐᓂ ᐊᐅᓚᑦᓯᔨᐅᔪᓂᒃ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ ᑲᑎᒪᔨᖏᓐᓄᑦ, ᐱᓗᐊᖅᑐᒥᒃ ᐃᔨᒋᓂᖅᓴᐅᓪᓗᑎᒃ ᒥᐊᓂᖅᓯᓂᕐᒥᒃ ᑭᒡᓕᓕᐊᖑᓯᒪᔪᓄᑦ ᐸᔾᔭᕐᓗᒃᑕᖅᑐᑦ ᑐᒃᑐᑦ.

ᑎᓕᔭᐅᓯᒪᔾᔪᑎᖓ

ᑲᑎᒪᔨᕋᓛᑦ ᐃᒪᐃᑦᑕᕆᐊᖃᖅᐳᑦ, ᑲᑎᒪᔨᐅᖃᑕᐅᔪᑦ ᓈᒻᒪᒃᓯᒃᐸᑕ, ᑕᐅᖅᓰᑲᑕᒡᓗᑎᒃ ᑐᓴᒐᒃᓴᓂᒃ, ᐃᑲᔪᕐᓗᑎᒃ ᓴᓇᑎᓪᓗᒋᑦ ᐃᑲᔪᖃᑎᒌᒡᓗᑎᒃ ᐊᒻᒪ ᐊᖏᖃᑎᒌᒃᓯᒪᓗᑎᒃ ᐊᒻᒪ ᐊᑐᓕᖁᔭᓕᐅᖃᑦᑕᕐᓗᑎᒃ ᐱᓪᓗᒋᑦ ᐆᒪᔪᑦ ᐊᒻᒪ ᓇᔪᒐᖏᓐᓄᑦ ᐆᒪᔪᑦ ᐱᔾᔪᑕᐅᔪᑦ ᓄᓇᑖᕈᑎᓄᑦ ᐊᖏᕈᑎᖏᓐᓄᑦ ᐊᒻᒪ ᐊᖏᖃᑎᒌᒍᑕᐅᓯᒪᔪᓄᑦ ᑭᒡᓕᓄᑦ.  ᒪᓕᒡᓗᒋᑦ ᑐᑭᓯᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎᐅᔪᑦ, ᑲᑎᒪᔨᕋᓛᑦ ᑎᓕᔭᐅᓯᒪᔾᔪᑎᖏᑦ ᐅᑯᓂᖓ ᐃᓗᓕᖃᖅᐳᑦ ᑭᒡᓕᖁᑎᒋᔭᐅᔪᑦ ᐸᔾᔭᕐᓗᒃᓯᒪᓂᖏᓐᓄᑦ ᐱᔾᔪᑕᐅᔪᓄᑦ:

  1. ᓴᓇᓗᑎᒃ ᒥᐊᓂᖅᓯᔾᔪᑎᒃᓴᓄᑦ ᐸᕐᓇᐅᑎᓂᒃ Cape Bathurst, Bluenose ᐱᖓᖕᓇᖓᓂ, ᐊᒻᒪ Bluenose ᑲᓇᖕᓇᖓᓂ ᑐᒃᑐᖏᓐᓄᑦ;
  2. ᓴᓇᓗᑎᒃ ᐸᕐᓇᐅᑎᒃᑲᓐᓂᕐᓂᒃ ᐊᔾᔨᒌᖏᑦᑐᓄᑦ ᑐᒃᑐᓄᑦ ᑲᑎᑦᑕᖅᑐᓄᑦ ᐃᓗᐊᓂ ᑐᒃᑐᖃᐅᓯᕝᕕᐅᔪᑦ;
  3. ᐅᖃᐅᓯᖃᖃᑦᑕᕐᓗᑎᒃ ᑲᑎᓐᖓᔪᓂᒃ ᐆᒪᔪᖅᑕᐅᔪᓐᓇᖅᑐᑦ ᑭᒡᓕᖏᓐᓂᒃ;
  4. ᐅᖃᐅᓯᐅᖃᑦᑕᕐᓗᑎᒃ ᑰᑕᐅᖏᑦᑐᑦ ᐊᖑᓇᓱᖕᓂᕐᒧᑦ ᒪᓕᒐᐅᔪᑦ;
  5. ᐅᖃᐅᓯᐅᖃᑦᑕᕐᓗᑎᒃ ᖃᓄᑎᒋᑦ ᓴᐳᒻᒥᔭᐅᔭᕆᐊᖃᕐᒪᖔᑕ ᓄᕐᕆᐅᕐᕕᐅᔪᑦ ᐊᒻᒪ ᐃᕐᓂᐅᕐᑯᐅᔪᑦ ᓄᓇᐃᑦ.

ᐃᓚᒋᔭᐅᔪᑦ

ᑐᑭᓯᒪᖃᑎᒌᖕᓂᕐᒧᑦ ᐊᖏᖃᑎᒌᖑᑎᑦ ᐃᑲᔪᖃᑎᒌᒡᓗᑎᒃ ᒥᐊᓂᖅᓯᖁᓪᓗᒋᑦ ᐆᒪᔪᓂᒃ ᐊᑎᓕᐅᖅᑕᐅᓚᐅᖅᓯᒪᔪᖅ 2008-ᖑᑎᓪᓗᒍ ᒍᐃᑦᓯᓐ ᐊᓪᓚᐃᑦ ᐆᒪᔪᓕᕆᔨᖏᑕ ᑲᑎᒪᔨᖏᓐᓄᑦ, ᑐᒃᑐᑦ ᓄᕐᕋᐃᑦ ᒥᓐᖑᐃᖅᓯᕐᕕᖓᓐᓂ ᒥᐊᓂᖅᓯᔨᑦ ᑲᑎᒪᔨᖏᑦ, ᐅᐃᒃ’ᐄᔩ ᐆᒪᔪᓕᕆᔨᑦ ᑲᑎᒪᔨᖏᑦ, ᓵᑐ ᐆᒪᔪᓕᕆᔨᑦ ᑲᑎᒪᔨᖏᑦ, ᐅᒪᔪᓕᕆᓂᕐᒧᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᑦ - ᓄᓇᑦᓯᐊᕐᒥ, ᕿᑎᕐᒥᐅᑦ ᐆᒪᔪᓕᕆᓂᕐᒧᑦ ᑲᑎᒪᔨᖏᑦ, ᐊᒻᒪ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ.

ᑎᒥᐅᔪᓄᑦ ᑭᒡᒐᖅᑐᖅᑎᖃᖅᑐᑦ ᑲᑎᒪᔨᕋᓛᓂ ᐃᒃᓯᕙᐅᑕᖓᓐᓂ.  ᑭᓯᐊᓂᓕ, ᐊᔾᔨᒋᔭᐅᓇᓂ ᐊᓯᖏᑎᑐᑦ ᐃᓚᐅᔪᑎᑐᑦ ᐊᐅᓚᑦᓯᔨᐅᖃᑎᒌᑦ ᑲᑎᒪᔨᖏᑕ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᓱᒪᓕᐅᖃᑦᑕᕐᓗᑎᒃ ᑎᒥᐅᔪᑦ ᐊᒻᒪ ᐊᐱᕆᔭᐅᓂᐊᖅᐸᓪᓚᐃᔪᑦ ᐱᐅᓯᒋᐊᖅᑕᐅᖁᔭᐅᓗᑎᒃ ᐸᕐᓇᐅᑎᑦ  ᐅᕝᕙᓗ ᐅᓄᕐᓂᕆᔭᖏᑦ ᐆᒪᔪᖅᑕᐅᔪᓐᓇᖅᑐᑦ ᐊᑐᓕᖁᔭᓕᐊᖑᓯᒪᔪᑦ ᑲᑎᒪᔨᕋᓛᖏᓐᓄᑦ ᐳᓘᓅᔾ ᑐᒃᑐᖏᓐᓄᑦ ᐃᓗᐊᓂ ᓄᓇᕗᑦ.  ᑕᐃᒪᓕ ᐃᒻᒥᒧᑦ ᐊᒡᕕᐊᕈᑎᖃᖁᓇᒋᑦ, ᑐᑭᒧᐊᒃᑎᑦᓯᔨᐅᔪᖅ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ ᑭᒡᒐᖅᑐᐃᖃᑦᑕᖅᑐᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ ᐃᑲᔪᖃᑎᒌᖕᓂᕐᒧᑦ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ.

ᒫᓐᓇᐅᔪᖅ ᐱᒋᐊᖅᑎᑕᐅᓯᒪᔪᑦ

ᐱᒋᐊᓕᓵᖅᑎᓪᓄᒍ ᐊᕐᕌᒍᐊ 2009, ᑖᒃᑯᐊ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ ᐃᑲᔪᖃᑎᒌᖕᓂᕐᒧᑦ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ ᓴᖅᑭᑦᑎᓚᐅᖅᓯᒪᔪᑦ ᐱᔭᕆᐊᑭᒡᓕᑎᑦᓯᔨᑦ ᑲᑎᒪᔨᖏᓐᓄᑦ ᓴᓇᓂᐊᕐᒪᑕ ᐆᒃᑐᖃᐅᑎᓂᒃ ᒥᐊᓂᖅᓯᓂᕐᒧᑦ ᐸᕐᓇᐅᑎᓂᒃ ᑕᐅᕙᓂ Cape-Bathurst, Bluenose-ᐱᖓᖕᓇᒥ ᐊᒻᒪ Bluenose-ᑲᓇᖕᓇᖓᒥ  ᑐᓂᔭᐅᔭᕆᐊᖃᕐᓗᑎᒃ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ ᐃᑲᔪᖃᑎᒌᖕᓂᕐᒧᑦ ᐆᒪᔪᑦ ᒥᐊᓂᕆᔭᐅᓂᖏᑦ.  ᐱᔭᕆᐊᑭᒡᓕᑎᑦᑎᔨᑦ ᑲᑎᒪᔨᕋᓛᖏᑦ ᐱᖃᓯᐅᔾᔨᓚᐅᖅᑐᑦ ᐊᑕᐅᓯᕐᒥᒃ ᑭᒡᒐᖅᑐᖅᑎᒥᒃ ᐊᑐᓂ ᑎᒥᐅᔪᓂᑦ ᑐᑭᓯᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎᓕᐅᖅᓯᒪᔪᓄᑦ (ᑭᑭᓪᓗᒍ ᕿᑎᕐᒥᐅᓄᑦ ᐊᒡᒍᖅᑐᖅᓯᒪᓂᖓᓄᑦ ᐆᒪᔪᓕᕆᔨᑦ ᑲᑎᒪᔨᖏᑦ ᑕᐃᒃᑯᐊ ᐃᓚᐅᔪᒪᓚᐅᖏᒻᒪᑕ), ᐊᒻᒪᓗ ᑭᒡᒐᖅᑐᖅᑎᖃᓚᐅᖅᑐᑦ ᐅᑯᓇᓐᖓᑦ ᓄᓇᑦᓯᐊᑉ ᒐᕙᒪᒃᑯᖏᓐᓂ ᐊᕙᑎᓕᕆᓂᕐᒧᑦ ᐱᓕᕆᕕᒃ ᐊᒻᒪ ᓄᓇᒥᐅᑕᓕᕆᔨᒃᑯᑦ, ᓄᓇᕗᑦ ᒐᕙᒪᒃᑯᖏᓐᓂ ᐱᓕᕆᕝᕕᖓᑦ ᐊᕙᑎᓕᕆᔨᒃᑯᑦ.  ᒥᓐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ, ᑕᐃᑦᓱ ᐊᒻᒪ ᓄᓇᕗᑦ ᑐᓐᖓᕕᒃ ᑎᒥᖓᑦ (ᖃᐃᖅᑯᔭᐅᖓᓗᐊᕋᒥᒃ ᐃᓚᐅᔪᒪᓚᐅᖏᑦᑐᑦ ᐱᔭᕆᐊᑭᒡᓕᑎᑦᑎᔨᑦ ᑲᑎᒪᔨᖏᓐᓄᑦ.

ᐅᓪᓗᐊᓂ ᐄᑉᐳ 27th 2011, ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ ᐃᑲᔪᖃᑎᒌᖕᓂᕐᒧᑦ ᐆᒪᔪᑦ ᒥᐊᓂᕆᔭᐅᓂᖏᑦ ᑲᑎᒪᓂᖃᓚᐅᖅᑐᑦ ᕿᒥᕐᕈᓇᒃᑕᐅᓪᓗᓂ ᑭᖑᓪᓕᖅᐹᖅᓯᐅᑎ ᐆᒃᑐᕋᐅᑎᓕᐊᖅ ᐸᕐᓇᐅᑎᒃᓴᖅ; ᑲᑎᒪᓂᐅᔪᖅ ᐅᐸᒃᑕᐅᓯᒪᓚᐅᖅᑐᖅ ᑭᒡᒐᖅᑐᖅᑎᖏᓐᓂᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓄᑦ, ᕿᑎᕐᒥᐅᓂ ᐊᒡᒍᖅᑐᖅᓯᒪᓂᕐᒥ ᐆᒪᔪᓕᕆᔨᑦ ᑲᑎᒪᔨᖏᓐᓄᑦ ᐊᒻᒪ ᖁᕐᓗᖅᑐᖅ ᓄᓇᓕᖕᓂ ᐊᖑᓇᓱᒃᑐᓕᕆᔨᑦ ᑎᒥᖓᓐᓄᑦ.  ᑕᐃᑦᓱᒪᓂ ᓴᓇᔭᐅᓕᖅᑎᓪᓗᒍ ᒥᐊᓂᖅᓯᓂᕐᒧᑦ ᐸᕐᓇᐅᑎᐅᔪᖅ ᒪᕐᕈᐊᖅᑎ ᑐᓴᕋᓱᐊᕐᓂᖃᕐᓗᑎᒃ ᑲᑎᒪᓂᖃᓚᐅᖅᑐᑦ ᐃᓘᓐᓇᖏᓐᓂ ᓄᓇᖅᑲᑎᒌᖏᑦᑐᑦ ᒐᕙᒪᖃᕐᕕᖏᓐᓂ, ᓄᓇᕗᑦ ᑭᑭᓪᓗᒍ ᐊᑕᐅᓯᐊᕐᖢᑎᒃ ᑕᐅᕙᓂ ᑐᓴᕋᓱᐊᕐᓂᖃᕐᓗᑎᒃ ᑲᑎᒪᓂᖃᓚᐅᕐᒪᑕ.  ᑐᒡᓕᐊᓂ ᑐᓴᕋᓱᐊᕐᓂᖃᕐᓗᑎᒃ ᑲᑎᒪᔪᒃᓴᐅᑕᒫᖑᔪᑦ ᖁᕐᓗᖅᑐᕐᒥ ᔪᓚᐃ 2011−ᖑᓕᖅᐸᑦ.