ᑲᓇᑕᒥ, ᐱᐅᖅᓱᐊᕐᓂᕐᒧᑦ ᐊᒻᒪ ᒥᐊᓂᕆᔭᐅᓂᖏᓐᓄᑦ ᓇᓄᓕᕆᓂᕐᒧᑦ ᑲᒪᒋᔭᐅᕗᖅ ᑲᓇᑕᐅᑉ ᐊᒡᒍᖅᑐᖅᓯᒪᓂᖏᑕ ᒐᕙᒪᖏᓐᓂ ᐊᒻᒪ ᐅᑭᐅᖅᑕᖅᑐᕐᒥᐅᑦ ᒐᕙᒪᖏᓐᓄᑦ, ᑲᓇᑕᐅᑉ ᒐᕙᒪᒃᑯᖏᓐᓄᑦ, ᐊᒻᒪ ᐆᒪᔪᓕᕆᓂᕐᒧᑦ ᑲᑎᒪᔨᖏᓐᓄᑦ.  ᐃᖅᑲᓇᐃᔭᕐᓂᕆᔭᖓᑦ ᑐᑭᒧᐊᒃᑎᓴᑕᐅᖃᑦᑕᖅᐳᖅ ᐊᖅᑯᑎᒋᔭᐅᓪᓗᑎᒃ ᓇᓄᓕᕆᓂᖅ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᖏᓐᓄᑦ (PBAC) ᑖᒃᑯᐊ ᐅᖃᐅᓯᖃᖃᑦᑕᖅᑐᑦ ᒥᐊᓂᖅᓯᓂᕐᒧᑦ ᐊᖅᑭᒋᐊᕈᑎᓂᒃ ᐊᒻᒪ ᓴᐳᒻᒥᒡᓯᓂᕐᒧᑦ ᐱᔾᔪᑕᐅᔪᓂᒃ ᓇᓄᕐᓄᑦ.  ᑕᐃᒪᓕ ᐱᓪᓗᒍ ᓇᓄᓕᕆᓂᕐᒧᑦ ᒥᐊᓂᖅᓯᓂᖅ ᐊᒃᑐᐃᓂᖃᕐᓂᖓᓄᑦ ᓄᓇᕐᔪᐊᕐᒥ ᐊᖏᖃᑎᒌᒍᑎᐅᔪᓄᑦ (ᓲᕐᓗ ᐅᒪᔪᐃᑦ ᐃᓄᐃᓴᓗᐊᕆᔭᐅᓕᖅᑐᑦ ᓂᐅᕐᕈᑕᐅᖃᑦᑕᕐᓂᖏᓐᓄᑦ ᑲᑎᒪᔨᖏᑦ CITES-ᑯᑦ, ᐊᑐᓕᐅᖃᑕᐅᓯᒪᖕᒪᑕ ᑲᓇᑕᐅᑉ ᒐᕙᒪᒃᑯᖏᑦ ᑭᒡᒐᖅᑐᖅᑕᐃᓐᓇᕆᓪᓗᒋᑦ ᐃᓘᓐᓇᖏᑦ ᑲᓇᑕᐅᑉ ᐊᒡᒍᖅᑐᖅᓯᒪᓂᐊᓂ ᒐᕙᒪᐅᔪᑦ ᑖᒃᑯᐊ ᓇᓄᓕᕆᓂᖅ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᖏᑦ ᓴᖅᑭᑕᐅᓚᐅᖅᓯᒪᔪᑦ 1969−ᖑᑎᓪᓗᒍ ᐱᔨᑦᓯᕐᓂᐊᕐᓗᑎᒃ ᐊᐅᓚᓂᖃᖅᑎᑦᓯᔪᒥᒃ ᐃᓘᓐᓇᖏᓐᓄᑦ ᐊᒃᑐᖅᑕᐅᓯᒪᔪᑦ ᐃᓱᒪᒃᓴᖅᓯᐅᕈᑕᐅᖁᔭᐅᓪᓗᑎᒃ ᐊᒻᒪ ᑭᒡᒐᖅᑐᖅᑕᐅᖁᔭᐅᓪᓗᑎᒃ ᐊᖏᖃᑎᒌᒍᑎᑎᒍᑦ.

ᐊᐅᓚᑕᐅᓂᖓ ᑲᑎᒪᔨᕋᓛᑦ ᑲᑎᒪᔨᖃᖅᐳᑦ ᐊᑕᐅᓯᕐᒥᒃ ᑭᒡᒐᖅᑐᖅᑎᐅᔪᒥᒃ ᐊᑐᓂ ᑲᓇᑕᐅᑉ ᐊᒡᒍᖅᑐᖅᓯᒪᓂᓐᖔᖅᑐᑦ ᐊᒻᒪ ᐅᑭᐅᖅᑕᖅᑐᕐᒥᐅᑦ ᒐᕙᒪᖏᓐᓂᓐᖔᖅᑐᑦ ᒥᐊᓂᖅᓯᓂᕐᒧᑦ ᐊᐅᓚᑦᓯᓂᖃᖅᑐᑦ ᓄᓇᓕᕆᓂᕐᒧᑦ (ᒫᓂᑑᐸᒥ, ᓂᐅᕙᓐᓛᓐ ᐊᒻᒪ ᓛᐸᑐᐊ, ᓄᓇᑦᓯᐊᖅ, ᓄᓇᕗᑦ, ᐋᓐᑎᐅᕆᐅᓪ, ᑯᐃᐸᐃᒃ, ᐊᒻᒪ ᔫᑳᓐ; ᑖᒃᑯᐊ ᑲᓇᑕᒥ ᐆᒪᔪᓕᕆᓂᕐᒧᑦ ᐱᔨᑦᓯᖅᑎᒃᑯᑦ ᐱᓕᕆᕕᖓᑦ); ᒥᓐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐱᓕᕆᕝᕕᖓᑦ; ᐊᒻᒪ ᐊᐅᓚᑦᓯᔨᐅᖃᑎᒌᑦ ᑲᑎᒪᔨᕋᓛᖏᑦ ᐅᕝᕙᓗ ᑲᑎᒪᔨᖏᑦ ᒪᓕᒐᖅᑎᒍᑦ ᐱᓕᕆᐊᒃᓴᖃᖅᑎᑕᐅᔪᑦ ᓇᓄᓕᕆᓂᕐᒧᑦ ᑭᒡᒐᖅᑐᕐᓗᒋᑦ ᓄᓇᖃᖅᑳᖅᓯᒪᔪᑦ.

ᐱᔾᔪᑎ

ᐱᔾᔪᑎᖓ ᓇᓄᓕᕆᓂᖅ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᖏᑦ ᐱᕕᖃᖅᑎᑦᓯᔭᕆᐊᖃᖅᑐᑦ ᓂᓪᓕᕐᕕᒃᓴᖃᕈᓐᓇᖁᓪᓗᒋᑦ ᑲᓇᑕᐅᑉ ᐊᒡᒍᖅᑐᖅᓯᒪᓂᖓᓂᓐᖔᖅᑐᑦ, ᐅᑭᐅᖅᑕᖅᑕᕐᒥᐅᑦ ᒐᕙᒪᒃᑯᖏᓐᓂᑦ, ᐊᒻᒪ ᑲᓇᑕᐅᑉ ᒐᕙᒪᒃᑯᖏᓐᓂ ᐃᖅᑲᓇᐃᔭᖃᑎᒌᑦᓯᐊᖁᓪᓗᒋᑦ ᐊᑑᑎᖃᖅᑐᒥᒃ ᒥᐊᓂᖅᓯᔾᔪᑎᖃᕐᓂᐊᕐᒪᑕ ᓇᓄᕐᓄᑦ ᑲᓇᑕᐅᑉ ᐃᓗᐊᓂ, ᐊᒻᒪ ᓯᕗᒧᐊᒃᑎᑦᓯᖁᓪᓗᒋᑦ ᑲᓇᑕ ᐱᓕᕆᖁᓪᓗᒍ ᐱᓕᕆᐊᒃᓴᖏᓐᓂᒃ ᐊᖏᖃᑎᒌᖃᑕᐅᓯᒪᓂᖓ ᓄᓇᕐᔪᐊᕐᒥ ᐊᖏᖃᑎᒌᒍᑎᓂᒃ ᐱᐅᖅᓱᐊᖅᑕᐅᖁᓪᓗᒋᑦ ᓇᓄᐃᑦ ᐊᒻᒪ ᓇᔪᒐᖏᑦ, ᐊᒻᒪᓗ ᐊᓯᖏᓐᓂᒃ ᒪᓕᒡᓗᑎᒃ ᐊᖏᖃᑎᒌᒍᑕᐅᓯᒪᔪᓂᒃ ᐊᒃᑐᐊᓂᖃᖅᑐᓂᒃ ᓇᓄᕐᓄᑦ.

ᓇᓄᓕᕆᓂᕐᒧᑦ ᐱᔭᕐᓂᖏᑦᑐᓕᕆᓂᕐᒧᑦ ᑲᑎᒪᔨᕋᓛᑦ

ᓇᓄᓕᕆᓂᕐᒧᑦ ᐱᔭᕐᓂᖏᑦᑐᓕᕆᓂᕐᒧᑦ ᑲᑎᒪᔨᕋᓛᖑᔪᑦ ᓴᖅᑭᑕᐅᓚᐅᖅᓯᒪᕗᑦ ᐃᓚᒋᔭᐅᔪᓄᑦ ᓇᓄᓕᕆᓂᖅ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᖏᓐᓄᑦ 1970-ᖏᓐᓂ.  ᑖᒃᑯᐊ ᐱᔭᕐᓂᖏᑦᑐᓕᕆᓂᕐᒧᑦ ᑲᑎᒪᔨᕋᓛᖑᔪᑦ ᑲᑎᒪᔨᖃᖅᐳᑦ ᐆᒪᔪᓂᒃ ᖃᐅᔨᓴᐃᔨᓂᒃ ᐊᑐᓂᓐᖔᖅᓯᒪᔪᑦ ᑲᓇᑕᐅᑉ ᐊᒡᒍᖅᑐᖅᓯᒪᓂᖏᑕ ᒐᕙᒪᖏᓐᓂᑦ ᐊᒻᒪ ᖃᐃᖅᑯᔭᐅᓯᒪᔪᑦ ᖃᐅᔨᒪᔨᑕᒻᒪᕆᐅᔪᑦ ᓇᓐᓂᐊᖅᑎᐅᔪᑦ ᐊᒻᒪ ᐊᓯᖏᑦ ᖃᐅᔨᓴᐃᓂᕐᒧᑦ ᑎᒥᖁᑎᒋᔭᐅᔪᑦ (ᓲᕐᓗ ᓯᓚᑦᑐᓴᕐᕕᒡᔪᐊᑦ) ᑕᐃᒃᑯᐊ ᖃᐅᔨᒪᓂᖃᕐᒪᑕ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᓐᓂᒃ ᐅᕝᕙᓗ ᖃᐅᔨᓴᖅᑎᒻᒪᕆᑦ ᐱᔭᕐᓂᖏᑦᑐᓄᑦ ᐅᖃᐅᔾᔨᒋᐊᕈᓐᓇᕐᒪᑕ.  ᑖᒃᑯᐊ ᐱᔭᕐᓂᖏᑦᑐᓕᕆᓂᕐᒧᑦ ᑲᑎᒪᔨᕋᓛᑦ ᐱᔨᑦᓯᖃᑦᑕᖅᑐᑦ ᒥᐊᓂᖅᓯᓂᕐᒧᑦ ᐃᓱᒪᓕᐅᕋᓱᐊᖅᑎᓪᓗᒋᑦ ᕿᒥᕐᕈᓇᒡᖢᑎᒃ ᐊᒻᒪ ᐅᖃᐅᑕᐅᕙᓪᓕᐊᓪᓗᑎᒃ ᖃᐅᔨᓴᐃᓂᕐᒥᑦ ᖃᐅᔨᔭᐅᔪᑦ, ᐊᒻᒪ ᒥᐊᓂᖅᓯᓂᕐᒧᑦ ᐊᑐᓕᖁᔭᓕᐅᖅᖢᑎᒃ ᑕᒪᒃᑮᖕᓄᑦ ᓇᓄᓕᕆᓂᖅ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᖏᓐᓄᑦ ᐊᒻᒪ ᑕᐃᒃᑯᓄᖓ ᓂᕈᐊᖅᑕᐅᓯᒪᕝᕕᐅᔪᑦ ᒐᕙᒪᖏᓐᓄᑦ.

 ᐱᓕᕆᐊᒃᓴᖏᑦ

ᑲᑎᒪᔨᕋᓛᑦ ᑲᑎᒪᖃᑦᑕᖅᐳᑦ ᐊᕐᕌᒍᑕᒫᓐ ᕿᒥᕐᕈᓇᒡᖢᑎᒃ ᐊᑐᓕᖁᔭᓕᐊᖑᔪᓂᒃ ᓇᓄᓕᕆᓂᕐᒧᑦ ᐱᔭᕐᓂᖏᑦᑐᓕᕆᓂᕐᒧᑦ ᑲᑎᒪᔨᕋᓛᖏᑕ.  ᑲᑎᒪᖃᑦᑕᕐᒥᔪᑦ ᐃᑲᔪᕋᓱᐊᕐᖢᑎᒃ ᑐᑭᒧᐊᒃᑎᑕᐅᓂᖏᓐᓄᑦ ᑲᓇᑕᒥᐅᑦ ᒐᕙᒪᒃᑯᖏᑕ ᓇᓄᓕᕆᔾᔪᑎᖏᑦ, ᐊᒻᒪ ᐊᓛᔅᑲᒥ ᐊᒻᒪ ᐊᑯᑭᑦᑐᓂ.

ᐊᐅᓚᑕᐅᓂᖓ ᑲᑎᒪᔨᕋᓛᑦ ᐅᑯᓂᖓ ᐱᓕᕆᐊᒃᓴᓂᒃ ᓴᖅᑭᑦᓯᖃᑦᑕᖅᑐᑦ:

  1. ᑐᓂᓯᓪᓗᑎᒃ ᖃᐅᔨᓴᖅᑕᐅᔭᕆᐊᓕᖕᓂᒃ ᐱᐅᖅᓱᐊᖅᑕᐅᔭᕆᐊᖃᕐᒪᖔᑕ ᓇᓄᐃᑦ ᐊᒻᒪ ᓇᔪᒐᖏᑦ ᑲᓇᑕᒥ ᑕᐃᒃᑯᓄᖓ ᐱᔭᕐᓂᖏᑦᑐᓕᕆᓂᕐᒧᑦ ᑲᑎᒪᔨᕋᓛᖏᓐᓄᑦ;
  2. ᕿᒥᕐᕈᓇᒡᖢᑎᒃ ᐊᑐᓕᖁᔭᓕᐊᖏᓐᓂᒃ ᐱᔭᕐᓂᖏᑦᑐᓕᕆᔨᑦ ᑲᑎᒪᔨᕋᓛᖏᑕ, ᐊᒻᒪ, ᐱᔭᕆᐊᖃᓕᕌᖓᑦ ᐊᑐᓕᖁᔭᓕᐅᒃᑲᓐᓂᖃᑦᑕᖅᑐᑦ ᐊᓯᖏᓐᓄᑦ ᐅᖃᐅᔾᔨᒋᐊᖅᑎᐅᔪᓄᑦ ᐊᒻᒪ/ᐅᕝᕙᓗ ᐃᓱᒪᓕᐅᖅᑎᐅᔪᓄᑦ ᑎᒥᐅᔪᓄᑦ; ᐊᒻᒪᓗ
  3. ᑭᐅᖃᑦᑕᖅᑐᑦ ᑐᒃᓯᕋᐅᑕᐅᔪᓄᑦ ᑐᓴᒐᒃᓴᓂᒃ ᐱᔪᒪᔪᓄᑦ ᑲᓇᑕᐅᑉ ᐊᒡᒍᖅᑐᖅᓯᒪᓂᖓᓂ ᒐᕙᒪᐅᔪᓂᑦ, ᑲᑎᒪᔨᓂᑦ, ᑎᒥᐅᔪᑦ ᐱᓕᕆᕝᕕᖏᓐᓂᑦ ᐊᒻᒪ ᐊᓯᖏᓐᓂᑦ ᑎᒥᐅᔪᓂᑦ.

ᑐᓴᕆᐊᒃᑲᓐᓂᕈᒪᒍᕕᑦ,  ᓇᓄᓕᕆᓂᖅ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᖏᑕ ᖃᕆᑕᐅᔭᒃᑯᑦ ᐱᑐᒡᕕᖓ ᑕᑯᒋᐊᕐᓗᒍ www.polarbearcanada.ca