ᓈᓴᐅᑖ 15.4.1 ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ ᐅᖃᖅᓯᒪᕗᖅ ᐃᒪᓐᓇ “ᑖᒃᑯᐊ ᓄᓇᕗᒥ ᐊᕙᑎᓕᕆᓂᕐᒧᑦ ᕿᒥᕐᕈᔨᑦ ᑲᑎᒪᔨᖏᑦ  (NIRB), ᑖᒃᑯᐊᓗ ᓄᓇᕗᒥ ᐃᒪᓕᕆᓂᕐᒧᑦ ᑲᑎᒪᔨᖏᑦ (NWB), ᑖᒃᑯᐊᓗ ᓄᓇᕗᒥ ᐸᕐᓇᐃᔨᑦ ᑲᑎᒪᔨᖏᑦ (NPC), ᐊᒻᒪᓗ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᔪᒪᒍᑎᒃ ᑲᑐᔾᔨᓗᑎᒃ, ᓴᖅᑭᑦᓯᔪᓐᓇᖅᐳᑦ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᓂᒃ, ᐅᕝᕙᓗ ᐱᒻᒪᕆᐅᔪᒃᑯᑦ ᐅᖃᐅᔾᔨᒋᐊᕐᓗᑎᒃ ᐊᒻᒪ ᐊᑐᓕᖁᔭᓕᐅᕐᓗᑎᒃ ᐊᓯᖏᓐᓄᑦ ᒐᕙᒪᒃᑯᑦ ᐱᓕᕆᕝᕕᖁᑎᖏᓐᓄᑦ ᐱᓪᓗᒋᑦ ᐃᑭᖅ, ᐊᒻᒪ ᒐᕙᒪᒃᑯᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᐅᖃᐅᔾᔭᐅᒋᐊᕈᑎᖏᓐᓂᒃ ᐊᒻᒪ ᐊᑐᓕᖁᔭᓕᐊᖏᓐᓂᒃ ᐃᓱᒪᓕᐅᕈᑎᖃᕐᓂᐊᖅᑎᓪᓗᒋᑦ ᑕᕆᐅᑉ ᒥᒃᓵᓄᑦ.”

ᐱᒻᒪᕆᐅᓂᖓ ᑕᕆᐅᑉ ᐃᒪᕐᒥᐅᑕᓪᓗ

ᓯᒡᔭᖅ ᐊᒻᒪ ᐃᒪᕐᒥᐅᑕᑦ ᐊᑯᓂᐊᓗᒃ ᐊᑐᖅᑕᐅᖃᑦᑕᖅᓯᒪᓕᕐᒪᑕ ᐊᓐᓂᕆᔭᐅᓪᓗᑎᒡᓗ ᓄᓇᕗᒥᐅᓄᑦ, ᑭᓇᐅᓂᖏᓐᓄᑦ ᓇᓗᓇᐃᒃᑯᑕᑦ, ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪ ᐊᓂᕐᓂᒃᑯᑦ ᖃᓄᐃᖏᑦᓯᐊᖁᓪᓗᒋᑦ ᐃᓄᐃᑦ.  ᐊᐅᓚᑕᐅᑦᓯᐊᕐᓗᓂ ᐱᕙᓪᓕᐊᑎᑦᓯᓂᖅ ᐅᓄᖅᑐᓂᒃ ᐃᑲᔪᕈᑎᖃᕈᓐᓇᕋᔭᖅᐳᖅ ᓄᓇᕗᒥ, ᑭᓯᐊᓂ ᐱᒻᒪᕆᐅᔪᖅ ᐃᒪᕐᒥᐅᑕᑦ ᓄᓇᒥᐅᑕᓪᓗ ᐱᕈᒃᑲᓐᓂᕈᓐᓇᖅᑐᑦ ᐊᒻᒪ ᐃᓄᐃᑦ ᐃᓕᖅᑯᓯᖓᑦ ᓴᐳᒻᒥᔭᐅᑦᓯᐊᖁᓪᓗᒋᑦ ᓯᕗᓂᒃᓴᑦᑎᓐᓂ ᑭᖑᕚᖑᓂᐊᖅᑐᓄᑦ.  ᓄᖑᑦᓯᕙᓪᓕᐊᖏᓪᓗᑎᒃ ᐱᕙᓪᓕᐊᑎᑦᓯᔪᓐᓇᖁᓪᓗᒋᑦ − ᐊᖑᒻᒪᑎᓗᑎᒃ ᑭᓐᖒᒪᔭᐅᔪᓄᑦ ᐅᓪᓗᒥ ᓄᖑᕈᑎᔭᐅᖏᓪᓗᑎᒃ ᓯᕗᓂᒃᓴᑦᑎᓐᓂ ᑭᖑᕚᖑᓂᐊᖅᑐᑦ ᑭᓐᖒᒪᒐᔭᖅᑕᖏᑦ − ᑕᒪᓐᓇ ᐋᓪᓚᐅᖏᑦᑐᖅ ᐃᓱᒪᖏᔭᐅᔪᖅ ᐃᓄᖕᓄᑦ.  ᐃᒪᐃᑦᑐᖅ, ᐊᒃᓱᐊᓗᒃ ᐊᒃᑐᐊᓂᖃᑦᑎᐊᖅᑐᖅ ᒪᓕᒐᖏᓐᓄᑦ ᐃᓄᐃᑦ ᖃᐅᔨᒪᔭᑐᖃᖏᑕ, ᑖᒃᑯᐊ ᑐᑭᒧᐊᒍᑕᐅᔪᑦ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᓐᓄᑦ ᐱᓕᕆᐊᒃᓴᖏᓐᓂᒃ ᐱᓕᕆᐊᖃᖅᑎᓪᓗᒋᑦ.

ᐅᑭᐅᖅᑕᖅᑐᕐᒥ ᑕᕆᐅᕐᖓ ᐊᒃᓱᐊᓗᒃ ᐊᓯᕈᖅᐸᓪᓕᐊᓕᕐᒪᑦ ᒫᓐᓇ.  ᑖᒃᑯᐊᓗ ᐊᓯᕈᖅᐸᓪᓕᐊᔪᑦ ᑲᔪᓯᓂᐊᖅᑐᒋᔭᐅᔪᑦ ᐊᒻᒪ ᓱᑲᓕᖅᐸᓪᓕᐊᓗᑎᒃ ᐊᕐᕌᒍᓂ ᖁᓕᐅᑦᑕᖅᑐᑦ ᐃᓗᐊᓂ.  ᓄᓇᕗᒥ ᐃᒪᕐᒥᐅᓯᕆᓂᕐᒧᑦ ᑲᑎᒪᔨᖏᑦ ᓴᖅᑭᑕᐅᓯᒪᔪᑦ ᓯᕗᒧᐊᑦᑎᐊᖁᓪᓗᖏᑦ ᑐᓴᐅᒪᑦᑎᐊᕐᓗᑎᒃ ᐊᒻᒪ ᐊᑑᑎᖃᖅᑐᒃᑯᑦ ᓄᓇᕗᑦ ᓂᐱᖃᖁᓪᓗᒍ ᓴᖅᑭᑕᐅᓯᒪᔪᓄᑦ ᐊᒻᒪ ᐃᓱᒪᒃᓴᖅᓯᐅᕈᑕᐅᔪᓄᑦ ᑭᐅᔪᓐᓇᖁᓪᓗᒋᑦ ᐱᒻᒪᕆᐅᓂᖏᑦ ᐱᓪᓗᒋᑦ ᐅᑭᐅᖅᑕᖅᑐᕐᒥ ᑕᕆᐅᕐᒥᐅᓯᕆᓂᕐᒧᑦ ᐱᔾᔪᑎᐅᔪᑦ ᓄᓇᕗᒥᐅᓄᑦ.

ᑐᕌᒐᒃᓴᖏᑦ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑕ

ᐃᓕᓴᕆᓪᓗᒋᑦ ᖃᓄᐃᖏᑦᓯᐊᕆᐊᖃᕐᓂᖓ ᓄᓇᕗᑦ ᑕᕆᐅᖁᑎᖓᑕ ᐊᒻᒪ ᐃᒪᕐᒥᐅᑕᑦ ᐱᒻᒪᕆᐅᓂᖓ ᓄᓇᕗᒥᐅᓄᑦ ᐊᒻᒪ ᐊᓯᖏᓐᓄᑦ ᑲᓇᑕᒥᐅᑕᐅᖃᑕᐅᔪᓄᑦ, ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ ᐅᑯᓂᖓ ᑐᕌᒐᒃᓴᖃᕐᖢᑎᒃ ᐱᓕᕆᖃᑦᑕᖅᐳᑦ:

“ᓯᕗᒧᐊᒃᑎᑦᓯᑦᓯᐊᖁᓪᓗᒋᑦ ᑲᔪᓯᔪᒃᑯᑦ ᓴᐳᒻᒥᔭᐅᖁᓪᓗᒍ ᐊᒻᒪ ᓯᓚᑐᔪᒃᑯᑦ ᐊᑐᖁᓪᓗᒋᑦ ᑕᕆᐅᕐᒥᐅᑕᐅᔪᓂᒃ ᓯᕕᑐᔪᒧᑦ ᐃᑲᔪᕈᑎᖃᕐᓂᐊᕐᒪᑦ ᐃᓄᖕᓄᑦ ᐊᒻᒪ ᑭᓇᒃᑯᑐᐃᓐᓇᕐᓄᑦ ᓄᓇᕗᒥᐅᑕᐅᔪᓄᑦ ᐊᒻᒪ ᑲᓇᑕᒧᑦ, ᐱᓕᕆᓂᖃᕐᓗᑎᒃ ᒪᓕᒃᓯᒪᔪᓂᒃ ᒪᓕᒐᖏᓐᓂᒃ ᐃᓄᐃᑦ ᖃᐅᔨᒪᔭᑐᖃᖏᑕ ᐊᒻᒪ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ ᓈᓴᐅᑎᖓ 15−ᒥᒃ.”

ᑕᐃᒪᓕ ᑎᑭᑦᑐᓐᓇᖁᓪᓗᒋᑦ ᑖᒃᑯᓄᖓ ᑐᕌᒐᒃᓴᖏᓐᓄᑦ, ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ ᓴᓇᓯᒪᓕᖅᑐᑦ ᐱᓕᕆᐊᒃᓴᖏᓐᓂᒃ ᓇᓗᓇᐃᖅᓯᓯᒪᔪᓂᒃ ᐃᒪᐃᑦᑐᓂᒃ:

  • ᐋᖅᑭᒡᓱᖅᓯᒪᓂᖓ, ᐃᓅᓯᒃᑯᑦ, ᐃᓕᖅᑯᓯᒃᑯᑦ, ᑮᓇᐅᔭᓕᐅᕈᑎᖃᕋᓱᐊᕐᓂᒃᑯᑦ ᐊᒻᒪ ᑎᒥᐅᔪᑉ ᖃᓄᐃᓕᖓᓂᖓ ᑲᑎᒪᔨᐅᔪᑦ ᐊᐅᓚᑕᐅᔪᑉ ᐃᓗᐊᓂ;
  • ᑕᕆᐅᕐᒥᐅᓯᕆᓂᕐᒧᑦ ᐱᔾᔪᑎᐅᔪᑦ ᐱᒻᒪᕆᐅᑎᑦ ᓄᓇᕗᒧᑦ; ᐊᒻᒪ
  • ᐊᑑᑎᖃᖅᑐᑦ ᐃᓗᓕᑯᓘᔭᖏᑦ ᐊᓪᓚᕕᖕᒥ ᐊᐅᓚᑦᓯᔾᔪᑎᑦ ᐊᒻᒪ ᐊᐅᓚᑕᐅᓂᖓ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᐅᔪᑦ, ᐊᒻᒪ ᑲᑎᒪᔨᑦ ᐸᕐᓇᐅᑎᖏᑦ ᐊᑑᑎᖃᖅᑐᒃᑯᑦ ᓂᐱᒋᔭᐅᓂᐊᕐᓗᑎᒃ ᓄᓇᕗᒧᑦ.

ᑕᕆᐅᕐᒥᐅᓯᕆᓂᕐᒧᑦ ᐱᔾᔪᑎᐅᔪᑦ ᐊᒃᑐᐃᓂᖃᕈᓐᓇᖅᑐᑦ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᓐᓄᑦ

ᑕᕆᐅᕐᒥᐅᓯᕆᓂᕐᒧᑦ ᐱᔾᔪᑎᐅᔪᑦ ᐊᒃᑐᐊᓂᖃᓗᐊᖅᑐᑦ ᐱᓕᕆᐊᒃᓴᖏᓐᓄᑦ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᓐᓄᑦ  ᑎᓴᒪᐅᓕᖅᑲᖓᓪᓗᑎᒃ ᑭᓱᑐᐃᓐᓇᕐᓄᑦ ᑐᕌᖓᔪᖓᓪᓗᑎᒃ ᐊᒡᒍᖅᑐᖅᓯᒪᕗᑦ:

  1. ᖃᐅᔨᒪᑎᑦᓯᓂᕐᒧᑦ ᐱᔾᔪᑎᑦ: ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ ᑲᔪᖏᖅᓴᐃᔾᔪᑎᖃᕐᓂᐊᖅᐳᑦ ᖃᐅᔨᒪᑎᑦᓯᓂᕐᒥᒃ ᐱᔾᔪᑕᐅᔪᓂᒃ ᐊᒃᑐᐃᓂᖃᖅᑐᓂᒃ ᐅᕝᕙᓗ ᐊᒃᑐᐃᓂᖃᕈᓐᓇᖅᑐᓂᒃ ᑕᕆᐅᕐᒥᒃ ᐊᒻᒪ ᑕᕆᐅᕐᒥᐅᑕᐅᔪᓂᒃ, ᐱᓗᐊᖅᑐᒥᒃ ᑭᓐᖒᒪᒃᓯᖅᑎᓪᓗᒋᑦ ᓯᕗᒧᐊᑦᑎᐊᕈᑎᒃᓴᖏᓐᓂᒃ ᑲᔪᓯᔪᒃᑯᑦ ᓴᐳᒻᒥᔭᐅᓂᖓᓄᑦ ᐊᒻᒪ ᓯᓚᑐᓗᑎᒃ ᐊᑐᖁᓪᓗᒋᑦ ᑕᕆᐅᕐᒥᐅᑕᓂᒃ ᓯᕕᑐᔪᒧᑦ ᐃᑲᔪᕈᑎᖃᕈᓐᓇᕐᓂᐊᕐᒪᑦ ᐃᓄᖕᓄᑦ ᐊᒻᒪ ᑭᓇᒃᑯᑐᐃᓐᓇᕐᓄᑦ ᓄᓇᕗᒥᐅᑕᐅᔪᓄᑦ ᐊᒻᒪ ᑲᓇᑕᒥᐅᑕᐅᔪᓄᑦ.
  2. ᐊᑐᐊᒐᓄᑦ ᐱᔾᔪᑎᑦ: ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ ᕿᒥᕐᕈᓇᒋᐊᖃᖅᐳᑦ ᐊᑐᖅᑕᐅᔪᓂᒃ ᐊᑐᐊᒐᓂᒃ ᐊᒃᑐᐃᓂᖃᖅᑐᓂᒃ ᐅᕝᕙᓗ ᐊᒃᑐᐃᓂᖃᑐᐃᓐᓇᕆᐊᖃᖅᑐᓂᒃ ᑕᕆᐅᕐᒥᐅᑕᓂᒃ, ᓂᓪᓕᐅᑎᖃᖃᑦᑕᕐᓗᑎᒃ ᓄᑖᓄᑦ ᐊᑐᐊᒐᓕᐊᖑᒐᓱᐊᖅᑐᓄᑦ, ᐊᒻᒪ ᐊᔭᐅᖅᑐᐃᓗᑎᒃ ᑭᓐᖒᒪᔭᐅᔪᓄᑦ ᐃᓚᒋᐊᖅᑕᐅᖁᓪᓗᒋᑦ ᐅᕝᕙᓗ ᐋᖅᑭᒋᐊᖅᑕᐅᖁᓪᓗᒋᑦ ᐊᑐᐊᒐᑦ, ᑕᐃᒪᐃᓕᐅᖃᑦᑕᕐᓗᑎᒃ ᐱᔭᕆᐊᖃᓕᕌᖓᑕ.
  3. ᐊᐅᓚᑦᓯᔾᔪᑎᓄᑦ ᒪᓕᒐᕋᓛᓄᑦ ᐱᔾᔪᑎᑦ: ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ ᐃᒪᐃᓕᐅᕆᐊᖃᖅᐳᑦ, ᐱᔭᕆᐊᖃᓕᕌᖓᑦ, ᕿᒥᕐᕈᓇᒡᓗᑎᒃ ᐊᑐᖅᑕᐅᔪᓂᒃ ᒪᓕᒐᕐᓂᒃ ᐊᒻᒪ ᐱᖁᔭᒃᓴᓕᐊᖑᔪᓂᒃ ᐊᒃᑐᐃᓂᖃᖅᑐᓂᒃ ᐅᕝᕙᓗ ᐊᒃᑐᐃᓂᖃᑐᐃᓐᓇᕆᐊᓕᖕᓂᒃ ᑕᕆᐅᕐᒥᐅᑕᓂᒃ, ᐊᒻᒪ ᓇᓗᓇᐃᖅᓯᒐᓱᐊᕐᓗᑎᒃ ᐃᓚᑰᓂᖏᓐᓂᒃ − ᐅᕝᕙᓗ ᐱᔭᕆᐊᖃᕌᖓᑦ ᐱᐅᓯᒋᐊᕈᑎᒃᓴᖏᓐᓂᒃ − ᐱᖁᔭᒃᓴᓕᐊᖑᔪᑦ.  ᓄᓇᕗᒥ ᑕᕆᐅᕐᒥᐅᓯᕆᔨᑦ ᑲᑎᒪᔨᖏᑦ ᐊᔭᐅᖅᑐᐃᖃᑦᑕᕆᐊᖃᕐᒥᔪᑦ ᐃᓚᒋᐊᖅᑕᐅᖁᓪᓗᒍ ᐅᕝᕙᓗ ᐋᖅᑭᒋᐊᖅᑕᖁᓪᓗᒍ ᐱᖁᔭᖓ, ᑕᐃᒪᐃᓕᐅᖃᑦᑕᕐᓗᑎᒃ ᐱᔭᕆᐊᖃᓕᕌᖓᑕ.
  4. ᐱᔭᕐᓂᖏᑦᑐᓄᑦ ᐱᔾᔪᑎᑦ: ᐃᓕᓴᖅᓯᓪᓗᑎᒃ ᐱᔭᕐᓂᖏᑦᑐᓄᑦ ᖃᐅᔨᒪᔨᐅᔪᑦ ᒐᕙᒪᒃᑯᓐᓃᒻᒪᑕ ᐊᒻᒪ ᐱᓕᕆᕝᕕᖕᓂ ᐊᓯᖏᓐᓂ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ, ᑖᒃᑯᐊ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ ᑐᓂᓯᒋᐊᕈᓐᓇᖅᑐᑦ ᐅᖃᐅᔾᔨᒋᐊᖁᑎᓂᒃ ᐊᒻᒪ ᐊᑐᓕᖁᔭᓕᐊᓂᒃ, ᐱᔭᕆᐊᖃᓕᕌᖓᑕ, ᐱᓪᓗᒋᑦ ᐱᔭᕐᓂᖏᑦᑐᓕᕆᓂᕐᒧᑦ ᐱᔾᔪᑎᐅᔪᓄᑦ ᐊᒃᑐᐃᓂᖃᖅᑐᓄᑦ ᐅᕝᕙᓗ ᐊᒃᑐᐃᓂᖃᑐᐃᓐᓇᕆᐊᓕᖕᓄᑦ ᑕᕆᐅᕐᒥᐅᑕᓄᑦ.

ᐱᓕᕆᐊᒃᓴᖏᑦ ᓄᓇᕗᒥ ᑕᕆᐅᕐᒥᐅᓯᕆᓂᕐᒧᑦ ᑲᑎᒪᔨᖏᑦ

ᕿᒥᕐᕈᓇᓕᖅᑎᓪᓗᒋᑦ, ᐊᒻᒪ ᐋᖅᑭᒡᓱᐃᓕᖅᑎᓪᓗᒋᑦ ᐊᒻᒪ ᑐᓂᓯᓕᖅᑎᓪᓗᒋᑦ ᐅᖃᐅᔾᔨᒋᐊᕈᑎᒥᒃ ᐊᒻᒪ ᐊᑐᓕᐅᖁᔭᓕᐊᓂᒃ, ᑲᑎᒪᔨᐅᔪᑦ ᐸᕐᓇᒃᓯᒪᕗᑦ ᐅᑯᓂᖓ ᐊᐅᓪᓗᔾᔨᔪᒪᓪᓗᑎᒃ:

  • ᑲᔪᖏᖅᓴᐃᔾᔪᑎᖃᕐᓗᑎᒃ ᑕᖅᑲᒃᑯᐊ ᖃᐅᔨᒪᑦᓯᐊᖁᓪᓗᒋᑦ ᐱᔾᔪᑎᐅᔪᓂᒃ ᐊᒃᑐᖅᑕᐅᔾᔪᑎᓂᒃ ᐅᕝᕙᓗ ᐊᒃᑐᖅᑕᐅᔾᔪᑎᒋᑐᐃᓐᓇᕆᐊᖃᖅᑕᖏᓐᓂᒃ ᑕᕆᐅᕐᒥᐅᑕᑦ;
  • ᑐᓴᖅᑎᑦᓯᖃᑦᑕᕐᓗᑎᒃ ᓄᓇᕗᒥᐅᓂᒃ ᐱᓪᓗᒋᑦ ᑕᕆᐅᕐᒥᐅᑕᓄᑦ ᐱᔾᔪᑎᐅᔪᑦ ᐃᓱᒫᓗᖕᓇᓗᐊᖅᑐᑦ ᑕᐃᒃᑯᓄᖓ;
  • ᓇᐅᑦᑎᖅᓱᐊᖃᕐᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᖃᐅᔨᓴᖅᑎᒻᒪᕆᑦ ᖃᐅᔨᒪᔭᖏᓐᓂᒃ, ᑎᑎᕋᖅᓯᒪᔪᖁᑎᖏᓐᓂᒃ, ᒐᕙᒪᒃᑯᑦ, ᑐᓴᒐᒃᓴᓕᕆᔨᒃᑯᑦ ᐊᒻᒪ ᐃᒪᕐᒥᐅᑕᓂᒃ ᐃᖃᓪᓕᐊᖅᑎᑦ ᐅᓂᒃᑳᓕᐊᖏᓐᓂᒃ ᐱᔾᔪᑎᖃᖅᑐᓂᒃ ᐊᓯᕈᖅᐸᓪᓕᐊᔪᓂᒃ, ᐱᕙᓪᓕᐊᔪᓄᑦ ᐊᒻᒪ ᐃᓱᒫᓗᒍᑎᐅᔪᓄᑦ ᐃᒪᕐᒥᐅᑕᐅᔪᓄᑦ; ᐊᒻᒪ
  • ᕿᒥᕐᕈᓇᖃᑦᑕᕐᓗᑎᒃ ᐊᑐᖅᑕᐅᔪᓂᒃ ᐅᕝᕙᓗ ᓴᖅᑭᑕᐅᖓᓱᐊᖅᑐᓂᒃ ᒪᓕᒐᕋᓛᒃᓴᓕᐊᖑᔪᓂᒃ, ᐊᑐᐊᒐᓂᒃ, ᖃᐅᔨᐃᓴᓂᕐᒧᑦ, ᐱᕙᓪᓕᐊᑎᑦᓯᓂᕐᒧᑦ ᐊᒻᒪ ᒥᐊᓂᖅᓯᓂᕐᒧᑦ ᐸᕐᓇᐅᑎᓕᐊᖑᔪᓂᒃ ᐊᒃᑐᐃᓂᖃᖅᑐᓂᒃ, ᐅᕝᕙᓗ ᓯᕗᓂᒃᓴᒥ ᐊᒃᑐᐃᓂᖃᑐᐃᓐᓇᕆᐊᓕᖕᓄᑦ, ᑕᕆᐅᕐᒥᐅᑕᓄᑦ − ᐊᒻᒪ ᐊᔭᐅᖅᑐᐃᔨᐅᓗᑎᒃ ᑭᓐᖒᒪᔭᐅᔪᓄᑦ ᐱᐅᓯᒋᐊᕈᑕᐅᖁᔭᐅᓗᑎᒃ, ᐱᓕᕆᔭᕆᐊᖃᓕᕌᖓᑕ ᐱᓕᕆᔭᐅᕙᒡᓗᑎᒃ.

Login Form