ᒪᓕᒐᖏᑦ ᐱᐅᓯᐅᔭᕆᐊᖃᖅᑐᑦ ᐃᓄᓕᒫᖅᑎᑦᓯᓗᑎᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ
ᐱᒋᐊᕐᓂᖓ ᐊᒻᒪᓗ ᐱᔾᔪᑎᖓ
ᒪᓕᒡᓗᒋᑦ ᒐᕙᒪᒃᑯᑦ ᐱᔪᓐᓇᕐᓂᕆᔭᖓᑦ ᑲᒪᓂᕐᒧᑦ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ (NWMB) ᐊᐅᓚᑦᓯᔨᓪᓗᐊᑕᐅᕗᑦ ᐆᒪᔪᑦ ᒥᐊᓂᕆᔭᐅᓂᖏᓐᓄᑦ ᐊᒻᒪ ᒪᓕᒐᓕᐅᖅᑎᐅᓪᓗᑎᒃ ᐆᒪᔪᖅᑕᐅᕙᒃᑐᓄᑦ ᓄᓇᕗᑦ ᐃᓗᐊᓂ. ᒪᓕᒡᓗᒍ ᓈᓴᐅᑖ 5.2.26 ᐊᖏᖃᑎᒌᒍᑎᓕᐅᓚᐅᖅᑐᑦ ᐊᑯᕐᖓᓐᓂ ᐃᓄᐃᑦ ᓄᓇᕗᑦ ᓄᓇᑖᖑᓯᒪᔪᑦ ᐃᓗᐊᓂ ᐊᒻᒪ ᑯᐃᓐ ᐱᔪᓐᓇᕐᓂᓕᒃ ᑲᓇᑕᒧᑦ (ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑎᒍᑦ) , ᑲᑎᒪᔨᑦ ᐱᔪᒪᒍᑎᒃ ᐃᓄᓕᒫᖅᑎᑦᓯᓗᑎᒃ ᓈᓚᒃᑎᐅᓗᑎᒃ ᑲᑎᒪᔾᔪᑎᖃᕈᓐᓇᖅᐳᑦ ᑭᓱᑐᐃᓐᓇᕐᒧᑦ ᐱᔾᔪᑕᐅᔪᒧᑦ ᐃᓱᒪᓕᐅᕈᑕᐅᔭᕆᐊᖃᕐᓂᐊᖅᑐᒧᑦ.
ᐱᔾᔪᑎᖏᑦ ᑖᒃᑯᐊ ᒪᓕᒐᐅᔪᑦ ᐊᑐᐃᓐᓇᐅᑎᑦᓯᖁᓪᓗᒋᑦ ᐊᔾᔨᒌᒃᑎᑦᓯᓂᕐᒥᒃ, ᒪᑐᐃᖓᔪᒥᒃ, ᐊᒻᒪ ᑐᑭᓯᓇᖅᑐᒥᒃ ᐃᖏᕐᕋᓂᖃᕐᓗᓂ ᐃᓘᓐᓇᖏᓐᓄᑦ ᐃᓚᐅᔪᓄᑦ ᐊᒻᒪ ᑐᓴᕈᒪᓂᖃᖅᑐᓄᑦ ᑭᓇᒃᑯᑐᐃᓐᓇᕐᓄᑦ, ᑕᖅᑲᒃᑯᐊ ᐃᓚᐅᔪᓐᓇᖁᓪᓗᒋᑦ ᐊᒃᑐᖅᑕᐅᓯᒪᔪᑦ, ᐊᒻᒪ ᓯᕗᒧᐊᒃᑎᑦᓯᖁᓪᓗᒋᑦ ᓱᑲᑦᑐᒃᑯᑦ ᐊᒻᒪ ᑭᖑᕙᖅᓯᒪᖏᓪᓗᑎᒃ ᐱᓕᕆᔭᐅᖁᓪᓗᒍ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓄᓕᒫᖅᑎᑦᓯᓗᑎᒃ ᓈᓚᒃᑎᐅᓗᑎᒃ ᑲᑎᒪᓂᕆᔭᖓᑦ.
ᓂᐱᓕᐅᖅᑕᐅᓯᒪᔪᑦ ᐃᓄᒃᑎᑑᖓᔪᑦ ᓇᐃᓈᖅᓯᒪᔪᑦ ᒪᓕᒐᐃᑦ ᐊᑐᐃᓐᓇᐅᕗᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᒃᑯᖏᓐᓂᑦ.
ᒪᓕᒐᖅ 1: ᑭᓱᑐᐃᓐᓇᕐᓄᑦ ᑐᕌᖓᔪᑦ
1.1 ᐊᑐᓐᖏᑲᐃᓐᓇᕐᓂᖅ/ᐋᖅᑭᒋᐊᕆᓂᖅ ᒪᓕᒐᕐᓂᒃ
ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᔪᒪᒍᑎᒃ ᐊᑐᓐᖏᑲᐃᓐᓇᕈᓐᓇᖅᐳᑦ ᐅᕝᕙᓗ ᐋᖅᑭᒋᐊᕆᓗᑎᒃ ᑖᒃᑯᓂᖓ ᒪᓕᒐᕐᓂᒃ, ᑲᑎᒪᔨᐅᔪᑦ ᐃᓱᒪᒃᐸᑕ ᐃᓘᓐᓇᖏᓐᓄᑦ ᐃᓗᐊᓛᖑᓂᐊᕐᓂᖏᓐᓂᒃ ᐃᓚᐃᓐᓈᕆᖏᓪᓗᑎᒃ. ᑕᐃᒪᓕ ᑭᓱᑐᐃᓐᓇᐃᑦ ᓴᖅᑭᑦᑕᕌᖓᑕ ᐱᖃᓯᐅᔾᔭᐅᓯᒪᖏᑦᑐᑦ ᒪᓕᒐᕐᓄᑦ ᐅᑯᓄᖓ, ᑲᑎᒪᔨᐅᔪᑦ ᐱᓕᕆᔭᕆᐊᖃᖅᐳᑦ ᖃᓄᑐᐃᓐᓇᖅ ᐱᓕᕆᔭᕆᐊᖃᖅᓱᒋᔭᖏᓐᓂᒃ, ᐱᓕᕆᐊᖃᕈᓐᓇᕐᓂᐊᕐᒪᑕ ᐱᔾᔪᑎᐅᔪᒥᒃ ᓇᓛᒍᖅᑐᒃᑯᑦ.
1.2 ᒪᓕᒃᓯᖏᓐᓂᒃ ᒪᓕᒐᕐᓂᒃ
ᓇᓕᐊᑐᐃᓐᓇᖅ ᐃᓚᐅᔪᖅ ᐅᕝᕙᓗ ᑐᓴᕈᒪᓂᖃᖅᑐᖅ ᑭᓇᑐᐃᓐᓇᖅ ᒪᓕᒃᓯᓐᓂᖏᑉᐊᑦ ᐅᑯᓂᖓ ᒪᓕᒐᕐᓂᒃ, ᑲᑎᒪᔨᐅᔪᑦ ᐱᔪᒪᒍᑎᒃ ᐃᒪᐃᓕᐅᕈᓐᓇᖅᐳᑦ:
(a) ᒪᓕᒐᕐᓂᒃ ᐊᑐᕆᐊᖃᖅᑕᖏᓐᓂᒃ ᓴᓇᓗᑎᒃ ᑖᒃᑯᐊ ᒪᓕᒐᐃᑦ ᒪᓕᒃᑕᐅᔾᔪᑎᒋᓂᐊᖅᑕᖏᓐᓂᒃ;
(b) ᓄᖅᑲᖅᑎᑦᓯᓗᑎᒃ ᑲᑎᒪᓂᕐᒥᒃ ᑭᓯᐊᓂ ᒪᓕᒐᐃᑦ ᒪᓕᒃᑕᐅᓕᖅᐸᑕ ᑲᑎᒪᒃᑲᓐᓂᓕᕐᓗᑎᒃ; ᐊᒻᒪ/ᐅᕝᕙᓗ
(c) ᐱᓕᕆᐊᖃᖃᑦᑕᕐᓗᑎᒃ ᐃᓱᒪᒋᔭᖏᓐᓂᒃ ᓇᓛᒎᖅᑐᒋᔭᖏᓐᓂᒃ ᐊᒻᒪ ᐱᔾᔪᑎᐅᑦᓯᐊᕋᓱᒋᔭᖏᓐᓂᒃ, ᑎᑭᓪᓗᒍ ᐊᒻᒪ ᐱᖃᓯᐅᑎᓗᒍ ᓄᖅᑲᖅᑎᑦᓯᓂᖅ ᐃᓚᐅᔪᒥᒃ ᐅᕝᕙᓗ ᑐᓴᕈᒪᓂᖃᖅᑐᒥᒃ ᑭᓇᑐᐃᓐᓇᕐᒥᒃ ᐃᓚᐅᔪᒥᒃ.
ᑭᓯᐊᓂᓕ, ᓄᓇᕗᑦ ᐅᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᔪᒪᒍᑎᒃ ᐱᔨᑦᓯᕈᓐᓇᖅᐳᑦ ᒪᓕᒃᑕᐅᑎᑦᓯᓂᕐᒧᑦ ᒪᓕᒐᕐᒧᑦ ᓇᓕᐊᖕᓄᑐᐃᓐᓇᖅ, ᐃᓱᒪᒋᔭᖓᓄᑦ ᓇᓛᒎᖅᑐᕆᓪᓗᒍ ᐊᒻᒪ ᐱᔾᔪᑎᑦᓯᐊᕙᐅᔪᕆᓪᓗᒍ, ᖃᓄᐃᓐᓂᖅ ᒪᓕᒡᓗᒍ.
1.3 ᑐᑭᓕᐅᕆᓂᖅ
ᑭᓯᐊᓂ ᐊᓯᐊᒍᑦ ᐱᓕᕆᔭᐅᔭᕆᐊᖃᖅᐸᑦ, ᐅᖃᐅᓯᖅᑕᖏᑦ ᐊᒻᒪ ᑕᐃᔭᐅᓯᒪᔪᑦ ᐃᓗᐊᓂ ᐅᑯᐊ ᒪᓕᒐᐃᑦ ᐊᔾᔨᖏᓐᓂᒃ ᑐᑭᖃᖅᑐᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ.
1.4 ᐊᔾᔨᒌᓐᖏᑎᓪᓗᒋᑦ ᐅᕝᕙᓗ ᐊᑭᓴᖅᑑᑎᑎᓪᓗᒋᑦ ᒪᓕᒐᐃᑦ ᐊᒻᒪ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑦ
ᑕᐃᒪᓕ ᓇᓕᐊᑐᐃᓐᓇᖅ ᐅᑯᓇᓂ ᒪᓕᒐᕐᓂ ᐊᔾᔨᖃᖏᑉᐸᑦ ᐅᕝᕙᓗ ᐊᑭᓴᖅᑐᐃᒃᐸᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓄᑦ, ᑖᒃᑯᐊ ᐊᖏᖃᑎᒌᒍᑎᐅᔪᑦ ᓴᓐᖏᖕᓂᖅᓴᐅᓂᐊᖅᐳᑦ ᐊᔾᔨᒋᔭᐅᖏᑦᑐᒥᑦ ᐅᕝᕙᓗ ᐊᑭᓴᖅᑐᐃᔪᒥᑦ.
1.5 ᒪᓕᒐᖏᑦ ᑭᓇᒃᑯᑐᐃᓐᓇᕐᓄᑦ ᐅᐸᒃᑕᐅᔪᓐᓇᕐᓂᖏᑦ
(1) ᒪᓕᒡᓗᒍ ᒪᓕᒐᐃᑦ ᓈᓴᐅᑎᖓᑕ ᐃᓚᕈᑕᖓᓂ 1.5(2) ᐊᒻᒪ 3.3, ᒪᓕᒐᖏᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓂᐅᑉ ᐊᒻᒪ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓂᐊᖅᑎᓪᓗᒋᑦ ᑐᓴᕋᓱᐊᕐᓂᐅᔪᖅ ᒪᑐᐃᖓᑎᑕᐅᔭᕆᐊᖃᖅᐳᖅ ᑭᓇᒃᑯᑐᐃᓐᓇᕐᓄᑦ ᑕᒪᓐᓇᓗ ᒪᓕᒐᖓ ᒪᓕᒃᑕᐅᓪᓚᕆᖕᓂᐊᖅᑐᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ.
(2) ᑲᑎᒪᔨᑦ ᐱᕕᖃᖅᑎᑦᓯᒋᐊᑐᖏᑦᑐᑦ ᐱᓕᕆᕝᕕᐅᓂᐊᖅᑐᒥᒃ ᑭᓇᒃᑯᑐᐃᓐᓇᕐᓄᑦ ᐃᓚᐅᓂᕆᔭᖓᓐᓄᑦ ᐅᕝᕙᓗ ᓇᔫᑎᑎᓪᓗᒋᑦ ᐅᐊᔭᒨᖅᑐᒃᑯᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖅᑎᓐᓇᒋᑦ ᐅᕝᕙᓗ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖅᑎᓐᓇᒋᑦ ᑐᓴᕋᓱᐊᕐᓂᕐᒥ.
(3) ᒪᓕᒡᓗᒍ ᒪᓕᒐᖅ 7, ᒪᓕᒐᖏᑦ ᐃᓚᐅᔪᑦ ᐊᒻᒪ ᑭᓇᒃᑯᑐᐃᓐᓇᐃᑦ ᑎᒍᓯᔪᓐᓇᕆᐊᖃᖅᑐᐃᓐᓇᐅᕗᑦ ᑎᑎᕋᖅᓯᒪᔪᓂᒃ ᑐᓂᔭᐅᓯᒪᔪᓂᒃ ᓈᓚᒃᑎᐅᓪᓗᑎᒃ ᑲᑎᒪᑎᓪᓗᒋᑦ ᑕᒪᒃᑯᓄᖓᓗ ᒪᓕᒐᕆᔭᐅᔪᑦ ᒪᓕᒃᑕᐅᓪᓚᕆᖕᓂᐊᖅᐳᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ.
1.6 ᑐᑭᖏᑦ
“ᑲᑎᒪᔨᑦ” ᑐᑭᖃᖅᐳᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᒃ, ᓈᓚᒃᑎᐅᖃᑕᐅᔪᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ, ᐅᕝᕙᓗ ᓇᓕᐊᑐᐃᓐᓇᖅ ᑲᑎᒪᔨᐅᖃᑕᐅᔪᖅ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ. ᐅᑯᓇᓂ ᒪᓕᒐᕐᓂ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐊᒻᒪ ᑲᑎᒪᔨᖏᑦ ᐊᑐᖅᑕᐅᒐᔪᒃᐳᑦ ᑕᐅᖅᓰᑦᑕᖅᑐᑎᒃ. “ᑎᑎᕋᖅᓯᒪᔪᑦ” ᑐᑭᖃᖅᐳᑦ, ᐃᓚᒋᓪᓗᒋᑦ ᓇᕿᑦᑕᖅᑕᐅᓯᒪᔪᑦ ᐅᓄᖅᓯᓕᖅᑕᐅᓯᒪᔪᑦ, ᓱᑲᑦᑐᒃᑰᖅᑐᑦ ᐅᕝᕙᓗ ᐅᐊᔭᒨᖅᑐᒃᑯᑦ ᑎᑎᖅᑲᑦ ᑎᑭᑎᑕᐅᔪᑦ ᐅᕝᕙᓗ ᓂᐱᓕᐅᖅᑕᐅᓯᒪᔪᑦ ᑎᑎᕋᖅᑕᐅᔪᓐᓇᕐᓗᑎᒃ, ᐊᒻᒪ ᑐᓴᖅᓴᐅᔪᒃᓴᑦ ᓂᕆᓕᐅᖅᑕᐅᓯᒪᔪᓂᒃ ᐅᕝᕙᓗ ᑕᕐᕆᔭᒐᒃᓴᓕᐊᖑᓪᓗᑎᒃ ᓂᐱᓕᐅᖅᑕᐅᓯᒪᔪᓂᒃ.
“ᐅᐊᔭᒨᖅᑐᒃᑯᑦ ᓈᓚᒃᑎᐅᓪᓗᑎᒃ ᑲᑎᒪᓂᖅ” ᑐᑭᖃᖅᐳᖅ ᓈᓚᒃᑎᐅᓪᓗᑎᒃ ᑲᑎᒪᔪᑦ ᐅᖄᓚᐅᑎᒃᑯᑦ ᐅᕝᕙᓗ ᐊᓯᐊᖑᑦ ᐅᐊᔭᒨᖅᑐᒥᒃ ᐊᑐᕐᓗᑎᒃ ᑖᒃᑯᐊ ᐃᓚᐅᔪᑦ ᐃᒻᒥᖕᓄᑦ ᐅᖃᖃᑎᒌᒍᓐᓇᕐᓗᑎᒃ.
“ᐃᓘᓐᓇᖏᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ” ᑐᑭᖃᖅᑐᖅ ᑕᓪᓕᒪᑦ ᐅᓄᖏᓐᓂᖅᐹᖑᔪᑦ ᑲᑎᒪᔨᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂ.
“ᓈᓚᒡᑎᐅᓪᓗᓂ ᑲᑎᒪᓂᖅ” ᑕᐃᔭᐅᔪᓐᓇᖅᐳᖅ ᐅᖃᖃᑎᒌᒃᑎᓪᓗᒋᑦ ᐅᕝᕙᓗ ᐅᐊᔭᒨᖅᑐᒃᑯᑦ ᓈᓚᒡᑎᐅᓪᓗᑎᒃ ᑲᑎᒪᑎᓪᓗᒋᑦ. ᐱᖃᓯᐅᔾᔨᓯᒪᔪᖅ ᓇᓕᐊᖕᓂᑐᐃᓐᓇᖅ ᓈᓚᒃᑎᐅᓪᓗᑎᒃ ᑲᑎᒪᓂᕐᒥᒃ ᐃᓚᒋᔭᐅᔪᑦ ᑖᒃᑯᐊ ᓵᖓᓄᐊᖃᑦᑕᕐᖢᑎᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᓇᖕᒥᓂᖅ ᐅᕝᕙᓗ ᐅᐊᔭᒨᖅᑐᒃᑯᑦ, ᐅᕝᕙᓗ ᑕᒪᒃᑮᑎᒍᑦ, ᐅᖃᓪᓚᒋᐊᖅᑐᖅᓯᒪᓪᓗᑎᒃ ᑐᓐᓂᑯᑎᒋᓯᒪᔭᖏᑕ ᒥᒃᓵᓄᑦ.
“ᑲᓐᖑᓇᖅᑐᒃᑯᑦ ᑲᑎᒪᓂᖅ” ᑐᑭᖃᖅᐳᖅ ᐃᒻᒥᒃᑰᕐᖢᑎᒃ ᑲᑎᒪᔪᓂᒃ.
“ᐃᓄᒃᑎᑐᑦ” ᐱᖃᓯᐅᔾᔨᓯᒪᕗᖅ ᐃᓄᐃᓐᓇᖅᑐᑦ ᖃᖓᑐᐃᓐᓇᒃᑯᑦ ᐱᔾᔪᑎᐅᔪᑦ ᐅᑯᐊ ᒪᓕᒐᐃᑦ ᐊᑖᓃᑦᑐᑦ ᐊᒃᑐᐃᓂᖃᖅᑎᓪᓗᒋᑦ ᐃᓄᖕᓂᒃ ᐊᑐᖅᑎᐅᔪᓂᒃ ᐅᖃᐅᓯᕐᒥᖕᓂᒃ.
“ᖃᐅᔨᒃᑲᐃᔾᔪᑎ” ᑐᑭᖃᖅᑐᖅ ᑎᑎᖅᑲᑎᒍᑦ ᖃᐅᔨᒃᑲᐃᔾᔪᑎᒥᒃ:
(a) ᑐᓂᔭᐅᓗᑎᒃ ᐋᑕᐅᓗᑎᒃ ᓇᖕᒥᓂᖅ ᐅᕝᕙᓗ ᐊᑭᓕᖅᓯᒪᔪᑎᒍᑦ ᐊᐅᓪᓚᖅᑎᑕᐅᓗᑎᒃ ᑖᑦᓱᒧᖓ ᐃᓄᖕᒧᑦ;
(b) ᐊᐅᓪᓚᖅᑎᑕᐅᓯᒪᔪᒥᒃ ᓱᑲᑦᑐᒃᑯᑦ ᐅᕝᕙᓗ ᐊᓯᐊᖑᑦ ᐅᐊᔭᒨᖅᑐᒃᑯᑦ, ᐱᔭᐅᔪᕕᓂᖅᑎᑐᑦ ᐱᒐᔭᖅᑐᖅ ᖃᐅᑎᓪᓗᒍ ᐊᐅᓪᓚᖅᑎᑕᐅᓂᕆᓚᐅᖅᑕᖓᓂᑦ;
(c) ᑎᑎᖅᑲᕐᓂᐊᕐᕕᒃᑯᑦ ᐊᐅᓪᓚᖅᑎᑕᖅ, ᐱᔭᐅᓂᕋᖅᑕᐅᒐᔭᖅᐳᖅ 7-ᖓᓂ ᐅᓪᓗᐊᓂ ᐊᐅᓪᓚᖅᑎᑕᐅᓚᐅᖅᑎᓪᓗᒍ; ᐅᕝᕙᓗ
(d) ᑐᓴᖅᑎᑦᑎᔪᑦ ᑐᓴᒐᒃᓴᑎᒍᑦ ᐱᕙᓪᓕᐊᔪᑎᒍᑦ, ᓈᓚᐅᑎᒃᑯᑦ, ᑕᓚᕖᓴᒃᑯᑦ, ᓄᓇᓕᖕᓂ ᐊᑭᓐᓇᕐᒥᐅᑕᑎᒍᑦ, ᐅᕝᕙᓗ ᑕᖅᑲᒃᑯᐊ ᑐᓴᖅᑎᑕᐅᓂᖓᑎᒍᑦ, ᒪᓕ’ᓗᒋᑦ ᒪᓕᒐᖏᑦ ᓴᓇᔭᐅᓯᒪᔪᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ.
“NWMB-ᒥᒃ” ᓇᐃᓈᖅᓯᒪᓪᓗᓂ ᖃᓪᓗᓈᑎᑐᑦ ᑕᐃᔭᐅᕙᒃᐳᑦ ᐅᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ
“ᐅᖃᐅᓯᒃᑯᑦ ᑐᓴᖅᑎᑦᓯᓂᖅ” ᐅᖃᐅᓯᖃᖅᐳᖅ ᑐᓴᖅᑎᑦᑎᔾᔪᑎ ᓈᓚᐅᑎᒃᑯᑦ, ᑕᓚᕖᓴᒃᑯᑦ ᐅᕝᕙᓗ ᐊᓯᐊᒍᑦ ᑐᓴᖅᓴᐅᔾᔪᑎᑎᒍᑦ ᐅᖃᐅᑕᐅᑎᓪᓗᒍ.
“ᐃᓚᐅᔪᖅ” ᑐᑭᖃᖅᑐᖅ ᐃᓚᐅᓂᖃᖅᑐᒥᒃ ᐅᕝᕙᓗ ᑐᓴᕈᒪᓂᖃᖅᑐᑦ ᑭᓇᒃᑯᑐᐃᓐᓇᐃᑦ ᐅᐸᒍᑎᓯᒪᔪᑦ ᓈᓚᒃᑎᐅᓗᑎᒃ ᑲᑎᒪᓂᖃᖅᑎᓪᓗᒋᑦ.
“ᑭᓇᑐᐃᓐᓇᖅ” ᐱᖃᓯᐅᔾᔨᓯᖅᒪᕗᖅ ᑯᐊᐳᕆᓴᐅᔪᒥᒃ, ᐃᓄᐃᑦ ᑎᒥᖁᑎᖓᓐᓂᒃ, ᓇᓕᐊᑐᐃᓐᓇᕐᒥᒃ ᐱᓕᕆᕝᕕᐅᔪᒥᒃ ᓴᖅᑭᑕᐅᓯᒪᔪᒥᒃ ᐊᑖᒍᑦ ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᑎᒍᑦ, ᐊᒻᒪ ᓇᓕᐊᖕᓂᑐᐃᓐᓇᖅ ᑎᒥᓐᖑᖅᑎᑕᐅᓯᒪᖏᑦᑐᒥᒃ ᑲᑐᔾᔨᖃᑎᒌᖑᔪᓂᒃ ᐃᓕᓴᕆᔭᐅᓯᒪᔪᒥᒃ ᑭᓇᑐᐃᓐᓇᖅᑎᑐᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ.
“ᑎᑎᖅᑲᑦ ᑐᓐᓂᖁᑎᑦ” ᐱᖃᓯᐅᔾᔨᓯᒪᕗᖅ ᑎᑎᕋᖅᓯᒪᔪᓂᒃ ᖃᓄᐃᓐᓂᐅᔪᓂᒃ ᐅᖃᐅᓯᖃᖅᑐᓂᒃ ᐊᒻᒪ ᐃᓱᒪᒋᔭᐅᔪᓂᒃ, ᐊᐃᕙᐅᑕᐅᔪᓂᒃ, ᐊᒻᒪ ᐊᒃᑐᐊᓂᖃᖅᑐᓂᒃ ᑎᑎᕋᖅᑕᐅᓯᒪᔪᓂᒃ ᐅᕝᕙᓗ ᐊᓯᖏᓐᓂᒃ ᐅᖃᓕᒫᒐᓕᐊᖑᓯᒪᔪᓂᒃ.
ᒪᓕᒐᖅ 2: ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖅᑎᓐᓇᒋᑦ ᑐᓴᕋᓱᐊᕐᓂᖃᕐᓂᖅ
2.1 ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᕐᓂᕐᒥᒃ
ᓯᕗᕐᖓᒍᑦ ᐃᓱᒪᓕᐅᓚᐅᖏᓐᓂᖏᓐᓂ ᓈᓚᒃᑎᐅᓗᑎᒃ ᑲᑎᒪᔭᕆᐊᖃᕐᒪᖔᑕ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᕆᐊᖃᖅᐳᑦ.
2.2 ᐱᔾᔪᑎᖓ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᐅᑉ
ᒪᓕᒐᓕᐅᖅᓯᒪᖏᓪᓗᑎᒃ ᐊᑐᖅᑕᐅᔪᓐᓇᕐᓂᖏᓐᓄᑦ ᑐᓴᕋᓱᐊᕐᓂᐅᔪᑦ ᑕᐃᒪᐃᑦᑐᓄᑦ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐋᖅᑭᒡᓱᐃᔪᓐᓇᖅᐳᑦ ᐱᔪᒪᒍᑎᒃ ᑐᓴᕋᓱᐊᕐᓂᖃᕐᓂᕐᒥᒃ:
(a) ᐃᑲᔪᖅᑐᐃᓂᐊᕐᒪᑕ ᑲᑎᒪᔨᓂᒃ ᐃᓱᒪᓕᐅᕋᓱᐊᖅᑎᓪᓗᒋᑦ ᓈᓚᒃᑎᐅᓗᑎᒃ ᑲᑎᒪᔭᕆᐊᖃᕐᒪᖔᑕ;
(b) ᓇᓗᓇᐃᖅᓯᒐᓱᐊᖅᑎᓪᓗᒋᑦ ᓄ/ᓴᓕᐅᔪᒥᒃ ᐊᒻᒪ ᐊᓯᖏᓐᓂᒃ ᐃᓱᒫᓗᒍᑕᐅᔪᓂᒃ;
(c) ᐅᖃᖃᑎᖃᕈᓐᓇᖁᓪᓗᒋᑦ ᓄᓇᓕᖕᓂᒃ, ᐊᒻᒪᓗ ᐊᓯᖏᓐᓂᒃ ᐊᒃᑐᖅᑕᐅᓯᒪᔪᓂᒃ ᐅᖃᐅᑕᐅᔪᒧᑦ ᑐᓴᕋᓱᐊᕐᓂᖃᖅᑎᓪᓗᒋᑦ, ᐊᒻᒪ ᐅᖃᐅᓯᐅᔪᓐᓇᖅᑐᓂᒃ, ᐊᐅᓚᔾᔭᒃᑕᐅᔪᓐᓇᖅᑐᓂᒃ, ᐅᕝᕙᓗ ᐊᓯᖏᓐᓂᒃ ᐊᑐᖅᑕᐅᔪᓐᓇᖅᑐᓂᒃ, ᐊᒻᒪ ᓴᖅᑭᑦᑐᓐᓇᖅᑐᓂᒃ ᑐᓴᕋᓱᐊᕐᓂᕐᒥᑦ;
(d) ᓄᐊᑦᓯᓗᑎᒃ ᐊᒻᒪ/ᐅᕝᕙᓗ ᑐᓂᓯᐅᖅᑲᐃᓗᑎᒃ ᑐᓴᒐᓴᒃᓴᓂᒃ; ᐊᒻᒪ
(e) ᐅᖃᐅᑕᐅᖁᓪᓗᒍ ᐃᓚᐅᓂᕆᔭᖓ ᓄᓇᓕᐅᔪᖅ ᐊᒻᒪ ᐊᓯᖏᑦ ᓈᓚᒃᑎᐅᓗᑎᒃ ᑲᑎᒪᔾᔪᑕᐅᔪᓐᓇᕋᔭᖅᑐᑦ.
2.3 ᑐᓴᖅᑎᑦᓯᓂᖅ ᐊᒻᒪ ᐋᖅᑭᒡᓯᒪᓂᕆᔭᖓ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᓂᕐᒧᑦ
(1) ᓯᕗᕐᖓᒍᑦ ᐃᓱᒪᓕᐅᓚᐅᖏᓐᓂᖏᓐᓂ ᐋᖅᑭᒡᓯᒪᓂᕆᓂᐊᖅᑕᖓᓐᓂᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᕐᓂᐅᑉ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᐅᖃᐅᔾᔭᐅᒋᐊᕈᓐᓇᕐᓂᖏᓐᓂᒃ ᐊᑕᐅᓯᕐᒥᑦ ᐅᕝᕙᓗ ᐅᓄᕐᓂᖅᓴᓂᒃ ᖃᐅᔨᒪᓂᖃᖅᑐᓂᒃ ᐃᓕᖅᑯᓯᕐᓄᑦ ᐊᒃᑐᐊᓂᖃᖅᑐᓂᒃ ᑐᓴᕋᓱᐊᕐᓂᖃᓂᕐᒧᑦ ᐱᐅᓯᐅᔪᓂᒃ.
(2) ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑐᓂᓯᔭᕆᐊᖃᖅᐳᑦ ᐊᑐᓂ ᓄᓇᓕᐅᔪᓄᑦ, ᒐᕙᒪᒃᑯᑦ ᐱᓕᕆᕝᕕᖓᓐᓂᒃ ᑲᒪᔪᒥᒃ ᐱᔾᔪᑕᐅᔪᒧᑦ ᑐᓴᕋᓱᐊᕐᒃᓂᖃᖅᑎᓪᓗᒋᑦ, ᐊᒻᒪ ᑭᓇᑐᐃᓐᓇᖅ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᐃᓱᒪᒋᔭᖓ ᐱᑐᐃᓐᓇᐅᖏᑦᑐᒃᑯᑦ ᐊᒃᑐᖅᑕᐅᓂᐊᕐᓂᖓᓂᒃ ᐱᔾᔪᑕᐅᔪᒧᑦ ᑐᓴᕋᓱᐊᕐᓂᕐᒧᑦ ᐱᕕᖃᖅᑎᑦᓯᑦᓯᐊᕐᓗᓂ ᑐᓴᖅᑎᑦᓯᔭᕆᐊᖃᖅᑐᖅ ᐅᓪᓗᖓᓂᒃ, ᖃᑦᓯᒧᐊᖅᐸᐅᓂᖓᓂᒃ ᐊᒻᒪ ᓇᓃᓐᓂᐊᕐᓂᖓᓂᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᐅᔪᖅ, ᐱᖃᓯᐅᔾᔨᓗᑎᒃ ᐱᕕᖃᖅᑎᑦᓯᑦᓯᐊᕐᓗᑎᒃ ᐅᖃᐅᓯᒃᑯᑦ ᑐᓴᖅᑎᑦᓯᓗᑎᒃ ᓄᓇᓕᖕᓄᑦ.
(3) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐋᖅᑭᒡᓱᐃᖃᑦᑕᕆᐊᖃᖅᐳᑦ ᐊᑐᓂ ᓯᕗᕐᒐᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂᒃ ᑐᓴᕋᓱᐊᕐᓂᒃᓴᒥᒃ ᑎᓕᐅᕆᖁᓪᓗᒋᑦ ᐊᑕᖏᕐᓗᑎᒃ ᐊᒻᒪ ᒪᑐᐃᖓᑦᓯᐊᕐᓗᑎᒃ ᐃᓚᐅᓂᖃᕐᓂᐊᕐᒪᑕ.
(4) ᒪᓕᒡᓗᒍ ᒪᓕᒐᐅᑉ ᐃᓚᕈᓯᐊᑕ ᓈᓴᐅᑖ 2.3(1), ᑐᓴᕋᓱᐊᕐᓂᖃᕐᓗᑎᒃ ᑲᑎᒪᓂᐊᖅᐳᑦ ᑲᑎᒪᓪᓚᕆᖏᓂᐅᖏᓪᓗᒍ, ᑭᓯᐊᓂᓕ ᐋᖅᑭᒡᓯᒪᑦᓯᐊᕐᓗᓂ. ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᓇᓗᓇᐃᖅᓯᑦᓯᐊᕆᐊᖃᖅᐳᑦ, ᐱᒋᐊᕐᓂᖓᓂ ᑐᓴᕋᓱᐊᕐᓂᖃᕐᓗᑎᒃ ᑲᑎᒪᓂᕐᒥ, ᖃᓄᖅ ᐊᐅᓚᑦᓯᓂᐊᕐᒪᖔᑕ ᑐᓴᕋᓱᐊᕐᓂᖃᕐᓗᑐᑎᒃ ᑲᑎᒪᑎᓪᓗᒋᑦ, ᐱᕕᖃᑦᓯᐊᖁᓪᓗᒋᑦ ᐃᓱᒪᒋᔭᐅᔪᓂᒃ ᐅᖃᐅᓯᖃᖁᓪᓗᒋᑦ ᐊᒻᒪ ᑐᓴᒐᒃᓴᖁᑎᒋᔭᐅᔪᓂᒃ, ᐊᒻᒪ ᓯᕗᒧᐊᒃᑎᑦᓯᖁᓪᓗᒋᑦ ᑕᐃᒃᑯᐊ ᓂᓪᓕᕈᒪᔪᓕᒫᑦ ᓂᓪᓕᖅᑐᐃᓐᓇᖁᓪᓗᒋᑦ.
(5) ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᕐᓂᖅ ᑲᑎᒪᔪᓐᓇᖅᐳᑦ ᐅᐸᒍᑎᓯᒪᓗᑎᒃ ᐅᕝᕙᓗ ᐅᐊᔭᒨᖅᑐᒃᑯᑦ ᑲᑎᒪᔾᔪᑎᖃᕐᓗᑎᒃ, ᐅᕝᕙᓗ ᑕᒪᒃᑮᖕᓂᒃ ᐊᑐᕐᓗᑎᒃ.
2.4 ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᕐᓂᕐᒧᑦ ᓇᐃᓈᖅᓯᒪᔪᑦ ᐅᓂᒃᑳᑦ
(1) ᐃᓗᐊᓂ ᐱᕕᖃᑦᓯᐊᕐᓗᑎᒃ ᑐᓴᕋᓯᐊᕐᓂᖃᖅᑎᓪᓗᒋᑦ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑲᑎᒪᑎᑦᓯᓗᑎᒃ, ᐊᒻᒪ ᐃᖅᑲᐅᒪᓗᑎᒃ ᐱᔾᔪᑎᖓᓂᒃ ᐅᕝᕙᓗ ᐱᔾᔪᑎᖏᓐᓂᒃ ᑐᓴᕋᓱᐊᕐᓂᐅᑉ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᓴᖅᑭᑎᑦᑎᔭᕆᐊᖃᖅᐳᑦ ᑎᑎᕋᖅᓯᒪᔪᓂᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᓚᐅᖅᑎᓪᓗᒋᑦ ᐅᓂᒃᑳᖅᓯᒪᔪᓂᒃ ᓇᐃᓈᖅᓯᒪᔪᓂᒃ, ᖃᓪᓗᓈᑎᑐᑦ ᐃᓄᒃᑎᑐᓪᓗ. ᐃᓚᒋᓪᓗᒍ, ᑲᑎᒪᔨᐅᔪᑦ ᓴᓇᔭᕆᐊᖃᖅᐳᑦ ᐃᓄᒃᑎᑑᖓᔪᒥᒃ ᓂᐱᓕᐅᖅᓯᒪᔪᒥᒃ ᓇᐃᓈᖅᓯᒪᔪᓂᒃ.
(2) ᐊᔾᔨᖏᑦ ᓇᐃᓈᖅᓯᒪᔪᑦ ᐅᓂᒃᑳᑦ ᑐᓂᔭᐅᔭᕆᐊᖃᖅᐳᑦ ᐅᑯᓄᖓ:
(a) ᑲᑎᒪᔨᓕᒫᖏᓐᓄᑦ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ;
(b) ᐊᖑᓇᓱᒃᑐᓕᕆᔨᑦ ᑎᒥᖁᑎᖏᓐᓄᑦ ᓄᓇᓕᖁᑎᖓᓐᓂ;
(c) ᐊᒡᒍᖅᑐᖅᓯᒪᓂᕐᒥ ᐆᒪᔪᓕᕆᔨᑦ ᑎᒥᖁᑎᖓᑦ;
(d) ᒐᕙᒪᒃᑯᑦ ᐱᓕᕆᕝᕕᖓᑦ ᑲᒪᔪᖅ ᑲᑎᒪᔾᔪᑕᐅᔪᒥᒃ ᑐᓴᕋᓱᐊᕐᓂᖃᕐᓗᑎᒃ;
(e) ᓄᓇᕗᑦ ᑐᓐᖓᕕᒃ ᑎᒥᖓᑦ; ᐊᒻᒪᓗ
(f) ᑭᓇᑐᐃᓐᓇᕐᒧᑦ ᑐᕌᖓᔪᒧᑦ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ , or whom ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐅᕝᕙᓗ ᑭᓇᑐᐃᓐᓇᕐᒧᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑕ ᐃᓱᒪᒋᔭᖏᑦ, ᐊᒃᑐᖅᑕᐅᓂᐊᖅᑐᒋᓪᓗᒍ ᐅᖃᐅᑕᐅᔪᖅ ᑐᓴᕋᓱᐊᕐᓂᖃᖅᑎᓪᓗᒋᑦ.
(3) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᑐᐃᓐᓇᕈᐃᔭᕆᐊᖃᖅᐳᑦ ᑕᖅᑲᒃᑯᐊ ᖃᐅᔨᓴᐃᔪᓐᓇᕐᓂᐊᕐᒪᑕ, ᐊᖓᔪᖅᑳᖃᕐᕕᖓᓐᓂ ᑎᑎᕋᖅᓯᒪᔪᒥ, ᑎᑎᕋᖅᓯᒪᔪᑎᒍᑦ ᐊᒻᒪ ᐃᓄᒃᑎᑐᑦ ᓂᐱᓕᐅᖅᓯᒪᔪᓂᒃ ᐊᔾᔨᖏᓐᓂᒃ ᐊᑐᐃᓐᓇᕈᐃᓗᑎᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑐᓴᕋᓱᐊᕐᓂᖃᕐᓗᑎᒃ ᑲᑎᒪᔾᔪᑎᕕᓂᕐᓂᒃ.
ᒪᓕᒐᖅ 3: ᐃᓯᕈᓐᓇᕐᓂᖅ ᓈᓚᒃᑎᐅᓗᑎᒃ ᑲᑎᒪᔪᓄᑦ
3.1 ᐃᓚᐅᔪᓐᓇᕐᓂᖅ ᐃᓚᐅᔪᓄᑦ
(1) ᓇᓕᐊᑐᐃᓐᓇᖅ ᑭᒡᒐᖅᑐᖅᑎᐅᔪᖅ ᐅᕝᕙᓗ ᑭᒡᒐᕆᔭᐅᔪᖅ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐅᕝᕙᓗ ᐅᑭᐅᖅᑕᖅᑐᕐᒥᐅᑦ ᒐᕙᒪᒃᑯᖏᓐᓄᑦ, ᓇᓕᐊᑐᐃᓐᓇᖅ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᑎᒥᖁᑎᖓᑦ ᐅᕝᕙᓗ ᐊᒡᒍᖅᑐᖅᓯᒪᓂᕐᒥ ᐆᒪᔪᓕᕆᓂᕐᒧᑦ ᑎᒥᖁᑎᖓᑦ, ᑭᓇᑐᐃᓐᓇᖅ ᐃᓄᒃ, ᐊᒻᒪᐊ ᓯᖓ ᑲᑎᒪᔨᐅᔪᓄᑦ ᐃᓱᒪᒋᔭᐅᒃᐸᑦ ᓈᒻᒪᒐᓱᒋᔭᐅᓗᓂ, ᐃᓕᓴᕆᔭᐅᔪᓐᓇᖅᐳᖅ ᐃᓚᐅᔪᓐᓇᑦᓯᐊᕐᓂᐊᕐᓗᓂ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
(2) ᒪᓕᒡᓗᒋᑦ ᒪᓕᒐᐅᑉ ᐃᓚᕈᓯᖏᑦ ᓈᓴᐅᑎᖓ 1.2 ᐊᒻᒪ 3.3(2), ᐊᒻᒪ ᒪᓕᒐᖅ 7, ᐃᓕᓴᕆᔭᐅᒪᓂᖃᕐᓗᓂ ᐃᓚᐅᓂᐊᕐᓗᓂ ᑖᓐᓇ ᐃᓚᐅᓂᐊᖅᑐᖅ ᐊᔾᔨᖏᓐᓂᒃ ᒪᓕᒐᖃᖅᐳᖅ ᐃᓚᐅᓂᐊᖅᑎᓪᓗᒍ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓈᓚᒃᑎᐅᓗᑎᒃ ᑲᑎᒪᓂᐊᖅᑎᓪᓗᒋᑦ ᐊᒻᒪ ᐊᔾᔨᖓᓂᒃ ᐱᓯᒪᔪᓐᓇᕐᓂᖃᖅᐳᖅ ᓈᓚᒃᑎᐅᓗᑎᒃ ᑲᑎᒪᔾᔪᑕᐅᔪᓄᑦ ᑎᑎᖅᑲᖁᑎᐅᔪᓂᒃ ᐊᔾᔨᒋᓗᓂᒋᑦ ᐊᓯᖏᑦ ᐃᓚᐅᖃᑕᐅᔪᑦ.
(3) ᐊᓯᐊ ᑭᓇᑐᐃᓐᓇᖅ ᐊᑎᖓ ᐃᓕᔭᐅᖁᔭᖓ ᐃᓚᐅᑎᑕᐅᔪᒪᓂᐊᕈᓂ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᑐᒃᓯᕋᐅᑎᓕᐅᕆᐊᖃᖅᐳᖅ ᑎᑎᕋᖅᓯᒪᔪᑎᒍᑦ ᑲᑎᒪᔨᓄᑦ.
(4) ᐃᓱᒪᓕᐅᖅᑎᓪᓗᒋᑦ ᐊᑎᖓ ᐃᓕᔭᐅᓂᐊᖅᑎᓪᓗᒍ ᐃᓚᐅᖃᑕᐅᔪᓄᑦ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᖃᓯᐅᔾᔨᔪᓐᓇᕆᕗᑦ ᐊᓯᖏᓐᓂᒃ ᐱᔾᔪᑕᐅᔪᓂᒃ ᐃᒪᐃᑦᑐᓂᒃ:
(a) ᑭᓇᑐᐃᓐᓇᐅᑉ ᑐᓴᕈᒪᓂᕆᔭᖓᓄᑦ ᐊᒃᑐᖅᑕᐅᓂᕆᔪᓐᓇᖅᑕᖓ ᓈᓚᒃᑎᐅᓗᑎᒃ ᑲᑎᒪᓂᒃᑯᑦ ᐅᕝᕙᓗ ᓴᖅᑭᑦᑐᓂᑦ ᓈᓚᒃᑎᐅᓗᑎᒃ ᑲᑎᒪᓂᒃᑯᑦ;
(b) ᑭᓇᑐᐃᓐᓇᖅ ᑐᓴᕈᒪᓂᖃᑦᓯᐊᕈᓂ ᐱᔾᔪᑎᖃᑦᓯᐊᕐᓗᓂ ᑕᒪᑐᒧᖓ ᓈᓚᒃᑎᐅᓗᑎᒃ ᑲᑎᒪᔾᔪᑕᐅᔪᒧᑦ;
(c) ᑭᓇᑐᐃᓐᓇᖅ ᐱᓪᓚᕆᒃᑐᒥᒃ ᓴᖅᑭᑦᓯᔪᖅ ᐃᓱᒫᓗᒍᑎᒥᒃ;
(d) ᑭᓇᑐᐃᓐᓇᖅ ᐊᑑᑎᖃᖅᑐᒃᑯᑦ ᐊᒻᒪ ᓇᓗᓇᖏᑦᑐᒃᑯᑦ ᐃᑲᔪᕐᓂᖃᕐᓂᐊᕐᓂᖓᓂᒃ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᑐᑭᓯᒪᓂᖏᓐᓄᑦ ᐱᔾᔪᑕᐅᔪᓄᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ; ᐊᒻᒪ/ᐅᕝᕙᓗ
(e) ᐊᓯᐊᒍᑦ ᐊᑑᑎᖃᖅᑐᒃᑯᑦ ᐊᒻᒪ ᓱᒃᑲᑎᒋᔪᒃᑯᑦ ᑭᓇᑐᐃᓐᓇᐅᑉ ᐃᓱᒫᓗᒍᑎᒋᔭᖓ ᓴᖅᑭᑕᐅᔪᓐᓇᖅᑎᓐᓇᒍ.
3.2 ᐃᓚᐅᔪᓐᓇᕐᓂᖏᑦ ᑐᓴᕈᒪᓂᖃᖅᑐᑦ ᑭᓇᒃᑯᑐᐃᓐᓇᐃᑦ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᐃᒪᐃᑦᑐᓐᓇᖅᐳᑦ, ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓂᐅᑉ ᐅᕝᕙᓗ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ:
(a) ᐃᓕᓴᖅᓯᓗᑎᒃ ᑐᓴᕈᒪᓂᖃᖅᑐᒥᒃ ᑭᓇᑐᐃᓐᓇᕐᒧᑦ ᓇᓕᐊᑐᐃᓐᓇᕐᒥᒃ ᑭᓇᑐᐃᓐᓇᕐᒥᒃ ᐃᓚᐅᓂᖃᖏᑦᑐᒧᑦ ᐊᒻᒪ ᑖᓐᓇ, ᑲᑎᒪᔨᑦ ᐃᓱᒪᒋᔭᖓᒍᑦ, ᑐᓴᒐᒃᓴᖃᕐᓂᖓᓂᒃ, ᖃᐅᔨᒪᓂᖃᕐᓂᖓᓂᒃ ᐅᕝᕙᓗ ᐃᓱᒪᒋᔭᖃᕐᓂᖓᓂᒃ ᐃᑲᔪᕐᓂᖃᕐᓂᐊᕐᓂᖓᓂᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᑭᓯᐊᓂᓕ ᐊᑎᖃᖃᑕᐅᖏᒃᑲᓗᐊᕐᓗᓂ ᐃᓚᐅᔪᓄᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ; ᐊᒻᒪ
(b) ᐱᔪᓐᓇᖅᑎᑦᓯᓗᓂ ᑐᓴᕈᒪᓂᖃᖅᑐᒥᒃ ᑭᓇᑐᐃᓐᓇᕐᒥᒃ ᐃᓚᐅᔪᓐᓇᕐᓗᓂ ᓈᓚᒃᑎᐅᓗᑎᒃ ᑲᑎᒪᓂᖃᖅᑎᓪᓗᒋᑦ ᒪᓕᒃᑕᐅᓗᑎᒃ ᒪᓕᒐᖏᑦ ᓴᓇᔭᐅᓯᒪᔪᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ .
3.3 ᑲᓐᖑᓇᖅᑐᒃᑯᑦ ᑲᑎᒪᓃᑦ
(1) ᐅᕝᕙᓗ ᐃᓚᖓᓂ ᓈᓚᒃᑎᐅᓗᑎᒃ ᑲᑎᒪᓂᖃᕈᓐᓇᖅᐳᑦ ᑲᓐᖑᓇᖅᑐᒃᑰᕐᓗᒍ, ᐃᒪᐃᑦᑑᒃᐸᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᐃᓱᒪᒋᒃᐸᒍ ᐃᒪᓐᓇ:
(a) ᑲᓐᖑᓇᖅᑑᒃᐸᑦ ᐅᕝᕙᓗ ᐃᒃᐱᖕᓇᓗᐊᖅᐸᑦ ᓴᖅᑭᑕᐅᔭᕆᐊᒃᓴᖅ; ᐅᕝᕙᓗ
(b) ᑕᐃᒪᐃᑦᑐᑦ ᑮᓇᐅᔭᓕᕆᔪᑦ, ᐃᒻᒥᒧᑦ ᑐᕌᖓᔪᓄᑦ ᐅᕝᕙᓗ ᐊᓯᖏᓐᓄᑦ ᐱᔾᔪᑎᐅᔪᑦ ᓴᖅᑭᑕᐅᔪᓐᓇᖅᑐᑦ ᐱᔪᒪᒍᑎᒃ, ᑕᒪᒃᑯᐊ ᓴᖅᑭᑕᐅᕙᖏᑦᑐᑦ, ᐊᑲᐅᓛᖑᖁᓪᓗᒍ ᑭᓇᑐᐃᓐᓇᕐᒧᑦ ᐊᒃᑐᖅᑕᐅᓯᒪᔪᒧᑦ ᐅᕝᕙᓗ ᑕᖅᑲᒃᑯᓄᖓ ᐊᒃᑐᖅᑕᐅᓯᒪᔪᓄᑦ, ᑖᓐᓇ ᐅᖁᒪᐃᓐᓂᖅᓴᐅᒃᐸᑦ ᒪᓕᒃᓯᓂᕐᒥᑦ ᒪᓕᒐᖓᓐᓂᒃ ᓈᓚᒃᑎᐅᓗᑎᒃ ᑲᑎᒪᓂᐅᑉ ᑭᓇᒃᑯᓕᒫᓄᑦ ᒪᑐᐃᖓᔭᕆᐊᖃᕐᑉᓂᖓᓄᑦ.
(2) ᑕᐃᒪᓕ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓘᓐᓇᖓᓂᒃ ᑲᑎᒪᓂᐅᑉ ᐅᕝᕙᓗ ᐃᓚᖓᓂᒃ ᑲᑎᒪᓂᐅᑉ ᑲᓐᖑᓇᖅᑐᒃᑰᖅᑎᑦᓯᒃᐸᑦ, ᐃᓱᒪᓕᐅᕆᐊᖃᖅᐳᑦ, ᖃᓄᐃᓐᓂᕆᔭᖓ ᒪᓕᒃᑕᐅᓗᓂ ᐊᑐᓂ, ᑭᓇᒃᑯᑦ ᐃᓚᐅᑎᑕᐅᔪᓐᓇᕋᔭᕐᒪᖔᑕ ᐊᒻᒪ ᖃᓄᐃᑦᑐᓂᒃ ᒪᓕᒐᖃᕋᔭᕐᒪᖔᑕ ᐃᓚᐅᔪᓐᓇᕐᓂᐊᖅᑎᓪᓗᒋᑦ ᑲᓐᖑᓇᖅᑐᒃᑯᑦ ᑲᑎᒪᑎᓪᓗᒋᑦ.
ᒪᓕᒐᖅ 4: ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑲᑎᒪᓂᖅ
4.1 ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐋᖅᑭᒡᓯᔪᒪᒍᑎᒃ ᐋᖅᑭᒡᓱᐃᔪᓐᓇᖅᐳᑦ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑲᑎᒪᓂᒃᓴᒥᒃ
ᒪᓕᒐᖃᖅᑎᑦᓯᖏᓪᓗᑎᒃ ᐊᑐᖅᑕᐅᔪᓐᓇᕐᓂᖏᓐᓂᒃ ᑕᐃᒪᐃᑦᑐᑦ ᑲᑎᒪᓂᐅᔪᑦ, ᐊᒻᒪ ᓈᓚᒃᑎᐅᓗᑎᒃ ᑲᑎᒪᓂᖅ ᐊᑑᑎᖃᕐᓂᖅᓴᐅᖁᓪᓗᒍ, ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᐊᖅᑭᒡᓱᐃᔪᓐᓇᖅᐳᑦ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓂᐅᑉ ᑲᑎᒪᓂᕐᒥᒃ ᐅᕝᕙᓗ ᑲᑎᒪᓂᕐᓂᒃ:
(a) ᓇᓗᓇᐃᖅᓯᓇᓱᐊᕐᓗᑎᒃ ᐊᒻᒪ/ᐅᕝᕙᓗ ᐱᔭᕇᖅᓯᓇᓱᐊᕐᓗᑎᒃ ᑎᑎᕋᖅᑕᐅᓯᒪᓂᖏᓐᓂᒃ ᐱᔾᔪᑎᐅᔪᑦ ᑲᒪᒋᔭᐅᔭᕆᐊᖃᖅᑐᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ;
(b) ᐃᓱᒪᒃᓴᖅᓯᐅᕈᑎᖃᖁᓪᓗᒋᑦ ᐊᐅᓚᓂᕆᓂᐊᖅᑕᖓᓄᑦ ᐱᔾᔪᑎᐅᔪᑦ ᑭᐅᔭᐅᓯᒪᖏᑦᑐᓂᒃ ᐅᑯᓇᓂ ᒪᓕᒐᕐᓂ;
(c) ᐃᓱᒪᒃᓴᖅᓯᐅᕈᑎᖃᖁᓪᓗᒋᑦ ᐊᓯᖏᓐᓂᒃ ᐱᔾᔪᑎᐅᔪᓂᒃ ᐃᑲᔪᓯᔪᓐᓇᕋᔭᖅᑐᓂᒃ ᐱᔭᕐᓂᕐᓂᖅᓴᐅᖁᓪᓗᒍ ᐊᒻᒪ/ᐅᕝᕙᓗ ᐊᑯᓂᐅᓗᐊᖏᑦᑐᒃᑯᑦ ᐱᓕᕆᔭᐅᔪᓐᓇᖁᓪᓗᒍ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ;
(d) ᓇᓗᓇᐃᖅᓯᖁᓪᓗᒋᑦ ᐊᖏᖅᓯᖁᓪᓗᒋᑦ ᐃᓚᐅᓂᐊᖅᑐᓂᒃ ᐊᒻᒪ ᐃᓚᐅᔪᓐᓇᖅᑐᓂᒃ, ᑐᓴᕈᒪᓂᖃᖅᑐᓂᒃ ᑭᓇᒃᑯᑐᐃᓐᓇᕐᓂᒃ, ᐊᒻᒪ ᐅᖃᓪᓚᒋᐊᖅᑐᖅᑎᑕᐅᓂᐊᖅᑐᓂᒃ;
(e) ᑐᓂᓯᖁᓪᓗᒋᑦ ᑐᓴᒐᒃᓴᓂᒃ ᐃᓚᐅᔪᓄᑦ;
(f) ᓇᓗᓇᐃᖅᓯᓗᑎᒃ ᐊᑯᓂᐅᓂᕆᓂᐊᖅᑕᖓᓂᒃ, ᖃᖓᐅᓂᖓᓂ ᐱᓕᕆᔭᐅᓂᒃᓴᖏᑕ ᐊᒻᒪ ᓇᓂ ᓈᓚᒃᑎᐅᓗᑎᒃ ᑲᑎᒪᓂᐊᕐᒪᖔᑕ; ᐊᒻᒪᓗ
(g) ᓯᕗᒧᐊᑦᓯᐊᖁᓪᓗᒋᑦ, ᑲᑎᒪᑎᑦᓯᑎᓪᓗᒋᑦ ᓈᓚᒃᑎᐅᓗᑎᒃ, ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᕈᑎᖃᕐᓗᑎᒃ ᐊᒻᒪ ᑕᖏᖃᖅᑎᑕᐅᓗᓂ ᐃᓄᐃᑦ ᐃᓕᖅᑯᓯᖓᑦ, ᐱᐅᓯᖏᑦ, ᐊᒻᒪ ᖃᐅᔨᒪᓂᖓᑦ, ᐊᒻᒪ ᐱᖅᑯᓯᖓᑦ ᐃᓄᐃᑦ ᑎᑎᕋᖅᓯᒪᔪᖁᑎᑎᒍᑦ ᐱᖅᑯᓯᖃᖏᓐᓂᖏᓐᓂᒃ.
4.2 ᑲᑎᒪᔪᓐᓇᖅᑐᑦ ᑕᑯᓐᓇᖃᑦᑕᐅᑎᓗᑎᒃ ᐅᕝᕙᓗ ᐅᐊᔭᒨᖅᑐᒥᒃ ᐊᑐᕐᓗᑎᒃ
ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑲᑎᒪᔪᓐᓇᖅᑐᑦ ᑕᑯᓐᓇᖃᑦᑕᐅᑎᓗᑎᒃ ᐅᕝᕙᓗ ᐅᐊᔭᒨᖅᑐᒥᒃ ᐊᑐᕐᓗᑎᒃ, ᐅᕝᕙᓗ ᑕᒪᒃᑮᖕᓂᒃ ᐊᑐᕐᓗᑎᒃ.
ᒪᓕᒐᖅ 5: ᑐᓴᖅᑎᑦᓯᓂᖅ ᓈᓚᒃᑎᐅᓗᑎᒃ ᑲᑎᒪᓂᒃᓴᒥᒃ ᐊᒻᒪ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑲᑎᒪᓂᒃᓴᒥᒃ
5.1 ᑐᓴᖅᑎᑦᓯᔾᔪᑎᖃᕐᓂᖅ ᓈᓚᒃᑎᐅᓗᑎᒃ ᑲᑎᒪᓂᒃᓴᒥᒃ
(1) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓂᓯᔭᕆᐊᖃᖅᐳᑦ ᐃᓘᓐᓇᖏᓐᓄᑦ ᐃᓚᐅᓂᐊᖅᑐᓄᑦ ᐱᕕᖃᖅᑎᓪᓗᒋᑦ ᐅᓄᖏᓐᓂᖅᐹᖑᔪᓂᒃ ᐅᓪᓗᓄᑦ 60−ᓄᑦ, ᖃᖓᐅᓂᐊᕐᓂᖓᓂᒃ ᐊᒻᒪ ᓇᓂ ᑲᑎᒪᓂᐊᕐᒪᖔᑕ ᓈᓚᒃᑎᐅᓗᑎᒃ, ᐊᒻᒪ ᐃᓚᒋᓗᒍ, ᐱᕕᖃᖅᑎᑦᓯᑦᓯᐊᕐᓗᑎᒃ ᐅᖃᐅᓯᒃᑯᑦ ᑐᓴᖅᑎᑦᓯᓗᑎᒃ ᐃᓄᖕᓂᒃ.
(2) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᕈᖃᑦᓯᐊᖅᑎᑦᓯᓗᑎᒃ ᐃᓕᓴᕆᔭᐅᓯᒪᔪᓄᑦ ᑐᓴᕈᒪᓂᖃᖅᑐᓄᑦ ᑭᓇᒃᑯᑐᐃᓐᓇᕐᓄᑦ ᐊᒻᒪ ᑕᖅᑲᒃᑯᓄᖓ ᖃᐅᔨᒃᑲᐃᓯᒪᔭᕆᐊᖃᖅᐳᑦ ᑐᓴᖅᑎᑦᓯᓗᑎᒃ ᐃᓘᓐᓇᖏᓐᓄᑦ ᐃᓕᓴᕆᔭᐅᓯᒪᔪᓄᑦ ᑐᓴᕈᒪᓂᖃᖅᑐᓄᑦ ᑭᓇᒃᑯᑐᐃᓐᓇᕐᓄᑦ ᐊᒻᒪ ᑕᖅᑲᒃᑯᓄᖓ ᐱᕕᖃᑦᑎᑦᓯᑦᓯᐊᕐᓗᓂ ᑐᓴᖅᑎᑦᓯᔭᕆᐊᖃᖅᑐᑦ ᐅᓪᓗᐊᓂᒃ, ᖃᖓᐅᓂᐊᕐᓂᖓᓂᒃ ᐊᒻᒪ ᓇᓃᓐᓂᐊᕐᓂᖓᓂᒃ ᓈᓚᒃᑎᐅᓗᑎᒃ ᑲᑎᒪᓂᒃᓴᐅᑉ.
5.2 ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᑐᐃᓐᓇᕈᐃᔭᕆᐊᖃᖅᐳᑦ ᐊᑑᑎᖃᖅᑐᓂᒃ ᑐᓴᒐᒃᓴᓂᒃ
ᑕᐃᒪᓕ ᐱᕕᖃᖁᓪᓗᒋᑦ ᐊᑐᓂ ᐃᓚᐅᓂᐊᖅᑐᑦ ᐸᕐᓇᒍᓐᓇᕐᓂᐊᕐᒪᑕ ᐊᑑᑎᖃᖅᑐᒃᑯᑦ ᐃᓚᐅᔪᓐᓇᕐᓂᐊᕐᒪᑕ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐊᑐᐃᓐᓇᕈᐃᔭᕆᐊᖃᖅᐳᑦ ᐃᓘᓐᓇᖏᓐᓄᑦ ᐃᓚᐅᔪᓄᑦ, ᐱᕕᖃᖅᑎᑦᓯᑦᓯᐊᕐᓗᑎᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂᒃ, ᓈᒻᒪᒃᑐᓂᒃ ᑐᓴᒐᒃᓴᓂᒃ ᐊᑐᐃᓐᓇᕈᐃᓗᑎᒃ ᐃᒪᐃᑦᑐᓂᒃ:
(a) ᐅᖃᐅᑕᐅᓂᐊᖅᑐᖅ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ;
(b) ᐱᔾᔪᑎᖓᓂᒃ ᐊᒻᒪ ᓴᖅᑭᑕᐅᖁᔭᐅᔪᓂᒃ ᑲᑎᒪᓂᕐᒥᑦ ᓈᓚᒃᑎᐅᓗᑎᒃ;
(c) ᓇᓗᓇᐃᖅᑎᖅᓯᒪᓗᑎᒃ ᐱᔾᔪᑎᐅᔪᑦ ᑲᒪᒋᔭᐅᓂᐊᖅᑐᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ;
(d) ᑎᑎᕋᖅᓯᒪᔪᑦ ᐊᒻᒪ/ᐅᕝᕙᓘᓐᓃᑦ ᓂᐱᓕᐅᖅᓯᒪᔪᑦ ᑐᓴᒐᒃᓴᑦ ᐊᒻᒪ ᐊᓯᖏᑦ ᑐᓴᒐᒃᓴᑦ, ᑐᓂᔭᐅᓯᒪᔪᑦ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ , ᑲᑎᒪᔨᑦ, ᐃᓚᐅᔪᓪᓗ, ᐅᕝᕙᓗ ᑐᓴᕈᒪᓂᖃᖅᑐᑦ ᐊᑐᕐᓂᐊᖅᑎᓪᓗᓂᒋᑦ ᓈᓚᒃᑎᐅᓗᑎᒃ ᑲᑎᒪᓂᖃᖅᑎᓪᓗᒋᑦ; ᐊᒻᒪᓗ
(e) ᐆᒃᑐᕋᐅᑎᓕᐊᖅ ᑲᑎᒪᔾᔪᑎᒃᓴᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
5.3 ᑐᓴᖅᑎᑦᓯᔾᔪᑦ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑲᑎᒪᓂᒃᓴᒧᑦ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓂᓯᔭᕆᐊᖃᖅᐳᑦ ᐃᓘᓐᓇᖏᓐᓄᑦ, ᐃᓕᓴᕆᔭᐅᓯᒪᔪᓄᑦ ᑐᓴᕈᒪᓂᖃᖅᑐᓄᑦ ᑭᓇᒃᑯᑐᐃᓐᓇᕐᓄᑦ, ᐊᒻᒪ ᑕᖅᑲᒃᑯᓄᖓ ᐱᕕᖃᑦᓯᐊᖅᑎᑦᓯᓗᑎᒃ ᖃᐅᔨᒃᑲᐃᓗᑎᒃ ᑐᓴᖅᑎᑦᓯᓗᑎᒃ ᐅᓪᓗᐊᓂᒃ, ᖃᖓᐅᓂᖓᓂᒃ, ᓇᓃᓐᓂᐊᕐᓂᖓᓂᒃ, ᐊᒻᒪ ᐱᔾᔪᑎᖓᓂᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓂᒃᓴᒥᒃ ᐋᖅᑭᒡᑕᐅᔪᒥᒃ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ . ᐃᓚᒋᓗᒍ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓂᓯᔭᕆᐊᖃᕐᒥᔪᑦ ᐱᕕᒃᓴᖃᖅᑎᑦᓯᑦᓯᐊᕐᓗᑎᒃ ᐅᖃᐅᓯᒃᑯᑦ ᑐᓴᖅᑎᑦᓯᔾᔪᑎᒥᒃ ᐃᓄᖕᓄᑦ.
5.4 ᐋᖅᑭᑦᑎᐊᖅᒪᖏᓐᓂᖓ ᖃᐅᔨᒃᑲᐃᔾᔪᑎᐅᑉ
ᐊᑐᖏᓪᓗᒍ ᒪᓕᒐᐅᑉ ᓈᓴᐅᑎᖓᑕ ᐃᓚᕈᑎᖓ 5.1 ᑎᑭᓪᓗᒍ 5.3, ᐱᕕᖃᑦᓯᐊᖏᑦᑐᒥᒃ ᖃᐅᔨᒃᑲᐃᔾᔪᑎ ᓄᖅᑲᖅᑎᑦᓯᓐᖏᓚᖅ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓂᕐᒥᒃ ᐅᕝᕙᓗ ᓈᓚᒃᑎᐅᓗᑎᒃ ᑲᑎᒪᓂᕐᒥᒃ ᐃᒪᐃᑎᓪᓗᒍ:
(a) ᐃᓚᐅᖃᑕᐅᔪᖅ ᐅᕝᕙᓗ ᑐᓴᕈᒪᓂᖃᖅᑐᖅ ᑭᓇᑐᐃᓐᓇᖅ ᐊᖏᕈᑎᖃᕆᐊᖃᖅᑎᓪᓗᒍ ᖃᐅᔨᒃᑲᐃᔾᔪᑎᓄᑦ;
(b) ᐃᓚᐃᓐᓈᕆᓐᓂᖏᓪᓗᑎᒃ ᐃᓚᐅᔪᒥᒃ ᓇᓕᐊᖕᓂᑐᐃᓐᓇᖅ ᐃᓚᐅᓐᖏᑎᓪᓗᒍ; ᐅᕝᕙᓗ
(c) ᐃᓚᐃᓐᓈᕆᔪᖃᖅᑎᓪᓗᒍ ᓴᖑᓂᖓᓄᑦ ᐃᒪᐃᓕᐅᕐᓗᑎᒃ:
(i) ᓄᖅᑲᖅᑎᑕᐅᒃᐸᑦ ᑲᑎᒪᓂᖅ ᐅᕝᕙᓗ ᓈᓚᒃᑎᐅᑎᓪᓗᒋ ᐃᒪᐃᓕᒃᐸᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᒃᐸᑕ ᓄᖅᑲᕐᓂᖅ ᐊᒡᕕᐊᕈᑕᐅᖓᔭᖏᓐᓂᖓᓂᒃ ᐱᕙᓪᓕᐊᑎᑦᓯᓂᕐᒧᑦ ᐱᓕᕆᔭᐅᔪᑉ ᐃᖏᕐᕋᓂᖓᓄᑦ; ᐅᕝᕙᓗ
(ii) ᐊᓯᖏᑦ ᐊᖅᑯᑎᐅᔪᑦ ᐃᓱᒪᒋᔭᖏᑦ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᐊᒡᕕᐊᕐᓂᐊᖏᑦᑐᕆᓪᓗᒋᑦ ᐱᓕᕆᔭᐅᔪᑦ ᐃᖏᕐᕋᓂᖓᓄᑦ.
ᒪᓕᒐᖅ 6: ᓈᓚᒃᑎᐅᓗᑎᒃ ᑲᑎᒪᓂᕐᒥ ᑎᑎᖅᑲᖁᑎᑦ
6.1 ᐅᖃᐅᓯᒃᑯᑦ ᐊᒻᒪ ᑎᑎᖅᑲᑎᒍᑦ ᑐᓂᔭᐅᔪᑦ, ᐊᒻᒪ ᐊᓯᖏᑦ ᑎᑎᖅᑲᖁᑎᑦ
(1) ᖃᖓᑐᐃᓐᓇᒃᑯᑦ ᓯᕗᕐᖓᒍᑦ ᐅᕝᕙᓗ ᐃᓗᐊᓂ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᐃᓚᐅᔪᑦ ᐱᔪᒪᒍᑎᒃ ᑐᓂᓯᔪᓐᓇᖅᐳᑦ ᑲᑎᒪᔨᓄᑦ ᐃᒪᐃᑦᑐᓂᒃ:
(a) ᐅᖃᐅᓯᒃᑯᑦ ᓂᓪᓕᐅᑎᐅᔪᓂᒃ, ᑎᑎᕋᖅᑕᐅᓯᒪᔪᓂᒃ ᐅᖃᐅᑕᐅᔪᕕᓂᕐᓂᒃ ᐅᕝᕙᓗ ᓇᐃᓈᖅᓯᒪᔪᓂᒃ ᐊᒻᒪ/ᐅᕝᕙᓗ ᓂᐱᓕᐅᖅᑕᐅᓯᒪᔪᓂᒃ ᑲᑎᒪᔨᓄᑦ, ᐃᓱᒪᒋᔭᐅᒃᐸᑕ ᓈᒻᒪᒐᓱᒋᔭᐅᓗᑎᒃ;
(b) ᓂᐱᓕᐅᑕᐅᓯᒪᔪᓂᒃ ᐅᖃᐅᓯᒃᑯᑦ ᑐᓐᓂᖅᑯᑎᕕᓂᕐᓂᒃ;
(c) ᑎᑎᖅᑲᑎᒍᑦ ᑐᓐᓂᖅᑯᑎᕕᓂᑦ; ᐊᒻᒪᓗ
(d) ᐊᓯᖏᓐᓂᒃ ᑎᑎᕋᖅᓯᒪᔪᓂᒃ;
ᐱᔾᔪᑎᖃᖅᑐᓂᒃ ᐅᖃᐅᑕᐅᔪᓂᒃ ᓈᓚᒃᑎᐅᓪᓗᑎᒃ ᑲᑎᒪᑎᓪᓗᒋᑦ.
(2) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓴᖅᑎᑦᓯᔭᕆᐊᖃᖅᐳᑦ ᐃᓘᓐᓇᖏᓐᓂᒃ ᐃᓚᐅᖃᑕᐅᔪᓂᒃ ᐱᓯᒪᓕᕐᓂᖏᓐᓂᒃ ᑎᑎᖅᑲᖁᑎᓂᒃ, ᐊᒻᒪ ᑐᓂᓯᔭᕆᐊᖃᖅᐳᑦ ᐊᔾᔨᖏᓐᓂᒃ − ᐱᖃᓯᐅᑎᓪᓗᒋᑦ ᐃᓄᒃᑎᑑᖓᓕᖅᑎᓯᒪᔪᓂᒃ, ᓇᐃᓈᖅᓯᒪᔪᓂᒃ, ᐊᒻᒪ ᓂᐱᓕᐅᖅᓯᒪᔪᓂᒃ, ᐊᑑᑎᖃᖅᐸᑦ − ᓇᓕᐊᖕᓄᑐᐃᓐᓇᖅ ᐃᓚᐅᔪᒧᑦ ᑐᒃᓯᕋᖅᑐᓄᑦ ᑕᐃᒪᐃᑦᑐᓂᒃ. ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓕᓯᖃᑦᑕᕆᐊᖃᖅᐳᑦ ᑎᑎᖅᑲᖁᑎᐅᔪᓂᒃ ᐃᓗᐊᓂ ᓈᓚᒃᑎᐅᓗᑎᒃ ᑲᑎᒪᔾᔪᑕᐅᔪᑦ ᑎᑎᖅᑲᖁᑎᖏᓐᓄᑦ.
(3) ᐃᓚᐅᔪᑦ ᓴᓐᖏᔪᒃᑯᑦ ᑎᓕᐅᖅᑕᐅᕗᑦ ᑐᓂᓯᖁᓪᓗᒋᑦ ᑎᑎᖅᑲᓂᒃ, ᒪᓕᒡᓗᒍ ᒪᓕᒐᐅᑉ ᐃᓚᕈᑎᖓ 6.1(1), ᐅᓄᖏᓐᓂᖅᐹᖑᔪᑦ ᐅᓪᓗᑦ 30 ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂᒃ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪ ᐊᓯᖏᑦ ᐃᒪᐅᔪᑦ ᐱᕕᖃᑦᓯᐊᕈᓐᓇᖁᓪᓗᒋᑦ ᕿᒥᕐᕈᓇᒍᓐᓇᕐᓂᐊᕐᒪᑕ ᑎᑎᖅᑲᖁᑎᐅᔪᓂᒃ.
(4) ᑕᐃᒪᓕ ᑐᓴᖅᑎᑕᐅᓚᐅᖅᑎᓪᓗᒋᑦ ᐊᓯᖏᑦ ᐃᓚᐅᔪᑦ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᐱᑎᑕᐅᔪᒪᔪᓐᓇᖅᐳᑦ ᑎᑎᕋᖅᓯᒪᔪᓂᒃ, ᐅᕝᕙᓗ ᓂᐱᓕᐅᖅᓯᒪᔪᓂᒃ ᑐᓂᖅᑯᑎᒃᓴᓂᒃ ᐃᓚᐅᔪᓂᑦ ᖃᖓᑐᐃᓐᓇᑦᓯᐊᒃᑯᑦ. ᑲᑎᒪᔨᐅᔪᑦ ᑐᓂᓯᒐᔭᖅᑐᑦ ᐊᔾᔨᖏᓐᓂᒃ ᑐᓐᓂᖅᑯᑎᐅᓯᒪᔪᑦ ᐱᔭᐅᔪᑦ − ᐱᖃᓯᐅᑎᓪᓗᒋᑦ ᑐᑭᓕᐅᖅᑕᐅᓯᒪᔪᑦ, ᓇᐃᓈᖅᓯᒪᔪᑦ, ᐊᒻᒪ ᓂᐱᓕᐅᖅᓯᒪᔪᓂᒃ, ᐊᑑᑎᖃᖅᐸᑦ − ᓇᓕᐊᖕᓄᑐᐃᓐᓇᖅ ᐃᓚᐅᔪᓄᑦ ᑐᒃᓯᕋᖅᑐᓄᑦ ᑕᐃᒪᐃᑦᑐᒥᒃ ᐱᔪᒪᓗᑎᒃ, ᐊᒻᒪ ᐃᓕᔭᐅᖃᑦᑕᕐᓂᐊᖅᐳᑦ ᑐᓐᓂᖅᑯᑕᐅᓯᒪᔪᑦ ᓈᓚᒃᑎᐅᓗᑎᒃ ᑲᑎᒪᔾᔪᑎᓄᑦ ᑎᑎᖅᑲᖁᑎᖏᓐᓄᑦ.
6.2 ᑐᕌᖅᑎᑕᐅᔪᑦ ᐊᐱᖅᑯᑎᑦ
ᑐᓴᖅᑎᑦᓯᓚᐅᖅᑎᓪᓗᒋᑦ ᐃᓚᐅᔪᓂᒃ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ, ᖃᖓᑐᐃᓐᓇᑦᓯᐊᒃᑯᑦ, ᑎᓕᓯᔪᓐᓇᖅᐳᑦ ᑎᑎᕋᖅᓯᒪᔪᑦ, ᐅᖃᐅᓯᐅᔪᕕᓂᑦ, ᐅᕝᕙᓗ ᓂᐱᓕᐅᖅᑕᐅᓯᒪᔪᓂᒃ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᓄᑦ ᑭᓇᑐᐃᓐᓇᕐᒧᑦ ᐊᒃᑐᕐᓂᖃᖅᑐᒧᑦ ᓈᓚᒃᑎᐅᓪᓗᑎᒃ ᑲᑎᒪᓂᖃᖅᑎᓪᓗᒋᑦ. ᑲᑎᒪᔨᐅᔪᑦ ᑐᓂᓯᒐᔭᖅᑐᑦ ᐊᔾᔨᖏᓐᓂᒃ ᐊᐱᖅᑯᑎ ᐊᒻᒪ ᑭᒡᒍᓯᐅᔪᑦ − ᐱᖃᓯᐅᑎᓪᓗᒋᑦ ᑐᑭᓕᐅᖅᑕᐅᓯᒪᔪᑦ, ᓇᐃᓈᖅᓯᒪᔪᑦ, ᐊᒻᒪ ᓂᐱᓕᐅᖅᓯᒪᔪᓂᒃ, ᐊᑑᑎᖃᖅᐸᑦ − ᓇᓕᐊᖕᓄᑐᐃᓐᓇᖅ ᐃᓚᐅᔪᓄᑦ ᑐᒃᓯᕋᖅᑐᓄᑦ ᑕᐃᒪᐃᑦᑐᒥᒃ ᐱᔪᒪᓗᑎᒃ, ᐊᒻᒪ ᐃᓕᔭᐅᖃᑦᑕᕐᓂᐊᖅᐳᑦ ᑐᓐᓂᖅᑯᑕᐅᓯᒪᔪᑦ ᓈᓚᒃᑎᐅᓗᑎᒃ ᑲᑎᒪᔾᔪᑎᓄᑦ ᑎᑎᖅᑲᖁᑎᖏᓐᓄᑦ.
6.3 ᑐᑭᓕᐅᖅᑕᐅᓂᖏᑦ ᐊᒻᒪ ᓇᐃᓈᖅᓯᒪᔪᑦ ᑐᓐᓂᖅᑯᑕᐅᓯᒪᔪᑦ, ᑐᕌᖅᑎᑕᐅᓪᓗᑎᒃ ᐊᐱᖅᑯᑕᐅᒧᑦ ᐊᒻᒪ ᑭᒡᒍᓯᐅᔪᑦ, ᐊᒻᒪᓗ ᐊᓯᖏᑦ ᑎᑎᖅᑲᖁᑎᑦ
(1) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᑐᓂ ᑎᑎᕋᖅᓯᒪᔪᑦ ᑕᓪᓕᒪᓂᒃ ᒪᒃᐱᒐᖃᕐᓗᑎᒃ ᐅᕝᕙᓗ ᐅᓄᖏᓐᓂᖅᓴᐅᓗᑎᒃ, ᐊᑐᓂᓗ ᐅᖃᐅᓯᒃᑯᑦ ᓂᐱᓕᐅᖅᑕᐅᓯᒪᔪᖅ ᑕᓪᓕᒪᓐ ᒥᓂᑦᓯᓂᒃ ᐊᑯᓂᐅᓂᖃᕐᓗᓂ ᑐᖔᓂᓘᓐᓃᑦ, ᑖᒃᑯᐊᓗ ᑐᑭᓕᐅᖅᑕᐅᓂᐊᖅᐳᑦ ᖃᓪᓗᓈᑎᑐᑦ ᐅᕝᕙᓗ ᐃᓄᒃᑎᑐᑦ, ᐅᖃᐅᓯᖅ ᐊᑐᖅᑕᐅᔪᖅ ᒪᓕᒡᓗᒍ ᑎᑎᖅᑲᓂᒃ ᑎᑎᕋᓚᐅᖅᑐᖅ, ᐊᒻᒪ ᑐᑭᓕᐅᖅᑕᐅᔪᑦ ᑐᓂᔭᐅᔭᕆᐊᖃᖅᐳᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐊᑕᐅᑦᓯᒃᑯᑦ ᑎᑎᖅᑲᖅ ᑐᓂᔭᐅᑎᓪᓗᒍ.
(2) ᒪᓕᒡᓗᒍ ᒪᓕᒐᐅᑉ ᐃᓚᕈᑎᖓ 6.3(3), ᐃᓘᓐᓇᖏᓐᓄᑦ ᑎᑎᕋᖅᓯᒪᔪᓄᑦ ᐅᖓᑖᓂ ᑕᓪᓕᒪᑦ ᒪᒃᐱᒐᖃᖅᑐᓂᒃ ᑕᑭᓂᖃᖅᑐᓄᑦ, ᐊᒻᒪ ᐃᓘᓐᓇᖏᓐᓄᑦ ᐅᖓᑖᓄᐊᖅᓯᒪᔪᑦ ᑕᓪᓕᒪᓐ ᒥᓂᑦᓯ, ᑭᓇᑐᐃᓐᓇᖅ ᑐᓂᓯᔭᕆᐊᖃᖅᐳᖅ, ᐊᑕᐅᓯᒃᑯᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐃᒪᐃᑦᑐᓂᒃ :
(a) ᑎᑎᕋᖅᓯᒪᔪᓂᒃ ᐅᕝᕙᓗ ᓂᐱᓕᐅᖅᓯᒪᔪᓂᒃ;
(b) ᓇᓕᖅᑯᑦᑎᓯᒪᔪᓂᒃ ᓇᐃᓈᖅᓯᒪᔪᓂᒃ ᑎᑎᖅᑲᓂᒃ ᐅᕝᕙᓗ ᓂᐱᓕᐅᖅᓯᒪᔪᓂᒃ; ᐊᒻᒪ
(c) ᑐᑭᓕᐅᖅᑕᐅᓯᒪᓂᖏᑦ ᓇᐃᓈᖅᓯᒪᔪᑦ.
(3) ᑎᑎᕋᖅᓯᒪᔪᓄᑦ ᐅᖓᑖᓂ ᑕᓪᓕᒪᑦ ᒪᒃᐱᒐᖃᖅᑐᓄᑦ ᐊᒻᒪ ᑎᑎᕋᖅᑕᐅᓯᒪᔪᓄᑦ ᑐᕌᖓᓪᓗᑎᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᐅᕝᕙᓗ ᐊᓯᖏᑦ ᑎᑎᕋᖅᓯᒪᔪᑦ ᐅᖓᑖᓄᑦ ᑕᓪᓕᒪᑦ ᒪᒃᐱᒐᖃᖅᑐᑦ ᐅᕝᕙᓗ ᐅᖓᑖᓄᐊᖅᓯᒪᔪᑦ ᑕᓕᒪᓐ ᒥᓂᑦᓯᑦ ᑕᑭᓂᖃᖅᑐᑦ ᐊᒻᒪ ᑎᓕᔭᐅᓯᒪᓪᓗᑎᒃ ᑲᑎᒪᔨᓄᑦ, ᑭᓇᑐᐃᓐᓇᖅ ᑐᓂᓯᔭᕆᐊᖃᖅᐳᖅ, ᐊᑕᐅᑦᓯᒃᑯᑦ ᑕᒃᑯᓂᖓ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ :
(a) ᑎᑎᕋᖅᓯᒪᔪᓂᒃ ᐊᒻᒪ ᑐᑭᓕᐅᖅᓯᒪᔪᓂᒃ ᐃᓄᒃᑎᑐᑦ ᖃᓪᓗᓈᑎᑐᓪᓘᓐᓃᑦ; ᐊᒻᒪᓗ
(b) ᓇᓕᖅᑯᑦᑎᓯᒪᓗᓂ ᓇᐃᓈᖅᓯᒪᔪᖅ ᑎᑎᕋᖅᓯᒪᔪᖅ ᐊᒻᒪ ᑐᑭᓕᐅᖅᑕᐅᓯᒪᔪᖅ.
6.4 ᒪᓕᒐᖅ ᓴᖅᑭᑦᑎᔭᕆᐊᖃᕐᓂᕐᒧᑦ ᓂᐱᓕᐅᖅᓯᒪᔪᒥᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᐱᔭᕆᐊᖃᑐᐃᓐᓇᕆᐊᖃᕐᒪᑕ ᑭᓇᑐᐃᓐᓇᖅ ᓴᖅᑭᑦᑎᖁᓗᒍ, ᐃᓄᒃᑎᑐᑦ ᐊᒻᒪ/ᐅᕝᕙᓗ ᖃᓪᓗᓈᑎᑐᑦ, ᓂᐱᓕᐅᖅᓯᒪᓗᓂ ᑎᑎᕋᖅᑕᐅᓯᒪᔪᕕᓂᖅ ᐅᕝᕙᓗ ᓇᐃᓈᖅᓯᒪᔪᖁᑎᖓ, ᑐᓂᔭᐅᖁᓪᓗᒍ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐊᑕᐅᓯᒃᑯᑦ ᑎᑎᕋᖅᓯᒪᔪᖅ ᐊᒻᒪ ᓂᐱᓕᐅᖅᓯᒪᔪᖅ ᑐᓂᔭᐅᓗᑎᒃ.
6.5 ᓄᓇᕗᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᑲᔪᖅᓯᓂᖓᑦ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᒪᐃᑦᑕᕆᐊᖃᖅᐳᑦ, ᑐᒃᓯᕋᕐᕕᐅᒍᑎᒃ, ᐃᑲᔪᖅᓯᓗᑎᒃ ᐃᓄᖕᒥᒃ ᑭᓇᑐᐃᓐᓇᕐᒥᒃ ᐅᕝᕙᓗ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᑎᒥᖓᓐᓂᒃ, ᐊᒻᒪ ᐃᑲᔪᕈᓐᓇᕐᒥᔪᑦ ᑭᓇᑐᐃᓐᓇᕐᒥᒃ, ᐱᓕᕆᐊᖃᖅᑎᓪᓗᒍ ᐱᓕᕆᐊᒃᓴᖓᓂᒃ ᐊᑖᒍᑦ ᒪᓕᒐᐃᑦ ᐃᓚᕈᑎᖓᑕ 6.3 ᐊᒻᒪ 6.4.
ᒪᓕᒐᖅ 7: ᑎᒍᓯᔪᓐᓇᕐᓂᖅ ᑎᑎᕋᖅᓯᒪᔪᓂᒃ
7.1 ᑎᒍᔭᐅᔪᓐᓇᖏᑦᑐᑦ ᓇᓗᓇᐃᖅᑕᐅᓯᒪᔪᑦ ᐃᓚᖏᑦ ᑎᑎᖅᑲᖁᑎᑦ
ᑲᑎᒪᔨᑦ ᒪᓕᒐᓕᐅᕈᓐᓇᖅᐳᑦ ᑎᒍᔭᐅᔪᓐᓇᖏᓪᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓚᖏᑦ ᑎᑎᖅᑲᑦ ᓇᓗᓇᐃᖅᑕᐅᓯᒪᔪᑦ ᒪᓕᒐᖅ 6−ᒥ ᐊᒻᒪᓗ 9-ᒥ ᐃᒪᐃᑉᐸᑦ, ᐃᓱᒪᒋᖃᓯᐅᑎᔭᐃᓐᓇᕆᓗᒋᑦ ᖃᓄᐃᓐᓂᐅᔪᓕᒫᑦ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᒃᐸᑕ ᐃᒪᐃᑦᓱᕆᓗᒍ ᖃᓄᐃᓐᓂᖓ:
(a) ᑎᒍᓯᒃᐸᑕ ᑎᑎᖅᑲᓂᒃ ᐊᒃᓱᐊᓗᒃ ᐃᒡᓗᐃᓐᓈᖅᑎᑦᓯᓕᕋᔭᖅᐸᑕ; ᐊᒻᒪ/ᐅᕝᕙᓗ
(b) ᐃᓘᓐᓇᖓ ᐅᕝᕙᓗ ᐃᓚᖓ ᑎᑎᕋᖅᓯᒪᔪᖅ ᓴᖅᑭᑕᐅᒃᐸᑦ ᑲᓐᖑᓇᖅᑑᒃᐸᑦ, ᐃᒃᐱᖕᓇᓗᐊᖅᐸᑦ, ᐅᕝᕙᓗ ᐊᒃᑐᐊᓂᖃᓗᐊᖅᐸᑦ ᑮᓇᐅᔭᑎᒍᑦ, ᐃᒻᒥᒧᑦ ᐅᕝᕙᓗ ᐊᓯᖏᓐᓄᑦ ᐱᔾᔪᑕᐅᔪᓄᑦ,
ᑭᓇᑐᐃᓐᓇᖅᑕ ᓴᖅᑭᑦᓯᖁᔨᖏᑉᐸᑦ ᐊᒃᑐᖅᓯᑐᐃᓐᓇᕆᐊᖃᕐᓂᒧᑦ ᐅᕝᕙᓗ ᑕᖅᑲᒃᑯᓄᖓ ᐊᑲᐅᓛᖑᓂᖓ, ᐅᖁᒪᐃᓐᓂᖅᓴᐅᒃᐸᑦ ᒪᓕᒃᓯᔭᕆᐊᖃᕐᓂᕐᒥᒃ ᒪᓕᒐᖏᓐᓂᒃ ᐃᓚᐅᔪᑦ ᐊᒻᒪ ᑕᖅᑲᒃᑯᐊ ᑎᒍᓯᔪᓐᓇᕆᐊᖃᕐᓂᖏᓐᓂᑦ ᐃᓘᓐᓇᖏᓐᓂᑦ ᑎᑎᖅᑲᓂᒃ ᑐᓂᔭᐅᓯᒪᔪᓂᒃ ᓈᓚᒃᑎᐅᓗᑎᒃ ᑲᑎᒪᓂᖃᖅᑎᓪᓗᒋᑦ.
7.2 ᐊᒃᑐᖅᑕᐅᓯᒪᔪᑦ ᐃᓚᐅᔪᑦ ᐱᔪᒪᒍᑎᒃ ᑐᓂᓯᔪᓐᓇᖅᑐᑦ ᑎᑎᖅᑲᓂᒃ
ᑲᑎᒪᔨᐅᔪᑦ ᓴᒃᑯᐃᓯᓯᒪᔭᔭᕆᐊᖃᖅᐳᑦ ᐅᕝᕙᓗ ᑎᒍᓯᑎᑦᓯᑦᑕᐃᓕᒪᔭᕆᐊᖃᓐᖏᓚᑦ ᑎᑎᖅᑲᓂᒃ ᐱᕕᖃᖅᑎᑦᓯᓚᐅᖏᓪᓗᑎᒃ ᐊᒃᑐᖅᑕᐅᓯᒪᔪᒥᒃ ᑐᓂᓯᓂᕐᒥᒃ ᑎᑎᖅᑲᓂᒃ ᐅᖃᐅᑕᐅᔪᒧᑦ.
7.3 ᐋᖅᑭᒡᑕᐅᔪᓐᓇᖅᑐᑦ ᖃᐅᔨᔭᐅᔪᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ
ᓴᖅᑭᑦᓯᓐᖏᑎᓪᓗᒋᑦ ᐅᕝᕙᓗ ᑎᒍᓯᑎᑦᓯᓐᖏᑎᓪᓗᒋᑦ ᓇᓗᓇᐃᖅᑕᐅᓯᒪᔪᓂᒃ ᑎᑎᖅᑲᓂᒃ, ᑲᑎᒪᔨᐅᔪᑦ ᐱᔪᒪᒍᑎᒃ ᐋᖅᑭᒡᓯᔪᓐᓇᖅᑐᑦ ᓈᒻᒪᒐᓱᒋᔭᖓᓐᓂᒃ ᖃᓄᐃᑐᐃᓐᓇᖅ. ᐋᖅᑭᒡᑕᐅᔪᖅ ᐃᒪᐃᑦᑐᒥᒃ ᓇᓗᓇᐃᖅᓯᓂᐊᖅᐸᑦ:
(a) ᐃᓘᓐᓇᖏᑦ ᐅᕝᕙᓗ ᐃᓚᖓ ᑎᑎᕋᖅᓯᒪᔪᖅ ᑕᖅᑲᒃᑯᓄᖓ ᑕᑯᔭᐅᖁᔭᐅᖏᑉᐸᑦ, ᐅᕝᕙᓗ ᑭᓇᒃᑯᑐᐃᓐᓇᕐᓄᑦ ᐊᒻᒪ ᐊᓯᖏᓐᓄᑦ ᐃᓚᐅᔪᓄᑦ;
(b) ᓇᐃᓈᖅᓯᒪᔪᖅ ᑎᑎᖅᑲᒧᑦ ᐊᑐᐃᓐᓇᕈᖅᑕᐅᔭᕆᐊᖃᖅᐳᖅ;
(c) ᑎᑎᕋᖅᓯᒪᔪᑦ ᓇᓗᓇᐃᖅᓯᒪᔭᕆᐊᖃᖅᐳᑦ “ᑲᓐᖑᓇᖅᑑᓂᕋᖅᑕᐅᓗᑎᒃ” ᐊᒻᒪ ᐃᓛᒃᑯᖓᓗᑎᒃ ᐊᓯᖏᓐᓂᑦ ᑎᑎᕋᖅᓯᒪᔪᓂᑦ, ᐊᒻᒪ ᑎᒍᔭᐅᔪᓐᓇᕐᓗᑎᒃ ᑭᓯᐊᓂ ᒪᓕᒃᑕᐅᓗᑎᒃ ᑲᑎᒪᔨᑦ ᐋᖅᑭᒡᓯᒪᔭᖏᑦ, ᐅᕝᕙᓗ ᐊᓯᐊᒍᑦ ᐊᖏᖅᑕᐅᓯᒪᒃᐸᑕ ᐱᖁᔭᕐᔪᐊᑎᒍᑦ; ᐅᕝᕙᓗ
(d) ᑎᑎᕋᖅᓯᒪᔪᖅ ᐊᑐᐃᓐᓇᖅᑕᐅᓂᐊᕐᓗᓂ ᑭᓯᐊᓂ ᐃᓚᐅᔪᓄᑦ ᐊᒻᒪ ᐊᓯᖏᓐᓄᑦ ᑭᓇᒃᑯᑐᐃᓐᓇᕐᓄᑦ ᑲᑎᒪᔨᓄᑦ ᓈᒻᒪᒐᓱᒋᔭᐅᔪᓄᑦ.
ᒪᓕᒐᖅ 8: ᐃᓚᐅᓂᖅ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ
8.1 ᑭᓱᑐᐃᓐᓇᕐᓄᑦ ᐱᔾᔪᑎᓄᑦ
(1) ᐅᐸᒍᑎᓐᓂᖏᑉᐊᑦ ᐃᓚᐅᔪᖅ ᐅᕝᕙᓗ ᑐᓴᕈᒪᓂᖃᖅᑐᖅ ᑭᓇᑐᐃᓐᓇᖅ
ᑕᐃᒪᓕ ᐃᓚᐅᔪᖅ ᐅᕝᕙᓗ ᑐᓴᕈᒪᓂᖃᖅᑐᖅ ᑭᓇᑐᐃᓐᓇᖅ ᑐᓴᖅᑭᑕᐅᓚᐅᕐᓗᓂ ᓈᓚᒃᑎᐅᓗᑎᒃ ᑲᑎᒪᓂᐊᕐᓂᕐᒥᒃ ᐅᐸᒍᑎᖏᑉᐸᑦ ᑲᑎᒪᔪᓄᑦ, ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᑲᑎᒪᓂᕐᒥᒃ ᑲᔪᓯᑎᑦᓯᖓᔭᖅᑐᖅ ᑖᓐᓇ ᐅᐸᒍᑎᓯᒪᖏᒃᑲᓗᐊᖅᑎᓪᓗᒍ.
(2) ᐅᖃᐅᓯᖅ ᐊᑐᖅᑕᐅᔪᖅ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ
ᑭᓯᐊᓂ ᐃᓘᓐᓇᖏᑦ ᐃᓚᐅᔪᑦ, ᐅᖃᓪᓚᒋᐊᖅᑐᖅᓯᒪᔪᑦ, ᑲᑎᒪᔨᐅᔪᓪᓗ, ᐊᒻᒪ ᑕᖅᑲᒃᑯᓇᓐᖔᖅᑐᑦ ᐃᓄᒃᑎᑐᑦ ᑭᓯᐊᓂ ᐅᖃᐅᓪᓚᒃᐸᑕ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᕐᖐᓐᓇᖅ ᐅᖃᓪᓚᒃᐸᓪᓕᐊᔪᒥᒃ ᖃᓪᓗᓈᑎᑑᖓᓕᖅᑎᑦᓯᔨᒥᒃ ᑐᓵᔨᖃᕆᐊᖃᖅᐳᑦ ᐊᒻᒪ ᐃᓄᒃᑎᑑᓕᖅᑎᑦᓯᔨᖃᕐᓗᑎᒃ, ᐊᔪᖏᓐᓂᖓᑦ ᐱᔪᓐᓇᕐᓂᕆᔭᖓᑦ ᐊᑐᕐᓗᒍ.
(3) ᑎᑎᕋᖅᑕᐅᓯᒪᔪᑦ ᐅᕝᕙᓗ ᑲᑎᒪᔾᔪᑎᕕᓂᑦ ᓈᓚᒃᑎᐅᓪᓗᑎᒃ ᑲᑎᒪᑎᓪᓗᒋᑦ
ᓇᓕᐊᑐᐃᓐᓇᖅ ᑎᑎᕋᖅᓯᒪᔪᑦ ᑲᑎᒪᔾᔪᑎᕕᓂᓪᓘᓐᓃᑦ ᓈᓚᒃᑎᐅᓪᓗᑎᒃ ᑲᑎᒪᑎᓪᓗᒋᑦ ᖃᓪᓗᓈᑎᑑᖓᔭᕆᐊᖃᖅᐳᑦ ᐊᒻᒪ ᐃᓄᒃᑎᑑᖓᓗᑎᒃ.
(4) ᓱᓕᓂᐊᕐᓂᕋᐅᑦ ᓴᖅᑭᓐᓂᐊᖅᑕᖓᓄᑦ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᐃᓘᓐᓇᖏᓐᓂᒃ ᓴᖅᑭᑦᓯᓂᐊᖅᑐᓂᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ ᓱᓕᓂᐊᕐᓂᕋᐅᒻᒧᑦ ᐊᖏᖅᑎᑦᓯᔪᓐᓇᖅᐳᑦ.
8.2 ᐃᓚᐅᓂᖏᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ
(1) ᐅᓄᕐᓂᕆᔭᕆᐊᖃᖅᑕᖏᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑲᑎᒪᑎᑦᓯᑎᓪᓗᒋᑦ ᓈᓚᒃᑎᐅᓗᑎᒃ ᑲᑎᒪᓂᕐᒥᒃ
ᐃᓘᓐᓇᖏᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᔪᒪᒍᑎᒃ ᑎᒃᑯᐊᖅᓯᔪᓐᓇᖅᐳᑦ ᑭᓇᑐᐃᓐᓇᕐᒥᒃ, ᐅᕝᕙᓗ ᑲᑎᒪᔨᐅᖃᑕᐅᔪᓂᒃ ᐃᓄᖃᕐᓗᑎᒃ ᒪᕐᕉᖏᖕᓂᒃ ᐅᓄᕐᓂᖅᓴᓂᒡᓘᓐᓃᑦ ᐅᕝᕙᓗ ᑲᑎᒪᔨᓕᒫᖏᓐᓂᒃ ᑲᑎᒪᔨᑦ, ᓈᓚᒃᑎᐅᓗᑎᒃ ᑲᑎᒪᔾᔪᑎᖃᖁᓪᓗᒋᑦ ᓇᓗᓇᐃᖅᑕᐅᓯᒪᔪᒧᑦ.
(2) ᐊᔭᐅᖅᑐᐃᔾᔪᑎᖃᕐᓂᖅ ᐊᓯᔾᔨᑲᑕᒍᓐᓇᖅᑐᒥᒃ ᐊᒻᒪ ᖃᓱᖓᓂᖅᓴᒃᑯᑦ ᑲᑎᒪᓂᕐᒥᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᒪᐃᓕᐅᕆᐊᖃᖅᐳᑦ ᒪᓕᒃᑕᐅᓗᑎᒃ ᓯᐊᒻᒪᒃᑎᖅᓯᒪᔪᓄᑦ ᐊᑐᖅᑕᐅᓂᖏᑦ ᒪᓕᒐᖏᑦ ᑭᓱᑐᐃᓐᓇᕐᒧᑦ ᒪᓕᒐᐅᔪᑦ ᐊᒻᒪ ᒪᓕᒐᖏᑦ ᐊᔾᔨᒌᒃᑎᑦᓯᓂᕐᒧᑦ, ᐊᔭᐅᖅᑐᐃᔾᔪᑎᖃᕆᐊᖃᖅᐳᑦ ᐊᓯᔾᔨᑲᑕᒍᓐᓇᕐᓗᑎᒃ ᖃᓱᖓᓗᑎᒡᓗ ᒪᓕᒐᖃᓗᐊᖏᓪᓗᑎᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
(3) ᐃᓚᐅᔪᑦ ᐊᒻᒪ ᐅᖃᓪᓚᒋᐊᖅᑐᖅᓯᒪᔪᑦ ᐱᓂᐊᕐᓂᖃᕐᕕᐅᔭᕆᐊᖃᕐᓂᖏᑦ ᐅᐱᒋᔭᐅᓗᑎᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᒪᐃᓕᐅᕆᐊᖃᖅᐳᑦ ᐱᔪᓐᓇᕐᓂᓕᒫᖓᒍᑦ ᓯᕗᒧᐊᒃᑎᑦᓯᓗᑎᒃ ᐃᓘᓐᓇᖏᑦ ᐃᓚᐅᔪᑦ ᐊᒻᒪ ᐅᖃᓪᓚᒋᐊᖅᑐᖅᓯᒪᔪᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ ᐱᓂᐊᕐᓂᖃᕐᕕᐅᖁᓪᓗᒋᑦ ᐅᐱᒋᔭᐅᑦᓯᐊᕐᓗᑎᒃ.
(4) ᐋᖅᑭᒡᓱᐃᓂᖅ ᐅᖃᓪᓚᒡᕕᒃᓴᑦ ᐊᑯᓂᐅᓂᖏᑕ ᑭᒡᓕᖏᓐᓂᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᐋᖅᑭᒡᓯᔪᓐᓇᖅᐳᑦ ᐊᑯᓂᐅᓂᕆᔭᖏᓐᓂᒃ ᐅᖃᓪᓚᒡᓗᑎᒃ ᑐᓂᓯᓂᐊᖅᑐᑦ ᑭᓇᒃᑯᑐᐃᓐᓇᕐᓄᑦ ᐅᕝᕙᓗ ᐃᓘᓐᓇᖏᓐᓄᑦ ᐊᑐᖅᑕᐅᓂᐊᕐᓗᓂ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
(5) ᓴᖅᑭᑦᓯᓂᖅ ᓇᓗᓇᐃᖅᓯᔾᔪᑎᓂᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᓴᖅᑭᑦᑎᔪᓐᓇᖅᐳᑦ ᓇᓗᓇᐃᖅᓯᔾᔪᑎᓂᒃ ᐃᓱᒪᒋᔭᖏᓐᓂᒃ ᐊᑑᑎᖃᕋᓱᒋᓗᒋᑦ ᐅᖃᐅᑕᐅᔪᒧᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
(6) ᑭᒡᓕᓕᐅᕆᓂᖅ ᐅᕝᕙᓗ ᐱᖃᓯᐅᔾᔨᖏᓐᓂᖅ ᑎᑎᖅᑲᓂᒃ ᐅᕝᕙᓗ ᐅᖃᐅᑕᐅᔪᓂᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᑭᒡᓕᓕᐅᕆᔪᓐᓇᖅᐳᑦ ᐅᕝᕙᓗ ᐱᖃᓯᐅᔾᔨᖏᓪᓗᑎᒃ ᑐᓂᔭᐅᓚᐅᖅᑐᓂᒃ ᑎᑎᖅᑲᓂᒃ, ᐊᓯᖏᓐᓂᒡᓘᓐᓃᑦ ᑎᑎᖅᑲᓂᒃ, ᐅᕝᕙᓗ ᐅᖃᐅᓯᒃᑯᑦ ᑐᓂᔭᐅᓚᐅᖅᑐᓂᒃ ᐊᑑᑎᖃᖏᑦᑐᓂᒃ ᐅᕝᕙᓗ ᐃᑲᔪᖅᓯᓂᖃᕋᔭᖏᑦᑐᓂᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
(7) ᐱᒻᒪᕆᐅᓂᖓ ᐃᓄᐃᑦ ᖃᐅᔨᒪᔭᑐᖃᖓᑦ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᐊᒻᒪ ᑕᖏᖃᖅᑎᑦᓯᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐊᑐᕐᓂᖓ ᐱᓪᓗᒍ ᐃᓱᒪᒃᓴᖅᓯᐅᕈᑕᐅᔪᒧᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
(8) ᐊᐱᖅᓱᕐᓇᖅ ᐊᒻᒪ ᑭᐅᔭᐅᓐᓇᕐᒧᑦ ᐱᕕᖃᖅᑎᑦᓯᓂᖅ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᕕᖃᖅᑎᑦᓯᔭᕆᐊᖃᖅᐳᑦ ᐊᐱᖅᓱᕈᓐᓇᕐᓗᑎᒃ ᐊᒻᒪ ᑭᐅᔭᐅᔪᓐᓇᕐᓗᑎᒃ ᐊᑐᓂ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᐊᒻᒪ ᑕᖅᑲᒃᑯᐊ ᐱᕕᖃᖅᑎᓪᓗᒋᑦ ᑭᐅᔪᓐᓇᕐᓂᐊᕐᒪᑕ ᐊᒻᒪ ᐊᐱᖅᓱᕈᓐᓇᕐᓂᐊᕐᒪᑕ ᐃᓚᐅᔪᓄᑦ ᐊᒻᒪᓗ ᑲᑎᒪᔨᐅᔪᓄᑦ.
(9) ᐊᐱᖅᓱᕐᓂᖏᑦ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ
ᓇᓕᐊᑐᐃᓐᓇᖅ ᑲᑎᒪᔨᐅᖃᑕᐅᔪᖅ ᐊᐱᖅᓱᕈᓐᓇᖅᐳᖅ ᐱᔪᒪᒍᓂ ᐃᓚᐅᔪᒧᑦ ᐅᕝᕙᓗ ᐅᖃᓪᓚᒋᐊᖅᑐᖅᓯᒪᔪᒧᑦ, ᓴᖅᑭᓯᒪᔪᓂᒡᓗ ᐅᖃᐅᓯᒃᑯᑦ ᓴᖅᑭᑕᐅᔪᓄᑦ, ᑎᑎᖅᑲᑎᒍᑦ, ᐅᕝᕙᓗ ᓂᐱᓕᐅᖅᑕᐅᓯᒪᔪᑎᒍᑦ, ᐅᕝᕙᓗ ᐃᓱᒪᒋᔭᐅᔪᓂᑦ, ᖃᐅᔨᒪᔭᐅᔪᓂᑦ ᐅᕝᕙᓗ ᑐᓴᒐᒃᓴᓂᑦ ᓴᖅᑭᑕᐅᔪᓂᑦ ᑭᓇᑐᐃᓐᓇᕐᒧᑦ, ᐊᑑᑎᖃᖅᑎᓪᓗᒍ ᐅᖃᐅᑕᐅᔪᒧᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
(10) ᐊᐱᖅᑯᑎᖏᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑭᖑᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖅᑎᓪᓗᒋᑦ
ᑐᓴᖅᑎᑦᓯᓚᐅᖅᑎᓪᓗᒋᑦ ᐃᓚᐅᔪᓂᒃ, ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᑎᓕᓯᔪᓐᓇᖅᐳᑦ ᐃᓚᐅᔪᒥᒃ ᓇᓕᐊᖕᓂᑐᐃᓐᓇᖅ ᐅᕝᕙᓗ ᐅᖃᓪᓚᒋᐊᖅᑐᖅᓯᒪᔪᒥᒃ ᑭᐅᖁᓗᒍ ᐊᐱᖅᑯᑕᐅᔪᖅ ᐊᑑᑎᖃᖅᑐᖅ ᐅᕝᕙᓗ ᐊᑑᑎᖃᖅᑐᓂᒃ ᑐᓴᒐᒃᓴᓂᒃ ᑐᓂᓯᖁᓪᓗᒍ ᐃᓗᐊᓂ ᖃᐅᔨᒪᓂᕆᔭᖓᑕ ᐅᕝᕙᓗ ᐱᔪᓐᓇᖅᑕᖓᑕ, ᑭᖑᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓂᖃᓚᐅᖅᑎᓪᓗᒋᑦ. ᒪᓕᒐᐅᑉ ᐃᓚᕈᑎᖓ 6.3 ᑎᑭᓪᓗᒍ 6.5 ᐊᑐᖅᑕᐅᔭᕆᐊᖃᖅᐳᖅ ᑭᒡᒍᓯᕐᒥᒃ ᑭᐅᖁᓪᓗᒍ. ᑲᑎᒪᔨᐅᔪᑦ ᑐᓂᓯᔭᕆᐊᖃᖅᐳᑦ ᐊᔾᔨᖏᓐᓂᒃ ᑎᑎᕋᖅᓯᒪᔪᑦ ᓇᓕᐊᖕᓄᑐᐃᓐᓇᖅ ᐃᓚᐅᔪᓄᑦ ᑐᒃᓯᕋᖅᑐᓄᑦ ᐱᔪᒪᓗᑎᒃ. ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐃᒪᐃᑦᑕᕆᐊᖃᖅᐳᑦ, ᐃᓚᒋᓗᒍ, ᐃᓕᔭᐃᓐᓇᕆᓗᒋᑦ ᑐᓴᒐᒃᓴᐅᔪᑦ ᑎᑎᖅᑲᖁᑎᖏᓐᓄᑦ ᓈᓚᒃᑎᐅᓪᓗᑎᒃ ᑲᑎᒪᓂᐅᑉ.
(11) ᓄᖅᑲᕐᓂᖏᑦ ᐊᒻᒪ ᒪᑐᐃᒃᑲᓐᓂᕐᓂᖏᑦ ᓈᓚᒃᑎᐅᓪᓗᑎᒃ ᑲᑎᒪᓃᑦ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᓄᖅᑲᖅᑎᑦᓯᑲᐃᓐᓇᕈᓐᓇᖅᐳᑦ ᓈᓚᒃᑎᐅᓪᓗᑎᒃ ᑲᑎᒪᓂᖓᓐᓂᑦ ᖃᑯᑎᒃᑯᑦ. ᒪᑐᐃᒃᑲᓐᓂᕈᓐᓇᕐᓂᐊᕐᓗᓂ, ᐱᕕᒃᓴᖃᖅᑎᑦᓯᑦᓯᐊᕐᓗᑎᒃ ᑐᓴᖅᑎᑦᓯᓚᐅᖅᑎᓪᓗᒋᑦ − ᐱᖃᓯᐅᑎᓗᒍ ᐅᖃᐅᓯᒃᑯᑦ ᑐᓴᖅᑎᑦᓯᓚᐅᖅᑎᓪᓗᒋᑦ ᐃᓄᖕᓂᒃ − ᐃᓚᐅᓂᐊᖅᑐᓄᑦ ᐊᒻᒪ ᑭᓇᒃᑯᑐᐃᓐᓇᕐᓄᑦ, ᐱᔪᒪᓗᑎᒃ ᑎᑎᕋᖅᓯᒪᒃᑲᓐᓂᖅᑐᓂᒃ ᐅᕝᕙᓗ ᐅᖃᐅᑕᐅᒃᓂᐊᖅᑐᓂᒃ ᑐᓂᔭᐅᔪᒪᓗᑎᒃ.
8.3 ᐃᓚᐅᓂᖏᑦ ᐃᓐᓇᐃᑦ
ᐃᓕᓴᕆᓪᓗᒋᑦ ᐱᓕᕆᖃᑕᐅᓂᖏᑦ ᐃᓐᓇᐃᑦ ᐃᓄᐃᑦ ᐃᓅᓯᖏᓐᓂ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᕕᖃᖅᑎᑦᓯᔭᕆᐊᖃᖅᐳᑦ ᐃᓐᓇᕐᓂᒃ ᐅᖃᓪᓚᒍᓐᓇᖅᑎᑦᓯᓗᑎᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ. ᑲᑎᒪᔨᐅᔪᑦ ᐱᕕᖃᖅᑎᑦᓯᒐᓱᐊᕆᐊᖃᖅᐳᑦ ᐊᒃᓱᕈᕐᓗᑎᒃ ᐃᓂᖃᕐᓂᐊᕐᒪᑕ ᐃᓐᓇᐃᑦ, ᐃᒃᓯᕙᐅᑕᒃᓴᖓᓂᒃ, ᒪᓕᒡᓗᒋᑦ ᐅᖃᓪᓚᒡᕕᒋᓂᐊᖅᑕᖓ ᓵᖓᓄᐊᕐᓗᓂ, ᐊᒻᒪ ᐱᕕᖃᖅᑎᑕᐅᓗᑎᒃ ᓴᖅᑭᑦᓯᔪᓐᓇᕐᓂᐊᕐᒪᑕ ᐱᔾᔪᑎᓂᒃ ᐊᒻᒪᓂᓪᓕᐅᑎᖃᕈᓐᓇᕐᓗᑎᒃ ᐊᒻᒪ ᑭᐅᔪᓐᓇᕐᓗᑎᒃ ᐊᐱᖅᑯᑕᐅᔪᓄᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
8.4 ᐃᓚᐅᓂᖓ ᒪᓕᒐᕐᓂᐊᖅᑎᐅᑉ
(1) ᐃᒪᐃᑉᐸᑦ, ᐃᓱᒪᐸᒃᐸᑕ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ , ᑕᖅᑲᒃᑯᓄᖓ ᐊᑲᐅᓛᖑᒃᐸᑦ ᐱᓕᕆᔭᕆᐊᒃᓴᖅ, ᑲᑎᒪᔨᐅᔪᑦ ᐃᖅᑲᓇᐃᔭᖅᑎᑖᕐᓗᑎᒃ ᒪᓕᒐᕐᓂᐊᖅᑎᒥᒃ, ᐅᕝᕙᓗ ᑎᓕᓯᓗᑎᒃ ᓇᖕᒥᓂᖅ ᒪᓕᒐᕐᓂᐊᖅᑎᖓᓐᓂᒃ, ᐊᐃᕙᔨᐅᓂᐊᖅᑐᒥᒃ, ᓇᓕᐊᑐᐃᓐᓇᕐᒧᑦ ᐊᐱᖅᑯᑕᐅᔪᒧᑦ ᓵᖓᓂ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ.
(2) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ, ᐃᓚᒋᓗᒍ, ᑎᓕᓯᔪᓐᓇᖅᐳᑦ ᓇᖕᒥᓂᖅ ᒪᓕᒐᕐᓂᐊᖅᑎᖓᓐᓂᒃ, ᐃᒪᐃᓕᐅᖁᓪᓗᒍ, ᐊᓯᖏᓐᓄᓪᓗ ᐱᓕᕆᖁᓪᓗᒍ:
(a) ᐅᖃᐅᔾᔨᒋᐊᕐᓗᓂ ᑲᑎᒪᔨᓄᑦ ᒪᓕᒐᐃᑦ ᐱᓪᓗᒋᑦ ᐊᒻᒪ ᐱᐅᓯᐅᔭᕆᐊᖃᖅᑐᑦ ᒪᓕᒐᖏᓐᓄᑦ, ᐊᒻᒪᐊᓯᖏᓐᓄᑦ ᐱᔾᔪᑎᐅᔪᓄᑦ ᑲᑎᒪᔨᐅᔪᓄᑦ ᐊᑐᖅᑕᐅᔭᕆᐊᖃᖅᑐᓄᑦ; ᐊᒻᒪᓗ
(b) ᐊᐱᖅᓱᖃᑦᑕᕐᓗᓂ ᐃᓚᐅᔪᒥᒃ ᓇᓕᖕᓂᑐᐃᓐᓇᖅ ᐅᕝᕙᓗ ᑲᑎᒪᔨᓄᑦ ᑎᒃᑯᐊᖅᑕᐅᓯᒪᔪᓄᑦ ᐅᕝᕙᓗ ᐊᓯᖏᓐᓄᑦ ᐅᖃᓪᓚᒋᐊᖅᑐᖅᓯᒪᔪᓄᑦ.
8.5 ᑲᑎᒪᖃᑕᐅᓂᖏᑦ ᐃᓚᐅᔪᑦ
ᐃᓚᐅᔪᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ ᐱᔪᒪᒍᑎᒃ ᐃᒪᐃᑦᑐᓐᓇᖅᐳᑦ:
(a) ᐊᖏᕐᓗᒍ ᑭᒡᒐᖅᑐᖅᑎᖓᑦ ᑭᒡᒐᖅᑐᐃᓂᐊᕐᓗᓂ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ, ᐅᕝᕙᓗ ᓇᖕᒥᓂᖅ ᑭᒡᒐᖅᑐᕐᓗᓂ;
(b) ᐅᖃᓪᓚᒋᐊᖅᑐᕐᓗᓂ;
(c) ᖃᐃᖅᑯᔨᓗᓂ ᐅᖃᓪᓚᒋᐊᖅᑐᕐᓂᐊᖅᑐᒥᒃ, ᐊᒻᒪ ᐊᐱᖅᓱᖅᑕᐅᔪᓐᓇᕐᓗᓂ ᐊᓯᖏᓐᓄᑦ ᐃᓚᐅᔪᓄᑦ, ᐊᒻᒪᓗ ᐱᖃᓯᐅᑎᓪᓗᒋᑦ ᑲᑎᒪᔨᑦ ᐅᖃᓪᓚᒃᑎᒋᔭᖏᑦ;
(d) ᐊᐱᖅᓱᖃᑦᑕᕐᓗᑎᒃ ᐊᓯᖏᓐᓂᒃᐃᓚᐅᔪᓂᒃ ᐅᕝᕙᓗ ᑐᓴᕈᒪᓂᖃᖅᑐᓂᒃ ᑭᓇᒃᑯᑐᐃᓐᓇᕐᓂᒃ;
(e) ᐊᐱᖅᓱᖅᑕᐅᖃᑦᑕᕐᓗᓂ ᑲᑎᒪᔨᓄᑦ, ᐊᒻᒪ ᐊᓯᖏᓐᓄᑦ ᐃᓚᐅᔪᓄᑦ; ᐊᒻᒪᓗ
(f) ᑐᓂᓯᖃᑦᑕᕐᓗᓂ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᑎᑎᖅᑲᓂᒃ, ᐱᖃᓯᐅᑎᓪᓗᒋᑦ ᑭᖑᓪᓕᖅᐹᕐᒥ ᐊᐃᕙᐅᑎᒋᔭᖏᑦ.
8.6 ᐃᓚᐅᓂᖏᑦ ᑐᓴᕈᒪᓂᖃᖅᑐᑦ ᑭᓇᒃᑯᑐᐃᓐᓇᐃᑦ
ᑐᓴᕈᒪᓂᖃᖅᑐᑦ ᑭᓇᒃᑯᑐᐃᓐᓇᐃᑦ ᐃᓚᐅᔭᕆᐊᖃᖅᐳᑦ ᓈᓚᒃᑎᐅᓗᑎᒃ ᑲᑎᒪᓂᐊᖅᑎᓪᓗᒋᑦ ᒪᓕᒐᖏᓐᓂᒃ ᐱᓕᕆᐊᖃᖅᑎᓪᓗᒋᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ .
8.7 ᐃᓚᐅᓂᖏᑦ ᐅᖃᐅᓪᓚᒋᐊᖅᑐᖅᓯᒪᔪᑦ
(1) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᔪᒪᒍᑎᒃ ᖃᐃᖅᑯᔨᔪᓐᓇᖅᐳᑦ ᑭᓇᑐᐃᓐᓇᒥᒃ, ᑭᑭᓪᓗᒍ ᒥᓂᔅᑕᕆᔭᐅᔪᖅ ᒐᕙᒪᒃᑯᓐᓄᑦ;
(a) ᐃᓚᐅᓗᓂ ᐊᒻᒪ ᐅᖃᓪᓚᒡᓗᓂ ᐅᖃᐅᓯᒃᑯᑦ ᐅᕝᕙᓗ ᐅᐊᔭᒨᖅᑐᒃᑯᑦ ᐊᑐᕐᓗᑎᒃ ᓈᓚᕐᒃᑎᐅᑎᓪᓗᒋᑦ; ᐊᒻᒪ
(b) ᓴᕿᑦᓯᓗᓂ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ ᑎᑎᕋᖅᓯᒪᔪᓂᒃ ᐊᒻᒪ ᐊᓯᖏᓐᓂᒃ ᓇᓗᓇᐃᖅᑕᐅᓯᒪᒧᓂᒃ ᐃᓗᐊᓂ ᖃᐃᖅᑯᔨᔾᔪᑎᐅᑉ.
(2) ᐃᓚᐅᔪᖅ ᓇᓕᐊᑐᐃᓐᓇᖅ ᑐᒃᓯᕋᐅᑎᓕᐅᕈᓐᓇᖅᑐᖅ ᑲᑎᒪᔨᓄᑦ ᖃᐃᖅᑯᔨᔾᔪᑎᖃᖁᓪᓗᒋᑦ, ᑕᐃᓐᓇ ᐅᐸᒋᐊᖅᑐᖁᓪᓗᒍ ᐅᖃᓪᓚᒋᐊᖅᑐᕐᓂᐊᖅᑐᖅ ᓈᓚᒃᑎᐅᓗᑎᑭ ᑲᑎᒪᑎᓪᓗᒋᑦ. ᑐᒃᓯᕋᐅᑎᔪᖅ ᓴᖅᑭᑕᐅᓯᒪᔭᕆᐊᖃᖅᑐᖅ ᐅᓄᖏᓐᓂᖅᐹᓗᒍ ᐱᓇᓱᐊᕈᓰᒃ ᒪᕐᕉᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ, ᐊᒻᒪ ᐱᖃᓯᐅᔾᔨᓯᒪᓗᓂ ᐊᑎᖓᓂᒃ ᐊᒻᒪ ᑐᕌᕈᑎᖓᓂᒃ ᑖᑦᓱᒪ, ᐊᒻᒪ ᐱᔾᔪᑎᖓᓂᒃ ᖃᓄᐃᒻᒪᑦ ᐅᖃᓪᓚᒋᐊᖅᑐᖁᔭᐅᖕᒪᖔᑦ ᐊᒻᒪ ᖃᓄᐃᒻᒪᑦ ᖃᐃᖅᑯᔭᐅᖕᒪᖔᑦ ᓇᓗᓇᐃᖅᓯᓯᒪᓗᓂ.
(3) ᐅᖃᓪᓚᒋᐊᖅᑐᖅᓯᒪᔪᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ ᐊᐱᖅᓱᖅᑕᐅᔪᓐᓇᖅᐳᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐊᒻᒪ ᐊᓯᖏᓐᓄᑦ ᐃᓚᐅᔪᓄᑦ.
(4) ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐱᓕᕆᔭᕆᐊᖃᖅᐳᑦ ᐊᑐᐃᓐᓇᐅᑎᑦᓯᓗᑎᒃ ᓯᕗᕐᖓᒍᑦ ᐅᖃᓪᓚᒋᐊᖅᑐᕐᓂᐊᖅᑐᒧᑦ, ᑎᑎᕋᖅᓯᒪᔪᓂᒃ ᑐᓂᔭᐅᓯᒪᔪᓂᒃ ᐃᓚᐅᓯᒪᔪᓄᑦ, ᐅᕝᕙᓗ ᐱᓯᒪᔭᖏᓐᓂᒃ, ᐊᑑᑎᖃᖅᑐᓂᒃ ᐅᖃᓪᓚᒋᐊᖅᑐᖅᓯᒪᔫᑉ ᐅᖃᐅᓯᖏᓐᓄᑦ.
(5) ᑕᐃᒪᓕ ᐅᖃᓪᓚᖕᓂᐊᖅᑐᖅ ᐃᓅᒃᐸᑦ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓵᔨᖃᖅᑎᑦᓯᒐᓱᐊᕆᐊᖃᖅᐳᑦ ᐊᒻᒪ/ᐅᕝᕙᓗ ᓂᐱᓕᐅᖅᑕᐅᓯᒪᔪᑦ ᐊᔾᔨᖏᑦ ᐊᑑᑎᖃᖅᑐᒧᑦ ᑎᑎᕋᖅᓯᒪᔪᓄᑦ ᐅᕝᕙᓗ ᓇᐃᓈᖅᑐᓄᑦ ᑎᑎᕋᖅᓯᒪᔭᖏᓐᓄᑦ.
8.8 ᐃᓚᐅᓂᖏᑦ ᑕᖅᑲᒃᑯᐊ ᑭᓇᒃᑯᑐᐃᓐᓇᐃᑦ
ᒪᓕᒡᓗᒋᑦ ᒪᓕᒐᐅᑉ ᐃᓚᕈᓯᖏᑦ ᓈᓴᐅᑎᖓ 1.5(2) ᐊᒻᒪ 3.3, ᑕᖅᑲᒃᑯᐊ ᐱᕕᒃᓴᖃᖅᑎᑕᐅᔭᕆᐊᖃᖅᐳᑦ ᐊᑐᓂ ᓈᓚᒃᑎᐅᓗᑎᒃ ᑲᑎᒪᓂᕐᒥ ᑐᓂᓯᔪᓐᓇᕐᓗᑎᒃ ᑐᓴᒐᒃᓴᓂᒃ ᐊᒻᒪ ᓂᓪᓕᕈᓐᓇᖅᑎᑕᐅᓗᑎᒃ, ᐊᒻᒪ ᐃᓚᐅᑎᑕᐅᓗᑎᒃ ᑐᓴᐅᒪᑦᓯᐊᕐᓗᑎᒃ ᐊᐱᖅᓱᖃᑦᑕᕈᓐᓇᕐᓂᐊᕐᒪᑕ ᐊᒻᒪ ᑭᐅᔭᐅᖃᑦᑕᕈᓐᓇᕐᓂᐊᕐᒪᑕ.
ᒪᓕᒐᖅ 9: ᓂᐱᓕᐅᕆᓂᖅ ᓈᓚᒃᑎᐅᓗᑎᒃ ᑲᑎᒪᔾᔪᑎᕕᓂᕐᓂᒃ
9.1 ᐃᓗᓕᖏᑦ ᓂᐱᓕᐅᕆᓂᕐᒧᑦ ᓈᓚᒃᑎᐅᓗᑎᒃ ᑲᑎᒪᔾᔪᑎᕕᓂᕐᓂᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᓄᐊᑦᓯᖃᑦᑕᕆᐊᖃᖅᐳᑦ ᐊᑐᓂ ᓈᓚᒃᑎᐅᓗᑎᒃ ᑲᑎᒪᓚᐅᖅᑎᓪᓗᒋᑦ ᐃᓗᓕᖃᕐᓗᑎᒃ ᐅᑯᓂᖓ:
(a) ᐃᓘᓐᓇᖏᓐᓂᒃ ᖃᐅᔨᒃᑲᐃᔾᔪᑎᓂᒃ ᑐᓴᖅᑎᑦᓯᔾᔪᑎᓂᒃ ᓯᕗᕐᖓᒍᑦ ᓈᓚᒃᑎᐅᓗᑎᒃ ᑲᑎᒪᓚᐅᖏᓐᓂᖏᓐᓂ ᑲᑎᒪᓂᒃᓴᒧᑦ;
(b) ᓇᓕᐊᑐᐃᓐᓇᖅ ᑕᕐᕆᔭᓕᐊᕆᓯᒪᔪᖅ ᐅᕝᕙᓗ ᓂᐱᓕᐅᖅᓯᒪᔪᖅ, ᐅᕝᕙᓗ ᑎᑎᕋᖅᓯᒪᔪᑦ ᖃᓄᑐᐃᓐᓇᖅ ᓯᕗᓂᐊᖑᑦ ᓈᓚᒃᑎᐅᓗᑎᒃ ᑲᑎᒪᔾᔪᑎᕕᓂᕐᓂᒃ;
(c) ᖃᐅᔨᒃᑲᐃᔾᔪᑎᑦ ᑐᓴᖅᑎᑦᓯᔾᔪᑎᑦ ᓈᓚᒃᑎᐅᓗᑎᒃ ᑲᑎᒪᓂᒃᓴᒧᑦ;
(d) ᐃᓘᓐᓇᖏᑦ ᑎᑎᖃᖁᑎᒋᔭᐅᔪᑦ ᐊᒻᒪ ᐊᓯᖏᑦ ᐱᓯᒪᔭᐅᔪᑦ, ᐱᖃᓯᐅᑎᓯᒪᓪᓗᒋᑦ ᑎᑎᕋᖅᓯᒪᔪᑦ ᐊᒻᒪ ᓂᐱᓕᐅᖅᓯᒪᔪᑦ ᑐᓐᓂᖅᑯᑎᒋᔭᐅᓯᒪᔪᑦ, ᐊᒻᒪ ᐊᐱᖅᑯᑕᐅᓯᒪᔪᑦ ᐊᒻᒪᓗ ᑭᐅᔾᔪᑎᐅᔪᑦ, ᐃᓕᔭᐅᖁᓪᓗᒋᑦ ᓂᐱᓕᐅᖅᑕᐅᓗᑎᒃ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ;
(e) ᓇᓕᐊᑐᐃᓐᓇᖅ ᑕᕐᕆᔭᒐᓕᐊᕆᓯᒪᔪᖅ ᐅᕝᕙᓗ ᓂᐱᓕᐅᖅᓯᒪᔪᖅ ᐅᕝᓗ ᑎᑎᕋᖅᓯᒪᔪᖁᑎᖓᑦ ᓈᓚᒃᑎᐅᓪᓗᑎᒃ ᑲᑎᒪᔾᔪᑎᕕᓂᕐᓂ; ᐊᒻᒪᓗ
(f) ᑎᑎᕋᖅᓯᒪᔪᖁᑎᖏᑦ ᖃᐅᔨᔭᐅᓯᒪᔪᑦ ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐃᓗᐊᓂ, ᐅᕝᕙᓗ ᐱᔾᔪᑎᖃᖅᑐᓂᒃ, ᓈᓚᒃᑎᐅᓗᑎᒃ ᑲᑎᒪᓂᕐᒧᑦ.
9.2 ᐊᑐᐃᓐᓇᐅᑎᑦᓯᓂᖅ ᓂᐱᓕᐅᖅᓯᒪᔪᓂᒃ ᓈᓚᒃᑎᐅᓪᓗᑎᒃ ᑲᑎᒪᔾᔪᑎᕕᓂᕐᓂᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᑐᐃᓐᓇᕈᐃᔭᕆᐊᖃᖅᐳᖅ ᑕᖅᑲᒃᑯᓄᖓ ᖃᐅᔨᓴᖅᑕᐅᔪᓐᓇᕐᓂᐊᕐᒪᑦ, ᐊᖓᔪᖅᑳᖃᕐᕕᖕᒥ ᑎᑎᕋᕐᕕᖓᓐᓂ, ᐊᔾᔨᖓᓂᒃ ᓂᐱᓕᐅᖅᓯᒪᔪᑦ ᓈᓚᒃᑎᐅᓪᓗᑎᒃ ᑲᑎᒪᔾᔪᑎᕕᓂᕐᓂᒃ.
ᒪᓕᒐᖅ 10: ᓈᓚᒃᑎᐅᓪᓗᑎᒃ ᑲᑎᒪᓚᐅᖅᑎᓪᓗᒋᑦ ᐅᓂᒃᑳᓕᐊᖅ
10.1 ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᓴᓇᔭᕆᐊᖃᖅᐳᑦ ᓈᓚᒃᑎᐅᓪᓗᑎᒃ ᑲᑎᒪᔾᔪᑎᕕᓂᕐᓄᑦ ᐅᓂᒃᑳᓕᐊᓂᒃ
ᐱᕕᖃᖅᑎᑦᓯᑦᓯᐊᕐᓗᑎᒃ ᐱᔭᕇᓚᐅᖅᑎᓪᓗᒍ ᓈᓚᒃᑎᐅᓗᑎᒃ ᑲᑎᒪᓂᖅ, ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᓴᓇᔭᕆᐊᖃᖅᐳᑦ ᓈᓚᒃᑎᐅᓗᑎᒃ ᑲᑎᒪᓚᐅᖅᑎᓪᓗᒋᑦ ᐅᓂᒃᑳᓕᐊᓂᒃ, ᖃᓪᓗᓈᑎᑑᖓᓗᑎᒃ ᐊᒻᒪ ᐃᓄᒃᑎᑑᖓᓗᑎᒃ. ᐊᔾᔨᖏᓪᓗ ᐅᓂᒃᑳᓕᐊᑦ ᑐᓂᔭᐅᔭᕆᐊᖃᖅᐳᑦ ᐃᓚᒋᔭᐅᔪᓕᒫᓄᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ, ᐊᒻᒪ ᒥᓂᔅᑕᒧᑦ ᑲᒪᔪᒧᑦ ᐱᔾᔪᑕᐅᔪᒧᑦ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ.
10.2 ᐊᑐᐃᓐᓇᕈᖅᑕᐅᓂᖏᑦ ᓈᓚᒃᑎᐅᓗᑎᒃ ᑲᑎᒪᔾᔪᑎᕕᓂᕐᓄᑦ ᐅᓂᒃᑳᓕᐊᓂᒃ
ᑖᒃᑯᐊ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᑐᐃᓐᓇᕈᐃᔭᕆᐊᖃᖅᐳᑦ ᑕᖅᑲᒃᑯᐊ ᖃᐅᔨᓴᐃᔪᓐᓇᕐᓂᐊᕐᒪᑕ, ᐊᖓᔪᖅᑳᖃᕐᑯᖓᓐᓂ ᑎᑎᕋᕐᕕᖕᒥ, ᑎᑎᕋᖅᓯᒪᔪᓂᒃ ᐊᒻᒪ ᐃᓄᒃᑎᑑᖓᔪᓂᒃ ᓂᐱᓕᐅᖅᓯᒪᔪᓂᒃ ᓈᓚᒃᑎᐅᓗᑎᒃ ᑲᑎᒪᑎᓪᓗᒋᑦ ᐅᓂᒃᑲᓕᐊᓂᒃ. ᑲᑎᒪᔨᐅᔪᑦ ᑐᓂᓯᔭᕆᐊᖃᖅᐳᑦ ᐊᔾᔨᖏᓐᓂᒃ ᐅᓂᒃᑳᓕᐊᑦ ᐃᓚᐅᓚᐅᖅᑐᒧᑦ ᓇᓕᐊᖕᓄᑐᐃᓐᓇᖅ ᑐᒃᓯᕋᖅᑐᒧᑦ.
